Na Marama Yadua e Gadreva na iSoqosoqo ni Veivukei

Silvia H. Allred

iMatai ni Daunivakasala ena Mataveiliutaki Raraba ni iSoqosoqo ni Veivukei

Keitou gadreva mo ni vakalougatataka na nomuni bula kei na vuvale ena veivakauqeti kei na kaukauwa ni iSoqosoqo ni Veivukei.

iVakatakilakila

Silvia H. Allred

E ka ni reki meda mai soqoni vata vakaoqo e vuravura taucoko vakaveitacini e Saioni. Au marau ni mai noqu madigi meu wasea vei kemuni na noqu ivakadinadina baleta na iVakabula kau vakaraitaka na noqu lomani kemuni.

Au na tukuna tiko nikua na vuni nona gadreva na marama yadua na iSoqosoqo ni Veivukei ena nona bula.

Ni oti ga na nona tuvanaka ka tauyavutaka na Lotu o Parofita Josefa Simici, a tuvanaka talega o koya na iSoqosoqo ni Veivukei. A kaya kina: “Ena qai taucoko na yavu ni Lotu me yacova ni ra sa tauyavutaki mada na marama.”¹ Na iSoqosoqo ni Veivukei sa tiki bibi ni Lotu, ka keitou nuitaka na mataveiliutaki, me keitou vukei kemuni mo ni kila vinaka na vuna e bibi kina ki na nomuni bula.

Sa gagadre titobu ni neitou veiliutaki mo ni vukei na marama yadudua ena Lotu mo ni vakavakarau ka ciqoma na veivakalougatataki ni valetabu, rokova na veiyalayalati o ni cakava, ka cakacaka ena inaki kei Saioni. Na iSoqosoqo ni Veivukei e vakauqeta ka vakavulici ira na marama me ra vakatorocaketaka na nodra vakabauta kei na nodra yalododonu yadudua , vaqaqacotaka na matavuvale, ka vakasaqara ka vukei ira era vakaleqai tu.

Ena nona vosa me baleta na noda gauna oqo, a kaya kina o Peresitedi Spencer W. Kimball:

“E vuqa na torocake lelevu ka na yaco tiko ena Lotu ena veisiga mai muri sa baleta ni vuqa na marama vinaka ena vuravura oqo … era na curu mai vakalewelevu ki na Lotu. Ena yaco oqo ni ra sa buladodonu ka itovo maqosa ka yaco me ra laurai ni ra bula vakai ira ga ka duatani—ena mamarau—mai vei ira na marama kei vuravura.

“Ena kedra maliwa na marama yaloqaqa e vuravura era na lako mai ki na Lotu sai ira era gadreva vakalevu cake me ra ivalavala dodonu ka sega ni baleti ira ga. O ira na marama yaloqaqa oqo era yalomalumalumu dina, ka vakacerecerea na yalodina ka sega na ka vakarairai …

“Sa yaco kina o ira na marama ivakaraitaki dodonu ni Lotu me ra dua na tubu levu ena iwiliwili ka vakakina ena veika vakayalo ena Lotu ena iotioti ni gauna oqo.”²

Au vakabauta ni sa yaco na vosa vakaparofita oqo. O ira na marama vinaka ni vuravura oqo era sa ciqoma na kosipeli i Jisu Karisito vakalewe levu sara e vuravura taucoko. Sai kemuni na marama yaloqaqa dina a tukuna tiko o koya. Keimami sa mai kilai kemuni na udolu vakaudolu ni keimami veisiko yani e vuravura taucoko. Keimami sa raica na nomuni cakacaka vinaka; ka rogoca na nomuni ivakadinadina yalodina; ka vakila na yalomuni. Keimami sa raica na rarama ni kosipeli ni serau mai e matamuni. Na nomuni ivakaraitaki kei na veivakauqeti ni caka vinaka e sega ni ka wale ka totoka dina.

