O Le Faataitaiga a le Toatasi
O le autu o se i-meli lata mai nei na aumaia ai ia te au le tala faanoanoa: “Falelauasiga mo Wendy Knaupp.” A o soloi ese o’u loimata, na ou mafaufau i le aso, ua silia ma le 40 tausaga talu ai ina ua ma feiloai ma la’u soa faifeautalai ia Wendy ma Paulo Knaupp, i tafatafa o se fale faatau fugalaau i totonu o se fale faatalitali nofoaafi i Frankfurt. O se ulugalii talavou Amerika na i ai i Siamani i tiute faamiliteli, na mamao i laua mai o la aiga, ma na faatalitali [mo le fanau mai] o le la pepe muamua. Talu ai na faatoa maea lava ona uunaia i matou e lo matou peresitene o le misiona ina ia “avea ma faifeautalai i sekone uma,” na ma amataina ai se talanoaga ma i laua.
A o ma aoaoina i laua i lesona a faifeautalai, na faagaeetia au i le malamalama o le agaga o Wendy. Na fiafia ma susulu ma matua malosi i le faaleagaga. Na ia lagonaina le uiga o le Toefuataiina i ni lagona mausali. O se faamanuiaga le latalata atu ia te ia ma matauina le tuputupu ae o lana molimau ma vaavaai atu i le faateleina o le malamalama i ona foliga.
E sili atu i le 30 tausaga mulimuli ane, na faamatalaina ai e Wendy le matou uluai feiloaiga: “O le a ou manatua pea lagona na ia te a’u ina ua faatoa ou faalogo i le tala ia Iosefa Samita! E mafai ona ou vaai faalemafaufau i lo ma tamai fale mautotogi i le pito i luga o fale faaSiamani lea na toeitiiti lava a pei le telē o le ma potu moe lenei, o ma nonofo i le tulimanu o le moega/nofoa [faafesagai ma faifeautalai]. Ou te manatuaina le lagona o le maofa ma le toafilemu. Na ou lagona lava i taimi uma e tatau ona i ai se mea faapena i se mea. E le talafeagai le faapea o le a tuua pogisa i tatou e le Atua e ausulusulu solo e pei lava ona ma faia… . Na foliga mai e matua sa’o ma na ou talitonu i ai.”
Ae peitai e lei leva talu ona filifili e papatisoina, ae faalogo Wendy ma Paulo i se tagata o lo latou aiga o faitioina se aiaiga a le Ekalesia e uiga po o ai e mafai ona mauaina le perisitua. Na la le mautonu ma lotovaivai. Na la fai mai e le tatau ona ma toe asiasi atu ia i laua—vagana se toe taimi matou te faamavae ai. Na ma le iloa tali a laua fesili ae na ma iloa na toe tasi lava lo ma avanoa. A o matou talanoa na musuia a’u e faitau atu ia i laua le mau na faatoa ou matauina i la’u suesuega patino, o le tala ia Peteru ma Konelio i le Galuega 10–11. O lena po na ou iloa ai se faataunuuina o folafolaga a le Alii i faifeautalai: “Aua o le a tuuina atu ia te oulua i le ituaso lava, ioe, i le minute lava, le mea lua te fai atu ai … [ma] le Agaga Paia e molimau atu i mea uma lua te fai atu ai” (MFF 100:6, 8). Na matou lagonaina uma le agaga o le filemu a o matou tatalo faatasi.
I ni tausaga mulimuli ane na faapea mai Wendy e uiga i lenei lava aafiaga: “Ou te le manatua po o le a le mea na la tau maia ia i maua po o le a le mea na matou talanoa i ai, ae o lena malamalama … o le Agaga … na toe foi mai ma na ou iloa ai e moni, ma e ui lava ou te lei malamalama atoatoa i mea uma, na moni lava le savali ma na manaomia ona ma taliaina, ma o se isi taimi i le lumanai o le a ma malamalama ai.”
Na papatisoina Paulo ma Wendy. Na lei umi ae faamauina i laua i le malumalu. I le lotolotoi o tofotofoga masani o le olaga faaleaiga, na la tausia se fanau e toalima o e na iu ina toaaga uma i le Ekalesia. O nisi na faia ni misiona. O Paulo na avea ma se faiaoga. Na usuina e Paulo ma Wendy ni pese matagofie taitoalua i le lotu. Na taitaiina e Wendy le aufaipese a le uarota mo le tele o tausaga. Na fiafia tele i laua i le malumalu ma iloa ai e i laua lava le “olioli tele o le au paia” (Enosa 1:3).
