Na iSoqosoqo ni Veivukei: E Dua na Cakacaka Tabu

Julie B. Beck

Peresitedi Raraba ni iSoqosoqo ni Veivukei

Sa noda talega na cakacaka ni veivakabulai, veiqaravi, ka yaco me dua na kawa tamata savasava.

iVakatakilakila

Julie B. Beck

Oqo e dua na soqoni totoka ni marama ena iSoqosoqo ni Veivukei. Mai na iotioti ni noda soqoni raraba sa oti, au kalougata meu sikova e vuqa vei kemuni. Vinaka vakalevu na bula yalodina tiko kei na cakacaka gugumatua. Ena veisoqoni raraba ni iSoqosoqo ni Veivukei sa qai oti ga oqo, eda vulica mai kina na nodra kaukauwa kei na nodra tudei na marama Yalododonu Edaidai ena nodra kila ka vakayacora na inaki ni iSoqosoqo ni Veivukei.¹ Ena bogi nikua au gadreva meu vakarabailevutaka na noda ivakadinadina kei na noda kila na iSoqosoqo ni Veivukei ni sa cakacaka e vakayavutaki ena vakabauta. Au na vosa tiko ena inaki ni cakacaka oqo kei na sala eda na cakava rawa kina.

Eda kila ni sa inaki ni iSoqosoqo ni Veivukei, me vaka a tauyavutaka kina na Turaga sai koya na nodra vakarautaki na marama ki na nodra vakalougatataki ni bula tawamudu ena nodra vukei me ra:

Tubu cake ena nodra vakabauta kei na yalododonu yadudua.
Vaqaqacotaki na nodra matavuvale kei na vale.
Qaravi na Turaga kei ira na Luvena.

Na itukutuku, inaki, kei na cakacaka ni iSoqosoqo ni Veivukei e duatani sara mai vei ira na veisoqosoqo ni marama. Ena 1942, e kaya kina na Mataveiliutaki Taumada ni Lotu ni:

“Sega tale ni dua na isoqosoqo ni marama me a vakaoqo na kena tauyavu… .

“Me ra kakua ni vakatara na veimecaki se veiqati ena kena mataqali cava ga o ira na lewe [ni Soqosoqo ni Veivukei] me vakasevataki kina na ilesilesi kei na itavi, na veigauna donu kei na veidokadokai, na madigi kei na rawa ka ni lewena na iSoqosoqo cecere oqo.”²

Ke sa rui ka bibi na noda lewena na iSoqosoqo ni Veivukei e gadrevi meda kila na veika eda duidui kina mai vei ira na isoqosoqo tale eso ni marama. Na veika kece eda cakava ena iSoqosoqo ni Veivukei e ka bibi baleta ni rau a rairai o Tamada Vakalomalagi kei na Luvena vei Josefa Simici, ka sa soli kina vua na taucoko ni kosipeli i Jisu Karisito sa vakalesuimai ki vuravura. Na iSoqosoqo ni Veivukei sa tiki ni veivakalesuimai o ya. A vakamacalataka o Parofita Josefa Simici na inaki ni iSoqosoqo ni Veivukei ka vakasalataki ira na marama me baleta na nodra inakinaki me vaka ga a vakavulici ira kina na iliuliu e Kirtland kei Nauvoo ena nodra inakinaki ni matabete kei na cakacaka. Na noda isoqosoqo sa liutaki tikoga nikua mai vei ira na parofita, daurairai, kei na dauvakatakila.

E duatani sara na iSoqosoqo ni Veivukei baleta ni a tauyavutaki ena “ivakarau ni matabete”³ka da cakacaka ena ivakarau raraba kei na ituvaki ni vanua ena nodra veidusimaki na iliuliu vakabete. Eda cakacaka vata kei ira na iliuliu vakabete, sa tu vei ira na idola, ka solia vei ira na kaukauwa me ra vakatulewa ena yaca ni Turaga. Eda cakacaka ena ivakarau ni matabete—-sa kena ibalebale eda na vakasaqara, ciqoma, ka cakacaka ena ivakatakila; vakatulewa ena matabose; ka kauwaitaki ira na tamata yadudua. Sa noda na inakinaki ni matabete meda vakarautaki keda ki na veivakalougatataki ni bula tawamudu ni da vakayacora ka maroroya na veiyalayalati. O koya gona, me vakataki ira na turaga lewe ni matabete, sa noda talega na cakacaka ni veivakabulai, veiqaravi, ka yaco me dua na kawa tamata savasava.

