Na iOtioti ni Vosa
Kevaka eda na vakarorogo ki na Nona vosa ka bulataka na ivunau, eda na lako sivita rawa na gauna ni veivakawaleni kei na caka ca oqo.
Sa vakasinaiti na yaloqu ni da yacova mai na itinitini ni koniferedi oqo. Eda sa vakavulici vakavinaka ka laveti cake vakayalo ena noda vakarorogo voli mai ki na veitukutuku sa kacivaki kei na ivakadinadina sa wasei. Eda vakaraitaka na noda vakavinavinaka vei ira vakayadua era a vakaitavi, ka ra okati kina na Veitacini era a cabo masu.
E baci vakasakiti tale na ivakatagi kei na sere. Au vakaraitaka noqu vakavinavinaka vakaiau me baleti ira era solia nodra igu me ra wasea vata kei keda nodra taledi—e tarai keda ka veivakauqeti na kena vakayacori. Na totoka ni ivakatagi era vakayacora e vakatorocaketaka ka vakabulabulataka na soqoni vakayadua ni koniferedi.
Keimami tokaruataka tale vei kemuni ni na tabaki tiko na itukutuku eso eda sa rogoca ena koniferedi oqo ena Ensign kei na Liaona ni Noveba. Ni da wilika ka vulica, ena vakaikuritaki na noda kila kei na noda vakauqeti. Me da vakayagataka ena noda bula ni veisiga na dina e toka kina.
Eda vakaraitaka vei ira na Veitacini era sa vagalalataki ena koniferedi oqo na noda vakavinavinaka titobu. Era sa veiqaravi vakavinaka ka cecere na nodra cau ki na cakacaka ni Turaga. Sa taucoko na nodra yalodina. Eda vakavinavinaka vei ira ena vu ni yaloda.
Eda bula donuya e dua na gauna era sa lewevuqa kina na kai vuravura era lako tani mai na veitaqomaki ni bulamuria na ivakaro. Sa vakarawarawataki na veika bibi ka dredre, sa vakanadakui ka voroki na lawa ni Kalou ena veitikotiko raraba. E vakavuqa na noda dau raica ni da qalo vorata na kui, ka so na gauna na kena irairai e sa vaka me rawa meda na kuitaki tani yani.
Au nanuma kina na vosa ni Turaga ka kunei ena ivola i Ica ena iVola i Momani. E kaya na Turaga: Raica kevaka au sa sega ni vakarautaki kemudou mo dou sota kei na ua lelevu ni wasawasa, na cagi kei na uwaluvu, dou na sega ni kosova rawa na wasaliwa titobu oqo.“1 Kemuni na taciqu kei na ganequ, sa vakarautaki keda tu o Koya. Kevaka eda na vakarorogo ki na Nona vosa ka bulataka na ivunau, eda na lako sivita rawa na gauna ni veivakawaleni kei na caka ca oqo ka rawa ni vakatauvatani ki na ua kei na cagi kei na uwaluvu ka rawa ni veivakarusai. Sa dau kauwaitaki keda tikoga ko Koya. E lomani keda ka na vakalougatataki keda o Koya ni da cakava na veika e dodonu.
Eda sa vakavinavinaka ni sa tadola dina tu na lomalagi, sa tu na kosipeli i Jisu Karisito sa vakalesuimai, ia na Lotu oqo e yavutaki ena vatu ni ivakatakila. Eda sa tamata vakalougatataki dina, ni ra sa tu e vuravura nikua na iapositolo kei na parofita.
Ni da sa vakasuka yani mai na koniferedi oqo, au sa laiva vei kemuni yadua na veivakalougatataki mai lomalagi. Mo ni lesu tale ena bula v inaka ki na nomuni veivale. Ni ko ni vakasamataka na veika o ni sa rogoca ena koniferedi oqo, mo ni kaya, vata kei ira na tamata nei Penijamini na Tui ka ra a kacivaka vata ena dua na domo, “Keimami sa vakabauta na vosa kece ko ni sa tukuna, keimami sa vakadinata talega ni sa ka vakaidina sara, raica sa cakacaka yaco na Yalo ni Turaga sa Kaukauwa Sara ki na yaloi keimami … ka keimami sa biuta tani na gagadre ca ka via kitaka tikoga na ivalavala dodonu.”2 Vei kemuni vakayadua na tagane kei na yalewa, na gonetagane kei na goneyalewa mo ni lako yani mai na koniferedi oqo ka sa tamata vinaka cake mai na kemuni ituvaki ena gauna a tekivu kina ena rua na siga sa oti.
Au lomani kemuni, na taciqu kei na ganequ. Au dau masulaki kemuni. Au na kerea tale vei kemuni mo ni dau nanumi au kei ira kece na Vakaitutu Raraba ena nomuni masu. Keimami duavata kei kemuni ena kena tosoi ki liu na cakacaka vakasakiti oqo. Au vakadinadinataka vei kemuni ni da duavata kece ena ka oqo ka sa dui tu na noda itavi na tagane, yalewa, kei na gone yadua. Me solia vei keda na Kalou na kaukauwa kei na kila ka kei na yalodina me da qarava vakavinaka kina na noda itavi.
Au wasea vei kemuni na noqu ivakadinadina ni dina na cakacaka oqo, ni bula tiko na noda iVakabula, ka ni liutaka ka dusimaka tiko na Nona Lotu e dela ni vuravura oqo. Au laiva vei kemuni na noqu ivakadinadina bula kei na noqu ivakadinadina ni bula tiko na Kalou na Tamada Tawamudu ka lomani keda. Sai Koya dina na Tamada, sa bula vakataki Koya ka dina.
Me vakalougatataki kemuni na Kalou. Me tiko vata kei kemuni na Nona vakacegu sa yalataki tu ena gauna oqo kei na veigauna kecega.
Au sa vakamoce vei kemuni me yacova ni da qai sota tale ena vula ono mai oqo, ka vakayacora vakakina ena yacai Jisu Karisito, na noda iVakabula ka Dauveivueti ka noda Dautataro vei Tamana, emeni.