E Lava Nai Ke u Fakangaloʻi ʻEku Ngaahi Fehālaaki he Kuo Hilí?
ʻOku mātuʻaki mahuʻinga ʻaupito ʻa e ʻulungāanga lelei mo fiefiá ki he kakai ʻoku ngāue tuʻuaki koloá, ʻo hangē ko ia ʻoku ou faí. Ka ʻi he ngaahi taʻu lahi kuo hilí, ne u ongoʻi loto-foʻi pea ʻikai ke u toe fie lea ki ha taha. Naʻe hoko moʻoni ʻeni he hoʻatā ʻe taha.
Kuo pau pē naʻe hā ʻi hoku matá ʻa e faʻahinga ongo ne u maʻú he naʻe ʻeke mai ʻe ha taha ʻo hoku kaungā-ngāue ne ma faʻa talanoa maʻu peé, pe ko e hā e meʻa ʻoku hokó. Ne u talaange kuó u ʻosi vete mo hoku uaifí hili ia haʻama nofo-mali ʻi ha taʻu ʻe ono. Naʻe taʻu ono ʻaki he māhiná ni ʻema veté, ko ia naʻe lōloa tatau pē taimi kuó u vete aí mo e taimi ne u nofo-mali aí. Naʻe puputuʻu hoku ʻatamaí mo hoku lotó pea naʻe mamahi hoku laumālié. Ne u ʻiloʻi naʻe ʻikai te u ʻi ai ʻi he ngaahi meʻa lahi naʻe hoko ki heʻeku fānaú, pea naʻe hoko ʻa e ʻilo ko iá ko ha meʻa fakamamahi maʻu pē kiate au. Ne lōmekina au ʻe he ongoʻi taʻelatá, pea naʻe ʻikai te u sio atu ki ha founga ke vetekiʻaki—pe ha ʻamanaki lelei pē ā—ʻi he kahaʻú. Ne u talaange ki hoku kaungā-ngāué ko e totongi ʻeni ki heʻeku ngaahi fehālaakí.
Naʻe tali mai leva ʻe hoku kaungā-ngāué, ʻa ia naʻe kau ia ki ha siasi faka-Kalisitiane kehe. “Ko e hā e totongi ʻokú ke lau ki aí?” ko ʻene fehuʻí mai ia. “Kuo ʻosi fai ʻe Sīsū Kalaisi ʻa e totongí, ʻo kapau kuó ke ʻosi fakatomala moʻoni mei hoʻo ngaahi angahalá.” Pe ʻoku ʻikai koā te ke manatuʻi hono ʻuhinga naʻe haʻu ai ki he māmaní?”
Ne u ofo heʻene talí, pea ʻikai haʻaku toe lea. Naʻe ongo mālohi ʻene ngaahi leá ʻi hoku lotó he hoʻatā kotoa ko iá. ʻIo—neongo ne u nofo mo e ngaahi nunuʻa ʻo ʻeku ngaahi fehālaakí, ka kuo totongi ia ʻe Sīsū Kalaisi. Ko e hā ne ʻikai te u ʻiloʻi ai ʻení? Naʻá ku ʻiloʻi e tokāteliné, pea naʻá ku ʻiloʻi naʻe moʻoni ia. ʻI heʻeku ʻiloʻi ʻa e mālohi ʻo e Fakaleleí ʻi heʻeku moʻuí, ne fakafonuʻaki au ha ongoʻi nonga mo e fiemālie ʻa ia ʻoku ou kei manatu pē ki ai he ʻahó ni.
Kuo ʻosi atu ha ngaahi taʻu mei he meʻa ko ʻeni ne hoko ʻi he ngāué. ʻOku ou ʻiloʻi ʻoku ʻi ai ha nunuʻa ʻo ʻetau ngaahi tōʻongá, he ʻikai toe mole mei heʻetau moʻuí. ʻOku hanga ʻe honau konga lahi ʻo uesia e moʻui ʻa e kakaí. Naʻe ʻikai ko ha meʻa faingofua ʻa e taʻelatá, ka naʻe tokoni ia ke u ʻiloʻi ai hoku ngaahi vaivaí peá u kole fakamolemole ai ki heʻeku Tamai Hēvaní mo e kakai naʻe uesia lahi tahá—ʻa ʻeku fānaú mo ʻenau faʻeé.
Te u lava ke pehē ʻoku ʻi ai ha nonga mo ha ʻamanaki lelei ʻiate au he taimí ni ʻo kehe ia mei he ongo ne u maʻu he hoʻatā ko iá. ʻOku ou ʻilo kuo totongi ʻe Sīsū Kalaisi ʻa ʻeku ngaahi fehālaakí, pea ʻoku ou ʻilo pau ʻeni he kuó u fakatomala. Kuó Ne poupouʻi au lolotonga e ngaahi taʻu faingataʻá ni. Neongo ʻoku kei hokohoko atu pē hoku ngaahi faingataʻaʻiá, ka ʻoku ou ʻiloʻi ʻe tokoniʻi au ʻe he ʻEikí ʻi haʻaku fakatomala, tafoki kiate Ia, mo tauhi e ngaahi fekaú.