A vakatavulica o Peresitedi Boyd K. Packer ni “iSoqosoqo ni Veivukei e rabailevu na nona veiqaravi.

“Na tiko ena kena veisoqoni ni Sigatabu sa dua na tiki lailai ga ni nomuni ilesilesi.” Eso vei kemuni e sega tiko ni kila na ka oqo ko ni sa biuta vakatikitiki e levu na ka e inaki tiko ni iSoqosoqo ni Veivukei ena veiyabaki—o ya na mataveitacini marama, na cakacaka ni loloma kei na kena bulataki.”

A vakamacalataka:

“Na iSoqosoqo ni Veivukei, me vaka e kaya o Parofita [Josefa] vei keda, a tauyavutaki ena ivakarau ni matabete. Ni gauna sa lewena kina na matabete e dua na tagane, … sa na gadrevi me solibula ka yalodina …

“Ni sa lewena na matabete ena vakaceceretaka na tagane kei na gonetagane o ya. Na vanua cava ga e tu kina, na cava ga e cakava, se o cei ga e sema kina, sa nuitaki me na doka na nona matabete… .

“Kevaka mo ni muria na ivakarau oqo na marama, … ko ni na qarava na nomuni isoqosoqo, na kena inaki —na iSoqosoqo ni Veivukei… .

“Na veiqaravi ena iSoqosoqo ni Veivukei ena vakaceceretaka ka vakasavasavataka na marama yadudua. E ka tawamudu na nomu lewena na iSoqosoqo ni Veivukei.”⁴

Cakacaka ena Sala ni Turaga

Ni sa matata na noda inaki, sa na muria ga na sala sa dodonu meda vakayacora kina na noda ilesilesi. Meda na raicalesu mada vakatotolo na kena qaravi na iSoqosoqo ni Veivukei e vakayavutaki ena vakabauta. E dua vei ira na iyau talei e tu kece vei keda o ya na gauna. E vuqa na marama e levu tu na nodra itavi ia e sega na gauna me ra cakava kina na veika era nanuma se gadreva. Eda vakaraitaka na noda rokova na Turaga kei ira na marama ni da vakayagataka na gauna ni iSoqosoqo ni Veivukei ena sala veivakauqeti.

E vakatavulica o Peresitedi Dieter F. Uchtdorf: “E dua na tamata vuku ena kila vakavinaka na kedrau duidui ‘na vuku kila ka ni cakava na ka’ kei na ‘vuku me na sega ni cakava.’ E dina ni ‘vuku ena bula oqo,’ a vakatavulica, e okati kina na ‘tagutuvi laivi ni veika tawayaga. ‘A qai taroga o Peresitedi Uchtdorf, ”Na veika tawayaga cava e dau vakaosoosotaka na nomu siga ka butakoca na nomu gauna? Na ivakarau cava ko sa rairai tauyavutaka e sega na betena? Na veika cava me vakacavari se sega ni tekivutaki ena rawa mo bulabula cake kina, vakainaki, ka bula marau kina?“⁵ Sa rawa meda tarogi keda ena nona taro oqo ki na noda soqoni kei na itaviqaravi kece sara ni iSoqosoqo ni Veivukei.

