Vakasaqara mo Kila na Kalou, na Tamada Vakalomalagi, kei na Luvena, ko Jisu Karisito

Elder Robert D. Hales

Ena Kuoramu ni iApositolo Le Tinikarua

Na rarama ni vakabauta sa tiko vei iko, waraka tiko me vakayadrati ka gumatuataki mai na Yalo ni Kalou

iVakatakilakila

Elder Robert D. Hales

Kemuni na taciqu kei na ganequ, au vakavinavinakataki ira na vakadinadinataka tiko na Kalou na Tamada Vakalomalagi, kei na Luvena, ko Jisu Karisito ena koniferedi oqo vakakina na nona veivakavulici na Yalo Tabu.

Me vaka sa parofisaitaki tu, eda sa bula tiko oqo ena gauna sa wavoliti keda vakaukauwa tiko kina na butobuto kei vuravura. Sa qaqai sara tiko vakalevu na vakabauti ni Kalou ka sa valuti sara tiko mai na politiki, bula veimaliwai,vakatalega kina mai na veiyavu vakalotu. Na tawavakabauta, se na ivakavuvuli ni sega na Kalou, sa roboti vuravura sara vakatotolo.

Sa dina sara, vaka lewe ni Lotu i Jisu Karisito vakalesuimai, eda na tukuna, “keimami vakabauta na Kalou na Tamada Tawamudu kei na Luvena, ko Jisu Karisito, kei na Yalo Tabu.”¹

Eso era na taroga, na cava e bibi kina na vakabauta na Kalou? Na cava e kaya kina na iVakabula, “Ia, sa ikoya oqo na bula tawamudu, me ra kilai kemuni na Kalou dina duadua ga, kei Jisu Karisito o koya ko ni a tala mai”?²

Ni sega na Kalou, na bula sa na yala sara ga ena ibulubulu ka na sega na ibalebale ni veika eda sa sotava ena bula oqo. Na tubucake kei na toso ki liu sa na ka vakatovotovo walega, sega na yaga ni veika eda rawata, na bolebole sa na sega ni vakaibalebale. Sa na sega na ka dina kei na ka lasu, sa na sega na veikauwaitaki meda dau veivukevukei, ni da luvena na Kalou. Sa dina sara, ke sega na Kalou, sa na sega na bula oqo se na bula tawamudu.

Kevaka o iko se dua tale o lomana e se vaqara tikoga na inaki ni bula se me dua na veivakadeitaki ni tiko na Kalou ena noda bula, au sa solia oqo na noqu ivakadinadina bula, me vaka e dua na itokani ka dua na iApositolo. Sa bula tiko o Koya!

Eso ena rairai taroga, ena rawa beka meu kila vakacava? Eda kila ni o Koya e bula dina tiko, baleta ni da vakabauta na nodra ivakadinadina na Nona parofita ena gauna makawa kei na gauna oqo, ka da sa vakila na Yalo ni Kalou ni sa vakadeitaka vei keda ni sa dina na nodra ivakadinadina na parofita oqo.

Mai na nodra ivakadinadina, ka volai tu ena ivolanikalou tabu, eda kila kina ni “a bulia na [Kalou], na tamata, tagane kei na yalewa, me ucui koya, ka itovo vata kei koya.”³Eso na tamata era na kurabui ni ra rogoca ni keda irairai e tautauvata kei na Kalou. E dua na turaga kilai levu ena vuku vakalotu e vakavulica ni kena nanumi ni Kalou e vaka na tamata sa buli tiko kina e dua na matakau ceuceu ka sai koya na qaravi kalou matakau ka veivakacacani.⁴ Ia na Kalou sara mada ga e kaya, “Me datou bulia na tamata me ucui kedatou ka itovo vata kei kedatou.”⁵

Na vakayagataki ni vosa na datou kei na kedatou ena ivolanikalou e vakavulica vei keda na kedrau isema na Tamana kei na Luvena. E vakavuvulitaka tale na Kalou ni, “sa bulia na ka kece oqo na [Luvequ] e Le Duabau ga ena vukuqu.”⁶ Na Tamana kei na Luvena erau duidui ka sega ni dua ga—me vaka ga e dua na tama kei na luvena erau vaka tu ga o ya. Oqo beka e dua na vuna me yaca tiko kina ni Kalou ena vosa vaka-Iperiu na, Eloimi e sega ni dua ga, ia e sivia.

