Na Rawarawa kei na Lomasoli ni Vakabauta
Na bulataki ni kosipeli ena veisiga yadua ni noda bula e kauta mai e dua na malumalumu ni yalo ka gadreva na rawarawa kei na lomasoli ni vakabauta na vosa ni Kalou.
Ena vica na vula sa oti e vakavica na kena vakalesui tiko mai vei au e dua na tiki ni ivolanikalou e volai koto ena Ilamani, wase 6: “Ia eda sa raica eke ni sa sovaraka na nona Yalotabu na Turaga vei ira na Leimani, ni ra sa soli ira vua ka vakabauta na nona vosa” (tikina e 36).
Niu wilika na ivolanikalou oqo ena noqu gauna ni vuli vakaiau, e tara vakatitobu na lomaqu ka vakavuna noqu vakasamataka tiko ena vica vata na macawa. A tekivu noqu taroga kevaka au kunea ni rawarawa noqu vakabauta na vosa ni Kalou. Ka cava na vuna e rawarawa kina vei ira na Leimani curuvou oqo me ra vakabauta? Na cava e yaco me vakavuna na tamata me ra veisevaki ka tawa vakabauta me ra rawata na rawarawa kei na lomasoli ni vakabauta na vosa ni Kalou (raica 4 Nifai 1:39)?
Eda vulica baleta na veika e vakavuna na veisau oqo ena loma ni dua na yabaki veivakurabuitaki. Ena ika 62 ni yabaki ni nodra gauna ni lewa na dauveilewai, era lewe 8,000 na Leimani e Saraemala era papitaisotaki me vaka na kaukauwa kei na lewa ka tu vei rau ko Nifai kei Liai ka soli talega vei rau na veika e dodonu me rau vunau kina (raica Ilamani 5:18–19). Era lewe tolu na drau tale era a papitaiso mai na dua na ka veivakurabuitaki a sotavi ena nodra rogoca e dua na domo ka laubasikata sara na yalodra (raica Ilamani 5:30). O ira na lewe 300 oqo era sa lako sara me ra laki vakamatei Nifai kei Liai ena nodrau sa dabe toka ena valeniveivesu, ia era raici rau na lewe 300 oqo ni rau vosa tiko vua na Kalou ena gauna a nanuma ka kila kina o Aminatapi, ka a Nifai taumada ka sa vuki tani mai na Lotu, ni dodonu me ra masu me yacova ni ra sa vakabauta na Karisito (raica Ilamani 5:35–41). E lewe vuqa na Leimani era sa papitaiso mai na ivakadinadina ni lewe 300 ena nodra vunau vei ira na tamata ka vakadinadinataka na veika era sa raica ka rogoca (raica Ilamani 5:49–50).
Sa mai cava na itukutuku ni ika 62 ni yabaki ena itukutuku oqo: “Era sa lewevuqa sara na Leimani era sa tamata yalododonu” (Ilamani 6:1).
Na itagede cecere ni nodra saumaki ki na lotu a vakavuna nodra muduka sara nodra cudru na Leimani ka luvata nodra iyaragi ni vala me baleti ira na Nifai (raica Ilamani 5:51); sa tudei sara na nodra vakabauta (raica Ilamani 6:1); era sa muria na ivunau ka lako ena yalodina kei na ivalavala dodonu (raica Ilamani 6:34); ka ra sa tubu cake sara ena nodra vakabauta na nodra Kalou (raica Ilamani 6:34).
E uqeti au vakalevu na nodra rawarawa kei na lomasoli ni vakabauta na vosa ni Kalou. Na rawarawa kei na lomasoli ni vakabauta oqo e kauta mai vei ira vakayauyau na Yalotabu ka vukei ira me ra vosota ena vakabauta me yacova na ivakataotioti (raica Ilamani 15:5–9).
E ka ni rarawa, ni gauna vata sara ga oqo, era lewe vuqa na Nifai era sa “yalo kaukauwa, sega ni via veivutuni, ka ra sa ivalavala ca vakalevu sara” (Ilamani 6:2; raica talega na tikina e 31–34). Na veibasai ni veika era sotava na Leimani e sa yaco tiko vei ira na Nifai. Na nodra yalo kaukauwa sa biuti ira kina na Yalotabu (raica Ilamani 6.35), ia na nodra yalo malumalumu na Leimani e sovaraki kina vei ira na Yalotabu.
Ena noqu vakananuma se cava e vakavuna na veisau levu oqo e lomadra na Leimani, au sa qai kidava ni rawarawa kei na lomasoli oqo ni vakabauta na vosa ni Kalou e lako mai ena dua na yalo malumalumu. E lako mai ena dua na loma e qaqarauni ki na Yalo Tabu. E lako mai ena dua na loma ka rawa me loloma. E lako mai ena dua na loma me na cakava ka taqomaka na veiyalayalati vakamareqeti. E lako mai ena dua na loma ka rawa ni vakila na kaukauwa ni Veisorovaki i Karisito.
