Ko e Foki ki ʻApí

Sūsana Kōpolo, ʻIutā, USA

Ko ʻeku fuofua nofo mavahe mei ʻapí, ko e taimi ko ia ne māvae ai ʻeku ongomātuʻá. Ko e toki māhina pē ia ʻe taha ʻeku ʻi he ʻunivēsití, pea ʻi he mafuli ko ʻeni ʻeku tuʻunga moʻui fakafāmilí, ne u feinga ke mahino ʻa hono ʻuhinga ʻo e foʻi lea ko e ʻapi. ʻI he vete ʻa ʻeku ongomātuʻá pea hiki hoku fāmilí mei he ʻapi ne u nofo ai he taʻu ʻe 18 kuo hilí, ne u fuʻu puputuʻu ʻaupito. Naʻá ku ʻiloʻi naʻe ʻikai te u tuēnoa, ka ko e ongo ia ne u maʻú.

Ne u faʻa fanongo pē hono fakamatalaʻi ʻo e Siasí ko ha “ungaʻanga mei he afaá” (T&F 115:6). Naʻe hoko e ʻinisititiutí ko e ungaʻanga kiate au ʻi heʻeku fepaki mo e afā foʻou ko ʻeni heʻeku moʻuí. Naʻá ku lesisita he ʻinisititiutí, pea neongo ʻoku ʻikai te u manatuʻi e ngaahi foʻi lea totonu naʻe fakaʻaongaʻi ʻi he lēsoní, ka he ʻikai teitei ngalo ʻa e ongoʻi nonga mo e fiemālie ne u maʻu heʻeku fanongo ki aí. Naʻe kamata ke u ʻiloʻi ʻa e ʻofa ʻa ʻeku Tamai Hēvaní ʻiate aú, pea fakaʻau ke u toe maheni lelei ange mo e tokotaha faleʻi lelei taha kuó u ʻiloʻí: ʻa Sīsū Kalaisi.

Naʻe pau ke u totongi ʻeku ako he ʻunivēsití, ka ne u ako e ngaahi lēsoni mahuʻinga tahá mei he ngaahi kalasi ʻinisititiutí ʻa ia ʻoku taʻetotongi ʻeku kau ki aí. ʻOku ou ʻilo he taimí ni ko hono fakaʻuhingaʻi ʻo e ʻapí ʻoku ʻikai ko e fale ʻokú ke tupu hake aí ka ko ha feituʻu ʻoku akoʻi ai e ngaahi lēsoni fekauʻaki mo e moʻuí pea ʻi ai e ʻofá. Tupu mei he meʻa ne u akó mo e Laumālie ne u ongoʻí, kuo hoko ai e ʻinisititiutí ko ha ʻapi foʻou moʻoku. Meʻa fakaʻofoʻofa moʻoni ko e ʻi ai ha feituʻu ʻoku ou ongoʻi ʻoku ʻofeina mo talitali lelei ai aú.