Yaco Mo Matabete Kaukauwa Vakalevu Cake
E rawa meda yaco meda kaukauwa vakalevu cake ena noda vakalougatataka nodra bula na luvena tagane kei na yalewa na Tamada Vakalomalagi, a kaukauwa vakalevu cake sara ena qaravi ira na tani.
Ena vuqa na yabaki sa oti e dua na ilawalawa matabete kilikili era a veivakatavulici ena kaukauwa levu kei na lewa. E dua vei ira e sa laulau sara na nona vunau ka sa dredre me sega ni vakadinati.1 O ira na matabete oqo era vukei ira na tamata me ra vulica na veika me baleta na iVakabula kei na Nona ivunau, ka veivuke ena nodra kune marau. Na nodra ivakavuvuli kei na ivakaraitaki e vakarautaka e dua na ivurevure era sotava kina na tamata e dua na veisau uasivi e lomadra. Eda vulica ni udolu na tamata era sa saumaki mai ka papitaiso ka cakava nodra veiyalayalati ka vosota me yacova na ivakataotioti.2 Au tukuna tiko baleta na cecere ni daukaulotu ena i Vola i Momani ka ra kaukauwa vakalevu ena matabete.
E rawa meda vuli vakalevu sara mai vei ira na luvei Liai. Ena noda cakava na veika era a cakava, e rawa meda yaco meda kaukauwa vakalevu cake ena noda vakalougatataka nodra bula na luvena tagane kei na yalewa na Tamada Vakalomalagi, kaukauwa vakalevu cake ena qaravi ira na tani, kaukauwa vakalevu cake ena nodra vakabulai na tani, ka kaukauwa vakalevu cake ni da yaco meda tamata va-Karisito.
A vakatavulici keda o Alama Lailai ena dua vei ira na ka era a cakava ka yaco me ra rawa ka kina vakalevu: era vakayagataka na ivolatukutuku ka tauri mai kina na iVola i Momani. Ena nona solia na ivolatukutuku ka qai yaco me iVola i Momani kivei Ilamani, na luvena tagane, a vakatavulica ni kevaka me a sega na veika sa volai tu ena peleti oqo, “Ke a sega ni rawa vei Amoni kei iratou na nona itokani me ratou vakadinadinataka vei ira … ; ia era sa veivutuni na lewe vuqa, ni ratou sa vunautaka vei ira na veika sa volai tu eke.”3
E vakaraitaka na Kalou na Nona kaukauwa ena peleti ena nona vakayacora e dua na inaki, “ko ya … nodra saumaki mai e vuqa … ki na ivakavuvuli dina.” A qai parofisaitaka o Alama ni Kalou ena “qai vakatakila talega vei ira na itabatamata mai muri.”4 O koya gona, era maroroi na ivolatukutuku ka ni o iko kei au e daru tiki ni itabatamata mai muri oqori. Me vaka ga ena veisiga makawa, e rawa meda kaukauwa vakalevu cake ena matabete ena noda vakayagataka na i Vola i Momani.
Na icakacaka ni kena vakatakilai na iVola i Momani e sega ni rawa me vakatautauvatani ki na dua na cakacaka ka volai mai vua e dua na dauvolaivola ena itukutuku makawa vakatamata. E rawa meda kaya ni sa ikoya e dua na ivola ka a taqomaki mai na “iqaqalo ni liga” ni noda Kalou. Ena Nona veisiko ki Amerika makawa, a kerei Nifai na Turaga me kauta mai na ivolatukutuku era a maroroya tu ka vakaraitaka Vua. A qai vakaraica o Jisu ka vakarota eso na ka kei na malanivosa me tomani kina.5 “A sa kaya [na iVakabula]: Sa vakarota ko Tamaqu meu tukuna vei kemudou na ivunau oqo ni sa sega ni tu vei kemudou; raica sa vakarautaka tu ena nona lewa vuku me qai vakatakila vei ira na itabatamata e muri.”6 Au vakila noqu vakavinavinaka tawa yalani niu lewena na itabatamata e muri. O au e dua na lewe ni Lotu kau vakavinavinakataka na iVola i Momani. Au na sega ni guilecava rawa na veika au vakila ena noqu se gonetagane voli e Uruguay kau qai wilika na ivola vakamareqeti oqo ena imatai ni gauna. A sega soti ni gadrevi meu wilika vakalevu na 1 Nifai meu sotava kina na reki ka sega ni rawa me vakamacalataki ena vosa. E vaka e dua na ivola ka vakasinaiti tu ena Yalo ni Turaga ka vakavolekataki au kivua na Kalou.
