O Loo Ola Foi La’u Tama
Na aoaoina au e se tamaitai i la’u uarota i se lesona sili ona taua e uiga i le filemu matagofie lea e oo mai mai se faatuatua moni ia Iesu Keriso ma Lana Togiola.
O le faamanuiaga faapeteriaka o lenei tamaitai na folafola atu ai ia te ia le olioli o le avea ma se tina. Ae na mavae le tele o tausaga ao tatalo ma faatalitali pea i laua ma lana tane mo se fanau. Na iu lava ina talia a la tatalo. Mo le iva masina na faatumulia o laua olaga i tapenaga o le olioli. Na la valiina se potu faapitoa; faatau meaafale, lavalava, ma isi sapalai mo le pepe; ma tuuina atu le tele o talosaga. Na faapea mai fomai o le a le toe mafai lava ona i ai se isi pepe pe a fanau le pepe lea, o le mea lea na tuu atoa ai ona faamoemoega i lenei tamaitiiti.
Na oo mai le aso na fanau ai lenei tuafafine ma faalogo i le tagi a lana pepe.
“O se tama aulelei,” o le tala lea a le fomai.
Na moeiini mata o le tina ma tuuina atu lana tatalo faafetai. I le fa minute mulimuli ane, na maliu ai le pepe.
Na ou vaai ia te ia i le lotu faamanatuga i le lua vaiaso mulimuli ane. I le avea ma taitai musika, na savali atu o ia i le pito i luma o le falelotu ma nofo i talaane o le okeni. I lalo o lana taitaiga na matou pepese ai “Ua Ou Iloa Lo’u Faaola” (Viiga, nu. 73). Na tu sa’o i luga o ia, na fiafia ona foliga, ma susulu lana molimau. I nisi taimi na faigata ona usuina e ia upu. Na folofolo ma oomi faatasi ona laugutu. Ona le toe pese lea, ae faaauau pea ona gaoioi lona lima, i le taitaiina o i matou a o matou pepese.
Mulimuli ane, ma ona loimata na maligi ifo, na faia ai le molimau a lenei tuafafine i nei upu faigofie: “Ua ou iloa o loo soifua lo’u Faaola. Ou te iloa e tonu o Ia ma e alofa ia i tatou. Ma talu ai o loo soifua o Ia, o loo ola foi la’u tama.”
I lona faatuatua na ou vaai ai i se faamaoniga o le tulaga moni o lo tatou Faaola, o Lana Togiola mo i tatou ua mafai ai ona tatou maua le tino ola pea ma le ola e faavavau. Na aveesea lana tama, ae na ia iloaina o le a toefuataiina mai o ia ia te ia i se aso.