Sa Rawa me Noda na Veivakalougatataki ni Kosipeli
Era sa mai kila kina vakalevu cake na Luve ni Kalou e vuravura nikua ka sega ena dua tale na gauna na Nona ituvatuva ni bula marau ena vukudra.
Ena vica na macawa sa oti, keirau a tucake vata tu ena itutu ni vunau kei Elder Melvin R. Perkins e dua na lewe ni Vitusagavulu ni iWasewase e Alaska e matadra na ivavakoso ni iTeki o Vancouver British Columbia e Kenada. Ena yalo luluvu, a sureti ira na Yalododonu me ra raici rau mada erau sa mai tucake tu e matadra: e dua e kawa ni painia qiqidreti ni Momani kei na ikarua e dua na painia saumaki vou ena Lotu mai na dua na matanitu vakayawa mai Aferika rau sa mai qarava vata tu oqo na Turaga.
Mai na itekivu vakaloloma e Fayette, Niu Ioka, volekata ni 180 yabaki sa oti, sa mai yaco na Lotu i Jisu Karisito ni Yalododonu Edaidai me dua na lotu sa roboti vuravura. Au mai tu oqo e nikua meu ivakadinadina bula ni cakacaka veivakurabuitaki oqo. Sa noqu masu me na tiko vata kei kemuni kei au na Yalo ni Turaga niu na wasea eso na vakasama ena yakavi nikua.
Au sa vakavinavinakataka vakalevu na idola ni ivakatakila ena iotioti ni itabagauna oqo. Mai na cakacaka ni idola oqori mai vei ira na parofita bula, vakatekivu mai na Vakalesuimai, era sa mai kila kina vakalevu cake na Luve ni Kalou e vuravura nikua ka sega ena dua tale na gauna na Nona ituvatuva ni bula marau ena vukudra.
Na loloma nei Tamada mai Lomalagi sa mai vakadinadinataki ni sa mai tadolavi na salatu vei ira na bula kei na mate ni veimatanitu yadudua, ena gauna oqo kei na veisiga ni mataka, me ra na laki bula vakalou vata kei Koya, me vaka ga na nodra digidigi. E dua ga na kena ivakarau, ka tautauvata na veivakalougatataki kivei keda kece. Sa vakadeitaka tu na Kalou ni sega ni dau vakalomavinakataka na tamata.
Sa kaburaki tiko yani na kosipeli ki vuravura ena kena ivakarau e vakadeitaka ni sa yaco inaki ni Kalou o ya me ra tucake tale mai na mate na tamata ka rawata na bula tawamudu.
Ni oti na Lutu, o Atama kei Ivi, o irau na isevu ni noda itubutubu, rau a cakava e dua na veiyalayalati tawamudu kei na Kalou me rau vakabulai kina.1 Ni sa levu cake na kawa i Atama, a tubu kina e rua na ilawalawa.
E dua na ilawalawa, a liutaka o Inoke, era a maroroya vakavinaka na veiyalayalati sa sega tale ni rawa me ra tiko voli ga e vuravura. Sa kauti ira kina na Turaga me Nona.2
Na ikarua ni ilawalawa a rawai sara vakalevu ena ivalavala ca ka ra sotava kina na lewa ni Kalou. A qai luvuci ira na Waluvu, ka vakavo ga na matavuvale nei Noa,3 e tamata yalododonu, ka kawa i Inoke.4
Na Kalou sa qai vauci Noa ena dua na veiyalayalati, vata kei na dua na yalayala ni na sega tale ni luvuci o vuravura.5
Ni sa tubu me levu tale na matavuvale nei Noa, e vuqa era sa rawai ena ivalavala ca. Era sa viavialevu mai, ka ra tarai Pepeli e dua na Vale Cecere. Sa qai vakatara na Kalou me tau vei ira na lewa mai lomalagi. Sa qai mani veisautaki na nodra vosa ka ra sa dui veiseyaki ki vuravura. E vica walega era a talairawarawa ka ra vakabulai.6
E dua vei ira na vakabulai e taci Jereti, e tamata dauvakabauta, e a kerekere vua na Turaga ena vukudra na Jereti yalododonu. A qai kauti ira na Turaga ki na vanua o Amerika ke ra yalataka me ra qaravi Koya, era na qai “galala ka sega ni vakabobulataki, io ena sega ni dua na matanitu e vuravura e rawai ira.”7 E muri era a qai liutaki talega na Nifai ki na vanua vata ga o ya. E muri rau a qai vakarusai ruarua na kawa i Jereti kei Nifai, ni rau a sega ni yalodina.
E dua tale a vakabulai ka dauvakabauta o Eparaama, e kawa i Noa, ka a liutaki ki Kenani. A vauci Eparaama talega na Kalou ena veiyalayalati, kei na yalayala ni na tubu cake na nona kawa me vaka na kalokalo kei lomalagi8 ia mai na nona kawa era na “kalougata talega na veimatanitu kecega e vuravura.”9 Na veimatanitu era tiko ena yalayala oqo era kawa i Noa ka ra veisebayaki mai na Vale Cecere o Pepeli, ka ra kilai talega me o ira na Veimatanitu tani.
A vakavouya tale na Kalou na veiyalayalati vata kei Aisake na luvei Eparaama, kei na makubuna o Jekope, ka yaco me o Isireli.