Na veika au sotava oqo e vakuria na kena ibalebale ki na vosa a cavuta na Parofita o Josefa Simici me baleta na ivola oqo ena nona a kaya ni “dua na tamata ena volekata sara na Kalou mai na nona vakamuria na kena ivakavuvuli, mai na ivola tale eso.”7 Au kila talega na ivakatakila ni yalayala nei Peresitedi Thomas S. Monson ena nona kaya ni “noda wilika na i Vola i Momani kei na so tale na itagede ni cakacaka, ka da biuta na ivakavuvuli ki na veivakatovolei eda na qai kila na ivunau, baleta ni oqo na noda yalayala; eda na qai kila kevaka e lako mai vua na tamata se mai vua na Kalou.”8
Na veivosa ni yalayala oqo e kauta mai vei keda na reki ena gauna oqo kei na noda gauna sa bera mai. Ena noqu ciqoma e dua na ivakadinadina ni iVola i Momani, na ka au vakila vakatamata e muria mai sa ikoya e dua na gagadre meu vakayagataka na ivakavuvuli ni ivola mai na kena caka na veiyalayalati. Au cakava na kena veiyalayalati ena noqu papitaiso ka vakadeitaki me dua na lewe ni Lotu. Na veiyalayalati ka caka mai na cakacakatabu vakalotu ni matabete, salavata kei na kila mai na iVola i Momani, e veisautaka na noqu bula.
E sega ni ka veivakurabuitaki ena gauna a sikova kina na vanua o Amerika makawa na iVakabula, mai na veivakatavulici ni ivunau, a solia o Koya vei Nifai kei ira na tani na kaukauwa me ra veipapitaisotaki.9 Ena so tale na kena vosa, erau tu veitikivi na ivunau kei na cakacakatabu vakalotu. Na kena vakayacori taucoko na ivakavuvuli ni iVola i Momani e gadrevi kina na cakacakatabu vakalotu ni matabete vata kei na nodra veiyalayalati ka salavata kaya.
Eso na ivola biu mai ki na makete ka totolo na kena yaco me voli vakatotolo. Ena so na gauna era tosoya cake na kena tubu ka ra qai waraka tu na tamata na kena vagalalataki mai. Na mataqali ivola vakaoqori era vakasinaita na makete ena gauna vata ga e rawa mo raici ira kina na tamata ni ra wilika tu e veivanua. Ena Nona vuku sega ni vakaiyalayala na Kalou a maroroya tu na iVola i Momani me yaga vei keda. E sega ni kena inaki me volitaki ga vakatotolo. Ia, me rawa meda vukica na ivola vakamareqeti oqo ki na dua na ivola wiliki vakavinaka ka vakayagataki vakavinaka ena noda bula. Meu vakatututaka mada e tolu na itaviqaravi ka rawa me vukei keda ena noda vukica na iVola i Momani me wiliki vakavinaka ka vakayagataki vakavinaka, ka na rawa me vakaukauwataki keda edaidai meda yaco meda kaukauwa vakalevu cake ena matabete, me vakataki ira ena gauna makawa.
