Dou Yalomatua ena Ka Kecega

Elder Kent D. Watson

Ena Vitusagavulu

Na noda vulica meda yalomatua ena veika kecega sa isolisoli vakayalo ena cakacaka ga ni Yalo Tabu.

iVakatakilakila

Elder Kent D. Watson

Ena Nona sauma na vakatataro nei Parofita Josefa Simici, a vakasala kina na Turaga: “Ia sa rawa walega me ra vakaitavi kina ko ira era sa yalomalumalumu ka dauloloma; ko ira sa tu vei ira na vakabauta, na inuinui kei na loloma, io ko ira sa yalomatua ena ka kecega era sa vakaitavi kina.”¹

Na ivakasala meda dau yalomatua ena veika kecega, sa baleti keda yadudua. Na cava na yalomatua kei na cava e gadreva kina na Turaga meda yalomatua? E dua na kena ivakaraitaki o ya “na noda tarovi keda mai na kakana kei na gunu.” E dina, ni ibalebale ni yalomatua sa vakamacalataki vakavinaka kina na kena maroroi na Vosa ni Vuku. Eso na gauna ena rawa me tukuni me yalomatua sai koya na “gole tani mai na cudru, se sega ni dau yalo ca.” Na ivakamacala oqo, sa dua ga na tiki ni kedra vakayagataki vakaivolanikalou na vosa oqo.

Ena vakasama vakayalo, na yalomatua sa itovo vakalou i Jisu Karisito. Sa gadrevi keda yadudua meda vakamuria na itovo vakaoqo. Na noda vulica meda yalomatua ena veika kecega sa isolisoli vakayalo ena cakacaka ga ni Yalo Tabu.

Ena gauna a vakamacalataka kina o Paula na iApositolo na vua ni Yalotabu ena nona iVola vei ira na kai Kalatia, a tukuna ni o ya na “loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, [kei na] ivalavala malua.”²

A volavola o Paula vei Taito, ka vakamacalataka na itovo e gadrevi vua e dua na bisopi me veivuke ena cakacaka oqo, a kaya ni dodonu vua e dua na bisopi “me kakua ni domoqa, me kakua ni daucudrucudru, … [ia me] daurawa na yalona.”³ Na yalomatua sai koya na vakaivakarautaki ni veika kecega se na taqomaka na yalona.

Ena gauna a veivakavulici kina o Alama Lailai ena vanua o Kitioni, a kaya:

“Au kila dou sa sega ni yaloviavialevu; au kila dou sa sega ni domona na iyau kei na veika wale ni vuravura… .

“Ia mo dou vakamalumalumutaki kemudou, dou talairawarawa ka yalomalua; mo dou vakamasuti rawarawa; ka sinai ena loloma kei na vosota vakadede; ka yalomalua ena ka kecega.”⁴

E muri a qai vola o Alama vei Sipiloni na luvena tagane, ka sa na baleti keda yadudua “mo qarauna mo kakua ni vakalevulevui iko,”⁵ ia “mo yalomalua ka gumatua ena ka kecega.”⁶ Na yalomatua sai koya meda dikeva vakavinaka na noda sasaga kei na gagadre; ka meda gugumatua ka dau vosota ena vakasaqarai ni inakinaki savasava.

Ena vica na yabaki sa oti, au a draiva lesu tiko i vale mai na cakacaka ka lako tiko mai yasana kadua e dua na lori levu ka qai cawi tani mai e dua na kena taya yarua e muri. A qai vuka takoso mai na taya. Sa qai tavaladelade mai na taya ki na noqu yasa ni gaunisala. Era sa veileveyaki na motoka e yasana ruarua, era sega ni kila rawa na draiva ena dri tale evei na taya. Au a qai leve ena imawi ka dodonu meu leve ena imatau, a qai dri donu mai na taya ka lauta na tutu ni noqu iloilo e liu.

E dua na itokani a qiriti watiqu sara ni sa yaco na vakacala ka. A qai kaya vei au ni nanuma niu sa mavoa mai na kavoro ni iloilo. E dina, niu a ubi tu ena vurumemea ni kakavorovoro ni iloilo ia au a sega sara ga ni mavoa. E a sega ni baleta na noqu kila ka vakadraiva, ia a baleta ni iloilo ni noqu motoka lailai e caka mai na iloilo kaukauwa.

Na iloilo kaukauwa, me vaka ga na sitila kaukauwa, era dau vakatakatari me vakatubura na kena kaukauwa. Ni gauna e dau vorati kina na iloilo kaukauwa oqo, ena sega ni katuvu rawarawa me momoto gagata na kena kakavorovoro ka rawa ni veivakamavoataki.

Sa vakakina, na yalomatua ni tamata—ni dua e yalomalumalumu ka sinai ena loloma—sai koya talega e dua sa qaqaco tu na nona bula vakayalo. Ena qaqaco ni bula vakayalo, eda sa rawa ni vakayalomatuataki keda ka bula ena dua na ivakarau. Eda na vulica meda lewa se tarova na noda cudru, yalovakatani, kei na viavialevu. Ena qaqaco ni noda bula vakayalo eda na taqomaki keda rawa mai na veika rerevaki kei na veivesuki ni veivakarusai ni vuravura nikua.