Soqoni ni iSoqosoqo ni Veivukei ena Sigatabu

Eda vakayacora na noda soqoni ni veimacawa na isoqosoqo ena Sigatabu ni sa noda tiki tudei tiko ni tolu na auwa ni soqoni. E ka totoka me da kila tiko ena vei-Sigatabu, e vuravura taucoko, e udolu na ilawalawa ni marama era soqoni vata mai me vakatorocaketaki na nodra vakabauta, vaqaqacotaki ni nodra matavuvale, ka veicokonaki ena kena sagai na nodra qaravi. Na noda soqoni ena Sigatabu e 50 walega na miniti, ka tekivu ena kena vakayacori na bisinisi eso ka na vukei keda meda duavata tiko ka mana na noda cakacaka ena iSoqosoqo ni Veivukei. Me lekaleka walega na noda bisinisi, ka dodonu, maqosa, ka meda kilai keda tiko kei na veika meda cakava.

Me vaka ga na nodra ciqoma na marama ena imatai ni soqoni ni iSoqosoqo ni Veivukei na veivakavulici mai vei ira na parofita kei na iapositolo, eda na vulica tiko kina na nodra vosa na iliuliu ni Lotu e nikua. Sa ka ni veivakalougatataki dina meda umanaki ena veiivurevure cokovata e vakavulica na vunau kei na ivakavuvuli ena vukei keda ena noda bulataka yadudua na kosipeli kei na noda vuvale talega. Baleta ni oqo e cakacaka yavutaki ena vakabauta, e mana sara na lesoni ni iSoqosoqo ni Veivukei ni vakayacori ena veivakauqeti vakayalo “ni [o koya] sa veivakavulici kei [koya] sa vakarorogo, rau sa veikilai, ka rau sa vakavukui ka marau vata.”⁶

iKuri ni Soqoni ni iSoqosoqo ni Veivukei

Na noda soqoni kece kei na itaviqaravi era sa soqoni kece ni marama ni iSoqosoqo ni Veivukei. Ena vuqa na yabaki sa oti, eda sa vakatoka na ikuri ni isoqoni ni iSoqosoqo ni Veivukei me soqoni ni vuvale, matavuvale, kei na veivakabulabulataki yadudua. Ena kena vakamacalataki na qaravi ni veiulutaga oqori, kei na duidui ni kedra ibalebale kei na kedra inaki, sa vakatulewataki kina ni yaca “vakabulabulataki ni vuvale, matavuvale, kei na tamata yadudua” sa na sega tale ni caka. Ena nodratou ivakasala na Mataveiliutaki Taumada kei na Kuoramu ni iApositolo Le Tinikarua, sa vakadeitaki ni sega sara ni gadrevi me vakayacani vou na ikuri ni soqoni ni iSoqosoqo ni Veivukei, na veisoqoni kei na itaviqaravi kece ni iSoqosoqo ni Veivukei sa na vakatokai ga me ra soqoni ni iSoqosoqo ni Veivukei. Na soqoni yadudua ni iSoqosoqo ni Veivukei era sega ni caka ena Sigatabu sa rawa me ra vakatokai ena kena oqo: veiqaravi, kalasi, veivukei, koniferedi, se vuli ni iSoqosoqo ni Veivukei.

O ira na ikuri ni soqoni oqo sa rawa me ra yaga sara ki na veivakasalataki ena Sigatabu, vakabibi vei ira na marama era vakailesilesi ena Lalai se Goneyalewa se o ira era sega ni tiko rawa ena soqoni ena Sigatabu. Na veisoqoni oqo sa vanua vinaka talega ni nodra sureti mai kina na itokani mai na veimatalotu eso ka oka kina o ira na marama lewe ni iSoqosoqo ni Veivukei era luluqa tu vakalotu. Sa sureti kece sara tu na marama me ra mai vakaitavi. Ia, me ra kakua ni nanuma ni sa lawa na nodra mai tiko ena soqoni.

Ena ruku ni veidusimaki nei bisopi, sa rawa ki na mataveiliutaki ni iSoqosoqo ni Veivukei ni tabanalevu me na veivakasalataki baleta na gagadre vakayalo kei na vakayago ni tamata yadudua kei na matavuvale ena tabanalevu ka vaqaqacotaka na mataveitacini marama kei na duavata.

