Na Sala Taumada ena Kena Sotavi na Veigauna se Bera Mai
Na lesoni ni veigauna sa oti … era vakarautaki keda ena noda sotava na bolebole ni veigauna sa bera mai
Keirau a tiko rawa kei watiqu ena soqo ni Mormon Miracle Pageant e Manti, Utah ena vulaikatakata oqo. Ena dua na bogi ni se bera na soqo, keirau a vosa vei ira era vakaitavi kina. Baleta ni ra sa rui lewe levu, keirau a vosa vei ira ena rua na soqoni. E sivia na 800 na tamata era vakaitavi ena soqo, ka rauta ni 570 vei ira era se bera ni yabaki 18. E dua na drau tale era qai curu mai ena yabaki oqo ka mani cakava kina na marama e qarava tiko eso tale na isulu me ikuri ni isulu sa rawa tiko. E veivakauqeti dina ni da raica na nodra tuvalaka vakamatau na nodra veiqaravi ka qaravi kina vakavinaka na veika matailalai kece sara.
A vakayacori na soqo oqo ena dua na yasa ni delana ena ruku ni Valetabu e Manti. E lewe 15,000 na tamata era a tiko rawa ena bogi keirau laki sarava kina na soqo. Sa dua na ka qoroi ni da raica na mataivalu cauravou kei na goneyalewa oqo ni ra ciqoma na vakasama me baleta na Vakalesuimai ena nodra vakatasuasuataka na nodra dui tikina ena yalodina kei na vakanuinui vaka o ya.
E dua na ka keirau dau taleitaka me keirau cakava ni keirau tiko voli e Manti sai koya me keirau lako ki na soqoni ni valetabu. E dua na yalo talei e dau tu ena veivaletabu makawa oqo ka a tara ena dua na solibula cecere ka ra vakayacora na ivuvu taumada ni Lotu.
E dua na gauna luluvu vei au na noqu dau tiko ena dua na soqoni ni valetabu ena Valetabu e Manti. E dau kauta lesu mai na veivakanananu cecere kau dau nanuma tu me baleta na Valetabu e Logan ni bera na kena vakavoui. Ni keirau dau lakova na soqoni ni valetabu, au dau rogoca ena veirumu yadua na nodra vosa na ivuvu taumada ni ra kaya: “Raica mada na veika keimami tara sara ga ena ligai keimami. E sega ni dua na neimami iyaya vakamisini, e sega na kabani se kabani lalai ni taravale e bau oka kina. E sega na kereni rairai vinaka me ra laveta na veivatu bibi. Keimami vakayacora na cakacaka oqo ena neimami kaukauwa sara ga vakaikeimami.”
Sa dua na isolisoli lagilagi era sa laiva koto mai vei keda na ivuvu taumada ena Yasayasa vaka-Sanpete.
A kaya ena dua na gauna o Ronald Reagan na Peresitedi e liu kei Amerika: “Au sega ni vinakata meu lesuva tale na veigauna sa sivi; Au vinakata meu lesuva tale na sala taumada ena kena sotavi na veigauna sa bera mai.”1 Se voqa tu ga vei au na nona ivakasala yalomatua. E koto e dua na ka me baleta na kena dau railesuvi na lesoni ni gauna sa oti era vakarautaki keda ena noda sotava na bolebole ni veigauna sa bera mai. Sa dua na iyaunibula lagilagi ni vakabauta, yaloqaqa kei na vuku era sa biuta koto mai vei keda na ivuvu ni Momani vakaturaga oqo me da yavutaki kina. Na balavu ga ni noqu bula na titobu cake ni noqu qoroi ira.
Na nodra ciqoma na kosipeli sa basika kina e dua na veisau e taucoko ena nodra bula. Era biuta tu mai na veika taucoko—na nodra itikotiko, na nodra bisinisi, na nodra iteitei, kei ira sara mada ga na lewe ni nodra matavuvale lomani—ka ra lako yani ki na dua na lekutu. E rairai veivakurabuitaki beka vei ira ni sa kacivaka o Brigham Young, “Oqo na … vanua.”2 E tu e matadra e dua na vanua dravuisiga vakaitamera, e sega sara ni bau laurai e dua na delana drokadroka, na vunikau, na veikau totoka me vaka era dau raica e vuqa vei ira na ivuvu taumada. Ena nodra vakabauta tudei na Kalou kei ira na nodra iliuliu, era a cakacaka na ivuvu taumada me ra bulia e dua na itikotiko totoka ena iyaloyalo ni veiulunivanua.
