Fanga Kiʻi Meʻa Iiki mo Faingofuá

2011

Fēpueli 2011

Fanga Kiʻi Meʻa Iiki mo Faingofua

“ ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6).

Ko e Hivá ke Hā?

ʻE lava ke fakaafeʻi ʻe hono hivaʻi ʻo e ngaahi himí ʻa e Laumālié ki heʻetau ngaahi fakatahaʻanga faka-Siasí, ki hotau ʻapí, mo ʻetau moʻui fakaʻahó. Naʻe akonaki ʻa Palesiteni J. Lūpeni Kalake, ko e Siʻí (1871–1961) ʻo e Kau Palesitenisī ʻUluakí ʻo pehē, “ ʻOku tau ofi ange ki he ʻEikí ʻo fakafou ʻi he hivá ʻi ha toe founga ange tuku kehe pē ʻa e lotú.”¹

Kuo ʻomi ʻe he Siasí ha Uepi saiti ke maʻu mei ai e ngaahi himí (lava ʻo maʻu atu ʻi he lea faka-Pilitāniá, Falanisē, Potukali, mo faka-Sipeiní). ʻOku kau ʻi he Music.lds.org ha ngaahi fakahinohino ki hono tataki ʻo e hivá pea ki hono tā ʻo e ngaahi himí ʻo fakaʻaongaʻi ʻa e kīpōtí pea mo ha ngaahi fokotuʻu ki hono filifili ʻo e ngaahi himi ʻoku feʻunga mo e houalotu sākalamēnití.

ʻE lava ke lau, hiki hano tatau pea fanongo ki he ngaahi fasí mo e leá ʻi he Uepi saití, ʻa ia ʻe ʻaonga ʻaupito ki he kāingalotu ʻoku ʻikai ke ʻi ai haʻanau piano pe kīpōtí.

ʻE lava ke fakaʻaongaʻi ʻa e hivá ʻi ʻapi pea ʻi he lotú foki. Kuo faleʻi ʻe he Kau Palesitenisī ʻUluakí ke: “Akoʻi hoʻomou fānaú ke nau ʻofa mo manako ʻi he ngaahi himí. Mou hiva ʻaki ia ʻi he ʻaho Sāpaté, efiafi fakafāmili ʻi ʻapí, lolotonga ʻo e ako folofolá, pea ʻi he taimi lotú foki. Hiva ʻaki ia he taimi ʻoku mou ngāue pe vaʻinga aí, pea ʻi hoʻomou fefonongaʻakí.”² ʻE lava ke ʻomi ʻe he ngaahi himí ha laumālie ʻo e ʻofa mo e uouangataha ki he ʻapí.

Ngaahi Makamaile ʻi he Ngaahi Tokoni Fakauelofea ʻa e Siasí

ʻOku feinga e polokalama tokoni ʻofa fakaetangata ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke toe lelei ange ʻa e moʻui ʻa kinautolu ʻoku faingataʻaʻiá ʻaki hono foaki ʻo e meʻatokoni, vai maʻa, tokoni ki he matá, saliote sea teketeke, huhu maluʻi, mo e tokoni fakavavevave ki he ngaahi meʻa fakatuʻupakeé. Kuo fakalahi ʻa e polokalamá ʻi he ngaahi taʻu kuohilí mei hono kamata siʻisiʻí ʻo tokoniʻi ha lauimiliona ʻi he funga ʻo e māmaní.

Konga kimui ʻo e 1920: Kamata ʻo e ngaahi ngoue uelofeá. ʻOku tauhi e ngaahi fua ʻo e ngoué ʻi ha ngaahi fale tukuʻanga koloa.

1932: Fokotuʻu ʻa e fuofua fale faʻoʻanga meʻakai kapá.

1936: Fokotuʻu e Kōmiti Lahi ki he Uelofea ʻa e Siasí. Fokotuʻu ha vāhenga fakauelofea ʻe hongofulu ma fā ke tokangaʻi ʻa e polokalama uelofeá ʻi he tapa kehekehe ʻo māmaní.

1936: Fokotuʻu ʻa e fuofua senitā fakaʻofisiale maʻuʻanga ngāué.

1936–1940: Kamata e ngaahi fale ngāué, kau ai e fahiʻanga papa, fale fakamōmoaʻanga kiliʻi manu, fale ngaohiʻanga pasitā (pasta), faʻoʻanga kapa ika, mo e pīnatipata, ngaohiʻanga koa, mo ʻutu hina e huʻakaú.

