O Le Solo
A o ou laitiiti, na ou mauaina se solo i se itulau na sasae ese mai se tamaitusi ma faapaepae solo e se tagata i tafatafa o le auala. Na ou ola ae i fale taugofie a le malo ma sa na o au e leai ni a’u uo, ae na i ai mea e tolu na faafiafiaina ai a’u: o tusi, tifaga o Elvis Presley, ma solo. Sa matua ou fiafia lava i solo. Na tautala mai i se vaega o lo’u tagata ou te lei masani ai. Na peiseai e leai se upu e faamatalaina ai. I lo’u fia iloa e uiga i le solo, na ou aumaia ai ma ave i le fale.
Na ou faitauina lena solo i aso uma, o nisi taimi e faitau faafia i le aso, i tausaga na mulimuli mai. A o ou nofo i totonu o le vasega, a o ou alu ma sau i vasega, a o ou nofonofo toatasi i le malologa, ou te lagonaina le oo mai o vaega o lena solo i lo’u mafaufau. Ou te lei taulotoina lava se solo muamua, ae o le solo lea na ese lava. Na i ai se mea i totonu o lea solo na tautala mai ia te a’u ma ou ootia ai.
A musumusu mai se leo,
“O oe e le mai lalo nei,”
Ona ou lagona lea
Ua ou sau mai mea paia.
O taimi uma lava na ou lagona ai e ese a’u mai isi tamaiti. Na ou lagona i nisi taimi na i ai se isi aiga i se isi mea, ma afai ou te matuai taumafai lava e mafai lava ona ou tau manatuaina. Na faamalosia ia lagona e le solo. Mai lea taimi i lea taimi ou te aveeseina ai mai i la’u pusatoso ma faitauina. Na ou mafaufau pe fia ni tagata e pei o a’u o loo i ai i le lalolagi ma pe o le a ou feiloai i nisi o i latou.
Ua e aumai au i lalo nei
Mo se faamoemoega lelei
Ma ua e puni lo’u manatua
Uo, ma lo’u fanau mai muamua
Mafaufau la i lo’u tei i le tele o tausaga mulimuli ane, a o avea a’u ma tagata sailiili na ou nofo i la’u lotu faamanatuga muamua lava, ina ua ou tatalaina le tusipese i le itulau na ta’u mai ma ou vaaia ai le solo na ou mauaina i le tele o tausaga ua mavae. Na ese le fati mai lea na ou usuina leotele ia te a’u lava pe a le mafai ona ou moe pe a ou ala i le leva o le po ma le tagi, ae na ou iloaina lava nota na ta mai i le piano.
Lo’u Tama e, o loo afio
I le mea mamalu i luga,
Ou te foi atu ea afea
Ma toe vaai ia te oe?
A o pepese uma tagata “Lo’u Tama e” (Viiga, nu. 178), sa na o lo’u nofo ma tagi, ma lo’u iloa na tuuina mai e le Atua lena pese i lo’u ala a o ou laitiiti.
Sa lei mau ea lo’u agaga,
I mea paia o e afio ai?
Te lei tausi ea o a’u,
Ae ou te lei fanau mai?
A o ou nofo i lena lotu faamanatuga, ma faalogologo i la’u solo o usuina e le au paia, na ou iloa ua ou i ai i le ala sa’o. Na ou iloa o mea na aoao mai e faifeautalai ia te a’u e moni. Na ou iloa O Le Ekalesia a Iesu Keriso o le Au Paia o Aso e Gata Ai o le Ekalesia moni e tasi lea a le Atua i le lalolagi. Ma ina ua ou tootuli ma fesili atu i le Atua pe ua tonu i Lona finagalo e tatau ona ou papatiso ma faamauina i le Ekalesia, e lei faateia a’u i le tali ioe.
Ina ua mavae le tolu vaiaso o lesona na tuuina mai e Elder Walker ma Elder Whittaker, na faatofuina a’u e Elder Walker i le vai papatisoga. Na faamamaina a’u, e sili atu ona mama nai lo la’u faalogona i se isi lava taimi muamua pe mafai foi ona ou manatu ou te ono oo i ai. Faatasi ai ma nei faifeautalai i le lio o e umia le perisitua o e na faamauina au o se tasi o le Ekalesia na i ai lo’u epikopo, o le tagata lea na taliina le telefoni i le aso na ou telefoni atu ai e talosagaina faifeautalai e asia a.
Ou te faalogoina upu o la’u solo faapelepele e pei o se tali malie o loo faaopeopea malie i luga ae ma fegasoloai i le va o tagata taitoatasi na ou feiloai i ai ma gaoioiga taitasi na aumaia ai a’u i totonu o le Ekalesia—o upu ia na ootia ai se loto mafatia i le toe fia iloa tasi o lona Tama Faavavau.
Sa ou ta’u Tama oe,
I lou Agaga mai luga.
Ae, lei fuatai le malamalama
Sa ou le iloa pe aisea.