Na Noda iVakaraitaki Vinaka Sara
Na itukutuku ni kosipeli vakalesuimai nei Jisu Karisito sa ikoya ni rawa ka dodonu me da raica me na vinaka cake tiko mai na noda bula ena gauna taucoko sara ni noda bula.
Au kalougata ni soli vei au na galala meu vosa vei kemuni ena mataka ni Sigatabu edaidai. Ena duidui na noda ivakarau ni bula kei na ka eda sotava ia e duavata ga na noda mua meda vinaka cake. Ena tiko eso era na cala ni ra vakila ni ra sa vinaka cake ka tiko e so era sa sega sara ga ni via tovolea me ra na vinaka cake. Ia, kivei keda kece, na itukutuku ni kosipeli vakalesuimai nei Jisu Karisito sa ikoya ni rawa ka dodonu me da raica me na vinaka cake tiko mai na noda bula ena gauna taucoko sara ni noda bula.
E tiki ni vakanamata o ya na ivakatakila e a sa solia na Kalou vei Josefa Simici. E tukuni kina na siga eda na sotava kina na iVakabula, me vaka ni da na sotavi koya kece. E tukuna vei keda na ka meda cakava kei na ka meda nanamaki kina.
E tiko ena ivola nei Moronai: “Oi kemudou na wekaqu lomani mo dou masuta na Tamada ena lomamudou taucoko me vakasinaiti kemudou ena loloma oqo, ia na loloma sa solia vei ira sa muria na Luvena o Jisu Karisito ena yalodina mo dou yaco kina mo dou luve ni Kalou; ia ni sa rairai mai ko koya eda na tautauvata kaya ni da na raica na matana dina ia meda na rawata na inuinui oqo ka vakasavasavataki me vaka sa savasava ko Koya. Emeni.”1
O ya me na vukei kemuni mo ni kila na vuna ena vakabauta kina e dua na Yalododonu Edaidai na ka e sa tu e matana, se vakacava sara na dredre ni bula vei koya ena gauna oqo. Eda vakabauta ni da bulataka tiko na kosipeli i Jisu Karisito ni na rawa me da na vaka na iVakabula, o koya e sa vinaka sara. Ni vakasamataki na ivakarau ni bula i Jisu Karisito e dodonu me da buturaka sobu na noda dokadoka ni noda kaya tiko ni sa sega ni yaga me na vakavinakataki tiko na noda bula. Ni o koya mada ga na tamata yalomalua duadua e se nuitaka tikoga me na vakataka na iVakabula.
Na kena yaco na veisau totoka o ya, vei au, ena laurai ena dua na sere e volai me baleti ira na gone. Au nanuma niu vakaraica tiko na matadra na gone ni ra lagata tiko na sere oqo ena mataka ni Sigatabu. O ira kece na gone era vakalairoro tu yani ki liu voleka sara ki na mua ni idabedabe vaka ki liu. Au raica rawa ni vaka e rarama mai na matadra kei na nodra taleitaka ni ra lagata tiko na sere. Ko sa na rairai rogoca oti na sere oqo. Au nuitaka ni na voqa tu ga ena vuni yaloda. Au nuitaka ga me rawa niu biuta kina na veika era vakila tu na gone o ya.
Au saga tiko meu vaka i Jisu;
Au muria tiko nona ivakaraitaki.
Au tovolea meu dauloloma me vaka ikoya, ena veika au cakava ka tukuna.
So na gauna au temaki meu cakava na cala eso,
Ia au veisau me vaka e tukuna tiko na domolailai,
“Lomani ira na tani me vaka sa lomani iko o Jisu.
Tovolea mo ivakaraitaki ena ka kece o cakava.
Mo yalololoma ena nomu i tovo.
Ni o koya qo na ka e vakavulica o Jisu.”2
E vaka vei au ni ra sega walega ni laga sere tiko, era sa vakadeitaki ira sara tikoga. O Jisu Karisito e sa nodra ivakaraitaki. Sa nodra inaki me ra vakataki Koya. Ena kedra irairai e sega tale ni veisau na yaloqu ni ra sa sega tale ni qai vakatitiqa tiko. Era sa vinakata sara ga me ra rawata. Era sa vakabauta sara ga ni ivakasala ni iVakabula me da vinaka sara e sega ni dua na vakanuinui ia e ivakaro. Ka ra vakadeitaka ni sa vakarautaka ko Koya na kena sala.
Na vakabauta kei na dei ni yalo o ya me na tiko ena yalo yadua ni Yalododonu Edaidai. Sa vakarautaka oti na iVakabula na kena sala ena Nona Veisorovaki kei na Nona ivakaraitaki. O ira sara mada ga na gone era lagata na sere o ya era sa vakaraitaka tiko.
