Na Veivakavulici e Vukea na Vakabulai ni Tamata

Russell T. Osguthorpe

Peresitedi Raraba ni Matawilivola ni Sigatabu

Eda sa vakavulica na ivunau bibi, sureti ira eda vakavulica me ra cakava na cakacaka sa solia mai vei ira na Kalou ka yalataka ni na yaco dina mai na veivakalougatataki.

iVakatakilakila

Russell T. Osguthorpe

Ena dua na siga niu a se peresitedi tiko kina ni kaulotu, keirau a veivosaki sara tiko kei luvei keirau tagane qase ena talevoni. A gole tiko o koya ki na valenibula e cakacaka tiko kina vakavuniwai. Ena gauna sa yaco yani kina, a kaya mai, “Vinaka vakalevu, Ta, meu sa sobu meu laki vakabula mada eso na tamata.”

Na luvei keirau oqo e dau qaravi ira na gone e tauvi ira na mate e rawa ni veivakamatei. Ena gauna sa dikeva rawa kina e dua na mate ka cakava na kena veiqaravi donu, sa rawa me na bula na gone. Au a kaya vei ira na neitou daukaulotu ni nodra cakacaka sa vukea na nodra vakabulai talega na tamata—o ya na nodra bula vakayalo o ira era vakavulica.

E kaya o Peresitedi Joseph F. Smith, “Ni da [sa taura] na dina [eda] na vakabulai kina. [Eda] na sega ni vakabulai kina baleta ga ni dua a vakavulica vei [keda], e baleta ga [ni da] sa taura ka cakacakataka” (ena Ripote ni Koniferedi, Epe. 1902, 86; raica talega Na Veituberi, Ai Lutua ni Bula [1999], 49; 1 Timoci 4:16).

E vakabulai ira na tamata na luvei keirau ena nona wasea na kila ka ni veika vakavuniwai; o ira na daukaulotu kei ira na qasenivuli ena Lotu era vakabulai ira na tamata ena nodra wasea na nodra kila na kosipeli. Na gauna era dau vakauqeti kina na daukaulotu kei na qasenivuli ena Yalotabu, era na vakavulica na ivakavuvuli donu, sureti ira era vakavulica me ra bulataka na ivakavuvuli o ya, ka dau vakadinadinataka na veivakalougatataki yalataki ni na yaco dina mai. Ena dua na soqoni ni vuli se qai oti wale ga oqo a wasea kina o Elder David A. Bednar e tolu na ivakarau rawarawa sara me mana kina na veivakavulici: (1) uto ni vunau, (2) veisureti me vakayacori, kei na (3) veivakalougatataki yalataki.

Na idusidusiVunautaka na Noqu Kosipeli e vukei ira na daukaulotu me ra vakavulica na uto ni vunau, sureti ira na vakavulici tiko me ra vakayacora, ka ciqoma na veivakalougatataki yalataki. Na idusidusi Veituberi, Me iLutua ni Noda Bula ena vukei ira na itubutubu kei na qasenivuli me ra cakava vakakina. Sa ikoya na vakavulici ni kosipeli ena Vunautaka na Noqu Kosipeli me vakakina na cakacaka ni daukaulotu. Eda vakayagataki rau ni da vakarau veivakavulici, ka vakauqeti ena Yalotabu ena noda veivakavulici.

O Peresitedi Thomas S. Monson a talanoataki Lucy Gertsch, e dua na qasenivuli ni matawilivola ni Sigatabu ena nona se itabagone kina. Dua na Sigatabu, ena gauna ni lesoni me baleta na veiqaravi lomasoli, a sureti ira na nona gonevuli o Sisita Gertsch me ra solia na nodra ilavo ni kana ki na dua na nona matavuvale e dua vei ira na nodra lewenikalasi e sa mate o tinana. A kaya o Peresitedi Monson ni kena vakayacori na kerekere o ya, sa cakava kina o Sisita Gertsch me “sogoti na ivolavakarau ka dolavi na matada kei na daligada kei na yaloda ki na lagilagi ni Kalou” (“Examples of Great Teachers,” soqoni ni vuli veiliutaki e vuravura raraba, Fepe. 10, 2007], Liahona, June 2007, 76). A vakayagataka dina o Sisita Gertsch na ivolavakarau me vakarautaka kina na nona lesoni, ia ni yaco mai na veivakauqeti, a sogota na ivolavakarau ka sureti ira na nona gonevuli me ra bulataka na ivakavuvuli vakosipeli a vakavulica tiko.

