Masu kei na Veivakauqeti
Na veika e sotavi ena veivakauqeti kei na masu e sega ni ka vou ena Lotu. Oqo e tiki tiko ni ivakatakila sa vakarautaka vei keda na Tamada Vakalomalagi.
Ena sega ni dua na Tama me na biuti ira yani na luvena ki na dua na vanua yawa ka vakarerevaki me ra laki vakatovolei ni kilai vinaka tu ni vaka me sere tu na wa ni koli o Setani, kevaka me se bera ni vakaiyaragitaki ira taumada tu ena kaukauwa vakayadudua me taqomaki ira. Ena solia talega vei ira na gaunisala ni veitaratara kei Koya, mai vei Tamadra vei ira na gone ka vakakina mai vei ira na gone vei Tamadra. Na gone taucoko e biuta mai na Tamada ki vuravura ena soli vata mai kei koya na Yalo i Karisito se na Rarama i Karisito.1 E sega sara ga ni dua vei keda, e bula tiko vakataki koya eke ka ni tu vua na vakanuinui kei na veivakabulai.
Na veivakalesuimai e tekivu ena dua ga na masu ni dua na gonetagane yabaki 14 vakakina na rairai mai ni Tamana kei na Luvena. Sa qai vakacurumi mai na taucoko ni gauna.
Na Vakalesuimai ni kosipeli e kauta mai na kila ni bula taumada. Eda kila mai na ivolanikalou na Matabose mai Lomalagi kei na vakatutu me ra vakau mai ki vuravura na luvena na Kalou me ra mai vakayago me rawa ni ra na vakatovolei kina.2 Eda luve ni Kalou. Eda yago vakayalo ka vakavaletaki tiko ena valeqele vakavuravura. E kaya na ivolaniklalou, “Dou sa sega ni kila ni dou sa vale ni Kalou, ka sa tiko vei kemudou na Yalo ni Kalou?” (1 Korinica 3:16).
Me vaka ni da luve ni Kalou, eda vulica ni da sa tiki ni Nona “ituvatuva cecere ni bulamarau“ (Alma 42:8).
Eda kila ni a dua na ivalu mai Lomalagi, ka vakakina ni o Lusefa kei ira era vakabauti koya era a cemuri laivi mai ka ra sega ni vakayago:
“Setani na gata makawa ko ya, io sa ikoya na tevoro, … a vorata na Kalou ka segata me taura na nona matanitu na noda Kalou kei nona Karisito—
“A sa valuti ira na tamata yalododonu ni Kalou, io sa viribaiti ira ka vakavolivoliti ira”(V&V 76:28–29).
E a soli vei keda na noda galala.3 Meda vakayagataka vakavuku ka toro volekata tiko na Yalotabu, kevaka ena sega eda sa na rawai ena veivakatovolei kamikamica nei vunica. Eda kila ni na rawa ni da vakasavasavataki ena Veisorovaki i Jisu Karisito, ka na vakalesui tale na yagoda ki na kena itutu me taucoko.
“Raica sa soli vei ira na tamata kecega na Yalo i Karisito me ra kila kina na vinaka mai na ca; ia au sa tukuna vei kemudou na sala mo dou lewa rawa kina; raica na veika kece sa vakauqeti keda meda ivalavala vinaka kina, ka sureti keda meda vakabauti Karisito, sa vakatakilai ena kaukauwa kei na isolisoli i Karisito; ia dou na kila vakaidina ni sa vu mai vua na Kalou” (Moroni 7:16).
E dua tiko na sala totoka sara ni veitaratara ena cakacaka ni Yalotabu, “ni sa dikeva na ka kecega na Yalo Tabu, io, na veika titobu ni Kalou” (1 Korinica 2:10).
Tarava yani na papitaiso ki na Lotu i Jisu Karisito ni Yalododonu Edaidai, na ikarua ni cakacakatabu vakalotu: “Veitabaki ni liga me baleta na isolisoli ni YaloTabu” (Yavu ni Vakabauta 4:1).
