Faia o Uo
Talofa! O au o Clara Christensen. Ou te nofo i Keewatin, Ontario, Kanata
Mai ona tuafale, e fiafia ai Clara Christensen, e 11 ona tausaga, i se vaaiga ua lava le matagofie mo se itulau o le kalena. O lona fale e tu i le tulimanu o se mapuepue e iloa atu ai le Vaituloto o le Vao, o se vaituloto tele e oo atu i le itu i saute o le Iunaite Setete ma le itu i sisifo o Manitoba. I le taimi o le taumafanafana, e iila ai le susulu o le la i luga o le vai. I le taumalulu e susulu le vai i le kiona e lilofia ai.
O le vaituloto ma le togavao e siomia ai nuu o moomooga mo se tagata tiotio ma fiafia i fafo e pei o Clara. E aau, aloalo, fagota, sopo, ma tolauapi o ia i le taumafanafana. I le taumalulu e fiafia o ia e faasee, faataavale kiona, faasee i le aisa e taamilo ma faaifo i atumauga, ma le faasee i mauga tifato i poloka kapeta. O le fua o le malulu e oo maualalo atu i le -40 C i le po, ma e toulu le kiona i le va o le fa ma le fitu futu (1–2 m) le loloto. Ae peitai, o le tautoulu ma le taumalulu o vaitau ia o le tausaga e sili ona fiafia i ai Clara.
O lenei teine aumalosi i fafo e tele foi mea e fiafia e fai i totonu o le fale. E fiafia o ia e faitautusi, tolose, ma ili le foafoa ma ta le piano. Ua ia faatuina se sini e aoao ia iloa ta uma viiga ma pese a le Peraimeri. O Clara e ootia gofie lona loto ma fiafia e tausi tagata ma meaola. E masani ona tausitama i ona tausoga, ma a le maua ni tamaiti moi, na te faafaileleina ana faaputuga pepe meataalo. E fiafia tele foi o ia i pusi. E fiafia Lilo, Hero, ma Hope ia te ia ma e masani ona momoe i luga o lona moega. O le tala i le vaa o Noa o lana tala faatusipaia lea e sili ona fiafia i ai ona o meaola uma. A matua Clara e manao o ia e faigaluega [i le tausiga] a le o pepe po o pusi.
O le a lava le mea na te faia, o le a na ia faia i le lelei, aua e tumau lava o ia i se galuega seia oo ina lelei ona faamaeaina. O lenei uiga na fesoasoani ia te ia i nisi o taimi luitauina. Na aafia Clara a o laitiiti i le le mafai ona tautala. O le uiga o lenei mea, e ui lava ina iloa e ia le mea e manao e tautala mai ai, ae o faailoga na fenumiai i le va o lona faiai ma lona gutu, o lea e le manino ai lana tautala. Ua faaaluina e Clara le tele o itula e aoao ai le faagaoioiga o lona auvae, laugutu, ma le laulaufaiva, ina ia faia ai ni faaleoga talafeagai ma tuufaatasi na faaleoaga i ni upu. O se galuega faigata lenei mea, ae faatasi ai ma le fesoasoani a ona matua, na faataitai ai pea o ia ma o loo faaauau ona faia faapena. Ua mafai nei ona tautala lelei, e ui o nisi upu e manaomia ai pea se taumafaiga tele.
O le tausaga ua tea na tofia ai tamaiti o le vasega 4 a Clara e tuuina atu ni tautalaga e tai fa minute. Na filifili Clara e tuuina atu se tautalaga e uiga i le fasiotia o tagata eseese e Siamani i le taimi o le Taua Lona Lua o le Lalolagi, lea na ia tuuina atu e faapei o ia o se teineitiiti na i ai i se nofoaga o faasalaga. I le taimi muamua lava na faataitai ai lana tautalaga, e valu minute ma le 40 sekone na alu ai ona o le tele o upu sa faigata ona tau. Sa ia faataitaia ma saga faataitai faafia. Na faifaimalie lava le puupuu o le tautalaga ao ia aoaoina e tau faalelei upu. Na iu lava ina mafai ona ia tuuina atu le tautalaga i minute e fa ma le 40 sekone, ma na filifilia ai o ia e tamaiti o lana vasega e fai ma sui o i latou i luma o le aoga atoa. Ina ua ia faia, na tau fai patipati le aoga atoa. O le toatele o i latou na iloaina Clara mai lava i le vasega tasi, ma na foliga mai o se vavega lona alualu i luma. “Na tutulu le puleaoga,” o le tala lea a le tina o Clara. “Na tagi foi le faiaoga o le vasega lua a Clara. Na tuu alaga faamalosiau atu lona faiaoga o le vasega fa. O se faaeaga maoae—o se tasi o taimi sili ona faapitoa i lou olaga!”