Eda kila mai na Veiyalayalati Vou ni Tamada Vakalomalagi kei na Luvena o Jisu Karisito, erau vakayago. Erau tu vata ena dua na vanua ena dua na gauna me vaka e tukuna o Sitiveni na tisaipeli ni Veiyalayalati Vou: “Raica sa wase rua na lomalagi ka sa wavu tu na Luve ni tamata ena liga imatau ni Kalou.”⁷

Eda kila talega ni Tamana kei na Luvena e rogo na domodrau. Me vaka e volai tu ena iVakatekivu kei na iVola i Mosese, ni o Atama kei Ivi, “rau rogoca na domo ni Kalou ko Jiova ni sa lako voli ena were ena mudremudre ni siga.”⁸

Eda kila ni Tamana kei na Luvena erau vakamatadrau, ni Rau rawa ni tucake ka dau veitalanoa talega. Tukuna vakaoqo o Inoke na parofita, “Au sa raica na Turaga sa tu e mataqu ka keirau sa veivosaki ena matana votu me vaka ga erau sa veivosaki e rua na tamata.”⁹

Eda kila ni Tamana kei na Luvena erau vakayago, ka tiko na veitiki ni yagodrau me vakataki keda. Mai na ivola i Ica ena ni iVola i Momani, eda wilika: “A sa lau na matai taci Jereti ka raica na iqaqalo ni liga ni Turaga; raica sa vaka ga na iqaqalo ni liga ni tamata.”¹⁰E muri e qai vakatakilai Koya na Turaga, ka kaya, “Ia na yagoqu ko sa raica oqo, sa yagoqu vakayago, … au [na] rairai vakakina vakayago vei ira na noqu tamata.”¹¹

Eda kila ni rau dau vakila na Tamana kei na Luvena na veika me baleti keda. E vola vakaoqo o Mosese, “A sa raici ira na vo ni tamata e vuravura na Kalou mai lomalagi ka tagicaki ira.”¹²

Eda kila talega ni Kalou kei na Luvena o Jisu Karisito erau tawa mate rawa, vakalagilagi ka rau sa vinaka sara. Tukuna vakaoqo na Parofita o Josefa Simici baleti Jisu Karisito na iVakabula: “A sa vaka na yameyame ni bukawaqa na matana, sa vulavula sara na drau ni uluna me vaka na uca cevata, ia na iserau ni matana sa uasivi cake mai na iserau ni matanisiga a rorogo ni domona sa vaka na vadugu ni wailevu.”¹³

E sega ni dua na ivakadinadina e yaga vakalevu vei keda ena gauna oqo me vaka na ivakadinadina bula nei Josefa Simici. O koya na parofita ka sa digitaki tu me na vakalesuya mai na Lotu i Jisu Karisito ena gauna oqo, me na mai tu e vuravura na kosipeli ni bera ni lesu mai o Jisu Karisito. Me vakai ira ga na parofita era a dolava na cakacaka ni Kalou ena nodra gauna, e a vakakina vei Josefa ni soli vua na kaukauwa ni kila vakaparofita me vakarautaka na vuravura baleta na iKarua ni nona Lesumai na iVakabula.

Ni se gonetagane yabaki 14, a vaqara se lotu cava me lewena. Ni oti na nona vakasamataka na ka oqori, sa qai rai ki na iVolatabu ka wilika sara:

“Kevaka e dua vei kemudou sa lailai vua na vuku me kerea vua na Kalou ka na solia vakaidina ko koya; ka na solia vakaidina vua.

