Au Taleitaki ira na Gonetagane Domolevu
Me da lomani ira noda gonetagane—e dina ga ni so vei ira era gonetagane domolevu. Me da vakatavulici ira me ra veisautaka nodra bula.
Au gadreva meu talanoataka vei kemuni e dua na ilawalawa cauravou, domolevu, ka ra a tara noqu bula ena noqu a se bisopi gone e Seoul, Korea ena vuqa na yabaki sa oti. Keimami tiko veivolekati ga kei ira na gonetagane oqo. Ena gauna o ya e dua walega se rua vei ira erau lewe ni Lotu. O irau na gonetagane lewenilotu oqo, sai rau ga na lewenilotu ena nodrau matavuvale. Era veitokani, ka ra lako mai ki na lotu me ra mai qito ka mai duavata. Era taleitaka na qito Ping-Pong ena loma ni macawa, ka ra vinakata me ra mai veilasamaki ena vei-Vakarauwai ena dua na itaviqaravi. E vuqa vei ira e sega soti ni daumaka nodra vuli ka ra okati mai vei ira eso me ra dau vakatubuleqa.
Au se tama gone sara kina ka rua na luvequ tagane, ka rau yabaki vitu kei na ciwa, ena gauna oqori. Au a sega ni kila se cava meu cakava vei ira na cauravou oqo. Era sa dau vakosakosa, ni dua na gauna, sa kerei au na marama watiqu o Bon-Kyoung, kevaka e rawa me keitou sa toki ki na dua tale na tabanalevu me rawa ni ratou raica na luvei keirau tagane na ivakaraitaki vinaka mai vei ira tale eso na cauravou. Au vakasamataka kau masuta na Tamada Vakalomalagi me vukei au meu raica e dua na sala me vukei ira na cauravou oqo. Oti, au sa vakadeitaka meu tovolea meu vakatavulici ira ena sala me ra veisautaka kina na nodra bula.
A lako mai noqu vakasama e dua na raivotu ka matata vinaka sara. Au vakila kevaka me ra yaco me ra daukaulotu, ena veisautaka sara ga na nodra bula. Me tekivu mai na gauna o ya ka lako yani, sa yaco meu malaude, ka tovolea meu vakayagataka e levu sara na gauna e rawa me keimami veimaliwai vata, vakatavulici ira ena bibi ni veiqaravi vakadaukaulotu kei na vakavakarau ki na kaulotu.
Ena gauna vata oqori, a lesi mai kina ki na neitou tabanalevu o Elder Seo e dua na daukaulotu tudei. O koya e dua ka tubucake mai ena Lotu me vaka e dua na itabagone lewe ni Matabete i Eroni a vakaitavi ena ilawalawa ni matasere ni cauravou vata kei ira na nona itokani. A sotavi ira kina na gonetagane vakosakosa ena neitou tabanalevu. A vakatavulici ira era sega ni lewenilotu o Elder Seo ena lesoni ni kaulotu ka vakatavulici ira talega ena sere ka dau lagata. A cakava e tolu na matasere domo va vata kei ira na gonetagane domolevu oqori ka vakayacani ira na Hanaro Quartet, kena ibalebale na “duavata”. Era marau ena nodra lagasere vata, ia eda na gadreva kece na yalovosota “vakaitamera” ni da vakarogoca na nodra lagasere.
E veigauna e dola tu na neitou vale kivei ira na lewenilotu era gadreva me ra veisiko. Era dau sikova na neitou vale na gonetagane oqo voleka ni veimua ni macawa yadua ka so ena loma ni macawa. Keitou vakani ira ka vakatavulici ira. Keitou vakatavulici ira ena ivakavuvuli ni kosipeli vakakina na vakayagataki ni kosipeli ena nodra bula. Keitou tovolea me keitou solia vei ira e dua na raivotu ni nodra bula ena gauna sa bera mai.
Era lagasere vata ena veigauna era dau lako mai kina ki vale. E vakamosia na daligai keitou na domodra rogolevu. Ia keitou vakacaucautaki ira e veigauna baleta ni keitou rogoca nodra lagasere ka marautaka vakalevu cake sara mai na nodra dau sotava na leqa eso.