Eda na vakasaqara kece na vakacegu ni vakasama ka da gadreva kece me ra taqomaki ka bula marau na noda matavuvale. Kevaka meda vakasaqara na veika vinaka ena veiyabaki sa oti ni leqa vakailavo, e rairai na veivakatovolei era sotava eso sa ka ni vuli vei keda ni vakacegu ni vakasama, bula taqomaki kei na marau e sega ni lako mai ena kena voli e dua na vale se vakalevutaki ni iyau ka dau tubu kina na dinau ka sivia cake na levu ni ka e tiko se keda isau eda rawata.

Eda bula tiko ena dua na vuravura e sega kina na vosota ka sega kina na veinanumi ka sinai tu ena veilecayaki kei na veicacati. Sa vaka na nodra itikotiko na saumaki vou ki na veimatalotu a bula voli kina o Josefa Simici ni se yabaki 14 ni a vakasaqara voli na isau ni nona vakatataro. A kaya na cauravou o Josefa: “Kevaka era a veilomani dina, ia sa tubu ga na nodra veivakacacani ka sa duidui vakalevu sara na nodra nanuma.”⁷

Na taqomaki ni noda matavuvale e yaco mai na vulici na vakatulewa vakavuku, ka dro tani mai na veika cacawale ni vuravura, ka yalomatua ena veika kecega. Na vakacegu ni vakasama e rawa ena kena vaqaqacotaki na vakabauti Jisu Karisito. Na bula marau e rawa mai na gumatua tiko ena maroroi ni veiyalayalati ni papitaiso kei na kena ena valetabu ni Turaga.

Na ivakaraitaki cava beka ena uasvi duadua cake baleta na yalomatua me vakataki noda iVakabula o Jisu Karisito?

Ni vakayavalati na yaloda me cudru ena veileti kei na veicacati, a vakavulica na iVakabula meda “veivutuni, ka yaco me vaka na gone lalai.”⁸ E dodonu meda veivinakati mada kei tacida ka qai gole yani kivua na iVakabula ena yaloda taucoko⁹

Ni so era caka ca, e vakavulica o Jisu ni “ia na noqu yalololoma ena sega ni takali vei iko.”¹⁰

Ni da sotava na veika rarawa, a kaya kina o Koya: “Ia mo vosota sara na veika rarawa, io mo kakua ni cudruvi ira era sa vosa vakacacani iko. Mo tudei sara ka lewa vakadodonu e na nomu vuvale.”¹¹

Ni da vakasaurarataki, eda na yalo vakacegu ni da kila tu ni “sa vakasaurarataki, ka sa vakamalumalumu ga ko koya, ia sa sega ni vosa mai ko koya.”¹² “E dina sa colata ko koya na noda rarawa, ka sa colata na rarawa ni lomada.”¹³

Ena gauna a vakararawataki kina o Jisu Karisito, sa cecere duadua, a rarawa ena vukuda me yacova ni sa titiri mai yagona taucoko na tiki ni dra, a sega ni cudru se yalo vakatani ni sa vakararawataki. Ena yalovosota cecere duadua, se yalomalua, sa sega ni nanumi Koya ia o iko kei au. Ia, ena yalomalumalumu ka sinai ena loloma, a kaya kina, “Ia me vakarokorokotaki ga ko Tamaqu, raica au a gunuva na bilo ko ya, ka vakacavara na noqu itavi ena vukudra na luve ni tamata.”¹⁴

Ena yabaki sa oti, a noqu madigi meu wasea na noqu ivakadinadina ni sa bula tiko na noda iVakabula kei na Vakalesuimai ni kosipeli vei ira na Yalododonu kei na itokani e Esia taucoko. E vuqa vei ira sa isevu ni itabatamata ni Yalododonu Edaidai, era bula tiko ena kila taumada ni Lotu. Na iusutu ni ilakolako edaidai sa veivakayadrati tiko ki na veika a sotavi mai vei ira na Yalododonu Edaidai ena veiyabaki sa sivi.

Ena vuravura totoka oqo ni veika duidui e Esia, era lewe lailai sara kina o ira na lewena Na Lotu i Jisu Karisito ni Yalododonu Edaidai ena kedra maliwa e dua na lewenivanua vakaitamera, kau vakavinavinakataka kina na nodra isolisoli talei ni yalomatua sa va- Karisito. Au lomana ka dokai ira na Yalododonu oqo ka ra vakavulici au ena nodra itovo ena ibalebale dina ni yalomalua ka sinai ena loloma, “ka yalomatua ena veika kecega se cava ga [era] na veiqaravi kina.”¹⁵ Ena vukudra, au sa mai kila vakavinaka kina na loloma ni Kalou vei ira kece sara na luvena.

Sa noqu ivakadinadina ni sa bula tiko na noda Dauveivueti kei na Nona isolisoli vakalou ni yalomatua sa vakarautaki tu me nodra yadudua na luve ni Kalou, ena yaca i Jisu Karisito, emeni.