Kerekere, Vakasaqara, Tukituki
Ena dau ganiti keda yadudua na Yalododonu Edaidai na ivakatakila yadua.
Kemuni na taciqu kei na ganequ lomani, au sa vakavinavinaka vakalevu ena vukumuni yadua. Au vakavinavinaka talega ena cakacaka mana ni gaunisala vovou ni veitaratara ka rawa kina ni tarai ira e milioni vakamilioni na tamata e veiyasai vuravura na koniferedi oqo.
Na kila ka vakamisini talega ena gauna oqo sa rawa kina ni da vakayagataka na talevoni walesi me da veisoli itukutuku kina vakatotolo sara. Ena dua na gauna lekaleka se qai oti oqo keirau a tiko kei Wendy ena dua tale na yasai vuravura ena dua na ilesilesi, keirau rogoca kina ni sa sucu tale mai ki na neirau matavuvale e dua na gone vou. Keirau a ciqoma na itukutuku vinaka oqo ni se qai oti ga e vica na miniti mai na gauna ni sucu oqo ena veimama ni vuravura kadua.
E veivakurabuitaki cake sara mai na kila ka vakamisini oqo na noda rawa ni ciqoma vakadodonu sara ga mai lomalagi, sega ena parokaramu vakompiuta, se na isau vakavula ni veiqaravi eso. Oqo e dua na isolisoli vakasakiti duadua sa solia tu na Turaga vei keda na tamata. Sai koya na Nona veisureti yalodina me da “kerekere, ka na soli vei kemudou; vakasaqara, ka dou na kunea; tukituki, ka na dolavi vei kemudou.”1
Na isolisoli sega ni yalani oqo ni kena vakarautaki na ivakatakila yadua sa soli tu vei ira kece na Luvena. Ena sega beka ni vakabauti na kena irogorogo. Ia e dina! Au sa ciqoma ka rogoca na veivuke vakalomalagi ko ya. Kau sa vulica ni dodonu meu na dau tu vakarau e veigauna kece meu ciqoma.
Ena vica na yabaki sa oti, niu oga tiko ena kena vakarautaki e dua na vosa ni koniferedi raraba, au a vakayadrati mai na dua na moce lutu ena dua na veivakauqeti kaukauwa ni dua na vakasama. Ena gauna vata oqori au a tara mai e dua na penikau kei na pepa ena yasa ni noqu idavodavo kau vola sara vakatotolo. Au a moce tale, kau kila niu sa toboka rawa na veivakauqeti cecere o ya. Ena mataka ka tarava, au raica na tikinipepa o ya, ena rarawa ni yaloqu, ni sega sara ga ni matata na noqu volavola! Au se dau maroroya toka ga e dua na penikau kei na pepa ena yasa ni noqu idavodavo, ia au sa dau qarauna sara na noqu volavola ena gauna oqo.
Me ciqomi na itukutuku mai lomalagi, sa dodonu vua e dua me tudei na nona vakabauta ka titobu na nona gagadre. Sa dodonu vua me “kerekere ena yalodina mai vu ni yalona, ka vakabauti [Jisu] Karisito.”2 “Mai vu ni yalona” e kena ibalebale ni sa yalona dina e dua me muria na veidusimaki vakalou e soli mai.
Na ikarua ni ka e gadrevi sai koya me vulici sara vagumatua. A vakavuvulitaki na vakasama oqo vei ira na iliuliu ni Lotu vakalesui mai oqo ena gauna era vulica tiko kina ena imatai ni gauna na sala me ra rawata kina na nodra dui ivakatakila. A dusimaki ira na Turaga: “Ia au sa kaya vakaidina vei iko, a dodonu sara mo vakasamataka vakavinaka taumada; kevaka sa dodonu vei iko, mo qai kerea; ia kevaka au kila ni ganita, au na uqeta na yalomu ka na katakata mai na lomamu, raica ko na qai kila sara ni sa dodonu.”3
E tiki ni noda sa vakarau tu sai koya na noda kila kei na noda talairawarawa ki na ivakavuvuli ni Turaga e salavata kaya. Eso na Nona dina tawayalani e yaga raraba, me vaka na ivakaro mo kakua ni butako, kakua ni laba, ka kakua ni bubului vakailasu. Eso tale na ivakavuvuli se na ivakaro era vakararaba tale tu ga, me vakataki ira na ivakaro ni Siga ni Vakacecegu, na sakaramede, papitaiso, kei na veivakadeitaki.