Ena vuku ga ni nodra sega ni rawa ni gumatuataka na veiyalatalati na kawa i Isireli, a mani veisautaki ena itabagauna i Mosese. A mani tauyavutaki kina e dua tale na veiyalayalati lailai ka tomani tiko ena kedra maliwa na luvei Isireli me yacova ni sa vakalesua tale mai na Karisito na taucoko ni kosipeli ena gauna ni Nona cakacaka e vuravura.10
Ni oti na Nona Tucaketale sa vakatakila mai na iVakabula, ni sa kena gauna me sa kau yani na kosipeli vei ira na kai Matanitu Tani.11 Taumada, ena vosa vakatautauvata ni tamata cakacaka ena itabaniwere, a vakatakila kina o Koya ni o ira na matanitu tani era na sikovi ka sureti vakayadudua. Ia, na veivakalougatataki ena tautauvata ga se cava ga na ivakaro ni veisureti o ya.12
Ni oti na Nona sa Lako Cake na iVakabula, a taura tu na idola ni matabete o Pita, na iApositolo vakatulewa, e dua na kawa i Isireli, me veidusimaki tiko kina ena Lotu. Sa ivakatakilakila tiko ni dina ga sa solia oti tu na iVakabula na veivakadonui, a papitaisotaka o Pita, na imatai ni kai Matanitu tani o Konilio, ni oti na nona ciqoma e dua na ivakatakila me cakava vakakina.13
A mai vakataotaki na nodra vakalotutaki na kai Matanitu tani ena nona a vakamatei o Pita14 kei na nodra vakamatei talega na vo ni iApositolo ka sa mai kau laivi kina na idola ni matabete e vuravura. A veimuri mai kei na gauna ni vukitani vakaitamera.
A qai vakalesui mai na idola oqo mai vei iratou o Pita, Jemesa, kei Joni, na iApositolo ni gauna makawa ena 1829 kivei Josefa Simici, ni bera ni qai tauyavutaki na Lotu. Sa vakalesui mai kina na taucoko ni kosipeli ki vuravura ka tekivu me teteva yani na Veimatanitu tani me sa veiyalayalati vou ka tawamudu.
Kivua na Parofita o Josefa Simici, sa vakatakila mai kina na Turaga ni ilalavaki veivakadeitaki era sa sureti kina na kai matanitu tani e oka kina me ra tara cake vakayalo ka vakayago na matanitu ni Kalou ena kena sa tauyavutaki tu oqo e vuravura ena iotioti ni gauna.15
Eda raica ni sa mai tekivutaki tale na Lotu sa vakalesuimai ena vuravura oqo, era sa sasagataka ka vakamuria na parofita bula na lewa ni Kalou ena sala me kaburaki yani na kosipeli ki na veimatanitu kecega.
Au sa mai bula donuya oqo na gauna a parofisaitaka tu mai o Sinosi na parofita ena ibalebale ni vu ni olive, ena yaco kina vei ira na yalododonu mai na veimatanitu kecega me ra votai talega ena veiyalayalati ni Kalou kei Isireli.16
Au sa raica na kedra sa serau mai na vua vinaka ni kosipeli ena noqu vanua e Aferika. Ni oti ga e 30 na yabaki, era sa 300,000 na Yalododonu. Ena vunau kei na ivakavuvuli ni kosipeli vakalesuimai, e vuqa era sa mai kunea na ikelekele tudei ni nodra vakabauta. O ira na matavuvale era sa biuta mai na nodra itikotiko vakoro me ra vakasaqara na bula vinaka cake e taoni kei na siti era sa mai kunea e dua na bula vou me ra ququmi matua tikoga ki na bula vakamatavuvale qaqa ka ra dauvakacacani tiko ena ituvatuva vou ni vuravura oqo. Sa veivakauqeti sara tiko vakaukauwa na Yalo ni Turaga vei ira na tamata.
Sa tekivu tiko ena veivuvale e dua na ivakarau vou vakasilesitieli, susugi cake tiko ena yalo sa dau vakarorogo ki na nodra ivakasala na parofita bula o ya me vakayacori na masu ena veisiga kei na wili ivolanikalou ka soqoni vata vakadua ena veimacawa vakamatavuvale. Sa qai yaco kina, me vuqa era sa sereki mai na ivesu ni itovo makawa e sega ni vakatara na vakayagataki ni nodra bula galala.
Me ivakaraitaki ni ka au a sotava, e tolu vei iratou na luvei keirau eratou se qai vakamau walega ena valetabu ka sega ni vakayacori kina na oga ni soli ilavo, ka dau vakayacori ena neimami vanua ka dau siwati ira na cauravou kei na goneyalewa me ra vakamau ka sega kina na veidinadinati vakalawa vakai ira. Na madigi ni kena vakayacori na vakamau vakavaletabu ena tolu na valetabu era sa tu oqo mai Accra e Ghana; mai Aba e Nigeria; kei Johannesburg, mai Sauca Aferika, sa vukea tiko na kena vakatikori e dua na inuinui vou ena kena me vakalou na vakamau.
Au sa vakadinadinataka ni iVakabula o Jisu Karisito o Koya sa solia mai vei keda na kosipeli ka yalataka ni da na bula vakalou. Au sa vakadinadinataka na noda parofita bula, o Peresitedi Thomas S. Monson, ena vukuna sa vakadeitaki kina vei keda na veidusimaki ni iVakabula ena kena tomani tikoga na veivakabulai vei ira na tamata kecega. Ena yaca i Jisu Karisito, emeni.