Te tatarahapa e te faafariuraa
Te hoê varua tatarahapa o te hoê ïa varua tei faafariuhia, e te hoê varua tei faafariuhia o te hoê ïa varua tei tatarahapa.
I teie matahiti i mairi a‘e nei, te tere ra maua o Elder David S. Baxter i te hoê amuiraa titi, tape‘a’tura maua i te hoê fare tamaaraa. I to maua ho‘iraa i to maua pereoo, tapiri mai nei te hoê vahine o tei pii mai ia maua. Ua hitimahuta maua i to’na huru. Te huru o to’na faanehenehe (e aore râ, ua ‘ere i te reira) e au ïa ia parau vau na roto i te faatura e, « mea taa‘e roa ». Ui mai nei e e na Elders anei maua no te Ekalesia. Pahono atura maua e, e. Ma te imi e nahea ia haamata, faati‘a mai nei i te aamu o to’na oraraa fifi roa, ua topa i roto i te hara. I teie nei, 28 matahiti to’na, ua ino roa. Aita e faufaa faahou ia’na ia ora. A faati‘a noa’i oia, haamata maira te maitai o to’na varua i te iteahia. Na roto i te ta‘i e te taparu, ani mai nei e, te vaira anei te tahi ti‘aturiraa no’na, te hoê rave‘a no te iritiraa ia’na i rapae i teie apoo.
« E », o ta maua ïa pahono, « te vai nei te ti‘aturiraa. Ua taamuhia te ti‘aturiraa i te tatarahapa. E nehenehe oe e taui. E nehenehe oe e ‘haere mai i te Mesia, e ia maitai roa Ia’na’ ».1 Ua ani u‘ana’tu maua ia’na eiaha e haamaoro.2 Ua ta‘i oia ma te mărû e ua haamauruuru oia ia matou.
I roto i to maua tere e o Elder Baxter, ua feruri hohonu maua i teie nei ohipa. Ua haamana‘o maua i te a‘o tei horo‘ahia e Aarona i te hoê varua ti‘aturi ore, o tei parau e, « e ia tatarahapa i ta oe mau hara, e ia pi‘o i raro i mua i te Atua, e ia pii atu i to’na ra i‘oa i te faaroo… ei reira oe e roaa’i te tia‘i ta oe i hinaaro nei ».3
I roto i teie tuhaa amuiraa hopea o te amuiraa rahi, e a‘o atu vau no ni‘a i te tatarahapa. E parau atu vau no te mea ua faaue te Fatu ia‘u To’na tavini ia pii i te tatarahapa i te mau taata atoa.4 Ua faaho‘i faahou mai te Fatu i Ta’na evanelia no te hopoi mai i te oaoa i Ta’na mau tamarii, e ua riro te tatarahapa ei tuhaa faufaa no te evanelia.5
E parau haapiiraa tahito roa te tatarahapa no te evanelia iho. Te mau haapiiraa o te Bibilia mai te buka Genese mai â6 e tae atu i te Apokalupo7 te haapii nei i te tatarahapa. I roto i te mau haapiiraa a Iesu Mesia i roto i Ta’na misioni i te tahuti nei teie ïa hoê o te mau fa‘aararaa : « Ua tae i te tau te fatata mai nei te basileia o te Atua : a tatarahapa, a faaroo mai i te evanelia nei »,8 e « ia ore râ outou ia tatarahapa, mai te reira atoa ïa to outou pohe ».9
E mea pinepine atoa te mau faahororaa no te tatarahapa i te faahitihia i roto i te Buka a Moromona.10 I te feia no Amerika tahito ra, ua horo‘a te Fatu i teie faaueraa : « E parau faahou atu vau ia outou, ia tatarahapa ia faariro ia outou iho mai te tamarii aru‘aru ra, e ia bapetizohia i to‘u ra i‘oa e tia’i, aore ïa, e ore outou e ô i te basileia o te Atua ra ».11
