Ngaahi Ongoongo Nounou Mei Māmaní
Maʻu atu ʻi he ʻInitanetí ʻa e Ngaahi Tohi Folofola ʻe Tolu ʻa e Siasí Kuo Fakatahaʻí ʻi he lea Faka-Siapaní
Kuo lava ʻeni ke maʻu ʻi he ʻinitanetí ʻi he lea faka-Siapaní ʻa e tohi folofola ʻe tolu kuo fakatahaʻí ki ha voliume ʻe taha, ʻa e Tohi ʻa Molomona, Tokāteline mo e Ngaahi Fuakavá mo e Mataʻitofe Mahuʻingá ʻi he scriptures.lds.org/jpn. ʻOku toe maʻu atu foki mo e ongó ʻi he saiti tatau pē pea ʻe vave pē hono maʻu atu ʻi he CD. ʻOku kau ʻi he saiti ki he folofolá e ngaahi futinouti, mape mo e ngaahi taá pea lava ʻa e tokotaha laukongá ʻo fakaʻilonga e ngaahi folofolá mo kumi ha ngaahi foʻi lea. ʻOku kau atu ʻi he saiti ʻo e ngaahi folofolá ha ngaahi lea fakafonua ʻe 19.
Tokoni ʻa e Maʻuʻanga Fakahinohino ʻa e Toʻu Tupú ki he Kau Faiakó
Ko e maʻuʻanga fakahinohino foʻou ʻoku fakalahi atu ki he tohi lēsoni ʻa e Lakanga Taulaʻeiki Faka-ʻĒloné mo e Kau Finemuí, Lakanga Taulaʻeiki Faka-ʻĒloné - Tohi Lēsoni Fika 3 mo e Kau Finemuí - Tohi Lēsoni Fika 3, ki he 2011. ʻOku ʻoatu ʻi he fakahinohino ki he kau faiakó ʻa e ngaahi lea fakamuimuitaha ʻi he konifelenisi lahí, ngaahi fehuʻi fealeaʻaki, ngaahi potufolofola kehe mo ha ngaahi fakakaukau ki he ʻekitivitī ʻa ia ʻoku fekauʻaki pea fakamanatu e ngaahi lēsoní, pea toe ʻuhingamālie ange mo e ngaahi meʻa ʻoku fehangahangai mo e toʻu tupu ʻo e ʻaho ní. ʻOku maʻu atu ʻa e ngaahi fakahinohinó ʻi ha ngaahi lea fakafonua ʻe 27 mei he senitā tufakiʻanga nāunau ʻa e Siasí pe ʻinitanetí ʻi he resourceguides.lds.org.
Lolotonga Kumi ʻe he Siasí ha Niʻihi ke Kau ki he Faiva ʻo e Fuakava Foʻoú
ʻI ha feinga ke tohoakiʻi ha niʻihi mei māmani ke kau mai ʻi he faiva ʻa e LDS Motion Picture Studio New Testament, kuo fokotuʻu ʻe he Siasí ha Uepi saiti ko e casting.lds.org, ʻa ia ʻe lava ke hū ki ai e kāingalotu ʻoku nau fie kau ki aí ʻo kole ke nau kau ko ha kau ʻeti faiva pe tokoni ʻi he ngāue ki he filimi mo e vitiō kotoa ʻa e Siasí, kau ai ʻa e ngāue ki he Fuakava Foʻoú. ʻE kamata hono fakafaivaʻí ʻi he faʻahitaʻu failau ʻo e 2011 ʻi Sōleki Siti, ʻIutā, ʻAmelika pea ʻe hokohoko atu ki he faʻahitaʻu māfaná.
Maʻu atu ʻa e DVD Foʻou ki hono Ako ʻo e T&F
ʻOku tokoni ha seti ko ha DVD ʻe fā ki hono ako ʻo e Tokāteline mo e Ngaahi Fuakavá pea mo e Hisitōlia ʻo e Siasí. ʻOku ʻi he setí ni ha ngaahi saati fengāueʻaki, ngaahi lea mei he kau palōfita mo e kau ʻaposetolo ʻo e ngaahi ʻaho kimui ní, tā valivali pea mo ha ngaahi ʻekitivitī ako. ʻOku ʻi ai ha ngaahi vitiō hangē ko e Tukufakaholó, Mountain of the Lord, mo e Joseph Smith: The Prophet of the Restoration, ʻa ia kuo ʻosi huluʻi ʻi he Fale Fakamanatu ʻo Siosefa Sāmitá talu mei Tīsema ʻo e 2005. ʻOku lava ʻo maʻu ʻa e Doctrine and Covenants and Church History Visual Resources DVDs ʻi he lea faka-Pilitāniá, Potukalí mo faka-Sipeini. Hū atu ʻi he ʻinitanetí ʻi he store.lds.org pe telefoni ki he 1-800-537-5971. Vakai ki he ngaahi senitā tufakiʻanga nāunau fakalotofonuá ke maʻu atu.