Ni yaco mai na domo kamica ka malumu o ya ena vakilai ka sega ni vaka na ka me na rorogo. Na vuku makare sese ena rawa ni vakadewataki kina ki na vakasama. Ena dau veitaratara kei keda na Yalo Tabu ena yaloda kei na noda vakasama ka sega ena rorogo vakatamata.4 Na veituberi oqo ena yaco mai me vaka na vakasama, na ka e vakilai, ena veivakauqeti kei na vakanananu.5 Eda na rawa ni vakila cake na vosa ni veitaratara vakayalo mai na kena rogoci, ka da na raica na kena vakayalo mai na matada vakayago.6
Au a veiqaravi vata tu mai kei Elder LeGrand Richards ena Kuoramu ni iApositolo Le Tinikarua ena vica vata na yabaki. A mate o koya ni yabaki 96. A tukuna o koya vei keda ni yabaki 12 voli sa mai tiko ena soqoni ni koniferedi raraba ena Valecavu. A rogoci Peresitedi Wilford Woodruff kina ena siga o ya.
A talanoataka o Peresitedi Woodruff e dua n italanoa ni veivakauqeti ni Yalotabu. Eratou a talai koya na Mataveiliutaki Taumada me “vakasoqoni ira vata mai na Yalododonu mai New England kei Kenada ka kauti ira mai ki Saioni.”7
A mai vakacegu ena nona itikotiko e dua na turaga mai Indiana ka kelea na nona kareti ena matanivale ka ni na moce kina o koya kei watina kei na dua na luvedrau ka ratou na moce na kena vo e loma ni vale. Ni se qai davo koto ga me vakacegu, sa vakasolokakana vua na Yalotabu, ka vakaroti koya, “Duri cake ka tosoya na nomu kareti.” E a duri cake ka tosoya laivi na kareti mai na vanua e a tu kina e liu. Ni se qai vakarau davo sobu tale sa baci tukituki tale mai na Yalotabu ka kaya, “Lako ka laki tosoya laivi na nomu meuli mai vuni oki e vesu no kina.” Cakava o koya na ka o ya, sa qai mai davo sobu ka moce.
Rauta toka beka ga ni oti e 30 na miniti, sa cavuivuvutaka e dua na covulaca na vuni oki ka a vesu no kina na nona meuli. Vukataka yani me rauta ni 100 na ikalawa (90 na mita) ka sivia yani e rua na bai. Laki taubitalaki na vunikau levu oqo rauta ni lima na fiti, (1.5 na mita) na raba ni tolona ena vanua sara ga e a kele taumada tu kina na nona kareti. A vakabulai iratou na nona matavuvale o Elder Woodruff, ena nona a rogoca na veivakauqeti ni Yalotabu.8
Na yalo vata ga o ya ena vakauqeti iko ka taqomaki iko.
Niu a se qai kacivi ki na Vakaitutu Raraba rauta ni 50 na yabaki sa oti, keitou a dau vakaitikotiko ena neitou iteitei ena dua na tiki ni qele mai na Utah Valley. A dua tiko na neitou bulumakau kei na dua na ose vakakina na toa, kei na levu na gone.
Dua na Vakarauwai, meu a draiva yani ki na rara ni waqavuka meu laki vuka ki na dua na koniferedi ni iteki e Kalivonia. Ia, na bulumakau sa vakarau sucu sara tikoga ka sa vaka me dredre tiko na nona vakasucu. Sa qai sucu bula na luvena ka sa dredre ga me tucake rawa na tinana. Keitou qiria na vuniwai ni manumanu, ka sega ni dede sa yaco mai. A tukuna o koya ni bulumakau e a tiloma e dua na tiki ni waya ka na sega ni dede na nona bula ena siga o ya.
Au solia vei watiqu na naba ni talevoni ni kabani ka dau volitaka na tiki ni yago ni bulumakau me ratou mai kauta ni sa mate.
