O Pupuni o le Lagi
Na maua la’u galuega mo’i muamua i le pe tusa o le 13 o o’u tausaga. Na avea a’u ma tama tiliva nusipepa. Ou te manatua pea lo’u tietie i la’u uila faataamilo i le matou vai aai i le Aai i Sate Leki i afiafi uma, ma togi atu pepa i luga o faasitepu pito i luma o o’u tuaoi. E lei matua tele se tupe na ou maua mai ai, ae o masina taitasi pe a maua lo’u totogi, na leai lava se fesiligia o le a totogiina la’u sefuluai. Na faia e o’u matua le faataitaiga o le totogiina o le sefuluai, ma na ou iloaina o se poloaiga mai le Alii (tagai MFF 119:3–4).
Ou te manatuaina lo’u auai atu i le faatalanoaga o le sefuluai a o ou laitiiti faatasi ma lo’u tina ma lo’u tama. O se mea masani ia te au le talatalanoa ma le epikopo ma tautino atu o a’u o se tagata e totogi atoa la’u sefuluai. E oo lava i le taimi ina ua ou matua ma amata ona tele atu au tupe na maua, na muamua lava totogi la’u sefuluai i taimi uma.
Ina ua avea au ma matua, na taua ia te a’u le talanoa taitoatasi o la’u fanau ma le epikopo i le taimi o faatalanoaga o le sefuluai. Na ma taumafai ma lo’u toalua e vave aoao i latou a o laiti e totogi le sefuluai mai a latou tupe alauni na ma tuuina atu ia i latou ina ia latou matutua ane ua avea ma se mea ua uma ona latou vaai i ai i ona faamanuiaga ma iloa o se mea e tatau ona latou faia.
O Le a Oo Mai Faamanuiaga
Ina ua faatoa ma faaipoipo lava ma Sister Richards, na ma tau fai aooga ma sa itiiti lava se tupe na maua e totogiina ai o ma pili. O le totogiina o le ma sefuluai o se osigataulaga maoae. Ae sa lei mafaufau lava Sister Richards e faaaoga le ma tupe o le sefuluai mo nisi lava mea na ma matua manaomia, e pei o meaai ma le totogi o le fale. Na finau lava o ia e totogi muamua le ma sefuluai, ma na faapena ona fai i taimi uma lava. O nisi taimi sa na o le tasi lava se sene e totoe pe a maea ona totogi uma a ma pili, ae i taimi uma lava na foliga na lava lava le tupe mo na o le totogiina uma o ma pili. O se faamanuiaga lena mo le faaaogaina o lo ma faatuatua e totogi ai le sefuluai.
O se tasi o faamanuiaga ou te talitonu na oo mai ona o le totogiina o le sefuluai, o le tulaga o la’u galuega ona e leai lava se taimi umi na leai ai sa’u galuega. I se taimi i le faatoa amataina o la’u galuega na vaea a’u, ma i totonu o le lua vaiaso na toe maua ai le isi a’u galuega e sili atu le lelei o le totogi nai lo le galuega muamua. I totonu o le 25 tausaga i se tasi kamupani, e tele ni taimi na vaea ai le tele o tagata faigaluega na matou galulue, ae lei vaea a’u. Ou te talitonu na faamanuiaina a’u e le Alii ona o le totogiina o le sefuluai.
O’u uso e ma tuafafine talavou, afai tou te faaaoga le faatuatua e manaomia e totogi ai le sefuluai, ou te folafola atu ia te outou, o le a faamanuiaina outou. E tusa lava po o le a le laitiiti o lau foai, totogi pea e aunoa ma se masalosalo. Ia avea ma mea muamua lava e te faia pe a e maua se tupe. O le a faatupuina lou faatuatua e faia ai mea atonu na e manatu e le mafai ona e ausia. O le a e atamai atili i le faasoasoaina o au tupe, ma o le a e maua se faamaoniga matagofie lea e oo mai i le iloa o loo e faia le mea ua finagalo ai le Alii ia te oe. O le puna lea o ou malosiaga, ma o le a mafai ona e faalagolago i lena malosiaga i le lumanai.
Ou te iloa na ma maua ma Sister Richards le tele o faamanuiaga o se taunuuga o le totogiina o le sefuluai. Ua ou molimauina foi le tele o faamanuiaga ua oo mai i tagata faamaoni o le Au Paia o Aso e Gata Ai i nofoaga motu mamao ese o le lalolagi aua o loo naunau i latou e totogi le sefuluai.
O Le Ekalesia i Initia
O se mea faapitoa na tupu na maoae ai le loloto o lagona na oo mai ia te a’u. I le 2000 na ou maua ai le avanoa e auai atu i le sauniga o le suatiaina o le eleele o le falelotu fou muamua o le Au Paia o Aso e Gata Ai o le a fausia i Initia. O le tulaga mo lenei falelotu na i ai i Rajahmundry, o se aai e latalata i le talafatai i sasae o le atunuu. O se aai e fai lava si laitiiti mo Initia, e ui lava e tusa e tolu miliona tagata e nonofo ai iina.
