Ua matara faahou te Fare Menemene i muri mai i te mau tata‘iraa rahi

Mai to’na â faaohipa-raa-hia i te amuiraa rahi no te matahiti 1867, ua ti‘a te Fare Menemene no Roto Miti ei taipe no te faaroo e no te aau mahorahora o te mau feia matamua [pionie]. I teie nei, 140 matahiti i muri mai, te ti‘a noa nei â te Fare Menemene, e te vai nei i ni‘a i te hoê niu papû.

I roto i te tuhaa amuiraa o te Mahana Maa avatea, tei faaterehia i te 31 no Mati, ua haamo‘a-faahou te peresideni Gordon B. Hinckley i te Fare Menemene o Roto Miti i muri mai i te mau tata‘iraa o na matahiti e piti.

Ua tamaumauhia te mau parahiraa apî, tei hamanihia mai roto mai i te raau ale [chêne], e ua faaateateahia ia rava‘i te mau area no te hohoraraa avae ; te mau e‘a matamua na rapae mai e arata‘i i te taupee o ni‘a, ua hamanihia ïa na roto no te faaohieraa i te paumaraa o te mau manihini, e ua hamani-atoa-hia e piti mea apî na roto atoa’tu ; ua paraihia te hoê ana‘iraa piru i ni‘a i te mau tuio o te hamonia ; ua tata‘ihia te aroaro e ua penihia ; ua faanahohia te mau piha ahuraa ahu apî e te hoê piha vairaa buka nota himene no te mau melo o te pŭpŭ himene ; ua faaapîhia te pa‘epa‘e o mua ia nehenehe te hoê ana‘iraa parahiraa ia faahauhia mai e aore râ, ia iritihia ia nehenehe teie tahua ia faaineinehia no te tahi mau ohipara ; ua taui-haere-hia te mau tuio pape, te mau opereraa huira e uira ia au i te mau titauraa a te ture.

Noa’tu e ua farii te Fare Menemene i teie mau tata‘iraa e hau atu, te mau tauiraa faufaa râ, aita ïa e itehia e te mata taata.

Te niu e te mau papa‘i o te Fare Menemene ua tauihia ïa no te haamaitai atu â i te ti‘araa ia ore e aueue i roto i te mau aueueraa fenua.

Ua monohia e ua faa‘eta‘etahia na pou e 44 e turu nei i te tapo‘i o te Fare Menemene i te mau pou auri, ua faaôhia i roto i te mau pou mai ni‘a e tae mai i raro. Ua haapaarihia te niu o te mau pou i te tima. Ua faaohipahia te mau uuhiva auri no te faatui te faa‘eta‘etaraa o te mau pou, e ua tuuhia te mau faa‘eta‘etaraa o te aroaro no te faatuati atu i ni‘a i te mau pou,

I teie nei te ti‘a papû nei te Fare Menemene hau atu â i to te mau tau poto i ma‘iri a‘e nei, e au mai to te mau meloraa o te Ekalesia iho.

« I te hoê tau, ua ora na te rahiraa o te Feia Mo‘a i roto i teie nei peho e i te tahi atu mau area i haaati i te mau nohoraa i faati‘ahia », o te parau ïa a te peresideni Gordon B. Hinckley i roto i te pure haamo‘araa o te Fare Menemene tei faaapîhia. « I teie nei, ua tupu ta Oe ohipa i te rahi e ua tere na te fenua nei e tae roa’tu e ua rahi te mau melo no rapae mai i teie nei nunaa e tomo mai nei i te feia iho i roto nei ».

Te Hamaniraa e te Paturaa i te Fare Menemene

Ani atura te peresideni Brigham Young ia Henry Grow i te tauturu i te faatupuraa i ta’na orama no te Fare Menemene. E taata faafariuhia mai i roto i te Ekalesia e e taata hoi no Philadelphia, i Pennsylvania mai, e taata patu e‘a turu o te taea‘e Grow e e mau aravihi hoi to’na no te raveraa i teie nei ohipa.

Ua hamanihia te mau hoho‘a, e i te matahiti 1863 ua haamata te paturaa.

No te mea hoi e aita e roaa te mau materia i matarohia no te paturaa, ua faaapî-faahou-hia te mau materia tahito e ua faaohipahia te mau materia o te fenua iho no te paturaa i teie Fare Menemene. Ua tapuhia mai te mau tumu raau no roto mai i te mau mou‘a, ua ravehia mai te mau toe‘a ofa‘i o te paturaa o te Hiero o Roto Miti, te mau toe‘a materia o te nuu fa‘ehau e te mau tiaa raau puaatoro ua hamanihia ïa ei mau naero e ei mau tapiri, te mau pia ua hamanihia na roto i te tunuraa i te mau iri animala, e te mau pu‘a papaa ua hamanihia ïa no roto mai i te mau ofa‘i pu‘a ano‘ihia i te mau huruhuru animala no te haapaari.

Ia feruri-ana‘e-hia te mau huru o te mau materia o taua anotau ra, ua patu-mau-hia te Fare Menemene na roto i te faaroo e te paari.

Maha matahiti i muri mai i to’na haamata-raa-hia, ua faatupuhia te amuiraa i roto i te Fare Menemene. E ua haamo‘ahia te Fare Menemene i te ava‘e Atopa 1875, i muri mai i te faaoti-raa-hia te taupee.

Te mau ohipa tuiroo

Ua paturuhia te mau peresideni atoa o te Ekalesia maori râ o Iosepha e o Brigham Young i roto i te hoê amuiraa hanahana i roto i te Fare Menemene.
Te vaira i roto i te Fare Menemene te hoê apoo bapetizoraa o tei faaohipahia no te mau melo o Roto Miti e tae noa mai i te faaapîraa, i reira te faaore-raa-hia ia roaa te tahi vahi vata.
Te mau parahiraa matamua, ua hamanihia ïa mai roto mai i te paina [pin] e ua penihia ia riro mai te ale [chêne] te huru.
Te faaahuraa o te hamonia ua hamanihia ïa i te paina ponderosa, e ua penihia ia riro mai te tamanu papaa.
Hou te paturaa o te Fare Menemene o Roto Miti, ua patuhia te hoê ti‘ahapa o tei parauhia te « Ti‘ahapa Tahito » i te poro no te apatoa-too‘a o te râ o te ana‘iraa o te hiero ei vahi putuputuraa no te Feia Mo‘a.
Ua mata‘ita‘i hoê ahuru ma piti peresideni no te Mau Hau Amui no Marite i te Fare Menemene.
Te mau aroaro o te Fare Menemene e ere ïa mai to te tahi mau atu mau fare. Ua parauhia e, ia topa ana‘e hoê pine i ni‘a i te pupite o te Fare Menemene, e faaroo- roa-hia mai na muri.