Ia keimami sa kilai ira talega e vuqa na marama ena Lotu era se bera sara ni marautaka tiko na veivakalougatataki ni itaviqaravi ena Lotu ka vakakina ena iSoqosoqo ni Veivukei. Kivei kemuni ko ni sa tiko rawa ena iSoqosoqo ni Veivukei, sa neitou veikacivi vei kemuni oqo. Ko ni sa kerei mo ni sikovi ira na marama era sega tiko ni vakayacora na cakacaka ni iSoqosoqo ni Veivukei ena nomuni tabanalevu kei na tabana ka vakavulica vei ira ena loloma na veika ena cakava vei ira na iSoqosoqo ni Veivukei. Vakadinadinataka vei ira ni iSoqosoqo ni Veivukei ena vakabulabulataka na nodra vuvale kei na nodra bula yadudua. Mo laki nodra itokani ka tacidra. Wanonovi ira ka vakaukauwataki ira. Vukei keimami ena kena vakavinakataki na itovo e dau tawasea na matavuvale. Vukei ira na tacimu oqo me ra lesu vua na Turaga kei na Nona ituvatuva ni veivakabulai baleti ira na Luvena. Era na kunea na veidusimaki, veivakacegui, veisaututaki, kilai vinaka ni ka, kei na veivakauqeti. Era na kila sara ni lomani ira na Tamada Vakalomalagi ka na karoni ira ena sala e sega ni kilai rawa.

Na cava ena cakava na iSoqosoqo ni Veivukei vei ira na marama era sa vakayacora tiko na itavi ni isoqosoqo? E vakalougatataka vakacava na matavuvale kei na vale na iSoqosoqo ni Veivukei?

E a se qai lewena walega na Lotu o tinaqu ena gauna a kacivi kina me peresitedi ni iSoqosoqo ni Veivukei ena neimami tabana lailai e San Salvador. A kaya vei peresitedi ni tabana ni sega tu ni kila e dua na ka, sega tu ni vakarau, ka sega ni veiganiti kaya. Sa yabaki 30 vakacaca tiko kina o koya, ka sega sara ni vuli vinaka, ka solia taucoko tu mai na nona gauna ena nona qaravi watina kei iratou na luvena e vitu ena nona bula taucoko. Ia a kacivi koya ga o peresitedi ni tabana.

Au raici tinaqu ena nona vaqaqacotaki ena veikacivi oqo. Ena nona veiqaravi tiko, a vulica na veiliutaki ka rawata eso nona isolisoli vovou me vaka na veivakavulici, vosa e matanalevu, kei na tuvai ka vakarautaki na veisoqoni eso, itaviqaravi, kei na cakacaka ni veiqaravi. A vakauqeti ira sara na marama ena tabana. A qaravi ira ka vakavulici ira me ra dau veiqaravi vakaiira. Era a taleitaki koya ka dokai koya na marama. A vukei ira na marama tale eso me ra kila, vakayagataka, ka vakatorocaketaka na isolisoli kei na taledi; ka vukei ira me ra taracake vata na matanitu ni Kalou kei na matavuvale kaukauwa vakayalo. A yalodina tikoga ki na veiyalayalati ni valetabu a cakava. Rau a veisaututaki tu kei na nona Dauveibuli ena gauna a mate kina.

Ni oti e vica na yabaki a volavola mai e dua na marama ka a nona daunivasala tu ena iSoqosoqo ni Veivukei: “O tinamu a vakavulica vei au na sala meu tamata yaco vakaoqo. Au a vulica mai vua, na loloma uasivi, veikauwaitaki, yalodina, kei na vakayacori vakavinaka ni neitou ilesilesi. O koya a noqu qasenivuli ka daunivakaraitaki. Au sa mai yabaki 80 oqo, kau yalodina tikoga vua na iVakabula kei na Nona kosipeli. Au sa mai vakacavara e dua na ilesilesi ka sa vakalougatataki au vakalevu sara na Turaga.”³

Au sa raica na cakamana talega vakaoqo ena nodra bula e vuqa na marama ena veiyasai vuravura. Era sa ciqoma na kosipeli, ka vukei ira na iSoqosoqo ni Veivukei me qaqaco na nodra vakabauta ka tubu cake vakayalo ni soli vei ira me ra veiliutaki ka veivakavulici. Ni ra sa veiqaravi, sa semati na veika vovou ki na nodra bula. Ni ra tubucake tiko vakayalo, e torocake vakakina na nodra vakadeitaki ira, kilai ira, kei na kedra yaga. Era kila kina ni inaki raraba ni kosipeli o ya me vakarautaka na madigi meda yacova na keda ituvaki taucoko ni rawa ka.