Na matou malaga atu i Rajahmundry ma lo’u toalua; o le peresitene o le misiona, o Ebenezer Solomon; ma lona faletua. Ina ua matou taunuu atu i se nofoaga faatali nofoaafi tumu lava i Rajahmundry, na lagona lo’u alofa mutimutivale i le toatele o tagata e ola i le matautia o le matitiva. E toatele tagata na momoe i luga o le fola malo i soo se mea na i ai sina avanoa. Ina ua matou taunuu atu i le nofoaga mo le suatiaina o le eleele, na ou matauina se eseesega tele lava i le va o le puapuagatia na faatoa ou molimauina ma le olioli na ou vaaia i foliga o tagata o le Ekalesia na faapotopoto e faafeiloai i matou. Na susulu o latou foliga ma talotalo mai a o matou taunuu atu. Na latou matua fiafia tele. E ui na ola foi i latou i tulaga mativa e tusa ai ma nisi tulaga, ae na leai se faailoga o le atuatuvale po o le leai o se faamoemoe.
Na vave lava ona ou malamalama i le mafuaaga na filifilia ai lenei nofoaga mo se falelotu. Ou te ta’u sao atu lava na fai sina ou le mautonu i le mafuaaga na taulai atu ai punaoa a le Ekalesia i lenei nofoaga maotua. Ae ina ua maea se feiloaiga puupuu ma le Au Paia i Rajahmundry, na tali uma ai a’u fesili. O nei Au Paia o Aso e Gata Ai na matua faatuatua ma matua fiafia o le a i ai so latou lava falelotu.
O Tupe Iti a le Fafine Ua Oti Lana Tane
Ina ua maea le sauniga o le suatiaina o le eleele, na faafeiloai atu a’u e Peresitene Solomona i ni tina ua leai ni a latou tane o e na papatiso i ni nai tausaga ua mavae. E tai 70 uma o latou tausaga. Na faailoa mai e Peresitene Solomona ia te au o nei tamaitai na totogi atoa a latou sefuluai talu mai ona papatisoina i latou. Na faagaeetia ai ona o lenei nofoaga e matautia le le tagolima, ae o nei tuafafine faamaoni e lei misia lava se avanoa e totogi ai a latou sefuluai, e ui ina ou mautinoa o se osigataulaga mo i latou.
Na ou fesili ia Peresitene Solomona pe o le a le aofai e totogiina e nei tuafafine taitoatasi i masina taitasi. Na ia tau mai ia te a’u se aofaiga tupe i rupi, o le tupe lea a Initia. Ou te lei malamalama i le aofaiga, ona ou fesili lea ia te ia pe o le a le aofaiga i tala Amerika. O le a le galo lava ia te a’u lana tala: “Latou te totogiina o le va o le tasi ma le afa ma le lua sene.” Na toe faamanatuina mai ia te a’u o le totogiina o le sefuluai e le o le tupe e taua, ae e manaomia ai le faatuatua! Na ou lagonaina le faamaualalo i lo’u iloa o le faamanuiaga o se falelotu ua oo mai i lenei Au Paia ona o lo latou naunautai e ositaulaga i le totogiina o le sefuluai—e ui lava e na o ni nai sene. Ou te mautinoa e liua e le Alii na sene i le faitau miliona o tala.
O le sefuluai e le o se poloaiga tautupe—o se mataupu faavae o le faatuatua. E finagalo le Alii i le 10 pasene o a tatou tupe maua ma faatalitali pe o le a tatou faaaoga le faatuatua ia te Ia e faia ai lena osigataulaga. Na i ai i le Au Paia i Rajahmundry lena faatuatua.
Na faagaeetia au ina ua matou taunuu atu i le nofoaga o le falelotu o fofola mai se kapeta lanumumu mai le faleie na faapotopoto i ai le Au Paia. E tusa ma le 30 mita le umi. I lalo o le faleie na i ai ma nofoa veloveta mumu. E lapopoa ma mananaia. Na foliga tuai le kapeta ma nofoa, ae o mea silisili ia ona lelei na ofoina mai e lenei Au Paia. Latou te le tuuina mai se mea e itiiti ifo nai lo le mea sili latou te maua. O se aafiaga faamaualaloina mo a’u. O nei Au Paia i Rajahmundry na faatuina se faataitaiga o le foai ma le faamaoni i le Alii, e tusa pe o le totogiina o a latou sefuluai po o le saunia o nofoaga sili ona lelei mo taitai asiasi atu o le Ekalesia.
Atonu e foliga ia te oe o le 10 pasene o au tupe maua, laitiiti pe tele, e le mafai ona tele se aoga pe le taua foi. Ou te tautino atu ia te outou, e taua lava. E taua lou ola i le tulafono o le sefuluai i le taimi lenei aua o le a faamalosi ai lou faatuatua ma saunia ai oe mo tofotofoga i taimi mulimuli mai.
Na tuuina mai e le Alii ia i tatou se folafolaga afai tatou te usiusitai i Ana poloaiga, ua noanoatia o Ia e tuuina mai ia i tatou le faamanuiaga folafolaina (tagai MFF 82:10; 130:21). Na ou molimauina lena faamanuiaga i olaga o le Au Paia i Rajahmundry, ma e mafai ona e molimauina lena faamanuiaga i lou lava olaga pe afai o le a e faamaoni i le totogiina o lau sefuluai.