Me vaka a vakavulica o Peresitedi Monson, “Na inaki ni vakavulici ni kosipeli … e sega ni ‘sovaraki ni itukutuku’ ki na nodra vakasama na lewenikalasi … Na inaki bibi o ya me vakauqeta na tamata me vakasamataka, vakila, ka qai vakayacora e dua na ka me bulataki kina na ivakavuvuli vakosipeli” (ena Conference Report, Oct. 1970, 107).

Ni sa rairai o Moronai vei Parofita Josefa Simici, a sega walega ni vakavulici koya ena ivunau bibi baleta na Veivakalesuimai, ia a tukuna talega vua “ni sa digitaki [koya] na Kalou me qarava e dua na cakacaka” ka yalataka vua ni na rogo na yacana e vuravura taucoko (raica Josefa Simici—Ai Tukutuku 1:33). O ira kece na itubutubu kei na qasenivuli ni kosipeli era sa italai mai vua na Kalou. Eda sega kece ni na vakavulica e dua me na laki parofita e muri, me vaka rau a cakava o Sisita Gertsch kei Moronai, ia eda sa vakavulici ira era na laki iliuliu ni Lotu mai muri. Eda sa vakavulica kina na ivunau bibi, sureti ira eda vakavulica me ra cakava na cakacaka sa solia mai vei ira na Kalou, ka yalataka ni na yaco dina mai na veivakalougatataki.

Au vakasamataka lesu niu se gonetagane kau dau malaude niu taubale ki lotu me baleta na soqoni ni Lalai. Niu yaco yani, au kurabui ni ra sa tiko kece e kea na itubutubu ena vuku ni dua na parokaramu talei. Au sa qai nanuma. Au vakaitavi talega kina, kau sa guilecava meu cavuqaqataka na noqu vosa. Ni sa yaco mai na noqu gauna, au sa tucake sara mai na noqu dabedabe, kau sega ni cavuta rawa e dua na vosa. Au sa sega ni nanuma rawa e dua na ka. Kau sa mani tucake tu ga ka dabe sobu tale ka wanonova tu na vuloa.

Ni oti na ka o ya, au a yalataka meu kakua tale ni vosa ena dua na soqoni ni Lotu. Kau a mani vakayacora sara tiko. Ena dua na Sigatabu, a mai tekiduru e yasaqu o Sisita Lydia Stillman, na iliuliu ni Lalai ka kerei au meu vosa vakalekaleka ena macawa ka tarava. Au a kaya, “Au sega ni dau vosa.” A kaya mai o koya, “Au kila, ia qo e rawa ni o vosa baleta niu na vukei iko kina.” Au a bese tikoga, ia a vakaraitaka vei au nona veivakabauti vakaitamera ka dredre kina vei au meu vakasuka na nona veisureti. Au a mani vosa.

Sa ikoya e dua na italai ni Kalou na marama vinaka o ya, ka solia mai vei au e dua na cakacaka meu vakayacora. A vakavulica vei au ni dau yaco mai e dua na veikacivi, mo ciqoma, ke mani vakacava sara na nomu vakila ni o sega ni veiganiti kaya. Me vaka a vakayacora o Moronai vei Josefa, a vakadeitaka o koya niu sa vakarau vinaka ena kena gauna meu vosa kina. Na qasenivuli veivakauqeti o ya a vukea meu vakabulai.

Niu se yabaki tinivakacaca tiko, a veivakavulici tiko ena neitou kalasi ni Matawilivola ni Sigatabu o Baraca Peterson e dua a kaulotu. Ena veimacawa ena droinitaka e dua na ero levu mai na tutu imawi e ra ni vavaloaloa ki na itutu imatau e cake. Ka qai vola toka e cake ni vavaloaloa, “Yaco iCake.”

Se ivunau cava ga e vakavulica, e dau kerea me keimami toso ga ki liu, me keimami torocake tale mai na kena keimami sa rawata rawa. Na ero kei na vosa e rua o ya, yaco icake, sa dau veisureti tu ga ena gauna taucoko ni kalasi. A cakava o Baraca Peterson meu gadreva dina na laki kaulotu vakavinaka, meu vinaka sara e koronivuli, meu tubu cake tikoga ena noqu cakacaka.

A solia mai o Baraca Peterson e dua na cakacaka me keimami cakava. Na nona inaki me vukea me keimami “vakasamataka, vakila, ka qai vakayacora e dua na ka me bulataki kina na ivakavuvuli vakosipeli.” A vakabulai au na nona veivakavulici.

