Ko e Uike ʻo Pení
“Naʻe tāpuakiʻi ʻe he ʻEikí ʻa e ʻaho Sāpaté mo fakatapui ia” (Mōsaia 13:19).
Naʻe hili ʻe Peni hono nimá he katoleta ʻi hono tafaʻakí ʻi he kaá. Naʻe ʻave ia ʻe heʻene faʻeé mo ʻene tamaí ki he ʻapi ʻo ʻene kui tangatá. ʻE nofo ʻa Peni mo ʻene kuí ʻi ha uike kakato ʻe taha. ʻIkai ke ʻi ai hono ngaahi tokouá, ʻikai ke ʻi ai ʻa hono kiʻi tuofefiné—ko Peni pē mo ʻene kuí.
Ne ʻosi talanoa ʻa Peni mo ʻene kuí fekauʻaki mo e uike te na nofo aí. Naʻe pehē ʻe heʻene kuí ko e uike ia ʻo Peni pea te na fai e meʻa kotoa pē ʻoku saiʻia ai ʻa Pení. Naʻe sio ʻa Peni ki tuʻa he matapā ʻo e kaá. Naʻá ne manatuʻi nai ke faʻo e meʻa kotoa pē? Kuó ne ʻosi faʻo hono tatā taumātaʻu monūʻiá, matasioʻata laʻaá, mo e ʻū tohi naʻá ne saiʻia taha aí.
Naʻe pehē mai ʻene faʻeé mei he sea muʻá, “Manatuʻi ʻoku ʻikai ke kau hoʻo kuí ki hotau siasí. Ko ha tokotaha lelei ia pea ko ha kui lelei ia. Ka ʻe ʻi ai ha ngaahi meʻa ʻe ʻi hono falé ʻe hā ngali kehe kiate koe.”
“Hangē ko e hā?” Naʻe ʻiloʻi ʻe Peni ʻoku ʻikai ʻalu ʻene kuí ki he lotú. Ka naʻe teʻeki ai te ne fakakaukau ia pē ʻe founga fēfē haʻane kehe mei ai.
Naʻe pehē ange ʻe heʻene tamaí, “ʻE fie maʻu ke ke fakamanatu ange ki ai ʻoku ʻikai te ke inu tī ʻaisi koe.”
Naʻe pehē ange ʻe Peni, “ʻOku sai.”
Naʻe talaange ʻe heʻene faʻeé, “He ʻikai te ke lava ʻo ʻalu ki he lotú he Sāpaté, ka te ke lava ʻo tauhi e Sāpaté ke māʻoniʻoni ʻi ha ngaahi founga kehe.”
Naʻe pehē ange ʻe Peni, “Te u fai ia.”
ʻI heʻenau aʻu atu ki he ʻapi ʻo ʻene kuí, ne ʻosi talitali mai ʻene kuí ʻi he tafaʻaki ki muʻá. Ko Peni pē naʻe fuofua hopo ki tuʻa mei he kaá. “Siʻeku kui!”
“Fēfē hake e kiʻi tamasiʻi taʻu fitu ʻoku ou saiʻia taha aí?” Naʻe fāʻofua e kui ʻa Pení kiate ia. “Kuó ke mateuteu ki ho uike makehé?” Te ke fili ʻe koe ʻa e meʻa ke ta faí.”
“ʻE lava ke ta ō ʻo taumātaʻu?” Ko e fehuʻi ange ia ʻa Pení. “Naʻá ku haʻu mo hoku tatā taumātaʻu monūʻiá.”
Naʻe talaange ʻe heʻene kuí, “ʻIo, lava lelei.”
“Pea ʻe lava ke ta ō ki he tauhiʻanga ʻo e fanga manú (zoo)?” Ko e fehuʻi ange ia ʻa Pení. “Ne u haʻu mo hoku matasioʻata laʻaá.”
Naʻe pehē ange ʻe heʻene kuí, “ʻIo, lava lelei.”
