Ko Hono Fakatupulaki Hoʻo Ako e Tokāteline mo e Ngaahi Fuakavá
ʻOku ʻomi ʻi he taʻú ni ha faingamālie fakaʻofoʻofa kiate kitautolu ke tau takitaha maʻu ha ngaahi tāpuaki maʻongoʻonga ʻi heʻetau ako ki he Tokāteline mo e Ngaahi Fuakavá,—ko ha tohi fakaofo ʻo e fakahā, ʻa ia ne hiki ʻi hotau kuongá ni maʻa hotau kuongá ni.
A. Roger Merrill (loto-mālie), palesiteni; Daniel K Judd (toʻohemá), tokoni ʻuluaki; mo William D. Oswald, tokoni ua.
ʻOku faʻa ui e Tokāteline mo e Ngaahi Fuakavá ko e tohi fakahinohino ʻa e ʻEikí ki hono Toe Fakafoki mai ʻo e ongoongoleleí, pea ʻoku ʻi ai ʻa e “leʻo vaivai mo mālohi ʻo e ʻEiki ko Sīsū Kalaisí, ʻoku toe folofola mai ʻi he kuonga ʻo e kakato ʻo e ngaahi kuongá.”1
ʻOku tokolahi ha kāingalotu kuo nau ʻofa lahi ʻi he tohí ni. Naʻe pehē ʻe ha fefine ʻe taha, “ʻOku ʻaonga e ngaahi fakahā pau naʻe fai ki he niʻihi fakafoʻituitui ʻi he Tokāteline mo e Ngaahi Fuakavá. ʻOku ou ongoʻi ʻe lava ke fakafekauʻaki ʻeku moʻuí mo kinautolu. Naʻe pehē ʻe ha tokotaha, “ʻOku tokoni e Tokāteline mo e Ngaahi Fuakavá ke fakafekauʻaki ʻeku moʻuí mo e ngaahi tūkunga ʻoku ou fehangahangai mo iá he ʻoku ʻikai ko ha tohi mei he kuonga muʻá. Naʻe pehē ʻe ha tangata ʻe taha, “ʻOku ou saiʻia ʻi he Tokāteline mo e Ngaahi Fuakavá he ʻokú ne tokoni ke mahino kiate au ʻa e lakanga fakataulaʻeikí.”
ʻOku mau fakamoʻoni ko e Tokāteline mo e Ngaahi Fuakavá ko e leʻo moʻoni ia ʻo e ʻEikí ʻi hotau kuongá ni ke akonekina e fānau takitaha ʻa e ʻOtuá pea ʻe maʻu ha ngaahi tāpuaki maʻongoʻonga ʻe kinautolu te nau ako iá. ʻOku mau ʻoatu foki mo ha fokotuʻu ʻe fā ʻe ʻaonga mo fakafiefia ai hoʻomou ako he taʻu ní pea fokotuʻu atu ha ngaahi founga ʻe lava ke tokoni ai ʻa e Lautohi Faka-Sāpaté.
Lau e Tohí mei he Kamataʻangá ki heʻene ʻOsi.
ʻOku hanga ʻe he Tokāteline mo e Ngaahi Fuakavá mo e Hisitōlia ʻo e Siasí, Tohi Fakahinohino ʻa e Mēmipa ʻo e Kalasí, ʻo poupouʻi ʻa e kāingalotú ke nau “lau e Tokāteline mo e Ngaahi Fuakavá mei he kamataʻangá ki heʻene ʻosi”2 lolotonga e 2009, pea fakakakato foki mo e laukonga ki he Sāpate takitaha, ʻa ia ʻoku fokotuʻutuʻu fakatefito ʻeni.
ʻI heʻetau ako he founga ko ʻení, ʻe tokoni ia ke mahino kiate kitautolu ʻa e fekauʻaki e ngaahi vahé pea pehē foki ki he kakano ʻo e vahe takitaha. ʻOkú ne tokoniʻi foki kitautolu ke tau kau atu ki ha fealeaʻaki mohu fakakaukau ʻi he kalasi Lautohi Faka-Sāpaté—ʻo toe lahi ange ai ʻa e ʻilo mo e ueʻi fakalaumālie te tau maʻu ke fakaʻaongaʻi ʻi heʻetau moʻui fakatāutahá mo fakafāmilí.
