Aoaoina o Tulafono a le Atua
“Ina aumaia mea e sefulu ai a outou mea uma lava i le fale e tuu ai mea, ina ia i ai mea e ai i lo’u fale” (Malaki 3:10).
E faavae i se tala moni
O le uta lona sefulu lea,” o le valaau lea a le tama o Tavita ia te ia. “Ave atu i luga o le eleele maualuga atu.” Na vaai atu le alii talavou o Tavita O. MaKei i le faatoaga i le mea o loo tusi i ai le lima o lona tama. I uta e iva muamua na latou faaputuina na itiiti ifo le lelei o le vaovaomago. Na iloa e Tavita le faamoemoe o lona tama mo lana uta lona sefulu e alu i le fale teuoloa a le epikopo o le latou sefuluai. Ae na te lei malamalama pe aisea na le avea ai le vaovaomago lava e tasi lea na latou aoina.
Na valaau mai Tavita i lona tama, “Leai, tatou ave lava le vao ua maua.”
E lei tali mai le tamā o Tavita. Na sauni Tavita o le a toe tali atu ina ua vaai atu ua liliu lona tama ma amata ona savali sao mai lava ia te ia. Na faafuasei ona alu ese le savili sa i le faatoaga, ma na amata ona matua vevela lava le la. Na soloi le afu o Tavita mai lona muaulu ma lona tuaua. Na iloa e ia e le o savali mamao mai lona tama i le isi itu o le faatoaga e faamalo atu ia te ia mo lana tali le faaaloalo. Na sau lava o ia i le mamao ina ia faamautinoa ua malamalama Tavita.
“Leai, Tavita.” Na tautala malosi mai ai lona tama, ae o le to’a filemu i lona leo na faalogo lelei ai Tavita. “O le uta lona sefulu lea, ma o le mea silisili ona lelei e le lava lona lelei mo le Atua.” Na vaai toto’a le tamā o Tavita i foliga o lona atalii ia mautinoa na faalogo o ia. Ona ia liliu lea ma savali ese.
Na folo e Tavita le faalogona ese na ia lagonaina ma tatai atu ana solofanua i le eleele maualuga. A o ia lauina le vaomago i luga o le taavale, na amata ona ia mafaufau i le mea na taumafai lona tama e aoao atu ia te ia. E ui ina iloa o le sefuluai o se tulafono, e pei lava o le usiusitai ma le taulaga, ae na manao Tavita e faamuamua mea na latou manaomia. Ae na fetalai mai le Atua e ave uluai fua o a outou lafu—e silisili ona lelei—ma avatu ia te Ia (tagai Teuterenome 12:6).
“E ave e lo’u tama le mea silisili ona lelei i le Atua, ae ave e matou le mea lelei e sosoo ai,” o le mafaufau lea o Tavita. “Atonu o le auala lea tatou te avea ai le Alii ma totonugalemu o o tatou manatu ma o tatou olaga.”
Na i ai taimi na vaai ai Tavita i lona tina o totogi tupe mo le sefuluai. Nai lo le faaaluina i mea na ia manaomia ona faamoemoe lea o le a i ai sina mea e totoe mo le sefuluai, i le taimi lava lena na ia auina atu ai le tupe o le sefuluai i le epikopo ona faaaoga ai lea o mea na totoe. O le mea muamua ma le mea silisili ona lelei e ave i le Atua.
Na liliu e Tavita le taavale vaovaomago i lalo i le auala pefu agai i le fale teuoloa o le epikopo. Na ave atu i le lotoa ma lau i lalo le vao. O le osigataulaga mo lona tama le ave o lana vaovaomago silisili ona lelei i le Alii, ae na iloa e Tavita e le mafai ona faia e lona tama i se isi lava auala. Na manao o ia e tuuina atu ana mea silisili ona lelei i le Alii, e pei lava ona auina mai e le Tama Faalelagi Lona Alo atoatoa mo le lalolagi.
A o liliu e Tavita ana solofanua e toe foi atu i le fale, na oo mai ia te ia se faalogona lelei. Na fiafia o ia na aoao atu e lona tama ia te ia le tulafono o le sefuluai. O se lesona o le a ia manatuaina i lona olaga atoa.
Sii mai Aoaoga a Peresitene o le Ekalesia: Tavita O. MaKei (2003), xvi. Na auauna Peresitene MaKei (1873–1970) o le Peresitene lona iva o le Ekalesia, mai le 1951 i le 1970.
“O le totogi o le sefuluai o se faamaoniga lea ua tatou talia le tulafono o le taulaga. E saunia ai foi i tatou mo le tulafono o le faapaiaga ma isi tulafono maualuluga o le malo selesitila.”
Elder Dallin H. Oaks o le Korama a Aposetolo e Toasefululua, “Sefuluai,” Liahona, Iulai 1994, 45.