Ko ha Fakaafe ki he Kau Finemuí
Elaine S. Dalton (lotomālie), palesiteni; Mary N. Cook (toʻohema), tokoni ʻuluaki; mo Ann M. Dibb, tokoni ua.
ʻOku ʻikai faingofua ke te hoko ko ha “faʻifaʻitakiʻanga ʻo e kakai tuí.” ʻE fie maʻu ke tau feinga fakaʻaho ke manatuʻi pe ko hai kitautolu mo e meʻa ʻoku fai ʻe he kakai tuí. ʻOku mau fie fakaafeʻi kimoutolu ke mou fai ha meʻa ʻe tolu ʻi he ʻaho kotoa pē ʻa ia ʻe lava ke ne ʻoatu ha ivi pea mo tokoniʻi koe ke ke hoko ko ha faʻifaʻitakiʻanga ki ho fāmilí mo e kaungāmeʻá. ʻI heʻemau hoko ko e kau palesitenisií, ʻoku peseti ʻe 100—ʻeni he taimi kotoa pē. Te mou fie kau mai mo kimautolu?
ʻUluakí, lotu ʻi he ʻaho kotoa pē.
Uá, lau e Tohi ʻa Molomoná he ʻaho kotoa pē ʻo ʻoua naʻa toe siʻi hifo he miniti ʻe nimá.
Tolú, malimali he ʻaho kotoa pē.
ʻOku mau fakaafeʻi koe ke ke malimali he ʻokú ke ʻi he māmaní ʻi he taimi fakaʻofoʻofa ko ʻeni kuo toe fakafoki mai ai ʻa e ongoongolelei ʻo Sīsū Kalaisí. Kuo akonekina koe ʻe ha palōfita ʻa e ʻOtuá ʻe tohoakiʻi atu kiate koe ʻa e kakai lelei ʻo e māmaní ʻo aʻu ki ha tuʻunga te ke “hā ʻilonga mo makehe ai—ʻi ha ngaahi tōʻonga ʻoku fakafiefia.1”1
Fakakaukau angé ki he meʻa ʻe hokó ʻo kapau ʻe fai fakaʻaho e ngaahi meʻa ko ʻeni ʻe tolú ʻe ha kau finemui ʻe toko lauiafe ʻoku nau hangē pē ko koé!
Ko e lahi ʻo e ngaahi lavameʻa tuʻuloa ʻo e moʻui ní ʻoku langa ia ʻi ha fakavaʻe ʻo hono toutou fai ʻo e fanga kiʻi meʻa īkí ʻi ha taimi lōloa. ʻOku iiki mo faingofua e fanga meʻa ko ʻeni ʻe tolú, ka ke manatuʻi, “ʻoku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6). ʻOku mau ʻilo te mou ʻiloʻi ʻa e ngaahi tāpuaki ʻo hono fai fakaʻaho ʻo e ngaahi meʻá ni ʻe tolu. Pea kapau ʻe ngalo ha ʻaho ʻe taha, te ke lava pē ʻo toe kamata he ʻaho hono hokó.
ʻOku mau fakamoʻoni kapau te ke lotu, lau e Tohi ʻa Molomoná, pea malimali ʻi he ʻaho kotoa pē, ʻe faitāpuekina koe ʻi hoʻo feinga ke fai iá pea te ke hoko ko ha faʻifaʻitakiʻanga ʻo e kakai tuí—ko ha finemui te ne lava ke fakahoko ha lelei ʻi he māmaní.