Ena nodra cakacaka na marama ni Soqosoqo ni Veivukei, eda na vukea na tarai cake ni matanitu ni Kalou ka vaqaqacotaki na vuvale kei Saioni. E sega tale ni dua na mataisoqosoqo ena Lotu me na vakayacora rawa na veiqaravi ni iSoqosoqo ni Veivukei. E udolu na matavuvale era sa vukei mai na nodra veiqaravi na dauveisiko dauloloma era dau veivakacegui, dauvakarorogo, ena vosa veivakayaloqaqataki.

A kaya vakaoqo o Norma na luvequ yalewa me baleta na nona a vakalougatataki koya na iSoqosoqo ni Veivukei: “Ni keirau se qai vakamau walega kei Darren kau kunekunetaka tiko na imatai ni luvei keirau, keirau a laki vakaitikotiko ena dua na taoni lailai ni koliji. Keirau se vuli ruarua tiko ka lailai sara na keirau isau. Na neirau tabanalevu voleka duadua e 30 na maile [48 na kilomita] na kena yawa, ka sala ni neirau veilakoyaki e dua na motoka makawa ka dau sega ni yavala rawa ena levu na gauna. Ni ra rogoca na marama ena tabanalevu na itukutuku oqo, era sa lomavata sara me dua me na dau mai kauti keirau i valenilotu ka lesu mai ena Sigatabu kei na itaviqaravi tale eso. Eso vei ira na marama mai na taoni tale eso era draivataka mai e 20 se 30 na maile [32 ki na 48 na kilomita] me ra mai kauti keirau walega. Kena ikuri, e vuqa sara na marama era dau sureti keirau ni oti na lotu ki na nodra vakayakavi totoka. E sega ni dua e vakaraitaka ni ra a bau vakacauocataki keirau. Au na sega ni guilecava na nodra lomasoli dina kei na loloma cecere era vakayacora vei keirau o ira na marama ni iSoqosoqo ni Veivukei ena gauna lekaleka o ya ka veibolei ni neirau bula.”⁴

E bisopi o watiqu, ka kaya ni na sega ni cakava rawa na nona cakacaka ke sega na veivuke nei peresitedi ni iSoqosoqo ni Veivukei. O ira na peresitedi ni iSoqosoqo ni Veivukei e vuravura taucoko era cakacaka vata tiko kei ira na bisopi kei na peresitedi ni tabana me ra vakarautaki na marama ena ilesilesi vakalou ni nodra kunei ka vukei o ira na vakaleqai tu. O ira na peresitedi yalodina oqo ni iSoqosoqo ni Veivukei era gadreva na nomuni veitokoni kei na veivuke. O ni na vakalougatataki ena nomuni tiko ena veisoqoni ni iSoqosoqo ni Veivukei ena Sigatabu, ia na nomuni vakaitavi ena cakacaka ni iSoqosoqo ni Veivukei ena vakalougatataka na Lotu taucoko.

Ke o gone se qase, vakamau se sega, yada se tiko vakamatavuvale, keitou gadreva mo ni vakalougatataka na nomuni bula kei na vuvale ena veivakauqeti kei na kaukauwa ni iSoqosoqo ni Veivukei. Ko ni sa kacivi ka vakayaloqaqataki na marama ena Lotu mo ni tosoya ki liu na cakacaka oqo. Keimami sureti kemuni mo ni veiqaravi ena nomuni kaukauwa ni veivakauqeti ni caka vinaka ena vaqaqacotaki ni noda matavuvale, noda lotu, kei na noda itikotiko raraba. Sai kemuni na kaukauwa e gadrevi tiko me baleta na loloma, dina, kei na yalododonu ena vuravura oqo. Keimami gadrevi kemuni mo ni susuga cake na veimatavuvale, itokani, kei ira eda tiko veivolekati. Oi kemuni na idewadewa bula ni loloma uasivi ni Kalou vei ira yadudua kece sara na Luvena.