Eso na ivakatakila era soli me baleta na veika bibi eso, me vaka na nona taya ko Noa na waqa se na kena gadrevi me ra tu na parofita eso me vakataki Mosese, Liai, kei Brigham, me ra liutaki ira na nodra tamata ena veilakolako dredre eso. Na nona iwalewale ni veivakavulici na Kalou vei ira na Luvena mai vei ira na parofita e vakadeitaka vei keda ni na vakalougatataki ira yadua na parofita ka na vakalougatataki ira era rogoca na ivakasala vakaparofita.
Na gagadre ni muria na parofita ena gadrevi kina na sasaga levu baleta ni tamata vakayago e lailai sara na ka e kila me baleta na Kalou ka lailai sobu sara me baleta na Nona parofita. E vola ko Paula ni “na tamata vakayago ena sega ni [ciqoma] na veika me baleta na yalo ni Kalou: ni ra sa ka lialia vua: ka ra na sega talega ni kila, baleta ni ra sa vakaduiduitaki tu vakayalo.”4 Na veisau mai na tamata vakayago ki na dua na tisaipeli yalodina sa dua na veisau levu.5
E dua tale na parofita e vakavuvulitaka ni “sa veimecaki na itovo vakayago kei na Kalou me tekivu sara mai na lutu i Atama, ka na vaka tu kina me tawamudu kevaka eda sa sega ni vakarorogo ki na domo ni Yalo Tabu, me da biuta tani na itovo vakayago ka yaco me tamata yalosavasava ena vuku ni isoro nei Karisito na Turaga, ka yaco me vaka na gone lailai, me da talairawarawa, yalomalua, yalomalumalumu, dauvosota, dauloloma ka talairawarawa ki na veika kece sa lewa vua na Turaga, me vaka na gone sa talairawarawa vua na tamana.”6
Ena dua na gauna lekaleka se qai oti oqo au a sarava toka e dua na veisau levu vakaoqo vua e dua na tamata keirau a sota ena imatai ni gauna rauta ni 10 na yabaki sa oti. A lako mai ki na dua na koniferedi ni iteki me tokoni kina ki na kena mataveiliutaki vou na luvena tagane. E sega ni lewe ni Lotu na tama oqo. Ni sa vakatikori oti na luvena, au a mokoti tamana ka vakacaucautaki koya me baleta na luvena tagane talei oqo. Au qai kaya ena yalodoudou: “Ni na yaco mai na siga o na vinakata kina me vauci vei iko kei na watimu na luvemudrau tagane oqo ena dua na valetabu. Ni sa yaco mai na siga ko ya, ena ka dokai vei au meu qarava na veivauci oqori ena vukumu.”
Ena yabaki tini ka tarava mai, au sega tale ni a raica na tamata oqo. Ena ono na macawa sa oti, erau a lako mai ki na noqu valenivolavola kei na watina. A kidavaki au ena marau ka tukuna na nona a kidacalataka na noqu veisureti ena gauna ko ya. A sega ni cakava kina e dua na ka me yacova mai ena dua na gauna e muri, ni sa tekivu me sega ni rogo vakavinaka na daligana. A qai yadra mai ena nona vakila ni sa veisau tiko na yagona ka sa yalani na nona gauna e vuravura. Sega ni dede, sa sega sara ga ni qai rogo tale na daligana, sa mani veisau mai ka lewena na Lotu.
Ena neirau veitalanoa, a talanoataka vakalekaleka na nona veisau mai: “A yaga me sega sara ni rogoca rawa e dua na ka na daligaqu meu qai rogoca rawa na bibi ni nomu itukutuku. Au qai vakila na levu ni noqu vinakata me ra vauci vei au na noqu daulomani. Sa kilikili tu oqo na noqu bula kau sa vakarau tu. E rawa beka ni o vakayacora na veivauci?”7 Au a vakayacora oqo ena vakavinavinaka levu vua na Kalou.
Ni sa yaco na veisau vakaoqo, ena rawa ni yaco mai na veivakasavasavataki vakayalo. E rawa ni vakatorocaketaki na ivakatakila yadua me yaco me kila ka vakayalo. Me vakaduiduitaka sai koya me kila na duidui, se me vakaduiduitaka rawa.8 Na isolisoli ni kila na duidui vakayalo e dua na isolisoli vakalomalagi.9 E rawa kina vei ira na lewe ni Lotu me ra raica na veika e sega ni laurai rawa ka vakila na veika e sega ni rawa ni tarai.