Era se qai tekivu marautaka na logavinaka ni bula eso na ivuvu ka ra sa oca tu ena gauna sa kacivi ira tale kina o Brigham Young me ra biuta na nodra veivale ka lako ki na tokalau, ki na ra, vualiku, kei na ceva me ra vakatawana na Bucabuca Levu. E vakaoqo na nodra sa lako yani mai na yasayasa vaka-Sanpete—e Fairview, Ephraim, Manti, Moroni, kei na Mt. Pleasant—me ra sa tauyavu.
Niu lesu mai ena veisiko ki na Yasayasa vaka-Sanpete au gadreva meu kila eso tale na ka me baleti ira na kena ivuvu taumada. Au mani nanuma meu laki vakasaqaqara mada ena Valenivola vou ni iTukutuku ni Lotu ka wilika eso na ka me baleta na kedra itukutuku.
A yaco ena yabaki 1849, ni se qai oti ga e rua na yabaki na nodra yaco mai ki na Bucabuca e Salt Lake, ena nona kaciva o Brigham Young, na dau tawavanua cecere ni Ra, e dua na ilawalawa yalododonu me ra lako ki na ceva ka tekivu tara vou tale na nodra veivale kei na itikotiko ena dua na vanua lala ka dravuisiga. Ni oti e dua na gauna lekaleka na nodra sa laki tiko e Sanpete, a veisiko yani ki na nodra itikotiko e Manti o Peresitedi Heber C. Kimball, na daunivakaasala vei Peresitedi Brigham Young, ka yalataka kina ni na tara ena delana ka raibaleta na qakilo, e dua na valetabu ka na vakayagataki kina na vatu mai na veiulunivanua ki na tokalau.
Sa oti e vica na yabaki mai na nona veisiko yani o Peresitedi Kimball ka sa tekivu me ra lomatarotaro na lewenivanua ni se bera ni dua na ka e caka me baleta na kena tara e dua na nodra valetabu. “E dodonu me dua na valetabu ena noda itikotiko oqo,” a kaya e dua vei ira. “Sa balavu sara na noda waraka tiko na veivakalougatataki oqo.” E kaya e dua tale, “Kevaka me na dua na noda valetabu, sa dodonu me da vakaogai keda ka tara.” Oqori sara ga na ka era a cakava.
A vakadaberi na vatuivakadei ena ika 14 ni siga ni Epereli 1879, rauta ni oti e 30 na yabaki ena nodra yaco mai ki na bucabuca e Sanpete. E vuqa na italanoa e rawa ni tukuni me baleta na nodra gugumatua na tamata cakacaka era a solia na nodra vinaka duadua ena kena tara na valetabu totoka. A kaya o Peresitedi Gordon B Hinckley ena vica vata na yabaki sa oti ena kena vakatabui tale na Valetabu e Manti: “Au sa taleva oti na veivale cecere e vuravura oqo, ia e sega ni dua vei ira meu vakila kina na veika au vakila ena noqu lako mai ki na veivale ivuvu oqo ni Kalou.” 3 E koto e dua na kedra isema voleka sara na matavuvale na Hinckley ki na Valetabu e Manti—a mai takali na bula nei tukai Sisita Marjorie Hinckley ena dua na mavoa ka a yaco vua ena gauna e tara tiko kina na Valetabu e Manti.
Me da kila vakavinaka cake na sala e rawa ni vakarautaka kina na veigauna sa sivi e dua na sala vinaka cake me da sotava kina na veigauna se bera mai au vinakata meu wasea e dua na italanoa mai na kena tara tiko na Valetabu e Manti. Au na qai wasea na veika sa vakavuvulitaka vei au me baleta na ivakavuvuli dina.
Era a lesi eso na matai ligamaqosa mai Nowei, ka ra a lako mai me mai vakaitikotiko e Manti, me ra tara na delavuvu ni valetabu. Era se bera vakadua ni bau tara e dua na delavuvu, ia era kenadau sara ena ta waqa. Era sega ni kila se me ra bulia vakacava e dua na delavuvu. Qai votu vei ira na kena vakasama: “Vakacava me tou tara ga e dua na waqa? Oti, me vaka ni dau qaqaco vinaka e dua na waqa e ta vakavinaka, kevaka tou na vakatoboicutaka na kena droini, sa na rawa kina e dua na delavuvu kaukauwa vinaka.” Sa tekivu sara me ratou navuca me ta e dua na waqa, ni sa oti eratou qai vakatoboicutaka na droini, sai koya oqori na delavuvu ni Valetabu e Manti.