Na roto i te faaho‘i-faahou-raa-hia mai te evanelia, ua haapapû faahou mai to tatou Faaora i teie nei parau haapiiraa. Te auraa no te parau tatarahapa i roto i to’na mau huru atoa e itehia ïa i roto i te irava 47 no te tuhaa 138 no Te Parau Haapiiraa e te Mau Parau Fafau !12
Tatarahapa i te hara
Eaha te auraa no te parau tatarahapa ? E hi‘o tatou i te tatararaa a te hoê ditionare i te parau no te tatarahapa oia ïa « o te fariu-ê-raa ïa i te hara… ia ite i te tatarahapa [e] te oto ».13 E ere te tatarahaparaa i te hara i te mea ohie. E mea faufaa râ. Titauhia te hoê taahiraa i muri i te tahi taahiraa ia tatarahapa. E faaohia râ te pure haehaa i roto i te mau taahiraa’toa. Te mau titauraa no te faaoreraa hara, oia ïa na mua roa, ia farii e ua hara, ia faahapa i te aau, e i muri mai ia fa‘i.14 « Na roto i teie nei mea e ite ai outou e mai te mea ua tatarahapa te taata i ta’na ra mau hara—inaha, e fa‘i mai oia i te eira e e haapa ê roa’tu ho‘i ».15 Te fa‘iraa no te taata ïa o tei hara. E mea ti‘a râ te fa‘iraa ia riro ei mea haavare ore eiaha râ, te parau-noa-raa e, ua hape i muri mai i te ite-raa-hia taua hape ra. Mai te mea e rave rahi o tei hara, e mea ti‘a ia tatarahapa te reira mau taata paato‘a. Te mau ohipa o tei faaino i te ti‘amâraa o te hoê taata i roto i te Ekalesia e aore râ, i te ti‘araa o to’na mau tura, e mea ti‘a ïa ia haere e tatarahapa vitiviti noa i te episekopo, o ta te Fatu i pii ei haava i Iseraela.16
Te taahiraa i muri mai oia ïa te faaho‘iraa—te tata‘iraa i te hapa i ravehia—mai te mea e nehenehe. I muri mai i te taahiraa no te faaotiraa eiaha e na reira faatou—o te tatarahaparaa ïa « ma te aau tae ».17 No te mea, te hoo o tei aufauhia e te taraehara a Iesu Mesia, e horo‘ahia’tu ïa te faaoreraa taato‘a i te taata tei hapa e o tei tatarahapa e o tei faaea ti‘amâ noa i rapae i te hara.18 I te varua o tei tatarahapa teie ta Isaia i parau, « ia uteute roa ta outou mau hara ra, e riro ïa mai te hiona ; e ia ura‘ura noa’tu mai te faaio ra, e riro ïa mai te vavai ra i te teatea ».19
E titau mai te Fatu i te tatarahapa mai ta tatou e tai‘o i roto i te tuhaa 19 no Te Parau Haapiiraa e te Mau Parau Fafau e : « No reira te faaue atu nei au ia oe ia tatarahapa—a tatarahapa, oi ta‘iri atu vau ia oe i te raau o to‘u nei vaha, e i to‘u riri u‘ana, e i to‘u iriâ ho‘i, ia rahi â to oe mau mamae ra—te rahiraa o te reira mamae aore roa i itea ia oe, te huru mau o te reira mamae aore roa ho‘i i itea ia oe, oia ïa, ta oe rave‘a fifi rahi no te faaoroma‘i i te reira aore roa ho‘i i itea ia oe na.
