Ko ha Lēsoni Naʻá ne Liliu ʻEmau Efiafi Fakafāmili ʻi ʻApí
ʻOku ʻi ai ʻemau fānau iiki ʻe toko tolu, ko e taʻu nima, tolu, mo e taʻu taha. ʻI he kamataʻangá naʻe taʻemaau atu pē ʻemau efiafi fakafāmili ʻi ʻapí. ʻE hohaʻa e fānaú ʻo tuku ai pē tokangá ia kiate kinautolu. Ne ma meimei ongoʻi loto-foʻi mo hoku uaifí.
Ka ʻi he pō Mōnite ʻe taha, naʻe faiako ai hoku uaifí ʻo kau kia Samuela ko e tangata Leimaná ʻo ne fakaʻaongaʻi ha ʻū fakatātā ʻi ha papa tupenu sipi. Naʻa mau fetongitongi kātoa ʻi hono fakapipiki ʻo e ʻū fakatātaá he papá ʻo fakatatau pē ki he kakai ʻi he fakamatalá he taimi naʻe lau ai ki honau hingoá. Naʻe fuʻu fiefia ʻaupito e fānaú he ʻekitivitií pea ko e fuofua taimi ia hili ha ngaahi māhina lahi ke fai ai haʻamau efiafi fakafāmili ʻi ʻapi naʻe nonga pea fonu he Laumālié.
Naʻe liliu ʻe he lēsoni ko ʻení ʻemau ngaahi efiafi fakafāmili ʻi ʻapí. Naʻe kamata ke mau teuteu ha ngaahi lēsoni te mau kau kotoa ki aí, pea naʻe loto lelei e fānaú ke nau fai e ngaahi meʻa kehekehe ke lele lelei ai ʻemau efiafi fakafāmili ʻi ʻapí. Ne mau kamata tuku foki ha taimi lahi ange ki hono palani ʻemau ngaahi efiafi fakafāmili ʻi ʻapí. Naʻa mau fakapapauʻi foki he ʻikai ʻasenita tatau ha ongo efiafi fakafāmili ʻi ʻapi. Naʻe tokoni e kehekehe ʻa e ngaahi ʻekitivitií ke ne pukepuke ʻa e tokanga ʻa ʻema fānaú.
Ko e ngāue lahi ʻa ʻema feinga ke fokotuʻu mo tauhi maʻu e ngaahi meʻa ko ʻení ʻi heʻemau ngaahi efiafi fakafāmili ʻi ʻapí. Ka ko e taimi ní kuo kau mai ʻema fānaú ki he efiafi fakafāmili ʻi ʻapí pea ʻi ha founga ʻaonga ange.