O Le Valaau Le Mafaamatalaina
I le aso Toonai, 7 Fepuari, 2004, sa ma i ai ma lo’u toalua i se faletalimalo i Gijón i Sepania matu, lea na ou auauna ai o le peresitene o le Misiona a Spain Bilbao. A o faamaea le ma meaai o le afiafi, na ou siakiina lau telefoni feaveai mo ni feau ou te lei faalogo i ai. Na faailoa mai ai e moni lava na valaau mai se faifeautalai. Na ou iloa le faifeautalai ma oomi le ki sao e valaau ai ia te ia.
Na tali mai e le faifeautalai le telefoni, ma ina ua mavae se faafeiloaiga puupuu, na ou fesili atu ia te ia po o le a le mea na ia manaomia. Na faateia o ia ma tali mai na te lei valaau mai ia te a’u. Na ou finau atu o loo mau i la’u telefoni le valaau mai ia te ia, ae na ia toe faapea mai foi na te lei valaau mai.
Na faamuta la ma talanoaga, ae o le lima minute mulimuli ane na toe valaau mai o ia ma faapea mai, “Peresitene, e i ai lo’u faafitauli o loo ou lagona ai ni lagona le lelei, ma ua faapopoleina ai a’u. Na ou tatalo ma fesili atu i le Alii mo se fesoasoani ia ou iloa ai le mea e tatau ona ou faia. Ou te lei manao ou te valaau atu, ae a o ou fesili atu i le Alii po o le a le mea e fai, ae e valaau mai loa. Na faateia a’u aua ou te lei valaau atu ia te oe. Na ou iloa na ta’u mai e le Alii ia te a’u e tatau ona ou valaau vave atu loa ia te oe.”
Na ma talanoa mo se taimi, ma na foia ai lona faafitauli.
Ina ua ou talanoa ia te ia i le lua o aso mulimuli ane, na ou toe fesili i le alii faifeautalai pe na ia valaau mai ia te a’u. “Leai, Peresitene,” o lana tali lea, “o le galuega lena a le Alii.” Na ia faamaonia o loo faaali mai i lana telefoni na te lei viliina la’u numera, e oo lava i se mea mao.
Na fetalai mai le Alii, “Ia e loto maualalo; ona taitaiina ai lea o oe e le Alii lou Atua, ma tali atu i au talosaga” (MFF 112:10). A o aoaoina e Alema lona atalii o Helamana, na ia faapea, “Ia oulua filifili ma le Atua i au mea uma e te fai, na te faatonu foi ia te oe i mea lelei” (Alema 37:37). E tatau ona tatou faia le finagalo o lo tatou Tama Faalelagi ina ia tatou lagonaina ai le filemu lea tatou te manaomia i taimi uma. O le valaau e le mafaamatalaina na mautinoa lava o se tali i le tatalo a se faifeautalai talavou.