Na loloma sa ikoya na ivakavuvuli e vakaraitaka tiko na Turaga ni sa na kauti keda yani meda na laki vakataki Koya, na noda ivakaraitaki uasivi. Na noda ivakarau ni bula ena veigauna kece sara me sinai tu ena lomana na Kalou kei ira na tani. E sega ni vakidacala na kena o ya me vaka ni sa tukuna na Turaga ni oqori na imatai ka ivunau cecere me da lomana na Kalou ka lomani ira na tani. Na lomana na Kalou sa ikoya ena kauti keda yani ki na talairawarawa ki na nona ivunau. Kei na lomani ira na tani sa itakele ni noda na talairawarawa Vua.
Me vaka ga na nona a vakayagataka o Jisu e dua na gone me Nona ivakaraitaki ena nona ilesilesi ena bula oqo me ivakaraitaki vei ira na tamata, ena vuku ni nona loloma cecere ka dodonu, se rawa, me ra rawata me ra vakataki Koya kina, sa vakaraitaka vakakina o Koya na matavuvale me vakaraitaka ni rawa ni da na veilomani me vaka sara ga sa dau lomani keda o Koya.
O ya baleta ni marau levu duadua kei na rarawa levu duadua ena sotavi ena veimaliwai ni matavuvale. Na marau ka lako mai ena noda vakaliuca mai na noda marau na nodra marau na tani. O ya sara ga na loloma. Ia na rarawa ena yaco mai ni sa basika na kocokoco, sa ikoya na kena sa yali na loloma. Na ka sara ga ena gadreva kina na Kalou meda vakamatavuvale me na kauti keda yani ki na bula marau ka dro tani mai na rarawa. Na tagane kei na yalewa me rau na yalataka me rau vakaliuca na veika me baleti ira na tani. Me ra na sucu mai na gone ki na matavuvale ka me rau na raica na itubutubu me tautauvata na bibi ni nodra gagadre kei na nodra na gone. Ka vakakina na nodra lomani ira na itubutubu na gone ka veilomani vakai ira.
Sa ikoya oqori na kena ivakarau dodonu ena dua na matavuvale dau veilomani. Ena vuqa na noda veimatavuvale, era cavuti kina na veimalanivosa “E Rawa ni Tawamudu na Noda Veimatavuvale.” E tiko voleka ena neitou itikotiko e dua na vatu ni ibulubulu ni dua na tina ka buinigone. Erau sa vauci vata kei na watina ena valetabu ni Kalou ka vakakina vei ira na nodrau kawa me baleta na gauna oqo kei na veigauna tawamudu. E vakaoqo na ka e volai ena vatu ni ibulubulu, “Yalovinaka, me kakua ni dua na idabedabe lala,” A kerea me volai na veika oqori baleta ni kila ni vakatau ki na nodra dui digidigi na lewe ni matavuvale na nodra tiko vata. E tiko kina na vosa “yalovinaka” baleta ni sega ni rawa vua kei na Kalou me rau vakaukauwataka e dua me digitaka na marau. Ka tu talega o Setani, ka dau vinakata na yaluma, sega ni marau, ena veimatavuvale ena bula oqo kei na kena e tarava.
Na noqu vakanuinui nikua meu vakatura eso na digidigi, ena dredre beka ia, ena vakadeitaka vei iko ni o sa rawata me sega ni dua na idabedabe lala ena nomu matavuvale ena vuravura sa bera mai.
Taumada, au na vakasalataki ira na tagane kei na yalewa vakawati. Masulaka na loloma ka na rawa kina vei iko mo raica na veika vinaka e tu vua na nomu itokani. Masulaka na loloma ka na rairai lailai kina na veimalumalumu kei na cala. Masulaka na loloma ka na yaco kina me nomu na nona reki na nomu itokani. Masulaka na loloma mo vinakata kina mo vakalailaitaka na nona icolacola kei na nona rarawa na nomu itokani.
Au a raica oqo ena nodrau bula vakawati na noqu itubutubu. Ena iotioti ni nona tauvimate o tinaqu, na levu ga ni nona masa, na kena levu talega ni nona vakaliuca o tamaqu ena nona bula me vakacegui koya. A kerea me ratou vakarautaka na valenibula e dua na idavodavo ena nona rumu. E lomana me tiko e kea me raica me kakua ni dua na ka e leqa kina. E dau taubaletaka yani ki cakacaka ena veimataka e vica na maile ka lesu mai ki yasana ena bogi ena veigauna dredre oqori. Au vakabauta ni sa isolisoli ni Kalou vua me tubu cake na nona kaukauwa ni loloma ena gauna e gadreva vakalevu duadua kina o tinaqu. Au vakabauta ni a vakayacora tiko na veika vata ena vakayacora ko Jisu ena Nona loloma.