Keitou a masu vakamatavuvale ni bera niu biubiu. A cabora na masu na luvequ tagane lailai. Ni oti na nona kerea na Tamada Vakalomalagi me “vakalougatataki Tata ena nona ilakolako ka vakakina o keitou taucoko,” sa qai tekivuna e dua na nona masu ni vakatakekere ka kaya, “Tamaqu Vakalomalagi, ni yalovinaka sara ni vakalougatataki Bossy na bulumakau me rawa ni na bula vinaka tale.”
E Kalivonia au a tukuna kina na ka a yaco o ya ena noqu kaya, “O koya e dodonu me vulica ni na sega ni ka rawarawa na veika kece eda masulaka.”
Na lesoni me a vulici, sa ikoya o au meu a vulica sega ni o luvequ tagane. Niu lesu yani ena yakavi ni Sigatabu, sa “vinaka tale na bula” nei Bossy.
E sega walega ni vakarautaki na veika vakaoqo me baleti ira na parofita. Ena cakacaka vakatautauvata na Yalo Tabu ki na tagane, yalewa, vakakina o ira na gone lalai. Na iwali ni leqa kece sara ena rawa ni tiko ena cakacaka veivakadrukai ni isolisoli kei na kaukauwa ni veivakacegui vakayalo vaka o ya.
“A sa talai ira yani na nona agilosi me ra vunautaka na nona vosa vei ira na tamata, na tagane kei na yalewa. Era sa kila talega na nona vosa ko ira na gone lalai, ka ra vakurabuitaki ira kina na tamata vuku” (Alama 32:23).
E tiko eso na sala ka dau muria me sovaraka kina na vuku ki na noda vakasama me rawa ni vakauqeti keda, tuberi keda, vakavulici keda, vakadodonutaki keda, ka vakaroti keda. A kaya na Turaga, “Raica ena vakatakila vei iko na Yalo Tabu, io, ena lako yani vei iko ko koya ka tukutuku sara ki lomamu.” (V&V 8:2).
A vola vakaoqo o Inosi, “Ia, niu sa masu tiko ena yaloqu taucoko, sa rogo tale mai na domo ni Turaga” (Inosi 1:10).
Ena rawa ni ko kila na veika e gadrevi mo kila. Masulaka mo vulica mo na ciqoma na veivakauqeti ka bula kilikili tiko me rawa ni ko na ciqoma. Dolava tiko na gaunisala o ya—na nomu vakasama—me savasava ka galala tiko mai na veika vakavuravura.
O Elder Graham W. Doxey, ka a veiqaravi tu ena iKarua ni Kuoramu ni Vitusagavulu, a tukuna vei au e dua na ka a sotava. A tukuna talega vei au na ka vata ga o ya o tinana, ka a daunivakasala ni mataveiliutaki raraba ni Lalai.
E a dau tu o koya ena mataivalu-e-wai, vakaitikotiko mai Jaina ena iKarua ni iValu Levu. Ratou a vodo sitimanivanua yani ki na koro koTientsin kei na so tale me ratou laki sarasara.
E muri eratou vodo sitimanivanua lesu tale ki na nodratou itikotiko, ia ni oti ga e dua na auwa sa mua na sitima ki na vualiku. Eratou a vodo cala! Eratou sega ni kila na vosa vaka-Jaina. Ratou dreta na wa ni kele ka tarova na sitima. Eratou sa qai vakasoburi tu e lomanivanua lala ka sega na ka e caka vakavo ga na taubale lesu tale ki na siti.
Oti vakalailai na nodratou taubale, ratou sa raica sara e dua na qiqi pamutaki [pump-handle car] na kena era dau vakayagataka na cakacaka ena sala ni sitima. Eratou vakataqara ena sala ni qiqi ka tekivu pamutaka yani. Ena sisi ni siro sobu, ia ena biligi ni cabe cake.