E nodra na bisopi na isolisoli oqo ena vuku ni itavi e nodra me baleta na nodra vakasaqarai na dravudravua ka vukei o ira era vakaleqai tu. Ena vuku ni isolisoli oqori, sa rawa kina vei ira na marama me ra raica na ivalavala eso e vuravura ka kila na kena e, dina ga ni kilai levu, era vovodea se rerevaki. O ira na lewenilotu e rawa ni ra kila na kena e rairai vinaka ka sega ni tudei kei na veivakasavasavataki e veilaveti ka tudei.
A vakaibalebaletaki ena veidusimaki nei Peresitedi John Taylor ena dua na gauna sa oti na kila na duidui ni ka e yaco.10 A vakavulici ira tiko na peresitedi ni iteki, bisopi, kei ira na tani: “E nodra dodonu o ira era tu [ena veitutu] oqo me ra taura na vosa ni Kalou me baleta na nodra itavi ni nodra mataveiliutaki me rawa kina ni ra vakayacora vakavinaka na Nona inaki tabu. E sega ni dua na ilesilesi se itutu ena matabete e kedra inaki me yaga yadua, me ra saumi kina se me ra rogo kina o ira era taura tu, ia na inaki era soli kina me rawa kina na inaki ni Tamada Vakalomalagi ka tarai cake kina na Matanitu ni Kalou e vuravura. Eda … segata me da kila na loma ni Kalou, ka vakayacora; ka raica ni ra vakayacora vakakina o ira eda veiqaravi ena vukudra.”11
Mo ni dui ciqoma na ivakatakila me baleta na nomuni dui gagadre kei na itavi, sa tu eso na idusidusi. Sa kerea na Turaga mo ni vakatorocaketaka na “vakabauta, na inuinui, na yalovinaka kei na loloma; ia na ka kecega sa kitaka, sa vakacaucautaka kina na Kalou,” Ia ena nomu “vakabauta, na ivalavala vinaka, na vuku, na ivalavala malua, na vosota, kei na veilomani vakaveitacini, io me daulotu, dau loloma, [ka] gugumatua,” dou kerekere ka na soli vei kemudou; dou tukituki ka na dolavi vei kemudou.12
Na ivakatakila ni Kalou e dau sala vata kei na Nona lawa tawamudu. E sega vakadua ni dau veisaqasaqa kei na nona ivunau. Ena vukei mai na noda rokova na Kalou. A solia na iVakavuvuli na idusidusi oqo:
“Koi au na Turaga, au sa yalololoma ka lomani ira era sa rerevaki au, ia sa ka ni marau meu vakalagilagi ira era sa qaravi au ena yalo sa dina ka dodonu, me yacova na ivakataotioti,
“Ia ena levu sara na kedra isau’ io ena tawamudu na nodra lagilagi.
“… Au na vakatakila vei ira na veika vuni kecega, [io] na veika au sa vakarautaka tu me baleta na noqu matanitu.”13
E sega ni gadrevi me dau lako kecega mai ena dua na gauna na ivakatakila. Ena dau lako mai vakalalai. “Sa kaya vakaoqo na Turaga na Kalou: Au na vakuria vei ira na luve ni tamata na vosa ena vosa, na vunau ena vunau, vakalailai eke ka vakalailai mai kea; ia era sa kalougata ko ira sa vakarorogo ki na noqu vunau ka vakatudaliga ki na noqu ivakavuvuli ni ra na vakavukui kina, ia ko koya sa ciqoma au na solia vakalevu vua.”14 Na vosota vakadede kei na toso tikoga erau tiki ni noda itosotoso tawamudu.
Era sa vakamacalataka na parofita na veika era a vakila ena nodra ciqoma na ivakatakila. Erau tukuna o Josefa Simici kei Oliver Cowdery ni “sa cereki tani na ilati, a sa rai na matai keirau ka tadola na neirau vakasama.”15 A vola ko Peresitedi Joseph F. Smith, “Niu sa vakananuma tiko na veitiki ni ivola oqo, sa vakararamataki na mata ni yaloqu ka sa curumi au na Yalo ni Turaga.”16
Ena dau ganiti keda yadudua na Yalododonu Edaidai na ivakatakila yadua. Na veisureti ni kerekere, vakasaqara, ka tukituki me baleta na veidusimaki vakalomalagi e tiko baleta ni bula tiko na Kalou sai Jisu na Karisito bula. E tiko baleta ni oqo na Nona Lotu bula.17 Ka da sa vakalougatataki nikua baleta ni o Peresitedi Thomas S Monson e Nona parofita bula. Me da vakarorogo ka muria na nona ivakasala vakaparofita sa noqu masu ena yacai Jisu Karisito, emeni.