A tomani tiko ena veiyabaki ka tarava mai na itaviqaravi oqo. E vuqa sara vei ira na cauravou oqo era sa matua ena kosipeli, ka yaco talega e dua na ka veivakurabuitaki. Ni oti vakalailai o ya, eratou sa papitaiso e lewe ciwa na gonetagane ka ratou a sega ni lewenilotu. Era sa veisau mai na gonetagane domolevu, vakosakosa ki na gonetagane sotia yaloqaqa.1
Era a kaulotu, sotavi ira na goneyalewa totoka ena Lotu, ka ra vakamau ena valetabu. E dina, era duidui na bolebole me baleti ira vakayadua ena nodra kaulotu, vuli, kei na vakamau, ia era yalodina tu ga baleta ni ra vinakata me ra muria na nodra iliuliu ka vakamarautaka na Turaga. Ena gauna oqo era sa vakamatavuvale mamarau kei ira na luvedra ka ra sucu mai ena loma ni veiyalayalati.
E lewe ciwa na gonetagane domolevu era sa yaco me 45 na lewenilotu bulabula ena matanitu ni Turaga, ka oka kina ko ira na watidra kei na luvedra. Era sa veiliutaki tiko ena gauna oqo ena nodra tabanalevu kei na iteki. E dua e bisopi, e rua e rau veiqaravi ena matabisopi, e dua e veiqaravi tiko ena matabose e cake, ka rua erau peresitedi ni Cauravou. E dua na iliuliu ni kaulotu, e dua na vunivola levu, ka dua na qasenivuli ni semineri. Me vaka e dua na ilawalawa, era se dau lagasere vata tikoga, kei na ikarua ni caka mana—sa rogo vinaka sara na domodra!
E rua na yavu ni ivakavuvuli a vukei ira na cauravou oqo me ra yaco me ra vaka na luvei Ilamani.2 E dina ga ni o ira na tinadra na gonetagane oqo era sega ni lewe ni Lotu ka ra sega ni kila na vosa ni Turaga, era a vaka na tamadra o ira na iliuliu ni matabete, kei ira na marama watidra era vaka na tinadra.
O iratou na lewe ciwa na gonetagane oqo—au vakatokai iratou me ratou “Gonetagane ni Turaga”—era vulica ni ra na vakalougatataki ena nodra vakarorogo kivei ira na iliuliu ni ni Lotu, veitalia ga ke ra sega ni kila na vuna. Era sa yaco me vakataki Atama, na imatai ni tamada, ena nona vakacabora na isoro kivua na Turaga a tarogi koya e dua na agilosi, “A cava ko sa vakacaboisoro kina vua na Turaga? A sa sauma ko Atama ka kaya vua: Au sa sega ni kila, Ia sa vakarota vei au na Turaga meu kitaka vakakina.”3 Sa yaco me ra taleitaka me ra talairawarawa ka qarava na Turaga ena lomadra taucoko.
Era vulica talega ni sa rui bibi nodra dau tiko ena veisoqoni ni Lotu. A kaya o Peresitedi Ezra Taft Benson ena nona vosa ena ulutaga “Ki na ‘iTabagone Vakaturaga’(To the Youth of a Noble Birthright)”: “Meu dusimaki kemuni ena gauna oqo ki na kena bibi na dau tiko ena veisoqoni taucoko sara ni Lotu. Noda tiko ena yalodina ena veisoqoni ni Lotu e kauta mai na veivakalougatataki ka na sega ni rawa mo ciqoma ena dua tani tale na sala.”4 Ena nodra tiko ena veisoqoni ni Lotu e veigauna, era vakila na gonetagane na loloma cecere ni Turaga ka vulica na kena vakayagataki na ivunau kei na ivakavuvuli ni Lotu ena nodra dui bula ni veisiga yadua. Era vulica talega na sala me ra vakaitavi kina ena veisoqoni ena reki vakaitamera kei na mamarau.
Ena gauna oqo, e tolu na luvei keirau tagane, wili kina na neirau itini, ka sucu ena gauna ni noqu veiqaravi vaka-bisopi. Ena nodratou tubu cake tiko na luvei keirau tagane, o iratou na lewe ciwa na gonetagane o ya eratou sa iliuliu tiko ni tabanalevu kei na iteki, ka yaco me ratou qasenivuli ka iliuliu ni luvei keirau tagane. Eratou vakatavulici iratou na luvei keirau tagane kei ira eso tale na gonetagane ena sala vata ga au a vakatavulici iratou kina ena nodratou a se dau vakatubuleqa voli. Eratou lomani iratou na neirau gonetagane me vaka ga noqu dau lomani ira. O ira na gonetagane domolevu, vakosakosa oqo ena gauna e liu sa yaco me ra nodratou tamata qaqa na luvei keirau. O iratou na luvei keirau tagane eratou vinakata me ratou vakamuria na nodratou ivakaraitaki cecere ena nodratou yaco me ratou daukaulotu qoroi ka vakamau vata kei na itokani yalododonu ena valetabu.