Ni ratou yaco ki na dua na baba me siro, eratou veisugusugu yani ki loma ni kareti ka tekivu qiqi yani. E a iotioti ni vodo o Graham. E galala sara tiko na mua-i-liu ni kareti. A ciciva yani na yasa ni kareti ka kaba yani ki loma. Ni cakava vaka o ya, qai sisi na yavana ka lutu yani. Ni sa dabilaki koya e dakuna, sa qai taqa yani na yavana ena yasa ni kareti me rawa ni kua ni qaqiraki. Ni sa totolo cake na cici ni kareti, e rogoca na domo itinana ni kaya, “Bud, qarauna vinaka!”
A vakaivava tu ni mataivalu. A sisi yani na yavana, ka tao ena qia ni dua na yava ni qiqi ka tarova na kareti ni rauta e dua na fute (30cm) mai ligana.
Ena gauna vata oqori, rau a moce tu kina o nona itubutubu ena dua na otela mai na vanua erau a veiqaravi voli kina vaka-peresitedi ni kaulotu ena East Central States Mission. E yadra mai o tinana rauta na 2:00 ena mataka lailai, ka vakayadrati watina: “sa dua na leqa e yacovi Bud!” erau a tekiduru ena yasa ni loga ka masulaka me taqomaki na nodrau gonetagane.
A tarogi yani ena nona ivola ka taura ni oti o ya, “Bud, na cava e leqa? Na cava e yacovi iko?”
Sa qai volavola lesu o koya ka talanoataka na ka e a yaco. Ni ratou vakasotara vata na gauna, na gauna sara ga e tavaladelade voli kina ena sala ni qiqi, o ya vata talega na gauna erau a tekiduru voli kina na nona itubutubu ena yasa ni loga ni nodrau rumu ena otela mai na yasa ni vuravura tale ka dua ka masulaka tiko me maroroi.
Na veika e sotavi ena veivakauqeti kei na masu e sega ni ka vou ena Lotu. Oqo e tiki tiko ni ivakatakila sa vakarautaka vei keda na Tamada Vakalomalagi.
E dua na iyaragi gata nei vunica sa ikoya me tukuna tiko ni sa na sega soti ni ganita meda dau masu. Veitalia se o cei o iko se cava o a sa cakava oti ena ganita ga meda dau masu.
A yalataka vakaoqo o Josefa Simici, “O ira kece era vakayago e tu vei ira na kaukauwa me ra vakamalumalumutaki ira era sega ni vakayago.”9
Ni yaco mai na veitemaki sa rawa ni ko bulia e dua na ki me bokoca laivi ena nomu vakasama, me vaka na qaqa ni dua na serenilotu dau taleitaka. Ena vakatulewa na nomu vakasama; na yagomu sa iyaragi ni nomu vakasama. Ni curu yani ki na nomu vakasama e dua na vakanananu ca, sosomitaka ena nomu bokoca. Na sere e totoka na kena irogorogo e iyaragi vinaka me vukea na nomu vakatulewataka na nomu vakasama.10
Ni a sega ni rawata o Oliver Cowdery me vakavakadewa, sa qai tukuna vua na Turaga:
“Ia, ko sa sega tiko ni kila na bibi ni ka oqo; ko a sega mada ni vakasamataka, ia ko a nanuma ga mo rawata na ka ko sa kerea vei au.
“Ia, au sa kaya vakaidina vei iko, a dodonu sara mo vakasamataka taumada vakavinaka; kevaka sa dodonu vei iko mo qai kerea, ia kevaka au kila ni ganita au na uqeta na yalomu ka na katakata mai na lomamu; raica ko na qai kila sara ni sa dodonu
“Ia, kevaka e sega tiko ni dodonu, ko na sega ni vakila e dua na ka” (V&V 9:7–9).
Na ivakavuvuli o ya ena vakaraitaki ena dua na italanoa ni dua na goneyalewa lailai, a rarawataki ganena ka tara tiko e dua na dai me tobo sivaro kina.
Ni sega ni dua e rawa ni vukei koya, sa qai kaya e lomana, “Sa vinaka, au sa na laki masulaka mada.”