Ni ra soqoni vata mai na marama ena soqoni ni iSoqosoqo ni Veivukei ena veimacawa era na vulica na kena vakayacori na ilesilesi ni cakacaka ni loloma ni iSoqosoqo ni Veivukei. Era na vulica eke ka vakatovotovotaka na ivakarau ni cakacaka ka na vukea na nodra vakabauta kei na yalododonu yadudua, vaqaqacotaki ni matavuvale kei na vuvale, ka vukei ira na vakaleqai. Na veisoqoni oqo sa ikakalawa ni vakavulici ni kila ka kei na ilesilesi vakamarama kei na vakatina ena nona ituvatuva na Turaga. Era vulica ka bulataka na marama na ivakavuvuli ni bula mamaroroi kei na kena e vakayalo ka vakayago ni bula rawati koya ka ra vakatubura talega na duavata ena mataveitacini marama ni ra veivakavulici vakaiira ka veiqaravi vata.

Na peresitedi ni iSoqosoqo ni Veivukei ni tabanalevu ena liutaka na soqoni kece ni iSoqosoqo ni Veivukei. E tiki ni ilesilesi oqo, me dau veivosaki e veigauna kei na bisopi ena kena sagai na soqoni vakaoqo me vukea na nodra gagadre na tamata yadudua kei na matavuvale ena tabanalevu.

Eratou na masumasu ka raica na mataveiliutaki ni iSoqosoqo ni Veivukei na veigauna cava so kei na vanua me vakayacori kina ena loma ni macawa na soqoni ni iSoqosoqo ni Veivukei. Me ratou qai vakatututaka yani vei bisopi, ka me ratou nanumi ira tiko na marama ena vuku ni nodra vakayagataki gauna, oga mai vale, na isau ni veilakoyaki, ilavo me vakayagataka na tabanalevu, tataqomaki, kei na veiituvaki tale eso ena noda vanua.

Na soqoni oqo me na vakayacori ga ena dua tale na siga ka sega ena Sigatabu se na bogi ni Moniti. Era vakayacori ga vakavula, ia sa itavi ni mataveiliutaki ni iSoqosoqo ni Veivukei me vakatututaka yani me dau vakayacori wasoma na soqoni se vagauna ga. E vinaka cake me vakayacori vakavulatolu. Me na dau tiko kina e dua na lewe ni mataveiliutaki ni iSoqosoqo ni Veivukei ena veigauna ni soqoni. Ena ruku ni veidusimaki ni mataveiliutaki ni iteki, sa rawa vei iratou na mataveiliutaki ni iSoqosoqo ni Veivukei me tuvanaka ka vakayacora e dua se rua na soqoni ni iSoqosoqo ni Veivukei ena iteki ena veiyabaki me baleti ira kece na lewe ni iSoqosoqo ni Veivukei ena iteki.⁷

Eratou na masulaka ka digitaka na iliuliu ni iSoqosoqo ni Veivukei na veiulutaga ka na vaqaqacotaki ira na marama kei na nodra matavuvale kei na veisala totoka me na vakavulici kina na veiulutaga oqori. Ena vakadeitaka o peresitedi ni iSoqosoqo ni Veivukei ni ituvatuva oqo me na vakadonuya o bisopi. Me na raica talega ni dodonu tiko na ituvatuva ka salavata kei na lawatu ena gauna oqo na veika me baleta na itaviqaravi, oka kina na lawatu ni veika vakailavo. E dina ga ni na veiliutaki tiko o peresitedi ni iSoqosoqo ni Veivukei ena veisoqoni oqo, sa rawa me kerea e dua vei rau na daunivakasala me vukei koya. Sa rawa talega me vakatututaka e dua tale na marama ena tabanalevu me kacivi ki na itutu ni kodineita ni soqoni ni iSoqosoqo ni Veivukei me vukea na tuvatuva ni mataveiliutaki ka vakayacori vakakina.