Ena gauna oqo, au na vakasalataki rau mada na nona itubutubu e dua na gone lakosese. Na iVakabula e ivakaraitaki vinaka sara ni loloma tawayalani. Dou nanuma na Nona vosa ni vakacegu vei ira na Nifai ka ra a besetaka na Nona veisureti taumada me ra lako mai Vua. A vosa vei ira era a bula mai na veivakarusai ka a yaco ni oti na Nona Vakamatei ena Kauveilatai: “Oi kemudou na Isireli au sa vakabula, raica au sa nanuma vakavica meu vakasoqoni kemudou vata me vaka na toa yalewa sa vakasoqoni ira na luvena ena ruku ni tabana, ia kevaka dou sa veivutuni ka lesu mai vei au ena yalomudou taucoko.”3
Na italanoa ni gone cidroi e solia vei keda kece na inuinui. A nanuma lesu na nona vale na cidroi, era na vakakina na luvemu. Era na vakila ni dreti ira lesu vei iko na nomu loloma. A solia e dua na yalayala vakasakiti, o Elder Orson F. Whitney, ena dua na koniferedi raraba ena 1929, kau kila ni dina, vei ira na itubutubu yalodina ka dau rokova na nodra sa vauci vei ira ko ira na luvedra ena valetabu: “E dina ni ra lakosese eso na sipi, ena wanonovi ira tiko na matana na iVakatawa, ena sega ni dede era sa na vakila na Nona iqaqalo na Dauveivakarautaki Vakalou ni sa dolele yani vei ira ka vakalesui ira mai ki na qelenisipi.”
Sa qai kaya talega vakakina, “Masulaki ira na luvemu dauvakawelewele ka talaidredre; kabiti ira toka ena nomu vakabauta. Vakanuinui, vakabauta, me yacova ni o sa raica na veivakabulai ni Kalou.”4 E rawa ni o masulaki ira na luvemu, lomani ira, ka dolele yani kei Jisu vei ira ena yalodei. Ni o tovolea tikoga, o sa cakava tiko na ka e a cakava ko Jisu.
Oqo, na noqu ivakasala vei ira na gone. Sa solia vei kemuni na Kalou e dua na ivakaro ka tiko vata na kena yalayala: “Mo vakarokorokotaki rau na tamamu kei na tinamu, me dede kina na nomu bula ena vanua sa solia vei iko na Turaga na nomu Kalou.”5 Oqo duadua ga na ivunau ena iVunau e Tini ka tiko na kena yalayala. Erau sa mate ruarua beka na nomu itubutubu. Ena so na gauna, o na nanuma beka ni sega ni ganiti rau na nomu itubutubu na nodra veidokai kei na vakarokoroko na luvedrau. Se o a sega sara ga ni se bau kilai rau vakadua. Ia, sai rau, na nomu mai bula. Ia ena veigauna kece, kevaka sara mada ga e sega ni vakabalavutaki na nomu bula, ena vakavinakataki cake na kena vinaka ena nomu vakarokorokotaki rau na nomu itubutubu.
Vei ira era sa wilika eso tale na matavuvale me vaka ga ni nodra dina: Era tiko eso na noqu itokani ka ra dau nanuma vakavinaka cake mai vei au na nodra siganisucu na luvequ. Era tu eso na neirau itokani vakaveiwatini ka ra dau yaco vakawasoma tu ga mai me ra mai veisiko se mai vakananuma vata kei keirau e dua na gauna ni vakacagicagi. E dau tarai au vakalevu ni dua e tekivuna e dua na veitalanoa, “Sa vakacava tiko na nomu matavuvale?” ka qai waraka na kena isau ni kune votu e matadra na loloma. Era dau vakarorogo vakavinaka niu vakamacalataka na nodra bula na luvequ yadudua. Na nodra loloma e dau vukea na noqu vakila vakavinaka cake na nona loloma na iVakabula kivei ira na luvei keirau. Ena nodra taro, au rawa ni vakila ni ra sa vakila tiko na veika e dau vakila o Jisu ka taroga na veika ena taroga.
