ʻOku Totonu ke Fevahevaheʻaki
Hangē ko e kau tautehina tokolahi ʻa ia, ʻoku faikehekehe ʻaki pē honau taʻú ha māhina ʻe 18, ʻoku vahevahe ʻe Malilia mo Nikola P. ʻo Kūsikou ʻi Peluú ha ngaahi meʻa ʻokú na faitatau ai. ʻOkú na fakatou manako he sevisé (ceviche), ko ha meʻakai fakafonua ʻa Pelū, ko ha ika ʻoku fakavai ʻi he huhuʻaʻi laimi pe lēmani. ʻOkú na fakatou pehē ko e talanoa fakafolofola ʻokú na saiʻia taha aí ko e misi ʻa Līhaí. Pea kapau ko e “ ʻOtua ko e Tapuhā” ʻa e himi pē ʻe taha ʻi he tohi himí, te na fiefia ke toutou hiva ʻaki.
Fevahevaheʻaki ha Fakamoʻoniʻi ʻo e Lotú
Ko e taha ʻo e ngaahi meʻa ʻokú na fevahevaheʻaki aí ko ʻena fakamoʻoni ʻoku tali lotu ʻa e Tamai Hēvaní.
Ko e pehē ʻe Nīkolá ʻa ia ʻoku taʻu 10, “ ʻOku ou ʻilo ʻoku moʻoni ʻa e Siasí he ko e taimi ʻoku ou lotu aí, ʻokú Ne tali mai. ʻI he taimi ʻoku ou kole tokoni ai kiate Iá, ʻokú Ne tokoniʻi au.”
ʻOku fakamatala ʻa Nīkola ki ha taimi naʻe puke lahi ai hono kaungāmeʻá pea fakakaukau ʻa e kau toketaá ke fakapuna ia ki he kolomuʻa ʻo Peluú, ki Lima koeʻuhí he naʻe ʻikai ke nau ʻilo pe ko e hā e faitoʻo ʻe faí. Naʻá ne pehē, “Naʻe ʻikai ke u loto ke ne ʻalu he ko hoku kaungāmeʻa mamaé ia. Ne u kole ki he Tamai Hēvaní ke tāpuakiʻi ia. Naʻá Ne fanongo mai ki heʻeku lotú, peá Ne fakamoʻui ia.”
ʻOku pehē ʻe Malilia ʻa ia ʻoku taʻu 11, ko e ʻuhinga ʻoku saiʻia ai ʻi he talanoa ki he misi ʻa Līhaí he ko e taimi naʻe ʻi he fakapoʻulí ai ʻa Līhaí, naʻá ne lotu, “pea tali ia ʻe he ʻEikí.”
ʻOkú ne pehē, “ ʻOku ou ʻilo ʻoku moʻoni ʻa e Siasí he ʻoku ou ongoʻi ia ʻi hoku lotó ʻi he taimi ʻoku ou lotu aí. ʻOku fanongo mai ʻa e ʻOtuá kiate au, pea kapau te u kole ha faʻahinga meʻa, te Ne tali.”
Ko e taha ʻo e ngaahi ʻuhinga ʻokú na fakatou saiʻia ai ʻi he talanoa fakafolofola ko iá he naʻe talangofua ʻa Nīfai mo Samu.
Vahevahe ʻo e Ngaahi Faikehekehé ke Tokoni ki he Fāmilí
Neongo ʻa e ngaahi meʻa kotoa ʻoku faitatau ai e ongo tautēhina ko ʻení, ka ʻoku ʻi ai pē mo e ngaahi meʻa ʻokú na faikehekehe ai. ʻI he akó, ʻoku saiʻia ʻa Malilia he saienisí, ʻoku saiʻia ʻa Nīkola he fiká. ʻOku saiʻia ʻa Malilia he tauʻolungá, hivá mo e heka pasikalá. ʻOku saiʻia ʻa Nikola ia he volipoló mo e fanga monumanú.
ʻOku saiʻia ʻaupito ʻa Malilia he feimeʻatokoní. ʻOkú ne saiʻia he sio he ngaahi polokolama feimeʻatokoni he TV. ʻOku fakamoleki ʻe Nīkola ha taimi lahi ke ngāue tokoni ki he niʻihi kehé, pea ʻoku vave ki he faʻa fakamolemole.
ʻOku takitaha fakaʻaongaʻi ʻe he ongo tamaiki fefiné ni hona ngaahi ʻulungāanga fakatāutahá mo e ngaahi talēnití ke tokoni ki hona fāmilí.
ʻOku nofo ʻa Malilia mo Nīkola ʻi ʻolunga ʻi he ʻOtu Moʻunga ʻAnitesí mo ʻena faʻeé mo e tamaí, ongo tehina, mo ha tuongaʻane siʻisiʻí. Ko e taha ʻo e ngaahi meʻa mahuʻinga ʻoku fevahevaheʻaki ʻe he ongo tautehina ko ʻení, ko e ʻofa ʻokú na maʻu ki hona fāmilí. Pea hangē pē ko e holi ʻa Nīfai mo Samu ke talangofua mo tokoni ki hona fāmilí, ʻoku ʻamanaki ʻa Malilia mo Nīkola ʻe tāpuekina honau fāmilí ʻe he ngaahi faitatau mo e ngaahi faikehekehe ʻokú na maʻú.
Ngaahi Meʻa ʻOku Saiʻia ai ʻa Maliliá
-
Meʻakai ʻoku saiʻia taha aí: Sevise (Ceviche)
-
Potufolofola ʻoku saiʻia taha aí: Misi ʻa Līhaí (vakai, 1 Nīfai 8)
-
Himi ʻoku saiʻia taha aí: “ ʻE ʻOtua ko e Tapuhā” (Ngaahi Himí, fika 38)
-
Lēsoni ʻoku saiʻia taha aí: Saienisí
-
Ngaahi meʻa ʻoku saiʻia hono faí: Hiva, tauʻolunga, mo e heka pasikala
Ngaahi Meʻa ʻOku Saiʻia ai ʻa Nīkolá
-
Meʻakai ʻoku saiʻia taha aí: Sevise (Ceviche)
-
Folofola ʻoku saiʻia taha aí: Misi ʻa Līhaí (vakai, 1 Nīfai 8)
-
Himi ʻoku saiʻia taha aí: “ ʻE ʻOtua ko e Tapuhā” (Ngaahi Himí, fika 38)
-
Lēsoni ʻoku saiʻia taha ai he akó: Fiká
-
Ngaahi meʻa ʻoku saiʻia hono faí: Volipoló
ʻI he fute nai ʻe 11,000 (kilomita ʻe 3.4) ki ʻolunga mei he fukahi tahí, ʻoku tuʻu ai ʻa Kūsikou ko e taha ʻo e ngaahi kolo māʻolunga taha ʻi māmaní. ʻOku taʻu ʻe 900 tupu nai e motuʻa ʻo e koló, ʻo hoko ia ko e taha ʻo e ngaahi kolo motuʻa taha ʻi he ongo ʻAmeliká.
Ngaahi tā fakatātā ʻa Denise Kirby; faitā ʻa Adam C. Olson