Toʻu Tupú
Vakaiʻi e Foʻi Vaʻé
ʻI hoku taʻu 15, ne mau ō mo hoku fāmilí mei homau ʻapi ʻi ʻAlesoná ʻo ʻeveʻeva mālōlō ki he feituʻu lotoloto ʻo e ʻIunaiteti Siteití. Naʻa mau fou atu ʻi ha ngaahi siteiti lahi kau ai ʻa Kenisisi, Tekisisi, ʻĀkenisoa, Mīsuli, mo ʻIlinoisi.
Ne fakalata ʻemau mālōloó. Naʻa mau ako ke feohi lelei ange lolotonga e fononga meʻalele lōloa ko ʻení mei he feituʻu ki he feituʻú.
ʻI heʻemau afe atu ki ha falekai ʻi ha efiafi ʻe taha, naʻa mau fiekaia. ʻI heʻemau hifo mei he vēní, naʻá ku maʻu ha ongo mālohi ke u sio ki he foʻi vaʻe mui ʻo ʻemau meʻalelé. Naʻá ku kamata lue ki he falekaí, ka naʻe ʻikai ke lava ʻo matoʻo atu e ongó meiate au. Naʻá ku fakasio ki mui peá u tuʻu. Naʻe haʻu ʻa e fakakaukau kiate au ke: “Vakaiʻi e vaʻe muí.” Naʻe ongo mālohi ʻaupito ʻo ʻikai ke u lava ʻo tukunoaʻi ia.
Naʻá ku lue ki he muiʻi vēní ʻo fanongo ki ha meʻa ʻoku sisī. Pea vakai, ne ava e vaʻe toʻomataʻu ʻi muí pea vave ʻene holó. Naʻá ku lele ke ui ʻeku tamaí he naʻe ʻosi hū ia ki he falekaí mo e toenga ʻo e fāmilí.
Naʻe ʻave heʻeku tamaí ʻa e vēní ki ha pausa ofi mai kimuʻa pea holo ʻaupito ʻa e foʻi vaʻé. Koeʻuhí ko e ʻikai ke maumau ʻa e foʻi vaʻé, naʻe vave pē mo maʻamaʻa hono ngāhí. Pea mau lava ʻo ngaohi ʻa e vaʻé ʻi ha ngaahi miniti siʻi pē kimuʻa pea tāpuni ʻa e fale ngaohiʻanga vaʻé. ʻOku ʻikai te u ʻilo pe ko e hā e meʻa ne mei hokó kapau naʻá ku tukunoaʻi pē ʻa e ueʻi ne u maʻú. Ka ʻoku ou ʻilo ne lava ʻo hoko lelei atu ʻemau fonongá pea mau malu koeʻuhí ko ʻeku fakafanongo ki he ueʻí.
Talu mei he meʻa ko ia ne hokó, mo hono fakapapauʻi mai maʻu pē kiate au e mālohi ʻo e Laumālie Māʻoniʻoní pea mo ʻetau monūʻia ʻi heʻetau hoko ko e kau mēmipa ʻo e Siasí ke maʻu ʻa e founga fetuʻutaki makehe ko iá. ʻOku ou houngaʻia ʻi he meʻa ne hokó, he te u manatuʻi maʻu pē ia, ʻo ne fakamanatu mai ʻoku ʻofa, tokanga mo tokangaʻi maʻu pē ʻe heʻetau Tamai ʻi Hēvaní ʻa ʻEne fānaú kotoa.