I le tasi taimi a o auai ai i le lotu i Lonetona, na ma feiloai ai ma lo’u toalua o Marie, i se tamaitai e suafa ia Libby Casas mai Maine. Talu ai na o le au aiga o Knaupp tagata na ma iloaina i Maine, na ma fesili ai pe na te iloa i latou. Na susulu ona foliga: “Iloa i latou? O Wendy o la’u uo pele lava. Na ia faailoa mai ia te a’u le talalelei!” Na feiloai Wendy ia Libby i se Faletamea—o ni tina se toalua na fai tagamea a o la aiga—ma faasoa atu le talalelei ia Libby e pei lava ona ma faia ia Wendy i le fale faatali nofoaafi. O le mea muamua lava na faagaeetia ai Libby e uiga i le Ekalesia o le mana o faataitaiga a Wendy lava ia—o se tina, ava, ma se tagata ola. Mo Libby, i le amataga mai, o Wendy lava ia na avea ma savali o le Toefuataiga.
Na mulimuli ane nonofo le au aiga o Knaupp i Oregon. Ona oo lea i le tausaga ua tea, ina ua mavae ona ma faalogo ua maua Wendy i le kanesa, na faamanuiaina i maua i le iloa o i laua na asiasi mai i Iuta i le taimi o konafesi aoao. Na matou tuuina atu ma le toalua o Wendy ma le la tama ua foi mai i le misiona se faamanuiaga ia te ia. Na fetufaai o matou aafiaga mai le fasefulu tausaga ua mavae. Na manino lava na avea le talalelei ma mea uma ia i latou. Na avea ma lotolotoi ma faamoemoega o o laua olaga faapea olaga o le la fanau. Na matua naunau lava Paulo ma Wendy ina ia ola maloloina ina ia mafai ona faataunuuina le la miti o le auauna faatasi i se misiona.
I se taimi e lei mamao a o lei maliu o ia, na tusi mai Wendy ia te a’u i se tusi, “Ou te matua lagona lava o loo ou i ai i aao o le Alii. Na te faia soo se mea e finagalo i ai o Ia, ma ua ou i ai i Lana tausiga.” Na ia faaali mai lona agaga faafetai mo le talalelei ma lona aiga, ona faapea mai lea, “Pe ua le matagofie ea le Alii!”
Ua toesea nei Wendy, ma ua matua misia tele o ia e lona aiga. Ina ua tusi mai lana tama tama e uiga i lona maliu, na ia faapea mai, “Faafetai mo le aumaia o Mama i le malamalama o le talalelei. Na ola usiusitai o ia i poloaiga.” Fai mai a ia na tusi atu lona tina ia te ia i se tasi taimi, “Ou te alofa i le Alii ma e faavavau ona ou faafetai [ia te Ia] mo le aumaia o le talalelei aupito taua i lo’u olaga. Ou te manao ia faamaonia lo’u faamaoni e sili atu nai lo se isi lava mea ma o loo matuai ou taumafai lava ia faia.”
Talu ai ona na avea le talalelei ma mea uma ia Wendy ma lona aiga, o i matou o e na avea ma ona faifeautalai ua malamalama “faauta i le tele o lo outou olioli” (MFF 18:15) faatasi ma ia i le malo o lo tatou Tama. O le talalelei o mea uma ia ia te ia, o lea la o lo’u aafiaga faafaifeautalai faatasi ma ia o mea uma ia te a’u. Leitioa a fetalai le Alii o le faia o le galuega faafaifeautalai “o le mea e sili ona aoga ia te oe” (MFF 15:6; faaopoopo le faamamafa).
Ua saunoa mai Peresitene Gordon B. Hinckley: “Ou te manao e augani atu i le Au Paia e faia mea uma tou te mafaia ina ia outou faasino mai ai igoa [o tagata] ua fia sailiili i le Ekalesia ina ia mafai ona aoaoina [e faifeautalai]… . O tagata uma e te iloa e o mai i totonu o le Ekalesia ona o au taumafaiga, o le a aumaia le fiafia i o outou olaga. Ou te tuuina lena folafolaga ia te outou taitoatasi” (“Mafaufauga Musuia,” Liahona, Oke. 2003, 3).
Ua ou iloa mo au lava le uiga o lena folafolaga. Ou te augani atu foi ia te outou ina ia faailoa atu i se tagata e toatasi le Ekalesia i lenei tausaga—ma aua nei e fiu pe a fetaiai i latou ma ni faafitauli. Afai e te mautinoa o le a le te’a atu le avanoa ma oe, o le a e faapea ifo faatasi ma Wendy Knaupp, “Pe ua le matagofie ea le Alii!”