1937: Langa e fuofua fale tukuʻanga koloa fakavahefonuá ʻi Sōleki Sití.

1938: Kamata ʻa e langa ʻi he Uelofea Sikueá, kau ai e fale tauhiʻanga uite mo ha fale tukuʻanga koloa.

1938: Huufi ʻa e fuofua falekoloa maʻamaʻa ʻa e Kautaha Teseletí ʻi Sōleki Siti.

1940: Kakato hono langa ʻo e Uelofea Sikueá.

1945: Fakauta ʻe he Siasí ha meʻakai, vala mo e ngaahi naunau lahi kehe ki he kāingalotu faingataʻaʻia ʻi ʻIulopé hili ʻa e Tau Lahi Hono II ʻa Māmaní.

1960: Fakakakato hono langa ʻo e fale faʻoʻanga meʻakai kapá mo e ngaohiʻanga huʻakau ʻi he Uelofea Sikueá.

1970 tupú: Fakalahi ʻe he Siasí ʻa e polokalama uelofeá ki Mekisikou, ʻIngilani pea mo e ʻotu motu e Pasifikí.

1973: Fokotuʻu ʻa e Ngaahi Tokoni ʻa e Siasí (ʻoku ʻiloa he taimí ni ko e Ngaahi Tokoni ʻa e Siasí ki he Fāmilí) ko e kautaha fakaʻofisiale ʻa e Siasí.

1976: Kamata ke fakalahi ʻe he Siasí ʻa e ngaahi fale tukuʻanga koloá ki he ngaahi feituʻu kotoa ʻo Kānata mo e ʻIunaiteti Siteití. Ne toe fanongonongo foki hono fakalahi ʻo e ngaahi fale faʻoʻanga meʻakai kapá mo e ngaahi fale fakatolonga meʻakaí.

1982: ʻAʻahi ʻa Ronald Reagan ko e palesiteni ʻo ʻAmeliká ki he Uelofea Sikueá.

1985: Kamata ke foaki ʻe he Siasí ha ngaahi vaitupu maʻa ki ʻAfilika, ʻa e kamataʻanga ʻo ha fakalahi fakaemāmani lahi ʻo e tokoni ʻofa fakaetangata ʻa e Siasí.

1990 tupú: Langa ʻo e Senitā Tokoni ʻOfa Fakaetangata ʻa e Kau Māʻoniʻoni ʻi he Ngaahi ʻAho Kimui Ní ke fakakalakalasi ʻa e valá mo e ngaahi nāunau kehé, kau ai e nāunau fakafaitoʻo ke fakauta ki he tapa kehekehe ʻo māmani ko e tokoni ki he masivá mo e ngaahi fakatamaki fakaenatulá.

2002: Kamata ʻe he Ngaahi Kautaha LDS Charities ʻa e Siasí ʻa e polokalama foaki saliote sea teketeké, vai maʻa mo e tokoni ke fakaake ʻa e fānau valevale ne fāʻeleʻi mai ʻoku ʻikai mānavá.

2003: Kau ʻa e Ngaahi Kautaha LDS Charities ʻa e Siasí ki he polokalama fakaemāmani lahi ki he mīselé pea tukupā ke foaki ha paʻanga ʻe taha miliona ʻAmelika ʻi he taʻu kotoa pē ke tokoni ki he polokalamá. Kamata foki ʻa e polokalama fakaemāmani lahi ki he faitoʻo ʻo e matá.

2010: Kamata ʻe he Ngaahi Kautaha LDS Charities ʻa e Siasí ha polokalama meʻakai ke fakalahi hono ngoueʻi ʻo e meʻakaí mo e meʻakai moʻui leleí ʻi he niʻihi ʻo e ngaahi fonua masiva taha ʻi māmaní. Tanupou ʻa e Bishopʻs Central Storehouse foʻou ʻi Sōleki Sití feʻunga hono lahí mo e sikuea fute ʻe 600,000 (56,000 m²).

Tā ʻo e Temipale Sā Paulo Palāsilá naʻe fai ʻe Matthew Reier; Ko e Tangata Samēlia Leleí, Faitaaʻi ʻe Joseph Brickey

Taupotu ki toʻohemá (mei ʻolunga): fakaʻaongaʻi e laʻitā ʻe tolú ʻi he angalelei ʻa e Church Welfare Department; faitā ʻa Welden C. Andersen; toʻohemá (mei ʻolunga): faitā ʻa Gerry Avant, Deseret News; faitā ʻa Howard M. Collett; laʻitaá © Rosa Pena