Ni oti nona masu, sa qai tukuna vei tinana, “Au kila ni na sega ni toboka rawa o koya e dua na sivaro ena nona dai baleta niu sa masulaka oti. Au sa vakadeitaka sara ga oqo ni na sega ni tobo sivaro rawa!”
Kaya yani o tinana, “Ko vakadeitaka rawa vakacava?”
A kaya sara yani o koya, “Noqu masu oti ga o ya, au lako yani ki tautuba ka caqeta me kakaseresere na dai makawa o ya.”
Masu kevaka mada ga o se gone vakataki Alama na parofita se sa tasogo tu nomu vakasama vakataki Amuleki ka “kila na veika oqo, ia … e sega ga ni muria” (Alama 10:6).
Vulica mo dau masu. Dau masu wasoma. Masu ena nomu vakasama, kei na yalomu. Tekiduru ka qai dau masu. Na masu na nomu ki ni veitaratara vakai iko kei lomalagi. Na kena loka e tiko ena nomu yasa ni ilati. Au sa vulica meu dau tinia na noqu masu ena, “Me yaco ga na nomuni lewa” (Maciu 6:10; raica talega Luke 11:2; 3 Nifai 13:10).
Kakua ni namaka mo na galala mai vakadua ena leqa kei na nuinui kara, kei na mosi, kei na yalolailai, ni veika oqo eda vakau mai kina ki vuravura meda mai vosota na kena yaco.
Dua e a vola:
Liga yatayata kei na sega ni vakasama
Na ituvatuva eda vakacacana
Na Turaga sa yavutaka.
Ni da tagi ena mosi o Koya ena qai kaya,
“Waraka luvequ, na kena ivesu meu serelaka.”11
E yalataka na ivolanikalou: “Sa sega na vere tani sa yaco vei kemudou, o koya ga sa vorata rawa na tamata ia sa yalodina na Kalou o koya ena sega ni laivi kemudou mo dou dau veretaki vakalevu cake me vaka ga na nomudou kaukauwa ka na cakava talega kei na vere na sala mo dou dro kina, mo dou vosota rawa.” (1 Korinica 10:13).
E kaya na iVakabula, “Dou toro voleka mai vei au, kau na qai toro voleka yani vei kemudou, dou vakasaqarai au vakagumatua, dou na qai kunei au, dou kerekere ka na soli vei kemudou, dou tukituki ka na dolavi vei kemudou“ (V&V 88:63).
Eda tekivutaka na soqoni ni koniferedi oqo ena nodra tokoni na vakaitutu. Na imatai ni tokoni o Thomas S. Monson me Peresitedi ni Lotu i Jisu Karisito ni Yalododonu Edaidai. Au kilai Peresitedi Monson. Au nanuma, me vaka e kilai koya e dua na tamata ena vuravura oqo, kau vinakata meu vakadinadinataki koya ni a kacivi dina mai vua na Kalou ena parofisai“ (Yavu ni Vakabauta 1:5). Ena gadreva o koya na noda veimasulaki—kei Francis, na marama watina, kei na nona matavuvale—ena vuku ni icolacola sa mai vakataqari oqo vua.
Au sa na masulaka ni na tokoni ena nona bula vakayago ena nona vakasama kei na nona bula vakayalo ka sa na matata sara ki na Lotu, me vaka ni sa matata vei ira era voleka vua, ni o koya e sa “kacivi mai vua na Kalou ena parofisai.” Kei na veitabaki ni liga mai vei ira e tiko vei ira na dodonu, me ra vunautaka na Kosipeli ka ra qarava na kena veicakacaka tabu vakalotu“ (Yavu ni Vakabauta 1:5), ka sa vakatikori kina ena nona ilesilesi.
Me vakalougatataki keda na Turaga ka tokoni Pertesitedi Monson kei na nona matavuvale ena veigauna kece sara ka na ganita vakakina me na rawa ni tomana tiko kina na itavi bibi sa mai vakataqari oqo e domona. Au vakadinadinataka ka kaciva na veivakalougatataki me vaka niu dua na nona ilumuti na Turaga ena yaca i Jisu Karisito, emeni.