Faamatalaga

Malosiaga i Aiga e Auai se Vaega i le Ekalesia

Ua faaaluina le tele lava o lo’u olaga i se aiga e auai na o se vaega i le Ekalesia. Ua tele ni lu’itau ua faafeagai ma a’u a o ou taumafai e tausisi e ola i le talalelei. O le i ai o tusi musuia a le Ekalesia, ae maise lava le Liahona, e fesoasoani ia te au e maua ai pea le Agaga.

Faafetai tele lava mo le faamanatu mai pea ia te a’u i masina uma o le talalelei e suia ai olaga.

Sandra Vinocuna, Ekuatoa

O Le Siufofoga o le Perofeta

O le lomiga o le Liahona o Oketopa 2005 na faapitoa lava le manaia ia te a’u. Na ou matua talisapaia tala uma o i ai, aemaise lava le savali a Peresitene James E. Faust, “O Filo e Afe o le Alofa.” Ou te manatu e tatau ona faitauina e tagata uma. Ou te faafetai i le Tama Faalelagi mo le faamanuiaina o i tatou i perofeta e taitaia i tatou i nei aso e gata ai.

Elder Emenike Hope Onwuchekwa, Misiona a Nigeria Ibadan

Faafetai mo le Lomiga PDF i le initoneti

O le Liahona o se musumusuga faapitoa i lo’u aiga, ma e fesoasoani ia i matou a o matou taumafai e ola ma faasoa atu le talalelei. Ua matua faamanuiaina i matou i a outou galuega. E le gata o mea o i ai e malolosi faaleagaga ma faatupu faatuatua, ae o le faiga ma ata e matagofie foi.

Matou te talisapaia foi le tulaga o le mafai ona maua o le mekasini i le tele o gagana i le faiga PDF i meliuila—e le toe i ai se otiotiga ma le faaleaogaina o le tusi! A ou manao e faapipii se upusii po o se ata i luga o le pusa aisa pe aumai foi ni mea mo taimi o fetufaaiga po o afiafi faaleaiga, na ona lolomi lava o mea ou te manaomia. Matagofie!

Christian Karlsson, ISA

Faamatalaga: O le Liahona ua maua i le meliuila i nisi o gagana i le www.lds.org. Mo le Igilisi, kiliki le “Gospel Library.” Mo isi gagana, kiliki i le faafanua o le lalolagi.

O Le Maataua Sili Ona Pupula

Ou te faafetai mo Liahona uma lava ua lomia. E ala i tusi taitasi, matou te iloa ai le finagalo o le Alii ma faamalosia ai a matou molimau. O le maataua pupula moni lava i nei aso e gata ai.

O savali a le Au Peresitene Sili e musuia ai i tatou e ola e pei o le Faaola ma aoao mai ia i tatou le talalelei mama a lo tatou Alii o Iesu Keriso. Atonu e eseese a tatou aganuu, ae ua tasi lo tatou faamoemoega. E faatumulia a’u i le olioli i le iloa i fafo atu o o matou lava tuaoi faaleatunuu, e oo lava i le isi itu o le sami tele, o loo i ai se tasi o le Au Paia o Aso e Gata Ai o loo faitauina le mekasini lava e tasi.

José Ramírez, Venesuela

La’u Lava Gagana

Ou te sau mai Ukraine, ae i le valu masina talu ai, na ma siitia atu ai ma lo’u toalua i Idaho (i le Iunaite Setete). E le lelei la’u Igilisi, ae o nisi taimi ou te le malamalama i mea ou te faalogo ai i le lotu i le Aso Sa. Ou te lagonaina pea le Agaga Paia i sauniga, ae o le taimi lenei ou te matua faafetai mo le avanoa e faitau ai i saunoaga a o tatou taitai i la’u lava gagana. Mo a’u, o le Liahona e aumaia moni ai ia i tatou tusitusiga paia.

Lena Cantor, ISA

Na o le Faafetai

O le Liahona o se soa sili ma se fesoasoani mo a’u. I masina uma e i ai luitau i lo’u olaga, ae i ni nai masina talu ai, na ou lagona ai na tusia patino lava le Liahona mo a’u ma a’u lu’itau. Ou te iloa e finagalo le Atua tatou te fiafia e ala i le usiusitai.

Georgia Adolpho Pahulaya, Filipaina