O Le Saolotoga e Siv a Ai
Na seesee malie atu le tamaitai siva palerina i le isi itu o le tulaga—taavilivili, taamilomilo, ona puna lea i luga o le ea i se auala faigofie e peiseai e le aafia i le kalave. O ana gaoioiga uma lava o se faaaliga faifaimalie o le saoloto.
E pei lava o le toatele o isi teineiti laiti, ina ua fa tausaga o Maria Victoria Rojas Rivera o Chile—o Mavi e valaau ai e ana uo—na filifili e manao e avea o ia ma teine siva palerina. Ma e pei lava foi o isi teineiti laiti uma, na vave lava ona ia iloa o le tino vavai ma le saoloto na ia vaaia i luga o tulaga na maua i se tau maualuga ma le taugata. O le taumafaiga ma le loto pulea na manaomia mo le avea ma palerina faapolofesa e fai si faigata tele mo le tele o tamaitai laiti na moemiti i ai.
O Le Tau o Miti
“A o e laitiiti, e te le malamalama i le ositaulaga e manaomia ai,” o le tala lea a Mavi. “Ina ua amata ona ou aoaoina i le 10 o o’u tausaga, na fai mai o matou faiaoga o le a faaaluina le afa o o matou olaga i le siva. O le a tatau ona matou tuuesea le tele o isi mea.”
O mea e pei o taimi avanoa ma ni meaai faapitoa. O le a tatau ia Mavi ona faaaoga le tele o le taimi ma taumafaiga i le faamalositino ma le faataitai. O le a tatau ona vaai ma le faaeteete ana mea e ai. Ma a uma meaaoga ma le siva, o le a le tele se taimi mo uo.
Na filifili Mavi e taua tele ia te ia lana miti ma o le a taumafai i ai.
“O tausaga o le avea ma se tupulaga talavou e ono avea ma taimi faigata,” o lana tala lea. “Na tele lava ina le malamalama a’u uo pe aisea ou te le ai ai i isi ituaiga o meaai pe tafafao umi ma i latou.”
O Le Tau o le Saolotoga
Na vave ona aoaoina e Mavi o mea ia na foliga e faatapulaa ai o ia mai lona saolotoga, na o le pau lea o le auala moni e mafai ona faasaoloto ai ia lava mai mea o le a taofia ai o ia mai lana sini.
“Na ou filifili ia ou le tafao umi, ma na ou filifili e faaalu le taimi ou te faataitai ai nai lo lou alu i le faleoloa,” o le tala lea a Mavi. “Afai na ou le lava ona sa ou tafao umi i le po pe ou te le iloa ia sitepu o le siva ona ou te lei aoao, e le mafai ona ou siva.”
O lena ituaiga o loto pulea e le faigofie, ae fai mai Mavi e matua aoga lava.
“O tagata uma lava e i ai se taimi e manao ai e tuu se mea ua fiu,” o le faaaliga lea a Mavi, “ae ua ia te oe lava le mana e filifili ai. O le loto pulea atonu e foliga e faasasaina ai le tele o mea, ae o le loto pulea o se filifiliga. Ma na ou filifili e talia lenei ituaiga olaga ina ia mafai ai ona ou siva.”
O se Sini e Sili Atu le Mamao
I se tasi o taimi i lana taumafaiga e avea ma palerina, na iloa e Mavi o le siva e le na o le pau lea o le sini na ia te ia pe na o le pau lea o le mea taua na manaomia ai lana ositaulaga.
I le ala, na ia maua ai se naunautaiga e mulimuli ia Iesu Keriso, ma na ia iloa ai o mea na aoaoina ai o ia i le siva palerina e uiga i le loto pulea, e aoga foi i le avea ma soo i le talalelei. E pei lava ona fesili ana uo pe aisea na te faia ai mea na ia faia mo le siva, na latou fesili foi pe aisea na ola ai o ia i ni mataupu faavae faaletalalelei e faatapulaaina le tele o mea.
“Na ou faamalamalama atu e i ai lo tatou saolotoga e filifili ai, ma na ou filifili e talia lenei ituaiga olaga ina ia mafai ona ou saoloto mai agasala ma faatasi mai le Agaga Paia ia te au,” o lana tala lea.
Ma e pei ona fetalai ai le Faaola, o se soo e tatau ona “tauaveina lona satauro,” o lona uiga ina ia teena e le tagata o ia lava mai le amioleaga uma ma faatosinaga uma faalelalolagi ae ia tausi poloaiga a le Atua (tagai Faaliliuga a Iosefa Samita, Mataio 16:26). O lea ituaiga o loto pulea e aumaia ai i tatou i le “saolotoga ma le ola e faavavau, talu le Puluvaga sili,” a o taumafai e ola i poloaiga o le a taitaia i tatou i le “faatoilaloina ma le oti, e tusa ma le faatoilaloina ma le mana o le tiapolo”(2 Nifae 2:27).