Niu sa yabaki 19, au a kacivi meu laki kaulotu ki Taiti, kau a laki vulica kina na vosa ni rua na matanitu tani—Varanise kei na Taiti. Niu sa tekivu kaulotu au sa yalolailai vakalevu niu sega ni vinaka sara ena rua na vosa oqo. Ena veigauna au dau saga meu vosa vaka-Varanise, era vosa mai vaka-Taiti na tamata. Niu saga meu vosa vaka-Taiti, era sauma mai vaka-Varanise. Sa voleka sara ga meu sa lesu mai.

Qai dua na siga, ena noqu taubale tiko e yasa ni rumu ni savasava ena itikotiko ni kaulotu, au rogoca sara ni dua e kacivi au. Au vuki kau raica sara e dua na marama ni Taiti ulu sika e tucake tu ena olo ka yalovi au tiko mai. Na yacana o Tuputeata Moo. E kila ga na vosa vaka-Taiti o koya. Kau kila ga na vosa vaka-Valagi. Sa dua na ka na noqu via kila na veika e tukuna tiko mai, ia au kila rawa ni vinakata o koya meu gole yani ki na rumu ni savasava ena veisiga me vukei au meu vulica na vosa vaka-Taiti.

Au sa qai dau lako kina e veisiga meu lai vakatovotovo ka yayani o koya. Taumada au a vakasamataka tu se na veivuke beka na neirau veivakavulici oqo, ia ni toso tiko au sa qai vakabauti koya. Na veigauna keirau sota kina, e tukuna mai ni kila niu na rawa ni vulica ruarua na vosa o ya.

A vukei au meu kila na vosa vaka-Taiti o Sisita Moo. Ia a vukei au meu kila tale e levu na ka. Sa vakavulica sara tikoga vei au na imatai ni ivakavuvuli ni kosipeli—o ya na vakabauta na Turaga o Jisu Karisito. A vakavulica vei au ni kevaka meu vakararavi vua na Turaga, ena vukei au o Koya meu cakava e dua na ka au nanuma ni ka dredre. A sega walega ni vakabula o koya na noqu kaulotu—a vukea meu vakabulai.

Eratou a veivakavulici o Sisita Stillman, Baraca Peterson, kei Sisita Moo “ena veivakauqeti, na vosota vakadede, na yalomalua, na yalomalumalumu, kei na loloma e sega ni veivakaisini; io ena yalo e veidokai, kei na yalomatua, raica ena rarama sara kina na yalona” (V&V 121:41). Eratou a veivakavulici ena ivalavala dodonu kei na savasava ni vakanananu, ena vuku ni ka oqo, sa nodratou itokani tudei kina na Yalo Tabu (raica V&V 121:41–46).

O ira na qasenivuli cecere oqo era vakauqeti au meu taroga na veika me baleta noqu veivakavulici:

Niu qasenivuli, au vakatokai au beka meu dua na italai ni Kalou?
Au dau vakavakarau ka veivakavulici beka ena sala era na vakabulai kina?
Au dau raica beka vakatabakidua e dua na uto ni vunau ni Vakalesuimai?
Era na vakila beka o ira au vakavulica niu lomani ira kei na Tamada Vakalomalagi kei na iVakabula?
Ni dau yaco mai na veivakauqeti, au dau sogota beka na ivolavakarau ka dolava na matadra kei na daligadra kei na yalodra ki na lagilagi ni Kalou?
Au dau sureti ira beka me ra cakava na cakacaka sa solia mai na Kalou me ra cakava?
Au dau vakaraitaka beka na dina ni noqu veivakabauti ka na dredre me ra vakasuka na veisureti o ya?
Au dau vukei ira beka me ra kila na veivakalougatataki yalataki e dau yaco mai ena kena bulataki na vunau au vakavulica tiko?

Na vuli kei na veivakavulici e sega ni itaviqaravi me digitaki ena matanitu ni Kalou. Sa ikoya sara ga na inaki ni kena vakalesuimai ki vuravura na kosipeli ka da na rawata kina na bula tawamudu. Sa ikoya oqo na sala ki na noda ivakadinadina. E sega ni rawa me “vakabulai na tamata ena lecaika” (V&V 131:6).

Au kila ni bula tiko na Kalou. Au vakadinadinataka ni o Jisu na Karisito. Au sa vakadinadinataka ni o Parofita Josefa a dolava na itabagauna oqo ena nona kila na dina ka qai vakavulica yani. A vakatataro voli ga o Josefa, a ciqoma na kena isau vakalou, ka qai vakavulica na veika sa kila vei ira na luve ni Kalou. Au kila ni ko Peresitedi Monson na gusunivosa ni Turaga e vuravura nikua ka sa tomani tikoga na nona vuli ka qai vakavulici keda me vakataki Josefa, baleta ni vukea na vakabulai ni tamata na veivakavulici. Ena yaca i Jisu Karisito, emeni.