Na soqoni sa rawa me dua ga na kena ulutaga se vidai kina eso tale na kalasi se itaviqaravi. O ira na qasenivuli me ra lewe ga ni tabanalevu se iteki o ya. Ena veiyabaki sa rawa me vakayacori e dua na soqoni se itaviqaravi me vakananumi kina na kena tauyavu na iSoqosoqo ni Veivukei ka vakamacalataki kina na kena itukutuku makawa kei na inakinaki.

Ena kena tuvanaki na soqoni ni iSoqosoqo ni Veivukei ena loma ni macawa, era na vakaliuca na iliuliu na ulutaga e vakayacori tiko kina na inaki ni iSoqosoqo ni Veivukei, me vaka na vakamau kei na matavuvale, qaravi ni vuvale, bula mamaroroi, kei na bula rawati koya, veiqaravi ena yalololoma, valetabu kei na tuva kawa, wasei ni kosipeli, kei na ulutaga tale eso e gadreva o bisopi.⁸

Ni da tuva ka, eda na kerea na Turaga ena veika meda kila ka cakava rawa meda vakarautaki keda ki na bula tawamudu. Ena vuku ni Turaga, na veitabanalevu yadua sa tu ga kina na kena veika talei, ka sega tale ni tu vua e dua tale. Oqo e rawa ni vakatauvatani ki na DNA e vakatakilakilataka na tamata yadua. Sa itavi nei bisopi na nona tabanalevu. Sa itavi nei peresitedi ni iSoqosoqo ni Veivukei ena tabanalevu me vukei bisopi. Na bisopi yadua kei na mataveiliutaki ni iSoqosoqo ni Veivukei sa tabaki na uludra ena liga me ra ciqoma na veivakauqeti ena vuku ni nodra ilesilesi, ka sega ni baleta e dua tale na tabanalevu se ilawalawa ni marama ena iSoqosoqo ni Veivukei.

Kevaka meda veikilai cakacaka tiko vakaoqo, eda na vakasaqara na ivakatakila ka cakacaka ena duavata kei bisopi me vakayacori kina na inaki ni iSoqosoqo ni Veivukei ena noda dui tabanalevu. Me isau ni cakacaka vakaoqo, kevaka era vakarautaki na marama kei na matavuvale ena leqa tubukoso sa rawa me vakarautaka na iSoqosoqo ni Veivukei na tuvatuvai, veivakavulici, kei na vakauqeti cake ni vakavakarau o ya. Kevaka era gadreva na marama kei na matavuvale me ra vakavakarau me baleta na valetabu, sa rawa ki na iSoqosoqo ni Veivukei me vakarautaka, veivakavulici, ka vakauqeti ira na marama me ra vakayacora vakakina. Ke gadreva o bisopi eso na goneyalewa qase cake dawai me ra wasea na kosipeli ka kauti ira lesu mai na nodra itokani ki na itaviqaravi, sa rawa me vakarautaka na iSoqosoqo ni Veivukei, veivakavulici, ka vakauqeta na cakacaka o ya. Kevaka me ra vakavulici na tina gone ena veisusugi, ka qaravi ira na luvedra, sa rawa ki na iSoqosoqo ni Veivukei me vakarautaka, veivakavulici, ka vakauqeta na cakacaka o ya. Kevaka era gadreva na marama me ra vuli ka vakatorocaketaka na kila ni qaravi ni vuvale, me na vukea na nodra vuvale me itikotiko ni veivaqaqacotaki vakayalo, sa na rawa talega ki na iSoqosoqo ni Veivukei me na vakarautaka, veivakavulici, ka vakauqeta na cakacaka o ya. Me vaka ni sa dau vakayacori tiko mai kevaka era gadreva na matabete me ra rawata e dua na ka cecere cake, sa rawa me ra kacivi ira na iSoqosoqo ni Veivukei me ra vukei ira.