ʻI hoʻo ako folofola fakaʻahó, te ke ʻiloʻi ai ʻene ʻaonga ke tuku mavahe ha ʻaho ʻe taha pe ua he uike takitaha ke tomuʻa vakaiʻi pau ai e meʻa ʻe aleaʻi he kalasí pea toki hoko atu leva hoʻo lau e Tokāteline mo e Ngaahi Fuakavá mei he kamataʻangá ki heʻene ʻosi.
Lau pē mo Fakakaukauʻi ha Ngaahi Fehuʻi
Ne ʻiloʻi ʻe Misa Lenisō Moli Peliose Mataiasi ʻo Kuatemalá, ʻa e mālohi ʻo hono fakaʻaongaʻi ʻo e ako folofolá ke maʻu ha fakahā fakafoʻituitui maʻa ʻene moʻuí.
ʻOkú ne pehē, “ʻHili e tō ʻa e Matangi ko Misí ʻi ʻAmelika Lotoloto he 2001 ʻo haveki e meʻa kotoa aí, ne ʻi ai haʻaku ngaahi fehuʻi lahi.” “Ne u ʻalu ki haku kaumeʻa ne u fakaʻapaʻapaʻi lahi ke maʻu mei ai ha tali. Naʻá ne talamai, ‘Lau e folofolá. Te ke maʻu ai e ngaahi tali lelei taha ki hoʻo ngaahi fehuʻí.’
Naʻe pehē ʻe Misa Mataiasi, “Naʻe liliu heni ʻeku moʻuí.” “Hili haʻaku ako e folofolá ʻi ha taimi lahi, naʻe kamata ke u maʻu e tali ki heʻeku ngaahi fehuʻí. Naʻe lava ke u sio ʻoku ʻi ai ha taumuʻa ʻeku moʻuí. Ko e taimi ia ne u fili ai ke u ngāue fakafaifekau taimi kakató.”
Ne ʻikai fuoloa kuo ngāue ʻa ʻEletā Mataiasi ʻi he Misiona Honitulasi Tekusikalapaá, ʻo ne tokoni ki he niʻihi kehé ke nau ʻiloʻi e mālohi ʻo e ako folofolá.
ʻI heʻetau laukonga mo ha ngaahi fehuʻi pau ʻi hotau ʻatamaí, ʻokú ne fakaafeʻi ai e ʻEikí ke Ne ueʻi mo fakahinohino kitautolu ʻi he ngaahi faingataʻa mo e ngaahi faingamālie ʻoku tau fetaulaki mo iá. Mahalo te ke fie maʻu ke hiki e ngaahi fehuʻí ke ke lotua mo fakakau ia ʻi hoʻo ako folofolá. ʻI hoʻo maʻu e ngaahi talí, ʻe ueʻi koe ke ke vahevahe ʻa e ʻilo ko iá ʻi he Lautohi Faka-Sāpaté. ʻOku fakamāmaʻi e kau mēmipa ʻo e kalasí ʻi heʻenau fanongo ki heʻenau fefakamoʻoniʻaki ʻiate kinautolu ki hono ngāueʻaki ʻe he ʻEikí ʻa e folofolá ke hoko ko ha fakahinohino mo ha ueʻi fakalaumālie fakatāutahá.
