ʻOku Mau Lea ʻia Kalaisi
ʻOku Lahi Feʻunga ʻEne ʻAloʻofá
Kuó u fāifeinga ʻo hangē ko e kakai tokolahi ʻi he konga lahi ʻo ʻeku moʻuí ke u ʻilo ʻa hoku mahuʻinga fakatāutahá. Kuó u fekuki ʻi he ngaahi taʻu lahi mo e ngaahi palopalema ʻo e fuʻu sinó pea ʻoku kau ia ʻi he ngaahi ongo taʻefakafiemālie ʻoku ou maʻú. Neongo kuó u holo ʻi he taimí ni peá u tauhi ʻa e founga moʻui leleí, ka ʻoku ʻi ai e taimi e niʻihi ʻoku ou kei feinga pē ke matoʻo atu e faʻahinga fakakaukau mo e ongo taʻefakafiemālie ko iá.
ʻI ha pongipongi ʻe taha naʻá ku fuʻu ongoʻi taʻeoliʻia ʻaupito peá u fakakaukau pe ko e hā nai e meʻa te ne fakaleleiʻi ʻa e meʻá ni. Ne u kamata lotu ʻo kole e tokoni ʻa e Tamai Hēvaní ke u ikunaʻi ʻa e ngaahi ongo taʻefeʻunga ko ʻení. Lolotonga ʻeku lotú, ne haʻu ʻa e folofola ko ʻení ki heʻeku fakakaukaú: “Kapau ʻoku ʻikai te mou maʻu ʻa e ʻamanakí kuo pau ke mou loto-foʻi; pea ʻoku tupu ʻa e loto-foʻí koeʻuhí ko e angahalá” (Molonai 10:22).
Ne hangē ʻa e angahalá ha foʻi lea mamafa, ʻo ʻikai ke u tokanga ai ki he foʻi fakakaukaú koeʻuhí naʻe ʻikai te u lava ʻo fakakaukauʻi ha faʻahinga meʻa kovi naʻá ku fai. Neongo ia, ne kei haʻu pē ʻa e foʻi fakakaukaú peá u lotu leva ʻo hangē ko e fakahinohino ʻa Molonaí, ke fakahā mai ʻe he Tamai Hēvaní ʻa hoku ngaahi vaivaí ke hoko ko ha meʻa ke u mālohi ai (vakai, ʻEta 12:27).
Ne u manatuʻi ha ngaahi meʻa ʻe tolu ne hoko ʻi he ʻaho ʻe ua kuo hilí ne ʻikai te u fakahā ai ʻa e faʻa kātakí ki heʻeku fānaú. Naʻá ku fakamuʻomuʻa ʻeku ngaahi ongó mo ʻeku ngaahi fie maʻú ʻi heʻeku fānaú pea naʻe ʻikai ke u tokanga ki heʻenau ngaahi ongó. Naʻe ʻikai ke u ongoʻi leleiʻia ai peá u fakakaukau ke u fai lelei ange. Ne u kole fakamolemole ki heʻeku fānaú peá u lotu ke fakamolemoleʻi au. ʻI he kamata pē ke u lotú naʻá ku ongoʻi ʻa e mahuʻi atu ʻa e ongo taʻefeʻungá pea lava ke u ongoʻi ʻa e nonga naʻe ʻikai ke u maʻú.
Ne hangē ne toki maama ʻeku fakakaukaú, ne toki mahino kiate au ʻa e tefitoʻi fakakaukau ne ʻikai ke u maʻu ʻi he ngaahi taʻu lahi ko ʻeni kuo hilí. Kapau ʻoku ʻi ai ha angahala ʻi heʻeku moʻuí kuo teʻeki ke fakaleleiʻi, neongo ʻene siʻisiʻí, ʻoku ou ʻoange ʻa e faingamālie ʻo Sētane ke ne tohoakiʻi au. ʻOkú ne ʻilo hoku ngaahi vaivaí, pea ʻokú ne ʻilo ʻa e ngaahi lea te ne “ueʻi hake aú” mo “taki au ki he fakaʻauhá” (vakai, T&F 10:22). Ko hono moʻoní, ʻoku ʻikai ke u fehiʻa ʻiate au, ka ʻoku fehiʻa ʻa Sētane ʻiate au pea te ne fakaʻaongaʻi ʻa e founga kotoa pē ʻe ala maʻú ke u tafoki ai mei he māmá.
Ka neongo ia, ko e taimi ʻoku ou fakatomala aí, ʻoku ou falala ki he mālohi ʻo Sīsū Kalaisí. Koeʻuhí ʻokú Ne ʻafioʻi e founga ke tokoni mai ai ʻi hoku ngaahi vaivaí (vakai, ʻAlamā 7:11–12), ʻoku langaki au ʻe Hono mālohí pea ngaohi au ke u mālohi ʻi ha ngaahi founga he ʻikai te u lava ʻo fai ʻiate au pē.
Naʻa mo e ʻAposetolo ko Paulá, ʻa ia ne lototoʻa ʻi hono malanga ʻaki ʻo e ongoongoleleí, naʻe hanga ʻe hono ngaahi vaivaí ʻo fakafaingataʻaʻiaʻi mo uesia ia. Ka ʻi he taimi naʻá ne lotu ai ke toʻo atu hono ngaahi vaivaí, naʻe tali ʻe he ʻEikí ʻo pehē, “Ko ʻeku tokoní ʻe lahi maʻau; he kuo fakakakato ʻeku mālohí ʻi hoʻo vaivaí.” Pea hoko atu ʻa e kalanga ʻa Paulá ʻo pehē, “Ko ia te u fiefia lahi mo pōlepole ai muʻa ʻi heʻeku ngaahi vaivaí, koeʻuhí ke nofoʻia au ʻe he mālohi ʻo Kalaisí” (2 Kolinitō 12:9).
Te u fai tatau ʻi heʻeku fakahoko hoku lelei tahá ke fakatomala pea talangofua ki he ngaahi fekaú koeʻuhí ke “nofoʻia au ʻe he mālohi ʻo Kalaisí” pea ke u fonu ʻi he melino mo e ʻofa.
Hangē pē ko e ʻAposetolo ko Paulá, te u fai hoku lelei tahá ke fakatomala pea talangofua ki he ngaahi fekaú koeʻuhí ke “nofoʻia au ʻe he mālohi ʻo Kalaisí.”
Ngaahi tā fakatātā ʻa Dilleen Marsh