Lesona Mai le Feagaiga Fou
O Le Olioli o le Salamo
I Lana galuega atoa i le tino, na faaalia e le Faaola le alofa tele mo atalii ma afafine taitoatasi o le Atua—aemaise lava i latou o e na agasala. I faataoto o le mamoe na se, o le tupe na leiloa, ma le atalii faamaumau oa, na faamamafaina ai e le Alii le taua o le aapa atu ia i latou ua se, pe ua leiloloa ma le olioli e lagonaina pe a latou toe foi mai (tagai Luka 15). Mo se faataitaiga, na Ia fetalai mai, “E faapea foi ona tele o le olioli i le lagi o le tagata agasala e toatasi e salamo, ae itiiti i e amiotonu e toaivagafulu ma le toaiva, e le tusa i ai le salamo” (Luka 15:7).
Ou te fia tulimatai atu i le olioli tele lea e oo mai i e salamo ma lagona o le olioli tatou te maua a o tatou fesoasoani atu i isi e ala i le faagasologa o le salamo.
“Ua Ola Tagata, Ina Ia Latou Maua Le Olioli”
O le olioli e matua sili atu le loloto nai lo taimi e oo mai ai le faamalieina po o lagona o le fiafia. O le olioli moni, po o le “olioli faavavau” (2 Nifae 8:11), e oo mai i le maua o aafiaga o le mana o le Togiola e ala i le salamo faamaoni ma mai se faamaoniga faaleagaga e mafai ona togiolaina ai i tatou mai agasala e ala i le Alii o Iesu Keriso ma maua le ola e faavavau.
Na aoao mai le perofeta o Liae e faapea, o le fuafuaga a le Tama Faalelagi mo i tatou taitoatasi o lo tatou “maua o le olioli” (2 Nifae 2:25) ma na o le pau lava le auala mautinoa e maua ai le olioli e faavavau, e ala lea i le Togiola a Iesu Keriso.
E ui lava e le mafai ona tatou maua se atoatoaga o le olioli i lenei olaga (tagai MFF 93:33–34), e mafai ona tatou maua faaaliga i aso uma o le olioli a o tatou ola i le talalelei. Na aoao mai e Mamona ia mamanu mo le mauaina o le olioli ina ua ia faapea mai e faatatau i Sa Nifae faamaoni, “Ua latou anapogi ma tatalo soo, ma ua tauau ina faamaulalo atili ai i latou, ma ua tauau ina mausali atili i le faatuatua ia Keriso, e oo i le faatumuina o o latou loto i le olioli, ma ua faamafanafanaina, ioe, e oo i le faamamaina ma le faapaiaina o latou loto, ua oo mai lea faapaiaina ona ua latou tuuina atu o latou loto i le Atua” (Helamana 3:35).
Faatumuina i le Olioli e ala i le Agaga Paia
I le tele o tusitusiga paia e talanoa ai perofeta e uiga i le lagonaina o le olioli ma le lagonaina o le Agaga Paia i ni faamatalaga tutusa. Mo se faataitaiga, i le tusi o Galuega tatou te aoao ai faapea “a ua tutumu le au soo i le olioli, ma le Agaga Paia” (Galuega 13:52). Ma ua folafola atu e le Alii i e mulimuli ia te Ia, “ou te tuuina atu ia te outou se vaega o lo’u Agaga, o le a faamalamalamaina ai lou mafaufau, e faatumuina foi lou agaga i le olioli” (MFF 11:13).
A oo ina tatou malamalama o le faatumuina i le olioli e aofia ai le faatumulia i le Agaga Paia, tatou te iloa ai o le fiafia moni e oo mai i le salamo i a tatou agasala ma ola agavaa mo le Agaga. Ma le isi, a oo ina lagonaina le Agaga, e mafai ona tatou maua le olioli tele i le iloa ai ua faapaiaina i tatou i luma o le Atua.
O le olioli lea e oo mai i le salamo e faamaonia i le tele o auala. Muamua o le olioli ma le mafanafana lea e oo mai i le loto o se agaga ua salamo a o masii ese atu le avega o le agasala. Lona lua o lagona loloto o le olioli ma le alofa lea e oo mai ia i latou o e fesoasoani i isi i le faagasologa o le salamo. Ma le lagona olioli mulimuli o se Faaola alofa a o silasila mai o Ia o tatou mulimuli i Ana apoapoaiga ma faalagolago i le mana faamalolo o Lana taulaga togiola.
A o tatou faaaogaina le Togiola i o tatou olaga, e tatau ona tatou manatunatu i le Faaola ma Lana meaalofa e le iu ia i tatou, faatino le faatuatua ia te Ia, ma saili se faamaoniga faaleagaga e mafai ai e Ia ona Ia togiolaina i tatou mai a tatou agasala ma tulaga le atoatoa uma. O lea, o le a tatou lagonaina ai le olioli ma le filemu lea e mafai ona faaalia mai ia i tatou e ala mai i Lona Agaga Paia. O o tatou aafiaga o le a pei o aafiaga a tagata o Saraemila: “Ua oo mai le Agaga o le Atua ia te i latou, ma ua faatumuina i latou i le olioli, ona ua maua le faamagaloina o a latou agasala, ma ua filemu i o latou loto fuatiaifo ona o lo latou faatuatua tele ia Iesu Keriso o Le afio mai” (Mosaea 4:3).