Ena gauna oqo, era a vakayagataka na veilesoni eso mai na veigauna sa oti—na ivakavuvuli ni ta waqa—e vukei ira me ra sotava na bolebole oqo. A donu vinaka na nodratou vakasama, na ivakavuvuli vata ga eratou vakayagataka ena nodratou taya e dua na waqa kaukauwa vinaka ena rawa ni vakayagataki talega ena kena tara e dua na delavuvu kaukauwa vinaka. Me vaka beka oqo, e gadrevi vei rau ruarua me kakua ni turu. Na kena vinaka na iyaya oqo ena sega ni yavalati ena kena veisautaki me sotava na kena inaki—se vakatadraicake se vakatoboicu. Na ka bibi duadua me da rawa ni kila ka cakacakataka na ivakavuvuli taumada e gadrevi me tara cake kina e dua na ka e vinakati me bula dede.
Sa umani koto ena kosipeli i Jisu Karisito, na veivakavuvuli tawamudu kei na dina ka na dede cake na kena tu mai na ivakavuvuli eso ni ta waqa kei na tara delavuvu. O iko vata kei au, ni daru lewena na Lotu dina ni Turaga, e dui tiko na nodaru icurucuru kei na ivakarau me daru raica kina na veivakavuvuli dina ka tawamudu oqo, vakauasivi ni daru vakarorogo ki na Yalotabu me baleta na veidusimaki yadua kei na kena vakamatavuvale ka rogoca na domona na parofita ena nona vunautaka na vosa ni Kalou vei ira na lewe ni Lotu. O iko kei au e daru kila na bibi ni veivakavuvuli tawamudu kei na dina ena noda bula. Au sega ni kila se a rawa beka vei ira na ivuvu taumada me ra sotava na nodra veisiga ni mataka dredre ka veilecayaki kevaka era a sega, e sega talega ni rawa vakakina vei keda. Sai koya duadua oqori na sala dina ka tawamudu me da sotava kina na veigauna sa bera mai, vakabibi ena veigauna sa toro cake tikoga na kena dredre kei na veilecayaki.
Era a kauta mai na dau ta waqa ni Nowei oqo na kila ka bibi ni nodra vaiwa ka rawa ni veisautaki mai na ta waqa ki na tara valetabu. Na cava e vuna na kena veisau na veika e bibi vei ira? E dua ga na kena isau me vakamacalataka na nodra lomasoli me ra solia yani na veika kecega me ra yaco me ra tara cake na matanitu ni Kalou. Era a vakavuvulitaki ka ciqoma na veivakavuvuli tabu kei na dina ni kosipeli i Jisu Karisito. Era kila ni nodra itavi e sega walega me ra veivuke ena kena tara na veivale, ia me ra cau talega ena nodra laveti cake na tani ena nodra wasea na veika era sa kila me baleta na kosipeli. Me vaka eda wilika ena wase 50 ni Vunau kei na Veiyalayalati, “Ko koya sa vunau kei koya sa vakabauta; erau sa veikilai yalo; io erau sa veivakavulici ka marau vata” (tikina e 22).
Ni da ciqoma na veivakalougatataki digitaki ena noda kila na kosipeli i Jisu Karisito ka taura na yacai Jisu Karisito ena noda sobu ena wai ni veipapitaiso, eda sa ciqoma talega na icolacola me da wasea vata kei ira na tani na kosipeli. Ena dua na gauna walega oqo, me rawati vakavinaka na noda itavi vata ni kena vunautaki na kosipeli, sa vakatoboicutaka na Lotu na parokaramu ni kaulotu. Ena vica na yabaki sa oti sa bokoci kina na kaulotu ena iteki ka vakanamatataki na noda sasaga ena kena qaravi na cakacaka oqo ena tabanalevu. Ni tarai cake e dua na ituvatuva ni kaulotu ena matabose ni tabanalevu ena Lotu, sa totolo cake sara kina na toso. E vuavuaivinaka sara na nodra cakacaka na daukaulotu tudei ni ra cakacaka vata kei na matabose ni tabanalevu, iliuliu ni kaulotu ena tabanalevu, kei ira na lewe ni Lotu.