Ni da vakayacora vakavinaka na bose, eda na toroya cake kina na nodra gugumatua na iSoqosoqo ni Veivukei me na cakacaka ena veiqaravi qaqa vata kei ira na iliuliu ni matabete ena veitabanalevu yadua. Me vaka a kaya o Josefa Simici ena Vunau kei na Veiyalayalati:

“Me kakua ni dua na tamata me okata na veika oqo me ka wale; raica sa vuqa sara na veika sa vakarautaki tu mai liu me baleti ira na yalododonu, ena vakatau tiko mai na veika oqo.

“Oi kemudou na [marama], mo dou kila ni sa rawa me vagolei e dua na waqa levu, ena dua ga na iuli lailai ena gauna ni cava; io me vagolei yani me saqata na cagi kei na biau lelevu”⁹

Kemuni na iliuliu ni matabete kei na iSoqosoqo ni Veivukei, na itukutuku oqo sa na nomuni idusidusi tiko vakalawatu me baleta na ikuri ni soqoni ni iSoqosoqo ni Veivukei. Ke tiko na nomuni vakatataro me baleta na veika oqo sa mai vakatavulici oqo ni oti na kena vulici, ni yalovinaka mo ni qai veivakasalataki ena nomuni dui tabanalevu kei na iteki me laurai kina na kena iwali.

Veisiko

E vuqa vei ira na cakacaka bibi ni iSoqosoqo ni Veivukei eda cakava e sega ni yaco ena noda soqoni. Meda raica vakatabakidua na vulici ni veisiko. Me baleta ga ni da muria tiko na ivakaraitaki kei na ivakavuvuli i Jisu Karisito, eda rokova na veikacivi tabu oqo meda loloma, kila, veiqaravi, kila vakavinaka, veivakavulici, ka cakacaka ena Vukuna. Oqo e dua na itavi ena loma ni Lotu e vakadeitaka ni na vukei keda na Turaga kevaka eda na kerea. Oqo e dua na ilesilesi e vakadeitaka ni na vakatorocaketaka na noda vakabauta kei na yalododonu yadudua ka vaqaqacotaki na noda vuvale kei na matavuvale ni da sa veitokani tiko kei na Turaga. E sega tale ni dua na ilesilesi ena taudaku ni nona matavuvale e dua na marama ena Lotu oqo me na levu cake kina na nona cakacaka vinaka me vakataka na veisiko.

Me baleta ga ni oqo na parokaramu ni Turaga ni nodra vakaraici tiko na Luvena yalewa yadudua, na lawatu ni cakacaka ni veisiko eratou vakadonuya na Mataveiliutaki Taumada sa tuvanaki tu ena iDusidusi ni Lotu. Baleta ni vakatabakidua na veisiko ki na marama yadudua, e se sega mada ni ra tuvalaka na veiliutaki ni iSoqosoqo ni Veivukei me ra gole yani vakailawalawa na marama me ra laki veisiko.

O bisopi, sai koya na ivakatawa sa tabaki ni tabanalevu, ena sega ni rawa me vakaraici ira tiko na sipi ni Turaga ena dua vata ga na gauna. Sa na vakararavi tiko o koya kivei ira na dauveisiko vakalou me ra vukei koya. Eda sa kila ni dodonu meda itokani vinaka vei ira yadudua ena noda tabanalevu, ia sa itavi nei bisopi kei peresitedi ni iSoqosoqo ni Veivukei me rau ciqoma na ivakatakila me o cei me na vakaraica ka vaqaqacotaki ira yadudua na marama. E uasivi, ki na marama yadudua me ra vakaraica ka vaqaqacotaka tale e dua na marama ena nona tabanalevu. Sa noda kalougata me tiko na noda veikacivi meda masulaka e dua na marama ena mataka kei na bogi ka vakauqeti ki na sala e gadreva na Turaga meda karona kina e dua vei ira na Luvena yalewa.

