Ko e Vahehongofulu Kakató, Ko ha Tāpuaki Maʻongoʻonga
Naʻá ku papitaiso ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he mei hoko hoku taʻu 17, pea naʻe ʻi ai ʻa e holi ʻi hoku lotó ke u ʻalu ʻo ngāue fakafaifekau maʻá e ʻEikí. ʻI he maʻu hoku uiuiʻí hili ha ngaahi taʻu mei ai, pea naʻe ui au ke u alu mei Pelū ʻo malangaʻi ʻa e ongoongolelei kuo toe fakafoki maí ʻi Sōleki Siti.
ʻI heʻeku fakakaukau ki he tāpuaki lahi ʻo e ngāue fakafaifekaú, naʻe ʻi ai ha ngaahi meʻa ne u fakakaukau ki ai: ko e ʻū meʻa fakapepá, pāsipōtí, visá, valá pea mo e paʻangá foki. Naʻá ku ngāue ka naʻe ʻikai ke feʻunga ia. Naʻá ku hohaʻa! ʻI ha māhina ʻe taha mo e konga kimuʻa peá u ʻalú, naʻá ku ʻilo ko e konga siʻi pē ʻo e paʻangá kuo maʻú. Ko e meʻa pē naʻe lava ke u faí ko e tafoki ki he ʻEikí ʻi he lotu.
Koeʻuhí ko e ʻikai ke lahi ʻeku vahé, ko e vahehongofulu naʻá ku totongí naʻe siʻisiʻi fau. Ka ne toki mahino kiate au ʻoku ʻikai ke tokanga ʻa e ʻEikí ia ki he siʻisiʻi ʻo e meʻa naʻe totongí: ʻoku tokanga Ia pe ʻoku kakato hono totongi ʻa e pēseti ʻe 10 naʻá Ne kole maí. Naʻá ku maʻu e ongo fiemālie mo e ʻilo fakapapau kapau naʻe hokohoko atu ʻeku totongi vahehongofulú, ʻe foaki mai ʻe he ʻEikí ʻa e meʻa naʻá ku fie maʻú.
Naʻe kamata leva ke lelei e meʻa kotoa. Naʻe maʻu haʻaku ngāue kehe ʻe ua pea maʻu mo ʻeku ʻū meʻa fakapepa ne fie maʻú. Naʻe tokoni mai mo e kāingalotu ʻo e uōtí ki he ngaahi fie maʻu kehé, tautautefito ki he kau Fineʻofá. Pea naʻe foaki mai ʻe he kau mēmipa ʻo e siteikí ʻenau tokoní. Naʻá ku hū ki he ngāue fakafaifekaú kuo kakato ʻa e ngaahi fie maʻú.
ʻI heʻeku hoko ko ha faifekau taimi kakató, naʻá ku akoʻi ʻa e fono ʻo e vahehongofulú mo hono ngaahi talaʻofá (vakai Malakai 3:10) ʻi he loto-houngaʻia mo e fakamoʻoni.
Tā fakatātaaʻi ʻe Scott Greer