Na rawarawa ni vakabauta oqo e lako mai na dua na ivakaraitaki mai vei ira eso era yalo malumalumu ka vakaraitaka na rawarawa ni vakabauta, oqo me vakataki Nifai kei Liai. O Ilamani na tamadrau, a vakatokayacataki rau o Nifai kei Liai me kauta lesu mai vei rau na vakabauta nei tamadrau (raica Ilamani 5:6). E vaka talega kina, e vuqa vei keda e vakatokai ena yacada e dua na ivotavota ni vakabauta mai vei ira noda qase ka ra yalo malumalumu ka rawarawa nodra vakabauta na vosa ni Kalou. Eso vei ira oqo era vakataki Ephraim K. Hanks na tukaqu vakatolu, o koya, ena nona kila ni tuakana tagane e qase cake “sa lewena na Momani” a vakadeitaka me kauti koya lesu tale mai ki vale. Sega ni veivakurabuitaki, a toki ki Nauvoo o Ephraim ka papitaiso ni oti ga nona rogoci tuakana ena nona wasea na ivakadinadina kei Josefa Simici kei na vakalesuimai ni kosipeli (raica na Richard K Hanks, “Eph Hanks, Pioneer Scout” [veitarogi ena master’s, Brigham Young University, 1973], 18–21).
Eda sa vakalougatataki vata kei ira na tani ena ivolanikalou ka vakatavulica vei keda meda rawata rawa vakacava na rawarawa kei na lomasoli meda vakabauta. O Nifai, na luvei Liai tagane, e dua na kena ivakaraitaki. Na imatai na ka e cakava ena gauna e rogoci tamana kina ena nona vakatavulica na vakarusai kei Jerusalemi sa ikoya me tagi vua na Turaga me yacova ni sa malumalumu na yalona ena nona vakabauta taucoko na vosa e vosataka o tamana (raica 1 Nifai 2:16). A vosa vakadodonu na Turaga kivei Nifai, ka kaya, “I Nifai, ko sa kalougata, ni ko sa dauvakasaqarai au vagumatua ena yalomalumalumu ni ko sa vakabauta.” (1 Nifai 2:19). E vakatavulica o Nifai na bibi ni gagadre kei na gugumatua ni kena taqomaki na ivakaro kei na ilesilesi mai vua na Kalou me rawa kina ni kaya ena vakacegu, “Au na lako ka vakayacora” (1 Nifai 3:7).
Eda vulica mai vei Inosi na bibi ni noda vakatara na vosa ni Kalou me sobuta vakatitobu na lomada me yacova noda gadreva na dina (raica Inosi 1:3–4). Na rawarawa ni vakabauta ena yaco mai ena gauna e sa ubia kina na lomada na vosa ni Kalou (raica na Jeremaia 31:33; 2 Korinica 3:3).
Mai na ivakaraitaki ni tamai Lamonai, eda vulica na kena bibi ni dua na yalo malumalumu e sa gadreva me veisau. A sa lomasoli o tamai Lamonai me solia vei Amoni na veimama ni nona matanitu me veisau kei na nona bula (raica Alama 20:21–23). Ni oti na kerekere nei Amoni me vakatara na tui vei Lamonai me sokalou me vaka e gadreva ena nona matanitu, na lomasoli kei na cecere ni vosa nei Amoni e vakavuna na leqa ni vakasama kei na lomana na tui (raica Alama 20:24; 22:3). Ena nona sa yaco mai o Eroni me vakatavulica na tui, sa veisau na lomana ka sa rawarawa nona vakabauta me vaka a kaya vei Eroni, “Au na vakabauta” (Alama 22:7). A qai vakamacalataka nona lomasoli me solia na veika kecega e taukena, kei na lewa ni nona matanitu, me rawata na reki mai vua na Turaga (raica Alama 22:15). Ena imatai ni nona masu, a solia na veika e vinakata na Tamada Vakalomalagi ena nona kaya, “Au na veivutunitaka noqu ivalavala ca kecega meu kilai kemuni” (Alama 22:18). E dua na rawarawa kei na lomasoli ni vakabauta na vosa ni Kalou ena lako mai ena veivutuni kei na talairawarawa.
E dua na vakatataro ni noda bula ena vakaraitaka na veigauna ni noda raica na kena rawarawa cake meda vakabauta na vosa ni Kalou. Na veigauna ni veisau, me vaka na vakamau se na sucu ni dua na gone; na veigauna ni veiqaravi bibi me baleta e dua na veikacivi vou; se dua na ilesilesi, veigauna ni noda itabagone vata kei na dua na bisopi totoka, iliuliu ni itabagone, kei na qasenivuli ni semineri; veigauna ni veivakatovolei; kei na veigauna ni tubu cake mai na vuli ena imatai ni gauna me baleta na kosipeli ena veigauna taucoko ni rawarawa na vakabauta. Kena irairai ni gauna vakaibalebale duadua sa ikoya na gauna ni gone. Noqu gauna ni gone au raica ni rawarawa na vakabauta na vosa ni Kalou eratou vakatavulica vei au na noqu itubutubu kei rau na tukaqu kei na buqu yaloqaqa. Sa rauta me vakaroti meda vaka na gone lalai meda rawata kina na bula tawamudu (raica 3 Nifai 11:38). Sa rauta meda vakatavulici tiko meda “susugi ira na luveda ena rarama kei na dina” (V&V 93:40).
