Ua Faasilasila mai e le Falemataaga le Tauvaga Lona Valu Faavaomalo o Faatufugaga

Ua faasilasila mai e le Falemataaga o Talafaasolopito o le Ekalesia ma Faatufugaga le autu mo lana Tauvaga Lona Valu Faavaomalo o Faatufugaga ma ua valaaulia ai tagata o le Ekalesia i le lalolagi atoa e auai i le faaaliga o le a faia i le aso 20 o Mati e oo i le aso 11 o Oketopa, 2009.

O le autu o le faaaliga, “Manatuaina o Mea Maoae a le Atua,” e aofia ai aafiaga a le Au Paia o Aso e Gata Ai i soo se mea. O galuega faatufugaga o le a faamatalaina ai se autu, manatu, tala, tagata, o nofoaga e faatatau i (1) aoaoga faavae, talitonuga, ma aoaoga, a le Au Paia o Aso e Gata Ai, e aofia ai tala mai tusitusiga paia ma aoaoga a perofeta; (2) mea na tutupu, nofoaga, ma tagata taitoatasi e talafeagai i le talafaasolopito o le Ekalesia ma ona tagata; po o (3) le faatatauina o tulaga faatauaina faalelotu i olaga o le Au Paia o Aso e Gata Ai, e aofia ai gaoioiga a le Ekalesia, aiga, ma tagata taitoatasi.

O le tauvaga e tatala i tagata o le Ekalesia e atoa le 18 tausaga ma luga atu i le aso 31 o Tesema, 2008. E mafai e tufuga taitoatasi ona faaulu mai se galuega se tasi. E taliaina uma foi ia ituaiga aganuu ma tu ma aga vaaia, sitaili o ata, ma faasalalauga eseese. O galuega e faaulufale mai sa tatau ona faamaeina i le aso 1 o Ianuari, 2006.

O le a lafoina atu ia fomu aloaia e faaulufale mai ai [galuega] i tufuga o loo i le lisi o meli a le falemataaga ia Aperila 2008. O le a maua foi i le meliuila ia le fomu i le Uepi saite a le falemataaga. Ina ia aofia ai i le lisi o meli pe ia suia foi faamatalaga e faafesootai ai pe afai o loo e i ai i le lisi o meli, tusi mai i le falemataaga i le Eighth International Art Competition, Museum of Church History and Art, 45 North West Temple St., Rm. 200, Salt Lake City, UT, 84150-3470, USA, po o le i-meli churchmuseum@ ldschurch.org.

O le taamilosaga muamua o le faamasinoina o le a faavae lea i ata o galuega o faatufugaga e auina mai faatasi ma le fomu e faaulufale ai mai le meliuila pe auala mai foi i le meli masani a o lei oo i le aso 10 o Oketopa, 2008. O galuega o faatufugaga o le a faamasinoina i le lelei ona faailoaina mai o le autu; ausia o tulaga faatusiata ma le faatinoina; ma le fatufatuai, amataga, ma le tulaga lelei o le faatufugaga. O taui e aofia ai se vaega o Taui e Faatau, lea e faatauina ai galuega o fatufugaga mo le faaputuga a le Ekalesia; e oo i le 25 faailoga tupe o Taui Aloaia, na tuuina mai e le au faamasino; ma le 3 faailoga tupe o le Filifiliga a Tagata Asiasi.

Mo nisi faamatalaga e uiga i le tauvaga po o le maimoaina foi o galuega o faatufugaga mai isi faaaliga muamua atu, asiasi i le Uepi saite a le falemataaga i le www.lds.org/churchhistory/ museum/competition.