O le a le mea na aoao mai e Clara mai lenei aafiaga? “Taumafai pea,” na ia fautuaina ai tamaiti i soo se nofoaga. “Aua nei fiu.”
E moni, o le tatalo o se vaega taua foi i le manumalo o Clara. E maoae lona faatuatua i le Tama Faalelagi ma Iesu Keriso. Na fesoasoani foi le Peraimeri, afiafi faaleaiga, suesueina o tusitusiga paia, ma aoaoga a ona matua. Na faia foi e ona uso matutua se eseesega, e ala i a laua faataitaiga lelei ma a laua tusi faitau. O le taimi lava na atoa le tai 12 tausaga o Carly, lea ua 18 nei tausaga, ma Josie, ua 15 ona tausaga, na amata ai ona la tuuina Pepa Lautele o i ai savali o le New Era i luga o a laua faata. Ua taulotoina foi e Clara mau tauloto o le seminare ma aoaoina faatasi ma ona uso Ia [B’s] e ono a Peresitene Hinckley.
O lona tama o le peresitene o le paranesi, ma o lona tina o le peresitene o Tamaitai Talavou, o lea e tumau ai le aafia o Clara i gaoioiga a le paranesi. O le paranesi a Kenora e toagaogao i le taimi o le tautoulu, taumalulu, ma le tautotogo. O le mea moni, e masani lava na o Clara le tagata o lana vasega o le Peraimeri, lea e aoaoina e lona tinamatua, e peresitene i le Peraimeri. Ae a oo i le taimi o le taumafanafana, pe a lolofi atu le faitau afe o turisi e tafafao i le Vaituloto o le Vao, e faatumulia le paranesi i tagata asiasi i Aso Sa taitasi. E talisapaia uma e Clara faauooga fou ma le mananaia. E latalata atu le aiga i le Ekalesia i le tausaga atoa e ala i le auai i gaoioiga a le siteki i Winnipeg, Manitoba, pe a ma le lua ma le afa itula i sisifo. O le foi mai i le fale i le afiafi, e masani ai ona latou vaaia le feilafi o moli i le lagi i matu.
E vavalalata foi Clara ma lona aiga lautele. I po o le Kerisimasi, e momoe faatasi ai tausoga ma tamaloloa ma fafine o le aiga i le fale o Tinamatua. Latou te aai, pepese, faatautau totini, ma faatulaga se vaaiga o le soifuaga o le Faaola, faalogologo i tala o le Kerisimasi, ma tootutuli faatasi i le tatalo. O le taeao o le Kerisimasi e aumaia ai ti koko vevela, pani faakoluse vevela, ma meaalofa. I le po o le Kerisimasi, e toe faatasitasi ai le aiga i le fale o Clara mo se aiga i le afiafi. O le Aso e sosoo ma le Kerisimasi [Boxing Day] e faia ai se taumafataga faasolosolo i le afiafi o ni taumafa eseese i fale o tagata taitoatasi o le aiga.
Ua tuputupu ae Clara i le musuia e le matagofie o le natura, o le mafanafana o le alofa faaleaiga, ma le malamalama o le talalelei a Iesu Keriso. O nei aafiaga uma e atagia lelei mai i ona foliga ma lona agaga. E oo lava i le aso aupito sili ona malulu o le taumalulu, na te faamafanafanaina olaga o i latou latou te iloaina lelei o ia. E pei ona fai mai lona tina, “Faafetai lava i lo matou mauaina o Clara.”