« Tera râ, mai te mea e aita ratou e tatarahapa ia roohia ratou i te mamae rahi e tia’i ia au i ta‘u i faaoroma‘i ra ».20
A onoono ai te Fatu i to tatou tatarahaparaa, aita râ te rahiraa taata e ite ra i te faufaa no te reira.21 Te mana‘o ra ratou e e mau taata ratou o te tamata nei i te rave i te maitai. Aita ratou e mana‘o ra e te rave nei ratou i te ino.22 Area râ, e mea papû maitai te parau poro‘i a te Fatu i roto i Ta’na faaararaa i te taato‘araa ia tatarahapa—eiaha noa no te mau hara tei ravehia, i te mau hara atoa o tei mana‘ohia. Ua faaara atoa Oia i te mau metua : « E teie faahou â, mai te mea e tamarii ta te mau metua i Ziona… o te ore ho‘i e haapii atu ia ratou ra ia ite papû roa i te parau no te tatarahapa, te faaroo i te Mesia te Tamaiti no te Atua Ora, e no te bapetizoraa e te horo‘a no te Varua Maitai… tei ni‘a iho ïa te hara i te upoo o te mau metua ».23
Aano te auraa ïa o te parau tatarahapa
E mea aano atu â te parau haapiiraa no te tatarahapa i ta te faaiteraa a te ditionare. I to Iesu parauraa e « tatarahapa », ua papa‘i te mau pĭpĭ i taua faaueraa ra i roto i te reo Heleni i te ihoparau metanoeo.24 E auraa rahi to teie nei parau mana. Te omuaraa oia meta to’na auraa ra « taui »25 Te hopea ra e faaiteraa ïa no na parau e maha i roto i te faaauraa a te Heleni : nous, oia hoi te « feruriraa »26 ; gnosis, oia ho‘i « iteraa »27 ; pneuma, oia ïa « varua »28 ; e pnoe, oia ho‘i « te aho »29
No reira, ia parau ana‘e Iesu e « tatarahapa », te ani maira Oia ia tatou ia taui—taui i to tatou feruriraa, to tatou ite, e to tatou varua, e tae noa’tu i to tatou hutiraa aho. Ua parau te hoê peropheta e, e au te tauiraa i te hutiraa aho, te hutiraa mai i te aau mehara o te Taata o tei horo‘a mai i te aho no tatou. Ua parau te Arii Beniamina e, « ia tavini outou ia’na i tei hamani ia outou… e tei faaora ia outou i tera mahana i tera mahana, i te horo‘araa mai i te aho no outou… i tera minuti i tera minuti—e parau atu vau, ia tavini outou ia’na ma to outou aau atoa, e mau tavini faufaa ore â outou i reira ».30
Oia mau, ua faaue te Fatu ia tatou ia tatarahapa, ia taui i to tatou mau e‘a, ia haere mai Ia’na ra e ia riro mai Ia’na ra te huru.31 E titauraa teie ia taui-roa. Ua haapii Alama i ta’na tamaiti : « E haapii oe i te paari i to oe apîraa ; » o ta’na ïa i parau, « e haapii oe i te haapa‘oraa i te mau faaue a te Atua ra i to oe apîraa… E te mau mea atoa ta oe e rave ra, ia ravehia no te Fatu ra, e ia tuuhia te aroha o to aau i ni‘a i te Fatu ra e a muri noa’tu ».32
Te tatarahaparaa taato‘a o te fariu taato‘araa ïa i te Fatu ra ia Iesu Mesia e i Ta’na ohipa mo‘a. Ua haapii Alama i teie mana‘o i to’na uiraa i teie nei mau uiraa : « E ui atu nei au ia outou na, e au mau taea‘e o te ekalesia e, ua fanau-varua-hia anei outou i ta te Atua ra ? Ua roaa anei ia outou to’na ra hoho‘a i to outou mata na ? ua itea anei ia outou taua faahuru-ê-raa rahi ra i roto i to outou aau na ? »33 E tae mai taua tauiraa ra mai te mea ua « fanau-faahou-hia » tatou, e ua faafariuhia e ua faahi‘oti‘ahia i ni‘a i to tatou tere i te basileia o te Atua.34
Te mau hotu o te tatarahapa
E mea monamona mau te mau hotu o te tatarahapa. Te mau taata faafariu o tei tatarahapa e ite ratou e e faaterehia nei ratou e ta ratou mau ohipa, e tauihia ta ratou mau peu e e haavihia to ratou huru e te mau parau mau o te evanelia tei
faaho‘i-faahou-hia mai. E faaoroma‘i atu â ratou e e tape‘a atu â ratou ia ratou iho eiaha e rave noa’tu i te mea paieti-ore.35 Hau atu â, te mau hinaaro o te tino o te ore e haavihia,36 te mata‘ita‘iraa i te hoho‘a faufau e aore râ, te raveraa i te mau raau ta‘ero,37 te mau hinaaro ta‘oti‘a-ore-hia,38 te mau hiaai e au i te tino,39 e te te‘ote‘o parau- ti‘a-ore 40 e faaitihia ïa i roto i te faafariuraa taato‘a i te Fatu e te hoê faaotiraa ia tavini Ia’na e ia pee i To’na ra hi‘oraa maitai. 41 Ia faa‘una‘una noa te tai‘ata ore i to outou mau feruriraa, e ia tupu te ti‘aturiraa ia outou iho.42 Ua itehia te aufaaraa i te tuhaa ahuru mai te hoê haamaitairaa oaoa e te paruru, eiaha râ mai te hoê ohipa e aore râ, mai te hoê tusia.43 E tupu mai ïa te parau mau mai te mau mea popouhia ra, e te mau mea ro‘o maitata‘i ra.44
E rave‘a te tatarahapa na te Fatu no te tupuraa i te pae varua. Ua faaite te Arii Beniamina e « no te mea te taata tino nei, o te enemi ïa o te Atua, e e enemi oia mai te hi‘araa o Adamu mai â, e e enemi ho‘i a muri e a muri noa’tu ; area ia auraro oia i te parau a te Varua Maitai, e ia faarue i te mau peu a te taata tino nei, e ia riro ei taata mo‘a na roto i te taraehara a te Meisa ra te Fatu, e ia riro ho‘i mai te tamarii ra i te mărû, e i te mamahu, e i te haehaa, e i te faaoroma‘i, e i te î i te aroha, e ma te hinaaro ia auraro i te mau mea atoa ta te Fatu e hinaaro ia tuu i ni‘a ia’na, mai te tamarii e auraro ho‘i i to’na ra metua ».45 E au mau taea‘e e au mau tuahine e, teie te auraa mau no te faafariuraa ! Te tatarahapa ra o te faafariuraa ïa ! Te hoê varua tatarahapa o te hoê ïa varua tei faafariuhia, e te hoê varua tei faafariuhia o te hoê ïa varua tei tatarahapa.
