Taulai atu le Au Peresitene Sili ia Keriso i le Faigalotu

“Mai vaitau uma o le tausaga e leai lava se vaitau e maeu le matagofie e pei o le Kerisimasi,” o le saunoaga lea a Peresitene Gordon B. Hinckley i le Faigalotu o le Kerisimasi a le Au Peresitene Sili na faia i le Maota Autu mo Konafesi i le Aai o Sate Leki ma faasalalauina i le lalolagi atoa.

“E aapa atu o tatou loto ia i latou e manaomia le fesoasoani. E faatoilalo e le alofa le inoino… . E tupu teisi atu le malosi o le alofa, e tele atu foi le matamau o le loto. Tatou te matele atu i le faamalolosia o tulivae ua vaivai ma sii a’e i luga lima ua tautau. E faafiafiaina loto o le fanau. E oo mai se maneta faaopoopo. E i ai se āu loloto o le fiafia.”

I le mavae ai o le toe taua o le maliu o lona tina ae toeitiiti oo i le Kerisimasi i le 1930 ma le faigata o le maliu o lona faletua i le 2004, na saunoa ai faapea Peresitene Hinckley: “O loo susulu mai foi i lena pogisa uma ia foliga ofoofogia o le Alo o le Atua, o le na ofoina mai Lona soifua ina ia tatou ola ai. O le uiga moni lenei o le Kerisimasi, o le moni o le Togiola, na saunia e le Faaola o le lalolagi.”

Na molimau Peresitene Hinckley, ua tuuina mai e le Faaola le faamoemoe mo le faaolataga mo tagata uma, e oo lava i nei taimi o taua, feteenaiga, ma faafitauli faigata.

Na saunoa Peresitene Thomas S. Monson, o le Fesoasoani Muamua i le Au Peresitene Sili, o le Kerisimasi “o se taimi lenei mo aiga; o se taimi e manatua ai; o se taimi mo le loto faafetai.

“O le agaga o le Kerisimasi o le agaga o le alofa, ma le agaalofa ma le agalelei… . O le agaga o le Kerisimasi o se mea ou te faamoemoe o le a tofu maua e i tatou uma i o tatou loto ma o tatou olaga, e le gata i lenei vaitau patino, ae faapea foi i tausaga uma lava.”

Na saunoa Peresitene Monson pe a tatou faatumauina le agaga o le Kerisimasi, tatou te faatumauina le Agaga o Keriso.

“O le faafeiloaiga, ‘Ua le ofi,’ sa le gata ina faalogo i ai Iosefa ma Maria a o lumanai le soifua mai o Iesu, ae sa onosaia foi e Ia i le tele o taimi o Lana misiona,” o le saunoaga lea a Peresitene Monson.

“I o tatou fale i aso nei, e i ai avanoa [potu] e aai ai, o avanoa e momoe ai, o avanoa mo faafiafiaga. Pe o i ai ea so tatou avanoa mo Keriso? E i ai o tatou taimi mo … gaoioiga o se vaega o o tatou olaga i aso taitasi. Pe o i ai ea so tatou taimi mo Keriso?”

Na aoao mai Peresitene James E. Faust, o le Fesoasoani Lua i le Au Peresitene Sili e faapea, “i lenei taimi o le tausaga, pe a tatou faamanatuina le soifua mai [o le Faaola], e tatau foi ona faaavanoa so tatou taimi e mafaufau loloto ai ma le faaaloalo i Lona maliu ma [le] maualuga o le paia o le Toetu.”

I lana saunoaga, na taulai atu ai Peresitene Faust i se tasi o “aoaoga maoae ma le taua … a le Faaola: ia fai mo isi mea e le mafai ona latou faia mo i latou lava.”

O le foai atu ma le le faalauaiteleina e atagia ai le alofa o le Faaola, o le saunoaga lea a Peresitene Faust. “Ou te fia faailoa atu le agaga faafetai ma le faamalo ia i latou uma o e na tatalaina o latou loto ma foai atu i isi.

“O i tatou o e na foai atu ma le le faalauaiteleina, e i ai ni lagona fiafia i totonu o le Agaga lea e tupu ae i totonu pe a tatou faia se mea mo isi, lea e le mafai ona iloa o i tatou [na faia]. O le foai atu ma le le faalauaiteleina e tuuina atu ai se ituaiga meaalofa e maualuga atu o le faapaiaina.”