Vei keda kece ena dredre beka me laurai ena noda bula e dua na kaukauwa vakaikuritaki me da loloma ka raici keda ena noda sa yaco tiko me da vakataki koya na iVakabula, na noda ivakaraitaki uasivi. Au vinakata meu vakayaloqaqataki kemuni. O ni sa rawata eso na ivakadinadina ni ko ni sa muria tiko na sala mo ni yaco kina me vakataki Jisu vakalevu cake. Ena veivuke me da nanuma tiko na veika eda dau vakila, ena so na gauna, me vaka e dua na gone lailai, ena gauna mada ga ni derdre kei na veivakatovolei. Vakasamataki ira na gone lalai era lagalaga sere tiko. Nanuma na veigauna o vakila, de dua ga na gauna lekaleka se qai oti, me vakataki ira na gone lalai o ya “Au saga tiko meu vaka i Jisu; au muria tiko nona ivakaraitaki.” O na nanuma beka ni a kerea ko Jisu vei ira na Nona tisaipeli me ra kauti ira mai na gone Vua, ka kaya, “Dou laivi ira na gonelalai me ra lako mai vei au, … ni sa vakataki ira na lewe ni matanitu ni Kalou.”6 O sa dau vakila beka na nona vakacegu e dua na gone lailai savasava ena so na gauna ena gauna o dau tovolea kina mo vakataki Jisu.
A yaco beka ena gauna o papitaiso kina. A sega ni gadrevi me papitaiso, baleta ni sa savasava sara ko Koya. Ia na gauna o papitaiso kina, o vakila ni o savai me savasava, me vaka e dua na gone lailai. Ena gauna a papitaiso kina, a tadola na lomalagi, ka rogoca na domona na Tamana Vakalomalagi: “O Koya oqo na noqu Gone ni toko, au sa dau vinakata vakalevu.”7 O a sega ni rogoca e dua na domo, ia o a vakila na veivakadonui nei Tamada Vakalomalagi ena nomu kitaka na veika a vakayacora ko Jisu.
O sa vakila ena nomu matavuvale ena gauna o kerea kina na nona veivosoti na watimu se ena nomu vosota e dua na gone ena cala se talaidredre. Ena dau yaco wasoma mai na veigauna vakaoqori ena nomu tovolea mo cakava na veika o kila ni dau cakava o Jisu. Ena vuku ni Nona Veisorovaki ena vukumu, na nomu talairawarawa me vaka na gone ena kauta mai e dua na yalo ni loloma mai vua na iVakabula kivei iko ka vakakina na nomu ki Vua. Oqori e dua na isolisoli sa yalataki tu vei ira na Nona tisaipeli yalodina. Ia na isolisoli oqo e rawa ni yaco mai sega vei iko duadua ga, vei ira talega na lewe ni nomu matavuvale dauloloma. E tu ena ika 3 ni Nifai na yalayala: “A luvemu kecega ena vakavulici ira na Turaga; ena ka levu talega na nodra vakacegu na luvemu.”8
Au nuitaka ni ko ni na lako yani nikua ka vakasaqara na veigauna vinaka mo ni cakava kina me vaka a dau cakava ko Koya ka loloma me vaka na Nona dau loloma. Au rawa ni yalataka vei kemuni na vakacegu ko ni dau vakila ena gauna ni gone ni na dau lako wasoma mai vei kemuni ka na mai tikoga vata kei kemuni. E dina na yalayala a vakayacora vei iratou na Nona tisaipeli: “Au sa laiva vei kemudou na vakacegu, au sa solia vei kemudou na noqu vakacegu: au sa sega ni solia vei kemudou me vaka sa solia ko vuravura.”9
E sega ni dua vei keda sa taucoko sara. Ia e rawa ni dau yaco mai vagauna na veivakadeitaki ni da sa lakova tiko na kena sala. E liu tiko o Koya vei keda, ka sa kacivi keda tiko me da muri Koya yani.
Au vakadinadinataka ni sala sai koya na vakabauti Jisu Karisito, ena papitaiso, na ciqomi ni YaloTabu, kei na vosota ena loloma meda talairawarawa ki na Nona ivunau. Au vakadinadinataka ni bula tiko na Tamada ka lomani keda. E lomana na Luvena e Duabau ga na Turaga o Jisu Karisito o koya na noda ivakaraitaki uasivi. O Josefa Simici na parofita ni Veivakalesumai. E a raica na Tamada kei na Luvena. Au kila ni o ya na ka dina. E tiko ena Lotu i Jisu Karisito ni Yalododonu Edaidai na kaukauwa ni matabete me solia na cakacakatabu vakalotu ka na vakatara vei keda meda na vinaka cake sara me vaka na iVakabula kei na Tamada Vakalomalagi. Au sa laiva vei kemuni na noqu veivakalougatataki mo ni na vakila ka vakadinadinataka me vaka e dua na gonelailai ena yacai Jisu Karisito, emeni.