Haʻu ʻo Fanongo ki he Leʻo ʻo e Palōfitá
Hoko ʻo Hangē ko Sīsū Kalaisí
Mei ha lea ʻi he konifelenisi lahi ʻo ʻOkatopa 2005
ʻOku fakamatala ʻa Palesiteni ʻUkitofa ki hono ʻuhinga ʻo e fakatupulaki ʻo ha ngaahi ʻulungāanga faka-Kalaisí.
Naʻe fakahinohino ʻe Sīsū Kalaisi ʻEne kau ʻAposetoló he kamataʻanga ʻo ʻEne ngāue fakafaifekau ʻi he māmaní, “[Haʻu,] muimui ʻiate au, pea te u ngaohi ʻa kimoua ko e toutai tangata” (Mātiu 4:19). ʻOku fie maʻu ke tau “muimui ʻiate Ia,” pea ʻi heʻetau fai ʻení, ʻe tāpuakiʻi kitautolu ʻe he Fakamoʻuí ʻo laka hake ia ʻi heʻetau malava ke aʻu ki he tuʻunga ʻokú Ne finangalo ke tau aʻusiá.
Ko e muimui ʻia Kalaisí ko haʻatau hoko ʻo tatau ange mo Ia. Ko haʻatau ako mei Hono ʻulungāangá. ʻOku fakaafeʻi kitautolu ʻe he Fakamoʻuí ke tau ako ʻEne ongoongoleleí ʻaki ʻetau moʻuiʻaki ʻEne ngaahi akonakí. Naʻe fakamatalaʻiʻaki ia ʻe he kau palōfita ʻo e kuonga muʻá mo e ʻaho ní ha foʻi lea ʻe fā: “Tauhi e ngaahi fekaú”—ʻikai toe lahi hake pe toe siʻi hifo ai.
ʻOku fakamatala e folofolá ki ha ngaahi ʻulungāanga faka-Kalaisi ʻoku fie maʻu ke tau fakatupulaki lolotonga ʻetau moʻuí. ʻOku kau ai ʻa e ʻiló mo e loto-fakatōkilaló, ʻofa faka-Kalaisí mo e ʻofá, talangofuá mo e faivelengá, tuí mo e ʻamanaki leleí. Ko e ngaahi ʻulungāanga faka-Kalaisí ko ha ngaahi meʻafoaki kinautolu mei he ʻOtuá. He ʻikai lava ke fakatupulaki kinautolu taʻekau ai ʻEne tokoní. ʻOku foaki taʻetotongi mai ʻa e tokoni ko ia ʻe taha ʻoku tau fie maʻu kotoá ʻi he Fakalelei ʻa Sīsū Kalaisí.
ʻOku ʻuhinga ʻa e tui kia Sīsū Kalaisi mo ʻEne Fakaleleí, ki he falala kakato kiate Ia—falala ki Hono mālohí, potó, mo e ʻofa taʻefakangatangatá. ʻI he taimi ʻoku tau tui ai kia Kalaisí, ʻoku feʻunga ʻetau falala ki he ʻEikí ke muimui ʻi Heʻene ngaahi fekaú—ʻo aʻu pē ki he taimi ʻoku ʻikai mahino kakato ai kiate kitautolu hono ʻuhingá. ʻI heʻetau feinga ke tatau ange mo e Fakamoʻuí, ʻe fie maʻu ke tau falala ki he ngaahi ʻulungāanga lelei ʻo Sīsū Kalaisí mo e ngaahi tāpuaki ʻo ʻEne Fakaleleí, ʻo fou ʻi he hala ʻo e fakatomala moʻoní.
ʻI heʻetau fakatupulaki ʻa e ngaahi ʻulungāanga faka-Kalaisí ʻi heʻetau moʻuí, te nau “fua [māmālie] hake [kitautolu] ʻo hangē ʻi he kapakau ʻo e fanga ʻīkale” (T&F 124:18). ʻE fakatou ʻave kitautolu ʻe he tuí mo e ʻamanaki leleí ke tau fakalaka atu ʻi he ngaahi ʻōseni ʻo e ʻahiʻahí, ngaahi moʻunga ʻo e faingataʻaʻiá, pea fakafoki hao kitautolu ki hotau ʻapí mo e ikuʻanga taʻengatá. ●
ʻOfa Haohaoá, tā ʻe Del Parson, ʻoua naʻa hiki hano tatau