Eda sa raica rawa ni cakacaka ni kaulotu yavutaki ena tabanalevu e vakalevutaka cake na nodra vakaitavi na lewenilotu ena nodra kunei ka vakaitavitaki na lewenilotu ena nodra kunei ka vakavulici na dauvakatataro ena Lotu. E vakavuqa ni ra dau sureti na dauvakatataro ena Lotu me ra rogoca na lesoni ni kaulotu ena nodra veivale na lewenilotu. Era dau taleitaka vakalevu cake na lewe ni tabanalevu me ra wasea na nodra kila ka talei ni kosipeli i Jisu Karisito ni ra sotava sara ga vakadodonu na veivakalougatataki kamica ni veiqaravi vakadaukaulotu, ka dau talevi wasoma vei ira mai vei ira na nodra iliuliu ena tabanalevu. Era na vakaitavitaki ira sara vakalevu na lewenilotu ena gauna era vakanananu kina vakatitobu ka masulaka me ra wasea na kosipeli vata kei ira na nodra itokani, ira na wekadra, kei ira na lewe ni matavuvale ka duidui na nodra vakabauta.
E vakavuvulitaka o Peresitedi Gordon B. Hinckley: “E levu vei keda era nanuma ni kaulotu sai koya ga na kena veisoliyaki na veivola lalai ni Lotu. Na tamata kece e kila na cakacaka oqo e kila ni tiko e dua na sala vinaka cake. O ya mai vei ira na lewe ni Lotu. Ni dua na lewenilotu e vakaveikilaitaka mai e dua na dauvakatataro, sa tiko talega kina e dua na ivakarau ni veitokoni. Ena dau vakadinadinataka na lewenilotu na dina ni cakacaka. Ena vinakata me raica na marau vua na nona itokani dauvakatataro oqo. Sa na taleitaka sara ni sa tekivu me toso na nona vulica na kosipeli na itokani ko ya.”4
Era na tomana na daukaulotu tudei na nodra vakavulici ira na dauvakatataro, ia ena tu vei ira na lewenilotu na gauna me ra sauma na taro ka wasea na nodra ivakadinadina. Eda na rogoca vakavinaka cake na domona na parofita ena noda vakarautaki keda me da vakavuvulitaka na veivakavuvuli taumada ni kosipeli. Na vakavakarau ena seyavu kina na rere, ka na vakarawarawataka ka vaqaqacotaka na veika era na vakayacora na lewenilotu me ra tokoni ira kina na daukaulotu tudei. E tolu na lesoni rawarawa sara era dau vakavuvulitaka na daukaulotu—na Veivakalesuimai, na yavu ni veivakabulai, kei na kosipeli i Jisu Karisito. E vakaevei na nomu sa vakarau tu mo vakadinadinataka na dina ni veilesoni rawarawa oqo? Vakayagataka na ivoladusidusi vakauqeti ni daukaulotu Vunautaka na Noqu Kosipeli mo vuli ka vakarautaki iko kina mo veitokoni vei ira na daukaulotu tudei ena nodra vakavuvulitaka na veilesoni rawarawa oqo ni kosipeli.
Me da vulica ruarua na lesoni bibi era vakavuvulitaka oqo na dau ta waqa ni Nowei ka ra a tara na delavuvu ni Valetabu e Manti. Taumada na lesoni ni kena vakayagataki na lesoni ni ivakavuvuli kei na dina ni veigauna sa oti me vukea na noda sotava na veigauna se bera mai. iKarua, eda vuli mai na nodra gagadre me ra wasea na veika era kila vata kei ira na tani me vukea na kena tarai cake na matanitu ni Kalou. Na ikarua ni lesoni oqo, kevaka eda vulica vakavinaka, ena vukei ira e lewe vuqa—o ira na tacida kei na ganeda, kei ira na noda itokani luvena tagane kei na yalewa na Kalou, e veilecayaki na vunilagi e tu e matadra kei na veivakadeitaki tawamudu e noda vata.
E dina na kosipeli i Jisu Karisito. Sa vakalesuimai me vakalougatataka na noda bula ena gauna oqo. E koto kina na dina, na ivakavuvuli, kei na veicakacaka tabu vakalotu era okati tu ena nona ituvatuva cecere ni bula marau na Tamada Vakalomalagi, sai koya na ituvatuva me da lesu tale ka laki bula vata kei Koya me tawamudu. Na kosipeli i Jisu Karisito sai koya na Nona sala vakalou me rawa kina vei keda me da sotava na noda vunilagi vakaiukuuku sa noqu ivakadinadina vei kemuni, ena yacai Jisu Karisito, emeni.