Ko Hono ʻIloʻi ʻo e ʻOtuá
ʻI he mei hoko hoku taʻu 18, ne u puna ki ha kiʻi kolo ko Solotonata ʻi ʻAlasikā ke ngāue ai he tutuku ʻa e akó. Ko e fuofua taimi ʻeni ke u mavahe ai mei ʻapi. Ne ʻosi aleaʻi ʻe heʻeku ongomātuʻá ke u ngāue pē mo nofo mo e fāmili Laití, ko hona kaungāmeʻa lelei naʻe ʻanaua ʻa e falekoloa he koló. Ko ʻeku ʻamanakí ke maʻu ha paʻanga feʻunga ki he ‘univēsití. Ne u toe ʻamanaki foki te u lava ʻo foki mai ki ʻapi mo ha tali ki ha fehuʻi naʻe nofo maʻu pē ʻi hoku ʻatamaí: Ko e moʻoni ʻoku ʻi ai koā ha ʻOtua?
Ne u loto ke u maʻu ha tali ʻiate au pē. Ko ia ne u fakakaukau ke u lotu ʻi he pō kotoa pē ʻo fehuʻi ki he ʻOtuá pe ʻokú Ne moʻoni koā. Ne u ongoʻi kapau ʻoku ʻi ai ha ʻOtua, te Ne tali mai ʻeku lotú. Kapau he ʻikai pē ke u maʻu ha tali, pea te u ʻiloʻi leva ʻoku ʻikai ha ʻOtua. Ne u pehē ko ha meʻa faingofua pē ʻeni.
Ne ma loki taha mo Lisa, ko e taʻahine ʻa e ongomātuʻá. Naʻá ne foki mai mei he ʻUnivēsiti Pilikihami ʻIongí he tutuku ʻa e akó ʻo ma ngāue he falekoloá. Naʻá ku saiʻia ʻia Lisa talu pē mei he kamataʻangá. Naʻá ne talavou, ʻatamai poto, loto-toʻa pea vēkeveke ʻi he moʻuí. Ne ma feohi ʻi he meimei houa kotoa ʻo e ʻaho kotoa pē ʻo e faʻahitaʻu māfana ko iá.
Naʻá ku saiʻia he fanongo ki he talanoa ʻa Lisa ʻo kau ki he anga e moʻui ʻi he ʻunivēsití. Naʻe ongo fakafiefia mo tauʻatāina ʻene moʻuí. Naʻe fokotuʻutuʻu lelei mo potupotutatau e moʻui ʻa Lisá, peá ne fokotuʻu mo e ngaahi meʻa ke fakamuʻomuʻá ʻi honau feituʻu totonú.
Ne fakautuutu ai pē ʻeku saiʻia ʻia Lisá ʻi heʻeku sio ki heʻene lau fakaʻaho e folofolá mo lotu he pongipongi mo e efiafi kotoa peé. Ne u fie ʻeke ange kia Lisa pe naʻe maʻu fēfē ʻene tui ki he ʻOtuá ka ne u ongoʻi mā he siʻi ʻeku tuí. ʻOku ou manatu ki heʻeku tokoto ʻi he mohengá ʻo fifili pe ko e hā e meʻa ʻoku leaʻaki ʻe Lisa ki he ʻOtuá ʻi heʻene lotú.
Naʻá ku tūʻulutui ʻi hoku veʻe mohengá he pō kotoa pē ʻo fai ha kiʻi lotu fakavavevave ʻo fehuʻi ki he ʻOtuá pe ʻokú Ne ʻi ai koā. Ka ne teʻeki ai pē ke u ongoʻi ha meʻa makehe pe fakalaumālie. Naʻe ʻikai te u fanongo ki ha leʻo. Ne u maʻu e ongo tatau ʻo hangē ko ia ne u ongoʻi ʻi he hili ʻeku ngaahi lotu ki muʻá. Ne u fai hokohoko ʻeni he māhina ʻe ua. Ne u ongoʻi loto-foʻi pea fakaʻau ke lahi ange ʻeku ongoʻi veiveiua ʻo kau ki he ʻOtuá.
ʻI he pō ʻe taha ne u fuʻu ongoʻi taʻelata ai peá u fakatē loʻimata. Ne u fie maʻu lahi ke u ofi ki hoku fāmilí, ngaahi kaungāmeʻá mo e ngaahi feituʻu ne u maheni aí. Ne u fie talanoa ki ha taha ʻokú ne ʻiloʻi mo ʻofa ʻiate aú, ko ia ne u tūʻulutui ʻo lotu. Ne u kamata ʻaki ʻo pehē, “ʻE ʻOtua, ʻoku ou fie maʻu moʻoni Koe he taimí ni.” Ne u fakahā ange hoku loto moʻoní ki heʻeku Tamai Hēvaní ʻi he ngaahi miniti hoko mai aí. Ne u fakahā kiate Ia ʻa e meʻa kotoa pē. Ne u talanoa mo Ia ʻo hangē pē naʻá ku tui naʻá Ne ʻi aí.
Ne u ongoʻi ha māfana ʻokú ne ʻākilotoa au. Ne kamata ke u ongoʻi ʻo hangē kuo hāʻele hifo ʻa e Tamai Hēvaní ʻo fāʻofua atu au kiate Iá. Naʻe ʻikai ke u kei ongoʻi tuēnoa. Ne u ongoʻi ha ʻofa mo ha melino. Ne u ʻiloʻi naʻe ʻi ai ha ʻOtua.
Naʻá ku fifili pe ko e hā ne ʻosi ai e māhina ʻe ua pea toki maʻu ha tali ki heʻeku lotú. Ne ʻomai ʻe he Selemaia 29:13 ʻa e talí kiate au: “Pea te mou kumi mo ʻiloʻi au, ʻo ka mou ka kumi kiate au ʻaki homou lotó kotoa.”
Naʻe faifai pea maʻu ha tali ki heʻeku lotú hili ia haʻaku fekumi lahi ʻi hoku lotó. Naʻá ku tui naʻe ʻi ai ha ʻOtua. Naʻá ku lotu pea fekumi lahi ki ai ʻi heʻeku ngaahi leá mo e loʻimatá.
Naʻe liliu ʻe he pō ʻe taha ko iá ʻa ʻeku moʻuí. Naʻá ku ngāue fakafaifekau peá u mali ʻi he temipalé. ʻOku hokohoko atu pē ʻa e tupulaki ʻa ʻeku tui ʻoku ʻi ai ʻa e ʻOtuá.
ʻOku ou faʻa fakakaukau ki he faʻahitaʻu māfana ko ia ʻi ʻAlasikaá. Ka ne taʻeʻoua e tā sīpinga ʻa Lisá, pehē kuo ʻikai te u faʻa kātaki he ngaahi māhina ne u lotu aí. Naʻe mei lava pē ke u foʻi pea ʻikai ke u teitei ʻiloʻi ʻa e ʻofa ʻa ʻeku Tamai Hēvaní. Te u houngaʻia maʻu pē kia Lisa mo ʻene tā sīpingá. Naʻá ne tokoniʻi au ke u ʻiloʻi ʻa e ʻOtuá mo ongoʻi ʻEne ʻofa kiate aú.
Tā fakatātaaʻi ʻe Julie Rogers