Na veisiko e cakacaka vakayavutaki ena vakabauta ena gauna eda vakaliuca kina na tamata ka sega ni iwiliwili. Na kena dina, e sega ni dau oti na veisiko. Sa ivakarau ni bula ka sega ni itavi. Na yalodina tiko ena veisiko sa ivakadinadina ni noda cakacaka vaka-tisaipeli. Eda vakaraitaka na noda vakabauta ka muria e dua na ivakarau tudei e tauyavutaka na Turaga ni da soli itukutukutaka na noda cakacaka ena veivula. Kevaka meda vakaliuca tiko na kena ripotetaki e dua na marama ena tabanalevu ni sa rogoca na iVaqa ni Veisiko ka tabaki tu vakavula ena Ensign kei na Liaona, ena uasivi cake ke wiliki e cake vei ira yadua era tiko ena soqoni ni sakaramede. Na noda ripote e ka bibi dina vei bisopi kei peresitedi ni iSoqosoqo ni Veivukei ni da vakamacalataka vei rau na nodra bula vakayalo ka vakayago na marama kei na sala eda a qarava ka lomani ira kina.

Au sa vakavinavinaka vakalevu vei ira taucoko na noqu dauveisiko ena veitaba yabaki sa oti, ka ra sa vakaraitaka na nodra vakabauta ena nodra veiqaravi, veivakavulici, veivaqaqacotaki, ka lomani au ena sala e veivakauqeti.

Veiqaravi Raraba kei na Loloma

Na noda veiqaravi ena loloma ka vukei yani na gagadre raraba ni tamata yadudua kei na matavuvale sa semati tiko ki na veisiko. Ena kila o peresitedi ni iSoqosoqo ni Veivukei na nodra gagadre na tamata ena nona tabanalevu mai vei ira na dauveisiko kei na nona veisiko vei ira na lewe ni tabanalevu. Eso na gauna e dau tuvanaki keda meda laki vukei ira na tani kei na veigauna tale eso eda na laki veiqaravi “ni sa vaka ga na [keda] ituvaki,”¹⁰ ni da vakamuria tiko na veivakauqeti ni Yalo Tabu. Au a vulica mai vei Sister Camilla Kimball, na wati Peresitedi Spencer W. Kimball, o ya meda “kakua vakadua ni bokoca e dua na vakasama ni loloma.” Ni da vakamuria na nona ivakasala, eda na kila vakaidina ni o Tamada mai Lomalagi e kilai keda vakavinaka tu baleta ni talai keda yani meda sa Ligana ka Yalona vei ira era vakaleqai tu. Ni da vakayacora oqo, ena vaqaqacotaki na noda vakabauti Koya.

iTinitini

Eda sa bula tiko ena marau kei na dua na gauna ni tubu vakasakiti ena itukutuku ni Lotu, kei na noda iSoqosoqo ni Veivukei sa tiki tiko ni itukutuku o ya. E kaya o Josefa Simici, “ Laivi ira na tagane, yalewa kei na gone me ra kidava na bibi ni cakacaka, ka cakava na kena icakacaka me vaka ni rawa ka e vakatau ena nona veivakayarayarataki vakataki koya; me da vakila taucoko na kena taleitaki, ka qai vakasamataka ni ra bula ena dua na siga, na kena vakasamataki e vakabulabulataka na lomadra na tui, Parofita, kei ira na turaga yalosavasava ena udolu na yabaki sa oti—na kena irairai ni noda veisiga e vakauqeta na kamikamica ni kena irogorogo, kei na torocake ni kaukauwa ni sere, ka vakavuna na nodra lako tani mai eso na ivakarau ni vosa veiuqeti me vaka era volai vakaivola ena iVolanikalou.”¹¹

Au reki ni kila ni Turaga e lomani keda me dusimaki keda ena cakacaka oqo mai vei ira na parofita, daurairai, kei na dauvakatakila. Au kila vakaidina ni gauna era cakava kina na marama yadudua na nodra itavi me vakayacori kina na inaki ni iSoqosoqo ni Veivukei, era na tomani keda na agilosi ka da na cakava na cakamana veivakurabuitaki eso. Eda sa marautaka tiko ka vakavinavinaka ki na cakacaka bibi, e vakayavutaki ena vakabauta sa soli tu oqo vei keda, ena yaca i Jisu Karisito, emeni.