“Ina Ia Ou Taitai Mai Agaga i le Salamo”
Pe a uma ona tatou lagonaina le olioli lea e oo mai e ala i faamanuiaga o le Togiola, e mafai foi ona tatou maua le olioli tele i le valaaulia lea o isi e o mai ia Keriso. A o aoaoina lona atalii o Helamana, na faapea atu ai Alema: “Ua ou galue e le aunoa, ina ia ou taitai mai agaga i le salamo; ina ia ou taitaiina mai foi i latou e tofotofo i le olioli silisili na ou tofotofoina; ina ia fanauina foi i latou i la le Atua, ma ia faatumuina i latou i le Agaga Paia.
“Ioe, o lenei faauta, lo’u atalii e, ua foaiina mai ia te au e le Atua le olioli silisili lava i le fua o a’u galuega” (Alema 36:24–25).
Na aoao mai le Faaola Lava Ia: “Afai foi e faapea ona oulua galulue i o oulua aso uma i le alagaina o le salamo i lenei nuu, ma aumaia, tau lava o se agaga e toatasi ia te a’u, faauta i le tele o lo outou olioli faatasi ma ia i le malo o lo’u Tama!
“Ma o lenei, afai o le a tele lo outou olioli faatasi ma se agaga e toatasi ua oulua aumaia ia te a’u … , faauta i le sili atu o lo outou olioli pe afai lua te aumaia ni agaga e toatele ia te a’u!” (MFF 18:15–16).
“Faauta i le Silisili O lona Olioli i le Agaga Ua Salamo”
O le mea mulimuli, e faigata ona ou le mafaufau i le lagona o le faamalieina o le Faaola i taimi uma lava tatou te salamo ai ia tatou agasala ma faaaoga Lana taulaga togiola i o tatou olaga. E moni lava na toe taua e Ioane lagona o le Faaola ina ua ia folafola mai: “E leai so’u fiafia e sili i lenei pe a ou faalogo ua savavali la’u fanau i le upu moni.” (3 Ioane 1:4). O Keriso, na fetalai e faatatau ia te Ia lava, na fetalai mai, “Faauta i le silisili o lona olioli i le agaga ua salamo” (MFF18:13).
Ina ua maea ona aoaoina sa Nifae e uiga i Lana Togiola ma mea e tatau ona latou faia e tutu ai ma le le pona i Ona luma, na faailoa atu e Iesu Lona finagalo ia i latou i le fetalai atu: “O lo’u olioli ua tele e oo lava i le atoatoa, ona o outou … ; ioe, e olioli lava le Tama, atoa ma le au agelu paia, ona o outou ma lenei tupulaga; aua e leai so latou ua fano… . O i latou foi ia ua faaatoatoaina ai le fiafia ia te au” (3 Nifae 27:30–31).
Ou te molimau atu e mafai foi e i tatou ona maua le olioli i lenei olaga ma se faaatoatoaina o le olioli i le olaga i tua atu e ala i le “vaavaai atu ia Iesu o le na te taitaiina ma le na te faaatoatoaina le faatuatua; o le na onosai i le satauro, na faatauvaa ia te ia le ma, ona o le olioli na tuuina i ona luma, ua nofo foi o ia i le itu taumatau o le nofoalii o le Atua” (Eperu 12:2; faaopoopo le faamamafa).
O le olioli o se agaga ua salamo
E mafai ona tele mea tatou te aoaoina e uiga i le olioli e mulimuli mai le salamo faamaoni e ala i le aoaoina o aafiaga o le Aposetolo o Paulo ma Alema le Itiiti, e ui lava o o tatou aafiaga atonu e le maoae (tagai Galuega 8:1–3; 9:1–31; Mosaea 27:8–31; Alema 36:5–24). O Paulo ma Alema o tagata e malosi la la’ua uunaiga o e na feoai e sauaina le Au Paia. I le totonugalemu o a la faiga faaumatia, na oo mai ai ia i laua uma ni asiasiga faalelagi. O se agelu a le Alii na faaali mai ia Alema, ae o Iesu Lava Ia na fetalai atu ia Paulo, ma fesili atu, “Se a le mea ua e saua mai ai ia te au?” (Galuega 9:4).
Na pauu nei alii i le eleele, o se taunuuga o mea na la vaaia ma faalogoina. Na taia ma gugu Alema, a o Paulo na tauaso. O le mea sili ona taua, na toe tulai mai i laua i a la amio leaga ma tulaga pauu i ni auala tutusa. Na fesili atu Paulo, “Le Alii e, se a le mea e te finagalo i ai ou te faia?” (Galuega 9:6). Na vave ona liliu atu lona olaga i le Faaola ma mulimuli i le finagalo o le Alii ma le tonu atoatoa. Na faamatala mai e Alema lona salamo:
“Ua oo foi ina o faapea ona tigaina a’u i le puapuaga, ina o atuatuvale a’u i le manatu i a’u agasala e tele, faauta, sa ou manatua, na ou faalogo i lo’u tama ua vavalo i le nuu e uiga i le afio mai o le toatasi, o Iesu Keriso, o le Alo o le Atua, e togiola agasala a le lalolagi.
“Ina o taofi atu e lo’u loto i lenei manatu, sa ou tagi ifo i lo’u loto: Iesu e, le Alo o le Atua, ia e alofa mai ia te au, o loo i le au oona, ma ua noanoatia i filifili o le oti faavavau.
“O lenei foi, faauta, ina o o’u manao i lenei mea, ua le toe mafai ona ou manatua o’u tiga; ioe, ua ou le toe atuatuvale i le manatu i a’u agasala.
“Ioe, ua maeu lava le olioli, ma le malamalama ofoofogia na a’u vaaia; ioe, sa faatumuina lo’u agaga i le olioli matua tele e tusa ma le tele o lo’u tiga!” (Alema 36:17–20; faaopoopo le faamamafa).
Elder Craig C. Christensen o le au Fitugafulu.