Ia, me kerea ena vakabauta ka kakua ni lomalomarua.“¹⁴

Ena vakabauta ni vosa vakaparofita o ya kei na sega na lomalomarua, e a lako yani o Josefa ki na veikau ena yasa ni nodratou itikotiko ka laki masu. E muri sa qai vola vakaoqo:

“Au sa raica kina e cake e dua na duru bukawaqa, donuya tiko na uluqu …

“… Ia ni sa mai toka e mataqu au sa qai raica e rua na tamata, na kedrau iserau kei na iukuuku sa sega ni vakamacalataki rawa, erau sa tucake tu ena maliwa lala.”¹⁵

Ni raici rau cake, e sega mada ga ni kilai rau o Josefa—ni se bera mada ni kila se me sa vulica na ituvaki dina ni Kalou kei Karisito. Ia e qai vola vakaoqo, “A sa kacivi au e dua vei rau dusi koya na kena ikarua ka kaya—Oqo na noqu Gone ni Toko. Mo rogoci Koya!”¹⁶

Mai na dua ga na ka e a yaco o ya kei na so tale, e vakadinadinataka na Parofita o Josefa ni, “Sa vakalewena ka vakasuina ko koya na Tamada; sa vakatalega kina ko koya na Luvena.”¹⁷

Era sa dau vakadinadinataka tu na parofita ni veitabayabaki na veika vakaoqo ka vakakina ena koniferedi sara ga oqo. Ia sa tu ga na galala vei keda yadua meda na qai digidigi. Ni tukuna na ikatinikadua ni noda Yavu ni Vakabauta, “Keimami vakabauta ni dodonu me soli na galala meda dui qarava kina na Kalou Kaukauwa me vaka na dodonu ni tamata yadua ia me soli na galala oqori me dui lewa kina na ivakarau ni nodra lotu na vanua me ra sokalou kina, kei na kalou me ra lotu vua.”¹⁸

Ena ka e baleta na vakabauta yadudua, eda na kila vakacava na ka dina?

Au vakadinadinataka ni sala meda kila kina na dina me baleta na Kalou sa ikoya na Yalo Tabu. Na Yalo Tabu na ikatolu ni Lewetolu Vakalou ka kena ituvaki e Yalo. Na nona itavi me “vakadinadinataka na [Kalou].”¹⁹Ka mai “vakavulica vei [keda] na veika kece.”²⁰

Ia meda qaqarauni meda kakua ni tarova na Nona veivakayarayarataki. Ni da sega ni cakava na ka dodonu, se me sa rairai e matana levu na noda vakatitiqa, vakalelewa, kei na sega ni vakarorogo vei ira na tani kei na nodra vakabauta, sa na sega ni tiko vei keda na Yalotabu. Eda sa na vaka na ka era dau kaya na parofita na tamata vakavuravura.

“Ia na tamata sa vakayago sa sega ni vakabauta na veika ni Yalo ni Kalou: ni sa ka lialia vua a sa sega ni kila rawa ko koya ni sa kilai vakayalo ga.”²¹Sa veimecaki na itovo vakayago kei na Kalou, … ka na vakatu kina me tawamudu, kevaka eda sega ni talairawarawa, yalomalua, dauvosota [ka] dauloloma.”²²

Kevaka meda sega ni rogoca na veivakayarayarataki ni Yalo Tabu, ena rawa ni da na vakataki Korio e dua ka dau meca kei Karisito ena iVola i Momani. Sega walega ni sega ni vakabauta na Kalou o Korio, e vakasewasewana sara ga na iVakabula, na Veisorovaki, na yalo ni parofisai, ka vakatavuvulitaka vakailasu ni sega na Kalou ka sega na Karisito.²³

E sega ni vakacegui Korio na nona kaya walega ni sega na Kalou ka lako galugalu yani. E a vakasewasewani ira na tamata vakabauta ka vinakati Alama na parofita me vakaraitaka vua e dua na ivakatakilakila ni kaukauwa kei na dina ni dua tiko na Kalou. Na kena isau mai vei Alama e a dina ena gauna o ya ka se dina tikoga nikua: “Sa rauti iko na ivakatakilakila kece sa tu; ko sa via vakatovolea beka na nomu Kalou? A cava ko sa kaya kina meu vakatakila vei iko e dua na ivakatakilakila, ko sa kila tu na nodra ivakavuvuli na nomu qase kei ira na parofita yalosavasava? Ko sa kila na ivolatabu ia na ivola oqo sa tukuna na Kalou; io na vuravura kei na veika kece sa tu kina kei na toso ni vuravura kei na nodra toso na veika kecega sa tu ena maliwa lala, a ka kecega oqo sa vakadinadinataka ni sa bula tiko na Kalou.²⁴

