Fakahaofi ʻo e Fanga Lami Naʻe Molé
ʻI he ngaahi taʻu kuo hilí ʻi he kamataʻanga ʻo e faʻahitaʻu failaú, naʻá ku maʻu mo hoku uaifí ha faingamālie ke fou atu ʻi he feituʻu fakaʻofoʻofa ko ia ko e Teleʻa Sitaá, ʻi Uaiōmingi, ʻAmelika. Ko ha pongipongi fakaʻofoʻofa moʻoni pea naʻe fakalata ʻete mamata ki he funga ʻo e fonuá mo e ngaahi meʻa ʻi aí.
ʻI heʻema fakaʻuli atu mo Sieki ki he loto Teleʻa Sitaá, naʻá ma fakalataʻia ʻi heʻema sio ki he fanga kiʻi tākanga sipí ne fio mai mo ha fanga kiʻi lamí. ʻOku siʻisiʻi ha meʻa ʻe fakaʻofoʻofa ange ʻi ha kiʻi lami. ʻI heʻema fakaʻuli atu ʻi he hala femoʻuekiná naʻá ma sio ki ha kiʻi lami ʻi he tuʻa ʻaá ʻo ofi ki he veʻe halá. Naʻá ne lele fefokiʻaki mei he ʻaá ko ʻene feinga ke hū ʻo foki ki he tākangá. Ne u mahalo ko e kiʻi lami ko ʻení naʻe siʻisiʻi feʻunga pē ke hū ʻi ha ava he ʻaá ka ko ʻeni ʻoku ʻikai lava ʻo toe foki ki loto.
Naʻá ku ʻilo fakapapau kapau naʻe ʻikai ke ma tuʻu ʻo fakahaofi e lamí, ʻe faifai pē ʻo hē atú ʻo aʻu ki hala pea ʻe lavea pe mate. Naʻá ku taʻofi e kaá peá u talaange kia Sieki mo e niʻihi he sea muí ne mau fonongá, “Tali heni; ʻe vave pē.”
Naʻá ku pehē pē ʻe au ʻi he siʻi ʻeku ʻilo ki he tauhi lamí, ʻe fiefia ʻa e kiʻi lami manavahē koʻení ke sio mai kiate au; he naʻe lelei pē ʻeku taumuʻá. Naʻá ku ʻi aí ke fakahaofi ia!
Ka naʻá ku loto-mamahi, he ne ilifia e lamí pea ʻikai houngaʻia ʻi heʻeku feinga ke fakahaofi iá. ʻI heʻeku ofi atu ki aí, ne siʻi lele ʻa e kiʻi lamí meiate au ʻi he vave tahá he veʻe ʻaá. ʻI he sio mai ʻa Sieki ki he meʻa naʻe hokó, naʻá ne hifo mai leva mei he kaá ke tokoni. Neongo ʻema toko uá, ka naʻe ʻikai ke ma lava ʻo puke ʻa e kiʻi lami veʻe oma ko ʻení.
ʻI he taimi ko ʻení ne hifo mai e ongomātuʻa ne heka he sea muí, ʻa ia ne maʻu ʻena oliʻiá heʻema taufetuli mo e kiʻi lamí, ʻo tokoni ʻi he feinga fakahaofí. ʻI heʻemau ngāue fakatahá naʻe faifai pea mau lava ʻo puke ʻa e kiʻi lamí ʻi he veʻe ʻaá. ʻI heʻeku kakapa hifo ke fua hake iá ʻi hoku vala maʻá, naʻe vave ʻeku fakatokangaʻi ʻa e namu faama ʻa e kiʻi lamí. Ko e taimi ʻeni naʻá ku fakakaukau ai pe ʻoku ʻaonga nai e meʻa naʻa mau faí.
Naʻe fute mo ʻaka ʻa e kiʻi lamí ʻaki e mālohi taha hono iví ʻi heʻemau toʻo hake ia ʻo fakafoki ki he loto ʻaá. Ka ʻi ha lau momeniti pē naʻá ne ʻilo ʻene faʻeé peá ne ʻunu ofi ʻaupito kiate ia ʻo ongoʻi malu ʻi hono tafaʻakí. Naʻe hoko atu ʻemau fonongá kuo kiʻi ʻuli mo manusinisi homau valá, ka naʻe ʻi ai e loto fiefia mo nonga ʻi he ʻilo naʻa mau fai ʻa e fili totonú .
Kuo tuʻo lahi ʻeku nofo ʻo fakakaukau ki he meʻá ni. Peá u fifili pe te tau fai nai ʻa e faʻahinga ngāue angaʻofa tatau ke fakahaofi hatau kaungāʻapi ʻoku māmālohi mo taʻehoungaʻia? ʻOku ou ʻamanaki pē ʻe lava! Naʻe fehuʻi ʻe he Fakamoʻuí, “ ʻIkai ʻoku lelei lahi ʻa e tangatá ʻi he sipí?” (Mātiu 12:12). ʻOku ʻi ai ʻa e fanga lami hē mo ʻi ha tuʻunga fakatuʻutāmaki ʻi he koló, uōtí mo e siteiki kotoa pē.
Fetongi ʻa e foʻi lea ko e ngāué ʻaki ʻa e fakahaofí ʻi he himi “Kuó U Fai ha Leleí?” ʻOku ou fakaafeʻi kimoutolu ke mou fakakaukau ke fakaʻaongaʻi ia ki hono fakahaofi ʻo e fanga lami heé:
[ʻOku ʻi ai e ngaahi faingamālie ke fai fakahaofi,
ʻOkú ta maʻu e faingamālie ko iá.
ʻOua naʻa tukuange ia peá ke pehē, “Te u toki feinga,”
Kae fai muʻa ha meʻa he ʻahó ni.1]
ʻE ngali taʻehoungaʻia, manavahē pe ʻikai tokanga mai hotau ngaahi kaungāʻapí ki honau fakahaofí. Pea mahalo ʻe fie maʻu ki heʻetau ngaahi feinga fakahaofí ha taimi lahi, feinga mālohi, ivi, poupou mo e tokoni ʻa e niʻihi kehé. Ka ʻe fakapaleʻi ʻa e feinga ko ʻení ʻaki ʻa e ngaahi tāpuaki taʻengata. Hangē ko ia kuo talaʻofa ʻe he ʻEikí, kapau te tau “ ʻomi ʻa e foʻi laumālie ʻe toko taha pē kiate [Ia], hono ʻikai ke lahi pehē fau ʻa [ʻetau] fiefiá fakataha mo ia ʻi he puleʻanga ʻo [ʻetau] Tamaí” (T&F 18:15).