iMatai, tugana na vosa i Karisito. E dodonu meda wilika na iVola i Momani me rawa ni da “tugana ki lomamudou na vosa i Karisito; raica, na vosa i Karisito sa tukuna vei kemudou na veika kece mo dou kitaka.”10 Na tugani ni vosa i Karisito sa ikoya e dua na ka o sotava ka sega ni vakatautauvatani rawa. Ni da wilika ka vaqara na ivakavuvuli kei na ivunau me vukea noda bula ni veisiga yadua, ena vakavoui na noda sasaga vagumatua. Kena ivakaraitaki, ena nodra sotava na bolebole o ira na itabatamata tubucake tiko mai me ra vorata na veiuqeti ni nodra icaba, e rawa ni da wilika na ivola me vaqarai kina na ivakavuvuli ena vukei ira ena mataqali bolebole vakaoqo. Dua vei ira na ivakavuvuli oqori e rawa me kau mai ena veika a sotava o Lemueli. A cakava o Lemueli eso na digidigi cala baleta ni muria na vosa i Leimani.11 A sega ni caka na ka dodonu baleta “ni rau sa sega ni kila na loma ni Kalou, o koya ka buli rau.”12 E dua na “ivakavuvuli eda rawa ni taura mai ena ka a yaco oqo sa ikoya na vulici ni ivunau me baleta nona qaravi keda vakacava na Kalou me vukei keda ena noda vorati ira na noda ilala. E levu cake na ivakavuvuli kei na ivakaraitaki ena iVola i Momani me baleta na iulutaga oqo ka sa ikeda sara ga oqo na itabatamata ka rawa me na yaga vakalevu vei keda na ivakavuvuli ni ivola oqo.
iKarua, bulataka ena noda bula na veika kece eda vulica baleti Karisito. Wilika na iVola i Momani kei na vaqarai ni ivakaraitaki nei Karisito sa ikoya e dua na veivakavukui cecere eda sotava. Kena ivakaraitaki, na taci Jereti tagane a kila ni Turaga sa ikoya na Kalou dina, sa sega ni daulasu.13 Sa dua na inuinui cecere e kauta mai ki yaloqu na ivakaraitaki oqo! Na veivosa ni yalayala taucoko ena iVola i Momani kei na veivosa ni yalayala mai vei ira na parofita bula edaidai era na vakayacori baleta ni sa iKoya na Kalou ka sega ni daulasu. Ena veigauna dredre mada ga oqo, eda kila ni veika ena rawa kevaka eda muria na ivakavuvuli eda vulica mai na iVola i Momani kei ira na parofita bula. Ena noda sa vulica baleta na ivakaraitaki nei Karisito, me vaka e dua a kila rawa na taci Jereti tagane, e dodonu meda cakacakataka na kena vakayagataki ena noda dui bula. Oqo ena vukei keda meda yaco meda matabete kaukauwa vakalevu cake.
iKatolu, vakatavulica na ivunau kei na ivakavuvuli e kunei ena veitabana vakamareqeti ni iVola i Momani. E rawa meda vakatavulica e dua mai na ivola oqo. E rawa mo raitayaloyalotaka na kena ikuri “na kaukauwa ni Kalou sa tu vei iratou”14 ena nodra cavuvosa na daukaulotu kei ira na lewe ni matavuvale, wiliki, se tokaruataki ena kena cavuqaqataki na vosa mai na kena ivola?
Au nanuma e dua na kaulotu e Ecuador ka ra vakayagataka o ira na kena daukaulotu na iVola i Momani ena nodra cakacaka. Me baleti ira sara ga, era sotava e udolu na vakabauta ka veivutuni ka vakasamataka me ra curu ena veiyalayalati mai na vakamareqeti ni cakacakatabu vakalotu ni matabete. Na iVola i Momani sa ikoya e dua na iyaya yaga vakalevu ena kena kunei ka veisautaki ira era yalodina ena nodra vakasaqara na dina kei na nodra vakalesui mai e vuqa na tacida kei na ganeda me ra lesu mai ki na vakayacori ni kosipeli.
Au kila ni na vakataudeitaki na veimatavuvale ena kena vakayagataki na ivakavuvuli ni ivola cecere oqo ena nodra bula. Era lewe vuqa na luveda era na vakabulai baleta era na nanuma, me vakataki Inosi, na vosa e dau rogoca wasoma mai vua na tamana ena nona vosataka na veika me baleta na bula tawamudu, ka baleta ni ka oqo, e kila ni sa bokoci dina na nona ivalavala ca enaVeisorovaki nei Karisito.15
O iko kei au, me vaka ni daru tiki ni itabatamata sa bera mai ka sa tukuni tiko, e rawa meda matabete kaukauwa vakalevu cake ena noda vakayagataka na iVola i Momani ka rokova noda veiyalayalati ni matabete. Na iVola i Momani e vakadinadinataki Jisu Karisito, kau vakadinadinataka talega, ena yaca i Jisu Karisito, emeni.