Era tomana tiko na cauravou oqo na nodra veivakayarayarataki ena neitou matavuvale. Ena rua na vula sa oti a dua na itaviqaravi ni daukaulotu ena neitou tabanalevu ena dua na bogi ni Vakarauwai, ka ra sureti taucoko kina, okati kina na veimatavuvale era lewenilotu e vica ga vei ira. O Sun-Yoon, na luvei keirau tagane gone duadua, a se qai lesu sara ga mai ena dua na keba ni itabagone ena yakavi ni siga vata ga o ya. A kaya ni sa na sega ni lako ki na itaviqaravi ni daukaulotu baleta ni sega ni lewe ni matavuvale lewenilotu ga e vica vei ira, ka sa rui oca talega vakalevu. A mani sega ni lako ki na itaviqaravi. A qiriti koya na marama watiqu me vakamacalataka ni tamata kece era sureti ki na itaviqaravi. A kaya, “Au kila, ia au na sega ni lako yani nikua,” ka biuta na talevoni.
Ni tekivu oti ga na soqoni ena bogi o ya, a curu yani o Sun-Yoon ka dabe tikivi tinana ena vakadirorogo. A vakasolokakana vua, ka kaya, “Ni oti sara ga noqu vosa ena talevoni, au nanuma sara noqu a tarogi Tata se cava eratou rawata kina vakavinaka nodratou bula na Hanaro Quartet? A kaya vei au ni ratou a talairawarawa ena nodra vosa na iliuliu ni Lotu ka ratou dau tiko e veigauna taucoko ena soqoni ni Lotu. Sa ikoya o ya na idola ka veisautaka nodratou bula ka yaco me ratou rawati iratou vakavinaka sara.” A tomana na luvequ tagane, “E vakasauri sara ga, na kena lako mai na noqu vakasama, na vosa nei tamaqu kau sa nakita meu vakamuri iratou baleta niu vinakata me dua noqu matavuvale mamarau me vakataki iratou ka rawata na noqu bula.”
Kemuni na taciqu lomani, me da lomani ira noda gonetagane … e dina ga ni so vei ira era gonetagane domolevu. Me da vakatavulici ira me ra veisautaka na nodra bula. Ko ira na luvei Ilamani tagane ena gauna oqo, era lako mai e sega walega mai vei ira noda matavuvale taleitaki ena loma ni Lotu ia mai vei ira talega na curuvou gone ka sega nodra itubutubu ena kosipeli. O kemuni kei ira na marama watimuni e dodonu mo ni nodra “itubutubu vinaka”5 me yacova ni ra sa yaco me ra vaka na luvei Ilamani tagane.
Au taleitaka ka marautaka noqu raica na nomuni veiliutaki loloma e veigauna baleti ira na noda gonetagane. O ira na cauravou oqo era luveda tagane taucoko. Ena noda volekati ira yani, tuberi ira, ka vukei ira, eda na vakila me vakataki Joni, ena nona kaya, “Sa levu na noqu reki ena vuku ni ka e dua bauga oqo, niu sa rogoca era muria na dina ko ira na luvequ.”6
Kemuni na cauravou lomani, me da muri ira na noda iliuliu ni Lotu ka tautauvata kei Atama, ena nona sega ni dau via kila e veigauna “na vuna,” ia e marautaka ga ni talaiarawarawa. Ni yalovinaka lakova na nomu veisoqoni ni Lotu ena yalodina. Kevaka o cakava oqo, o na vulica na sala mo vakavakarau kina me baleta nomu veigauna sa tu e matamu kei na nomu rawati iko. Kivei kemuni na gonetagane ko ni a sucu ena Lotu kei kemuni talega ko ni sa lewena na Lotu, o ikemuni na mataivalu ni Turaga. O ni na yaco mo ni daukaulotu qoroi ka tama yalododonu kivei ira na nomuni matavuvale. Na Tamada Vakalomalagi ena vakalougatataki kemuni me dua na nomuni matavuvale mamarau. Sa tu vei kemuni na rarama ni veigauna sa bera mai ena kosipeli, ka vakataki ira na luvei Ilamani tagane, o ni na kauta mai na reki tawamudu kivei keda kece sara.
Au lomani kemuni, kau kila ni Tamada Vakalomalagi e lomani keda kece sara, a tala mai kina o Koya na Luvena e Duabauga, o Jisu Kairisito, me noda Dauveivueti. Na noda Parofita bula o Peresitedi Thomas S. Monson ka liutaki keda ena gaunisala dodonu. Ena yacai Jisu Karisito, emeni.