Aisea Na Ta’u Mai Ai e le Agaga ia te A’u?
I le taumafanafana o le 1980, na latalata i le faaiuga o la’u auaunaga i le Misiona a Massachusetts Boston. I se tasi afiafi na i ai se taimi atofaina ma te aoaoina ai le ata o le faaolataga i se talavou e aoga i le kolisi na foliga e ono taliaina le talaiga.
I ni taimi eseese a o tuuina atu le lesona, na toetoe lava a lofituina o’u lagona a o molimau mai pea lava pea le Agaga Paia ia te a’u o le mataupu faavae o loo ma aoaoina e moni. Ou te manatua na toeitiiti lava leotele ae la’u tatalo: “Ua uma ona ou iloaina lenei mea. Ua tele taimi ua ou aoaoina ai lenei lesona i le lua tausaga ua mavae. Ou te faafetai o loo ou lagonaina lou Agaga, ae faamolemole molimau atu foi i le ma tagata sailiili!”
I se taimi puupuu ina ua mavae lenei afiafi, na ou feiloai ai i lo’u peresitene o le misiona, ma na ia ta’u mai ia te a’u ua maliu lo’u tina i se faalavelave faafuasei tau taavale. I le natura lava ia, na oo mai le toesea faafuasei o lo’u tina ma mea matautia na matua faateia ai lo’u aiga ma le nuu atoa. Ae na mavae loa lagona tiga o lena uluai taimi ma ua maua se taimi ou te tomanatu ai, na ou manatuaina ma le manino atoatoa le molimau mamana a le Agaga na ou mauaina i le taimi o le lesona o le ata o le faaolataga. Na ou iloa o le galuega lea a se Tama Faalelagi alofa na saunia ai a’u mo le puapuaga o le a oo mai.
E leai se aso e mavae ou te le misia ai aoaoga ma le mafutaga ma lo’u tina. Ae e leai foi se aso e mavae ou te le manatuaina ai le auala na saunia ai a’u ma le faaeteete e se Tama Faalelagi alofa mo le taimi faigata o le a oo mai.