Faamanatu e le Faletusi o Talafaasolopito o Aiga ia Tu ma Aga mai le Lalolagi atoa
O le lalagaina o se teuga o le Kerisimasi faaScandinavia ma le usuina i le faaSikotilani o le “Auld Lang Syne” ua na o le pau lea o ni gaoioiga se lua o Tesema i le Faletusi o Talafaasolopito o Aiga i le Aai o Sate Leki. O i latou sa auai i vasega e le totogia i afiafi na faia mai le aso 28 o Novema e oo i le aso 22 o Tesema, na aoao e uiga i tu ma aga o aso fiafia mai atunuu eseese ma vaega faaleaganuu.
O le tele lava o vasega pupuu sa fuafuaina ma aoaoina e tagata moni o atunuu eseese o e na talanoaina mataupu e pei o mea e faamanatuina ia Tesema, meaai, teuga, ma musika. O vasega sa tatala atu i tagata lautele, ma sa ofoina atu ai foi gaoioiga faaleaiga.
Na uunaia aiga ina ia faia se pepa a tamaiti o le faasologa o gafa. Na talosagaina tamaiti e tusi o latou lava ata, o o latou matua, ma matua o matua i luga o le siata. Na maua e i latou uma se lole, ma o i aiga na mafai ona faamaeaina se siata o augatupulaga e fa na maua se peni ua lolomiina ai upu “E manaia Talafaasolopito o Aiga.”
Na maua ai foi lisi o manatu mo afiafi faaleaiga ma talafaasolopito o aiga mo aiga e ave i le fale. O se tasi o pepa o loo faamatalaina ai le auala e mafai ai e fanau ma matua ona faatalanoa ia matua o matua.
O atunuu na faaalia ai na aofia ai Nouei, Farani, Siamani, Sikotilani, ma Netalani, o le Malo o Tagata Seki, Suetena, ma Tenimaka. Na talanoaina ai foi ia tu ma aga a Iutaia ma painoia.
Na saunoa Diane Loosle, o le pule o auaunaga amata, o le taimi muamua lenei ua lagolagoina ai e le faletusi le gaoioiga.
Na taua e Sister Loosle o gaoioiga sa faaautu lea i le aumaia o tagata e le masani ona oo mai iinei i le Faletusi o Talafaasolopito. Fai mai a ia: “O se tasi o sini a le faletusi o le avea lea o le sau i le faletusi ma se aafiaga sili atu ona manaia. Matou te mananao i tagata ia o mai ma ia iloa ai e le faigata nai lo le mea o loo latou manatu i ai.”
O le Faletusi autu o Talafaasolopito o Aiga a le Ekalesia o le faletusi aupito tele lea o lona ituaiga, ma e tatalaina i tagata lautele e leai se totogi. Ua fuafua pe a ma le 1,900 pe sili atu tagata e asiasi mai i le faletusi i aso taitasi e tatalaina ai.
O loo ofoina atu ni vasega e le totogia mo i latou e eseese ni aafiaga, e aofia ai tagata faatoa amata, ma le 125 tagata faigaluega tumau ma faavaitaimi atamamai e avanoa e fesoasoani atu. Toeitiiti 400 volenitia ua aoaoina lelei e ofo atu o latou taimi e fesoasoani atu foi. Mo nisi faamatalaga, asiasi i le www.familysearch.org.