Te tatarahapa no te feia tei pohe
E nehenehe te hoê taata e ora nei ia tatarahapa. Area râ, eaha ïa no te feia tei pohe ? E nehenehe atoa ratou e tatarahapa. Teie ta te irava e faaite nei « ua ite atura vau i te mau peresibutero faaroo o teie nei tau tuuraa evanelia, a faaru‘e mai ai ratou i te oraraa tahuti nei, ua tamau noa ratou i ta ratou mau ohipa no te pororaa i te evanelia o te tatarahapara… i rotopu i te feia… i raro a‘e i te ruuruuraa o te hara i roto i te ao rahi o te mau varua o te feia pohe.
« E i muri a‘e i to ratou aufauraa i te utu‘a no ta ratou mau ofatiraa i te ture, e to ratou horoi-mâ-raa-hia, e farii [ratou] i te utu‘a maitai mai te au i ta ratou mau ohipa ».46
Ua heheu mai te peropheta Iosepha Semita i muri mai e « e ta‘irihia te fenua nei i hoê ino maori râ ia vai noa mai te hoê ave fifi tu‘atiraa mai te reira te huru e a ore râ, mai te tahi huru i ropu i te mau metua e te mau tamarii… No te mea ia ore ratou e ore roa e ti‘a ia tatou ia haamaitai-roa-hia ra… E te haamata nei [teie] tau tuuraa i teie nei, ia ti‘a i te îraa e te taato‘araa o te tu‘atira maitai roa, e te tu‘atiraa o te mau tau tuuraa, e te mau taviri, e te mau mana, e te mau hanaha ia faatupuhia ».47
« Ei mori arata‘i na Iesu ? »48 Oia mau ! O outou atoa ïa ! Te hinaaro nei Oia ia taamuhia tatou i roto i te ruuruuraa mure ore—ia taatihia ei utuafare—ia ore te ta‘iriraa49 a te Atua ia tae i ni‘a i to tatou utuafare. Ua hamanihia te fenua nei e ua patuhia te mau hiero ia nehenehe i te mau utuafare ia taatihia no a muri noa’tu.50 E rave rahi, e mai te mea te tahi rii o tatou, o te ore e tatarahapa e o te ore ia faafariuhia i te hiero e i te ohipa aamu utuafare no to tatou mau tupuna. No reira, e mea titauhia ia tatarahapa tatou e e mea faufaa no to ratou tatarahaparaa.
No to tatou atoa mau tupuna tei pohe, i teie vahine 28 matahiti o tei topa i roto i te vari o te hara, e i tatou tata‘itahi, te parau atu nei au e mea papû te haamaitairaa o te tatarahapa. E tae mai te reira na roto i te faafariuraa taato‘a i te Fatu e i Ta’na ohipa mo‘a.
Ua ite au e te ora nei te Atua. O Iesu te Mesia. Teie Ta’na Ekalesia. Ta’na peropheta i teie mahana o te peresideni Gordon B. Hinckley ïa, te faaite papû nei au i te reira na roto i te i‘oa o Iesu Mesia. Amene.