Fekumi ki ha Ngaahi Fehokotakiʻanga, Sīpinga mo ha Ngaahi Kaveinga
Naʻe fokotuʻu mai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, ko ʻetau ako folofola kotoa pē pea tau fekumi ki ha ngaahi fehokotakiʻanga, sīpinga mo ha ngaahi kaveinga.3
Ko ha sīpinga ʻo ha fehokotakiʻanga ʻi he Tokāteline mo e Ngaahi Fuakavá, ʻokú ne fakafehokotaki ʻa ʻetau talangofuá mo e ngaahi tāpuaki kuo talaʻofa maí. “Ko au, ko e ʻEikí, ʻoku ou haʻisia ʻo ka mou ka fai ʻa e meʻa ʻoku ou leaʻakí; ka ʻo ka ʻikai te mou fai ʻa ia ʻoku ou leaʻakí, ʻoku ʻikai hamou talaʻofa” (T&F 82:10). ʻOku toe mahuʻingamālie ange ʻetau ako folofolá ʻi heʻetau ʻiloʻi ʻa e fehokotakiʻanga ko ʻení pea tau fakapapau ai ke ngāue ʻo fakatatau mo e fekau kuo ʻomi ʻe he ʻEikí ke tau faí.
Ko e sīpinga ʻe tahaʻi he Tokāteline mo e Ngaahi Fuakavá ʻoku hā ia ʻi he natula totonu ʻo e tohí. Hangē ko ʻene hā he talateú, “Naʻe maʻu ʻa e ngaahi fakahā toputapu ko ʻení ʻi he tali ki he lotu ʻi he ngaahi taimi ʻo e fie maʻu, pea naʻe tupu ia mei ha ngaahi meʻa naʻe hoko moʻoni ʻi he moʻuí pea kau ki ai mo ha kakai moʻui.”4 Ko ha ngaahi fakahā fakatāutaha ʻeni pea ʻokú ne tali ha ngaahi fehuʻi pau fekauʻaki mo e ngaahi meʻa naʻe ʻafioʻi ʻe he Tamai Hēvaní ʻe “mahuʻinga taha” (T&F 15:6; 16:6) ki he tokotaha fakafoʻituituí.5 Ko e sīpinga ko ʻeni ʻo e fekumi mo hono maʻu ʻo e fakahā fakatāutahá, ko ha sīpinga ia ʻe lava ke muimui ai ʻetau moʻuí.
Ko e taha ʻo e ngaahi kaveinga angamaheni taha he folofolá ko e “Fekumi faivelenga kiate au pea te mou ʻiloʻi au; kole, pea te mou maʻu; tukituki, pea ʻe toʻo ia kiate kimoutolu” (T&F 88:63). ʻOku fakalotolahiʻi kitautolu ʻe he ngaahi kaveinga pehení ke tau tali ha fatongia lahi ange ki heʻetau akó ʻi heʻetau lau mo fakalaulauloto ki he ngaahi folofola ʻa e ʻOtuá.
Neongo ʻoku ʻikai fakamatala e Tokāteline mo e Ngaahi Fuakavá ʻo hangē ha foʻi talanoá, ka ʻoku fakatahaʻi ʻaki ia ha ngaahi fehokotakiʻanga, sīpinga mo ha ngaahi kaveinga. Ko e taha ʻo e ngaahi tāpuaki ʻo hono aleaʻi fakataha ʻo e folofolá ʻi he Lautohi Faka-Sāpaté, ko ʻetau toe fakatokangaʻi e ngaahi fakakaukau ko ʻení lolotonga ʻetau vahevahe mo fakafanongo ki he ngaahi fakakaukau ʻa e niʻihi kehé.
Fekumi ke Fakamāmaʻi mo Fiefia Fakataha
Kuo folofola ʻa e ʻEikí ʻo pehē ko e taimi ʻoku feakoʻaki mo feakoʻiʻaki ai e kāingalotu ʻo e Siasí ʻi he Laumālié, “ʻoku fakamāmaʻi ʻa [kinautolu] pea [nau] fiefia fakataha” (T&F 50:22). ʻOku fakahoko ʻa hono akoʻi mālohi ʻo e ongoongoleleí mo e ako ʻi he ueʻi ʻa e laumālié, ʻi he taimi ʻoku mahino ai ki he kau faiakó mo e kau akó ko e Laumālie Māʻoniʻoní, ko e faiako moʻoni ʻi ha faʻahinga lokiako pē ʻo e Siasí, pea ʻoku fakaafeʻi leva ʻe he kau atu ko ia ki he kalasí ʻa e Laumālié ke fakamoʻoni ki ai.