Kevaka o tautauvata kei au, o na raica na veika e kauta dina mai na rawarawa kei na lomasoli ni vakabauta era sega ni veika sa yaco, ia na veika me vakayacori ena bulataki ni kosipeli. Nomu laurai vakavuqa nomu dau tekiduru ka vulica vakabibi na ivolanikalou ena veigauna oqo. O raica ni rawarawa na soqoni baleta na lotu vakamatavuvale kei na masu vakamatavuvale. O raica ni rawarawa na lai lotu ka sokalou ena valetabu. O raica ni rawarawa na saumi ikatini kei na veisolisoli. E dina, na bulataki ni kosipeli ena veisiga yadua ni noda bula e kauta mai e dua na malumalumu ni yalo ka gadreva na rawarawa kei na lomasoli ni vakabauta na vosa ni Kalou.
Na noqu ivakadinadina sa ikoya na ivakavuvuli mai vei ira noda parofita kei na iapositolo ena koniferedi oqo, ke vakamuri, ena veituberi ki na rawarawa kei na lomasoli ni vakabauta na vosa ni Kalou. Eda sa vakasalataki meda sokalou ena valetabu; me vakaqaqcotaki na matavuvale ena masumasu vakamatavuvale e veigauna, vulici ni ivolanikalou, kei na lotu vakamatavuvale; qaravi ena gugumatua na itavi vakamatabete kei na veikacivi ni Lotu; na saumi ikatini kei na isolisoli; me tu na vakabauta kei na masumasu ni veidusimaki; ka bula kilikili kaya na veitokani ni Yalo Tabu.
E vakavuqa noda tautauvata kei Neamani, na vukavuka mai Siria ka a vakau kivua na parofita mai Isireli me lai vakasavasavataki. O Ilaisa a tala e dua na italaki vata kei na ivakaro me laki sili vakavitu ena Uciwai na Joritani, a sa cudru ko Neamani ka lako tani. Sa vinaka sara, ni dua na italaki a kaya, “Kevaka ka vakarota vei kemuni e dua na ka levu na parofita, ko na sega li ni cakava? Ia sa dodonu vakalevu cake, ni sa kaya ko koya vei kemuni, Mo sili, ka ko na savasava?” (2 Tui 5:13).
Au vakadinadinataka ni rawarawa oqo kei na lomasoli ni vakabauta ena lako mai ena kena vakayacori na veika vakaibalebale oqori ka vakatavulici vei keda vakawasoma mai na noda itabagone. Na talairawarawa ena kauta mai na yalo malumalumu kei na rawarawa ni vakabauta na vosa ni Kalou. Au vakadinadinataka ni dua na rawarawa ni vakabauta ena kauta mai na sovaraki ni Yalotabu.
E dua na veivakatovolei ni noda rawarawa kei na lomasoli ni vakabauta e rawa me yaco ena veimacawa ena noda tiko ena soqoni ni sakaramede. Ena soqoni oqo eda vakavouya noda veiyalayalati ena noda vakaraitaka noda lomasoli meda taura na yaca i Karisito, ka dau nanumi Koya, ka muria Nona i vunau (raica V&V 20:77). Ni da dabe tiko ena soqoni ni sakaramede, e dodonu meda raica na kena rawarawa vei keda noda cakava na veiyalayalati oqo ka rawarawa noda rogoca ka vulica ena Yalo Tabu.
Au gadreva na Yalo ni Turaga me sovaraki mai vei au baleta noqu “rawarawa kei na lomasoli ni vakabauta nona vosa.” Au sa vakila ni ivolanikalou e vakayadrati au meu kidava noqu “itavi vua na Kalou” ni dodonu meu “dau talairawarawa ka yalo malua; mo dou vakamasuti rawarawa; dauvosota vakadede; … gugumatua ena muria tikoga na ivunau ni Kalou ena veigauna taucoko; … dou vakavinavinakataka vua na Kalou na veika kece sa solia vei kemudou” (Alama 7:22–23).
Me rawarawa tu ga e veigauna noda vakabauta Nona vosa. Me tu vei kemuni na rawarawa ni vakaraitaka, me vakataki au, ni sa Luve ni Kalou o Jisu. Sa i Koya noda iVakatawa, kei ira era rawarawa ka lomasoli ni vakabauta era na kila na Domona. Ena yaca i Jisu Karisito, emeni.