“Pea ʻe lava ke ta laukonga fakataha?” Ko Peni ange ia. “Naʻá ku haʻu mo e ʻū tohi ʻoku ou saiʻia taha aí.”
Naʻe pehē ange ʻe heʻene kuí, “ʻIo, lava lelei.” “Pea ʻoku ou tui ʻe fie maʻu ke ta ō ki falekoloa ke ke fili ai haʻo meʻavaʻinga.”
Naʻe pehē ange ʻe Peni, “Tōtō atu.” “Ko ha uike ʻeni ʻe fakalata!”
Naʻe ʻalu ʻa Peni mo ʻene kuí ʻo taumātaʻu he ʻaho Falaité.
Naʻe ʻalu ʻa Peni mo ʻene kuí ki he tauhiʻanga ʻo e fanga manú he ʻaho Tokonakí.
ʻI he ʻaho hono hokó, naʻe fakapaku ai ʻe heʻene kuí ha keke ke na kai pongipongi. Naʻe talaange ʻe heʻene kuí, “Te ta ō ki falekoloa ʻo fakatau he ʻahó ni.”
“He saí!” Ko e kaila ia ʻa Pení. “Ko e hā e meʻavaʻinga ʻoku totonu ke u fakataú?”
Naʻe toki manatuʻi hake ʻe Peni—ko e Sāpate ʻeni. Te ne talaange fēfē ki heʻene kuí ke ʻoua ʻe fai ha fakatau he Sāpaté?
ʻI he ʻosi pē ʻa e kai pongipongí naʻe lotu ʻa Peni ʻi hono lokí. Naʻá ne kole ki he Tamai Hēvaní ke tokoni ange ke ne fakamatala ki heʻene kuí kau ki hono tauhi e ʻaho Sāpaté ke māʻoniʻoní.
Hili e lotu ʻa Pení naʻá ne tangutu hono funga mohengá. Naʻe ui mai e kui ʻa Peni ki ai, “ʻOua leva ke tui hoku suú ka ta ō.”
Ne fuʻu mihiʻi ʻe Peni ʻene mānavá peá ne tuʻu ki ʻolunga. Naʻá ne ʻalu atu ʻoku nonoʻo mai ʻe heʻene kuí hono suú.
“Mālō ʻaupito hono ʻave au ke ta ō ʻo taumātaʻú pea ki he tauhiʻanga ʻo e fanga manú. Ka ʻoku ou pehē pē ʻoku totonu ke ta mālōlō he ʻahó ni.”
“Ko e hā hoʻo ʻuhingá?” Ko e fehuʻi ange ia ʻene kuí. “Ne u palōmesi atu te ta ō ʻo fakatau.”
“ʻOku ou ʻiloʻi, ka ʻe lava ke ta toki ō ʻi ha ʻaho kehe?”
“ʻOkú ke sai pē? ʻOkú ke puke?”
Naʻe pehē ange ʻe Peni, “ʻIkai, tangataʻeiki.” “Ko e ʻaho Sāpate ʻeni. ʻI homau ʻapí ʻoku ʻikai te mau ō kimautolu ʻo fakatau he Sāpaté.”
Naʻe ʻikai ke lea ʻene kuí.
“ʻE lava ke ta nofo pē ʻi ʻapí ni he ʻahó ni?” Ko e kole ange ia ʻa Pení. “ʻE lava pē ke ta luelue. ʻE lava ke ta lautohi.”
Naʻe malimali ange ʻene kuí. Naʻá ne talaange, “ʻIo, ʻe lava.” “Ko e uike ia ʻoʻou, pea te ke fili e meʻa ke ta faí.”
Naʻe fāʻofua ʻa Peni ki heʻene kuí. Naʻe talaange ʻe Peni, “Ne u ʻiloʻi pē ʻe hoko ʻeni ko ha uike fakalata.”
Ngaahi tā fakatātā ʻa Craig Stapley