Savali a Faiaoga Asiasi

Avea ma se Tufugaaao o le Atua e ala i le Tausia o e Matitiva ma Le Tagolima

Filifili ma faitau ma le agaga tatalo mai lenei savali ni mau ma aoaoga e fetaui ma tulaga o loo manaomia e uso o loo e asia. Fetufaai atu i ai ou aafiaga ma molimau. Valaaulia foi i latou o loo e aoaoina ia faapena foi ona fai.

O le a le Fetalaiga a le Alii e uiga i le Tausia o e Matitiva ma Lē Tagolima?

Elder Russell M. Nelson o le Korama a Aposetolo e Toasefululua: “E popole lo tatou Tama Faalelagi mo [e matitiva ma lē tagolima]. O i latou uma o ana fanau… . O e matitiva—ae maise lava o fafine ua oti a latou tane, fanau ua matua oti, ma tagata ese—ua leva ona avea ma popolega o le Atua ma e amiotonu… . Mo i latou o e tausia e matitiva, na folafola atu i ai faamanuiaga” (“In the Lord’s Own Way,” Ensign, Me 1986, 25).

Mataio 25:37–40: “Ona tali mai ai lea ia te ia o e amiotonu, e faapea mai, le Alii e, o anafea na matou iloa ai oe ua fia ai, ma matou fagaina oe? Po o fia inu, ma matou avane e te inu ai?

“O anafea foi na matou iloa ai oe o le tagata ese, ma matou talia oe? po o le le lavalava, ma matou faaofuina oe?

“O anafea foi na matou iloa ai oe ua ma’i, po o i le falepuipui, ma matou o atu ai ia te oe?

“Ona tali atu ai lea o le Tupu, e faapea atu ia te i latou, E moni, ou te fai atu ia te outou, aua na faia e outou i le tasi o e aupito itiiti o o’u uso nei, o a’u lea na outou faia i ai.”

E Mafai Faapefea ona Avea A’u ma se Tufugaaao e Tausia Isi?

Mosaea 4:26: “Ia outou foai ni o outou oa i e matitiva, ia taitasi le tagata e tusa ma mea ua ia te ia, e pei o le fafagaina o e fia aai, ma le faaofuina o e le lavalava, atoa ma le asiasi i e mamai, ma le tausiga o i latou i le faaleagaga atoa ma le faaletino.”

Elder Henry B. Eyring o le Korama a Aposetolo e Toasefululua: “Ou te le toe vaai lava i aoaoga ma asiasiga i aiga ua na o ni polokalama… . O na galuega o se avanoa, e le o se avega… . Sa osia e tagata uma o le Ekalesia se feagaiga e faia galuega agalelei e pei ona finagalo ai le Faaola e fai. Soo se valaauga la e fai ma molimau, ma tausia isi, e le o se talosaga mo ni galuega faaopoopo; o se faamanuiaga na fuafuaina e se Tama Faalelagi alofa ma Lona Alo o Iesu Keriso… . O valaauga taitasi o se avanoa lea e faamaonia atu ai faamanuiaga e tafe mai i le avea ai ma nuu o le feagaiga, ma o valaauga taitasi o se avanoa ua e ioe e te tauaveina” (“O Molimau mo le Atua,” Liahona, Ian. 1997, 35).

Epikopo H. David Burton, Epikopo Pulefaamalumalu: “Na aoao mai e le Perofeta o Iosefa Samita o lo tatou tiutetauave le ‘fagaina o e fia aai, faaoofu i e le lavalava, tausi i le fafine ua oti lana tane, soloi loimata o e ua matuaoti, faamafanafana i e mafatia, tusa pe i ai i lenei ekalesia po o se isi, pe le lotu foi, soo se mea lava e maua i ai i latou’ (Times and Seasons, 15 Mati 1842, 732). Tau ia ina ia tatou limafoai atu i o tatou taimi ma saoloto i o tatou saofaga mo le tausia o i latou o loo puapuagatia” (“Ina Alu Ia ma Ia Faapea Ona Fai,” Liahona, Iul. 1997, 96).

Bonnie D. Parkin, peresitene aoao o le Aualofa: “O le Fale Teuoloa a le Alii—lea ‘o loo lava ma totoe mea o i ai’—o le [faatusatusaga] o le malosiaga ua tuuina mai e le Alii ia i tatou taitoatasi (MFF 104:17). O le Fale Teuoloa a le Alii o lona uiga o se tasi tamaitai o loo fesoasoani i le isi. O se uso e ofo atu e faalogo pe talanoa ma se uso atonu o loo tuua na o ia. O se uso ua faatupuina se faauooga vavalalata ma le uso na te asia. O oe lea ma a’u faatasi ma o taua malosiaga, o taua tomai, ma a ta’ua taleni e faamanuiaina ai le olaga o le isi” (“Welfare, the Crowning Principle of a Christian Life,” BYU Women’s Conference, 1 Me, 2003, 3).