Sa qai mai soli vei Korio e dua na ivakatakilakila. Sa qai vagalui. “A vola lesu mai vakaoqo ko Korio: … au kila ni yaco vei au na ka oqo ena kaukauwa ni Kalou; io au sa kila tu ni tiko na Kalou.”²⁵

Kemuni na taciqu kei na ganequ, ko sa na rairai kila tiko beka, ena vu ni yalomu, ni bula tiko na Kalou. Ko na rairai sega beka ni kila na veika kece e baleti Koya ka sega ni kila vinaka na veika e dau cakava o Koya. Na rarama ni vakabauta sa tiko vei iko, waraka tiko me vakayadrati ka gumatuataki mai na Yalo ni Kalou.

Dou lako mai. Vakabauta na ivakadinadina ni Parofita. Vulici rau na Kalou kei Karisito. Na kena icakacaka era sa vakatavuvulitaka vakamatata na parofita ni gauna makawa kei na parofita ni gauna oqo.

Bucina cake na sasaga ni kena gadrevi me kilai ni bula dina tiko na Kalou.

Na gagadre oqo ena muataki keda yani meda dau vakananuma na veika vakalomalagi—meda laiva me yavalata na yaloda na ivakadinadina ni bula tiko na Kalou, ena veika era bula vakavolivoliti keda tu.

Ni da sa yalomalua eda na qai tu vakarau meda rogoca na veisureti ni iVakabula meda dau “vakasaqaqara ena ivolanikalou”²⁶—ka qai vuli mai kina ena yalomalumalumu.

Eda sa na qai vakarau me da kerea na Tamada Vakalomalagi ena yalodina ena yaca ni noda iVakabula, o Jisu Karisito, me baleta na dina ni veika eda sa vulica. E levu vei keda eda na sega ni raica na Kalou me vakataki ira na parofita, ia na domo rogo lailai malumu veivakauqeti ni Yalotabu; na vakasama kei na veika eda vakila ka na kauta mai na Yalo Tabu ki na noda vakasama kei na yaloda—ena solia vei keda meda kila ni o Koya e bula dina tiko ka lomani keda.

Era na vinakata kece na luvena na Kalou ena vuravura oqo me ra na kila na veika oqo. Kevaka mo sa na guilecava na vakabauta na Kalou se mo sa tinia na nomu vakabauta, se o vakabauta tu ga vakatikina, au sureti iko mo saga sara ga oqo me dua na nomu ivakadinadina ni Kalou. Kua ni rerevaka na veivakasewasewani. Na kaukauwa kei na vakacegu ena kauta mai na kila na Kalou ka me qai tiko vei iko na veitokani ni Yalo Tabu sa na qai ka tawamudu na veika ko na vakayacora.

Me ikuri, ni nomu ivakadinadina ni Kalou ko sa na rawa ni vakalougatataka na nomu vuvale, nomu kawa, nomu itokani,—kei ira kece ko dau lomana. Na veika ko kila vakataki iko baleta na Kalou e sega walega ni nomu isolisoli totoka duadua, ia ena solia vei iko na veivakacegui cecere duadua ko na ciqoma.

Me vaka niu dua na ivakadinadina ni Luvena e Duabau ga na Tamada Vakalomalagi dauloloma, o Jisu Karisito sara ga, au vakadinadinataka ni bula tiko na Kalou. Au kila ni o koya e bula tiko. Au yalataka ni o iko kei ira ko lomana mo dou qarai koya ena yalomalumalumu, ena yalodina kei na gumatua ko na kila talega vakaidina. Ena yaco me ka dina na nomu ivakadinadina. Na veivakalougatataki me baleta na nomu kila na Kalou ena qai nomu kei na nomu matavuvale me tawamudu. Ena yacai Jisu Karisito, emeni.