“O le usiusitai e aumaia ai le saolotoga ma le filemu sili atu ona maoae nai lo se isi lava mea,” o le tala lea a Mavi. “O a’u sini e le faatapulaa i lenei olaga faalelalolagi ae e aofia ai ma le faavavau.”
Aoga le Ositaulaga
E faaopeopea Mavi i luga o le tulaga e pei o se laulaau e lelea i le matagi, e aapa ma seesee malie atu mai le tasi gaoioiga i le isi—développé ma le pirouette, glissade ma le grand jeté.
E mafai e se palerina ona faagaoioi lona tino i ni auala e matua tiga i isi tagata. O lenei saolotoga o gaoioiga e taua mo le fesootaiga ma le au maimoa. Ae ui lava ina mafai e se palerina lelei ona faia gaoioiga uma e faafoliga mai e faigofie i luga o le tulaga, ae ua tele naua se taumafaiga na ia tuu i ai i tua atu o le tulaga.
Ina ua mavae le valu tausaga o le ositaulaga ma le tele o itula o aoaoga na toetoe lava o aso uma, na faataunuuina ai e ia lana miti i luga o le tulaga—ma totonu o le talalelei.
“E manatu tagata e matua matagofie ma vavai,” o le tala lea a Mavi. “Ae o gaoioiga uma e matua pulea lelei. E matua tele le malosi e manaomia e pulea ai oe lava faapena.”
E taua foi le faatusatusaga o le talalelei. O le mulimuli ia Keriso e manaomia ai le malosi. Ma o taui e ese le manaia.
“O taui mai le tele o le ositaulaga o le mafai lea ona ou siva,” o le tala lea Mavi. “Ou te lagona lo’u malosi, ma ou te lagonaina le taitaiga a le Agaga Paia i laasaga uma ou te faia—i luga o le tulaga ma fafo.”
E Lei Faamutaina Le Siva
E tusa ai ma aoaoga a Nifae, a tatou maua loa le naunautaiga e mulimuli ia Keriso ma ua papatisoina ma faamauina, e tatau ona tatou tumau ai pea seia oo i le iuga (tagai 2 Nifae 31:19–20). Mo Mavi, o le siva palei e manaomia ai le faamaoni lava e tasi.
Ina ua maea ona siva i Paraguay, na toe foi atu o ia i Viña del Mar, Chile, e faiaoga ai mo ni nai tausaga. O lea la ua manao nei o ia e siisii atu lana siva i le isi laasaga. Ua ia faatutuina ni sini fou ia ua mafai ona oo atu i Atenitina, Siamani, Aialani, ma Sepania e aoao ai ma tausinio ai mo avanoa i vaega palei eseese.
Ua ia iloa e tatau ona faaauau pea ona tauivi—i luga o le tulaga faapea ma totonu o le talalelei. E tatau ona faaauau pea lona loto pulea pe afai e manao o ia i le saolotoga e siva ai. Ma e tatau foi ona faaauau i le faatuatua pe afai e manao i le saolotoga lea e oo mai i le avea ma soo. “Afai tou te tumau i la’u mataupu,” na aoao mai ai le Alii, “o o’u soo moni outou: e iloa foi e outou le mea moni, e tuu saoloto foi outou e le upu moni” (Ioane 8:31–32).
Siva ma le faautauta
Na tuuina e Mavi se taumafaiga tele i tua mai o le tulaga ina ia ola maloloina ma tino malosi. E ese mai le vaavaai o ana meaai ma le lava o le malologa, e tele ina faamalositino Mavi, ma e siva foi mo le sili atu i le lima itula toetoe lava i aso uma. Ae na te le tausia o ia lava ona o ia o se tamaitai siva.
“I le avea ma se tasi o le Ekalesia, ou te malamalama o lou tino o le malumalu o lo’u agaga. I le avea o se tagata faafiafia, ou te manaomia vaega uma o lo’u tino ina ia galue lelei, o le mea lea ou te puipuia ai i le lelei ou te mafaia. Ae i le avea ai o se tagata o le Ekalesia, ua uma lava ona ou iloa e tatau ona ou faia lena mea.”
O lana molimau i tulaga musuia o le Upu o le Poto ua faamalosia i lona aafiaga i le palei. “A sa’o ona e faia lou tino, e te iloa lava le eseesega,” fai mai ai a ia.
E tatau ona e tausia lelei oe lava ina i a avea o se palerina, ae fai mai Mavi, “E tatau ona tatou tausia lelei uma lava o tatou tino, e tusa lava pe le o tatou o ni tagata sisiva. Tatou te le filifilia o tatou tino, ae e tatau ona tatou faafetai uma ma tausia lelei le tino ua tuuina mai ia i tatou. O ni meaalofa mai le Atua, ma ua tuuina mai ia i tatou taitoatasi o tatou tino mo se faamoemoega.”