ʻI he ako fakatakimuʻa fakaemāmani lahi ʻi Fēpueli 2007 ʻo fekauʻaki mo e faiakó mo e akó, naʻe fakaafeʻi ai kitautolu ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ke tau toe fakalahi ange hotau fatongia ki hono ako ʻo e ongoongoleleí. Naʻá ne toki fakaʻaliʻali mai leva e founga ʻe lava ke fakaafeʻi ai ʻa e kalasí ʻe he kau faiako kuo ueʻi ʻe he laumālié ke nau kau mai ki he ngaahi fealēleaʻaki fakakalasí, kae ʻikai fakalongolongo pē.
Naʻe pehē ʻe ʻEletā Hōlani, [“Kapau te tau tokoniʻi ʻa e tokotaha akó ke ne fatongiaʻaki ʻa e akó, pea kapau te tau fakamoʻoni ʻo kau ki he ngaahi moʻoni kuo tau akoʻí, ʻe fakapapauʻi mai ʻe he ʻOtuá ki hotau lotó mo e loto ʻo ʻetau kau akó, ʻa e pōpoaki ʻo e ongoongolelei ʻo Sīsū Kalaisí.”]6
ʻI hono ako ʻe he kau mēmipa ʻo e kalasí ʻi he faʻa lotu lolotonga e uiké pea nau lau fakataha mo vahevahe ʻa e ngaahi ʻilo mei he folofolá, ʻe fakamoʻoniʻi ia ʻe he Laumālie Māʻoniʻoní ʻo fakahū ange “ki he loto” (2 Nīfai 33:1) ʻo e mēmipa takitaha ʻo e kalasí ʻa e meʻa pau ʻoku fie maʻu ke ne ʻiloʻi mo faí (vakai, 2 Nīfai 32:3–5).
Ko ha Fakaafe Fakatāutaha
ʻI heʻetau lau mo ako mei he Tokāteline mo e Ngaahi Fuakavá he taʻu ní, ʻe fakamālohia ʻetau tui ki he Tamai Hēvaní mo Sīsū Kalaisí pea ʻe tupulaki ʻetau fakamoʻoni ko Siosefa Sāmitá ko ha palōfita ia ʻa e ʻOtuá ki hono toe Fakafoki mai ʻo e ongoongoleleí. ʻE toe fakalahi mai ʻe he ʻEikí ʻa ʻetau mahinó, pea ʻe hoko e folofolá ko ha konga mahuʻinga ange ʻo ʻetau moʻuí.7
ʻOku mau fakaafeʻi koe ʻi he kamataʻanga ʻo e taʻu foʻoú ni ke tau kau fakataha ʻi he “fakatotolo [fiefia] ʻi he ngaahi fekau ko ʻení [ʻi he Tokāteline mo e Ngaahi Fuakavá], he ʻoku moʻoni mo totonu ia, pea ko e ngaahi kikite mo e ngaahi talaʻofa ʻoku ʻi aí ʻe fakamoʻoniʻi hono kotoa” (T&F 1:37).
ʻOku fakahoko ʻa hono akoʻi mālohi ʻo e ongoongoleleí mo e ako ʻi he ueʻi ʻa e laumālié, ʻi he taimi ʻoku mahino ai ki he kau faiakó mo e kau akó ko e Laumālie Māʻoniʻoní, ko e faiako moʻoni ʻi ha faʻahinga lokiako pē ʻo e Siasí, pea ʻoku fakaafeʻi leva ʻe he kau atu ko ia ki he kalasí ʻa e Laumālié ke fakamoʻoni ki ai.
Ngaahi taá naʻe fai ʻe Craig Dimond
Tokāteline mo e Ngaahi Fuakavá mo e Hisitōlia ʻo e Siasí
Tohi Fakahinohino ʻa e Mēmipa ʻo e Kalasí