Era dau volavola mai ki na noda mataveiliutaki o ira na marama sa vakalougatataka na nodra bula na iSoqosoqo ni Veivukei. E vuqa vei ira era vola mai na veika sa cakava na iSoqosoqo ni Veivukei vei ira kei na nodra matavuvale. E rairai vakatoka oqo na veika era vola mai:

Sa vakadeitaka vei au na iSoqosoqo ni Veivukei ni lomani au na Tamada Vakalomalagi baleta niu sa Luvena yalewa.
E vakavotuya vei au ni sa vakalougatataki au na Tamada Vakalomalagi ena taledi kei na isolisoli.
Au sa mai kila ni veiyalayalati ni valetabu sa ka bibi sara vei au kei na noqu matavuvale.
Au sa kila na kena kunei na marau ena veiqaravi vakatina.
Na lesoni ni iSoqosoqo ni Veivukei kei na itaviqaravi e vukea meu kila na ivakarau meu tina vinaka kina.
Au sa kila rawa na noqu itavi meu vakauqeti ira na itabatamata tubucake tiko mai ena caka vinaka.
Na iSoqosoqo ni Veivukei e vukei au meu marama vakawati vinaka cake, ka doka ka rokova na watiqu.
Au sa mai vakayaloqaqataki meu vakasaqara na vuli kei na torocake yadudua.
Au sa kila ka vakayacora na imatai ni ivakavuvuli ni bula rawati au ena soqoni kei na itaviqaravi.
Au sotava na marau niu veiqaravi yani ena veisiko kei na veiqaravi ena yalololoma.
Au sa kunea rawa na isolisoli kau sega ni kila ni tu vei au.
Na iSoqosoqo ni Veivukei e solia vei au na madigi meu vakayagataka kina na noqu taledi.
Au sa kila niu rawa ni laveta ka vakayaloqaqataki ira na tani.
Au sa kila ni tiko kece vei keda na veika meda wasea yani: o ya na loloma, lomasoli, matadredredre, veikauwaitaki, kei na vuqa tale.
Au sa tekivutaka meu karoni ira dina na tamata.
Au sa vulica meu vinaka sara vei ira era tiko volekati au ka dau itovo vinaka vei ira na tamata.
Au sa kila na bula gugumatua kei na sasagataki ni inaki.
Au kila ni veivakalougatataki kece nei Tamaqu ena yaco me noqu kevaka au yalodina ka tudei tiko ki na noqu veiyalayalati.

Sa tomani tikoga mai na lisi oqo kau kila ni vuqa vei kemuni e tiko na ka mo ni vola mai ena lisi oqo. E ka bibi sara na iSoqosoqo ni Veivukei ki na bula ni vuvale yadudua kei na matavuvale. E dodonu vei ira na turaga vakawati kei na tama me vakayaloqaqataka na itaviqaravi ena iSoqosoqo ni Veivukei. E dodonu ki na marama yadudua me mai kila na veigauna vivinaka e vakarautaka tu na iSoqosoqo ni Veivukei me cau mai kina. Na marama yalododonu yadudua e tiko na nona cakacaka bibi ena loma ni ituvatuva ni Kalou kei na tarai cake ni Nona matanitu. E gadrevi iko na iSoqosoqo ni Veivukei, ka ko gadreva na iSoqosoqo ni Veivukei.

Au sa vakadinadinataka vei kemuni ni iSoqosoqo ni Veivukei a tauyavutaki vakalou me vukea na matabete ena cakacaka ni veivakabulai. Au kila ni bula tiko na Tamada Vakalomalagi. E kilai kedaru ka lomani kedaru. O Jisu na Karisito, na noda iVakabula ka Dauveivueti. Ena yaca i Jisu Karisito, emeni.