O Mai e Faalogo i le Siufofoga o se Perofeta

A o le Alaga Fiafia i le Taeao

Saunia e Thomas S. Monson

Fesoasoani Muamua i le Au Peresitene Sili

Ata

I ni nai tausaga talu ai, na lomia ai i le nusipepa a le Aai i Sale Leki se faasilasilaga o le maliu o se uo lelei i le taimi sili o lona olaga. Na ou asiasi atu i le fale maliu ma faatasi ai ma le toatele o isi tagata na faapotopoto atu e avatu faamafanafanaga [faamaisega] i le tane ma le fanau ua leai se tina. Na faafuasei ona iloa mai a’u e le tamaitiiti laititi, o Keli, ma sau uu lo’u lima. “Sau ta o,” o lana tala lea, ma ia taitai atu a’u i le pusa maliu o loo taoto ai le tino o si ona tina peleina. “Ou te le o tagi,” na fai mai ai o ia, “ma e le tatau foi ona e tagi. E tele taimi na ta’u mai ai e lo’u tina ia te a’u e uiga i le maliu ma le ola faatasi ma le Tama Faalelagi. O a’u e ā lo’u tina ma lo’u tama lea. O le a matou toe faatasi uma lava.” I lo’u mafaufau na oo mai i ai upu a le fai Salamo: “Ua e faatumauina le viiga i gutu o tama meamea” (Salamo 8:2).

Mai mata na susu i loimata, na ou vaai atu ai i foliga ataata aulelei ma tumu i le faatuatua o la’u uo itiiti. Mo ia, le o loo uuina lo’u lima i lona tamai lima, o le a leai lava se aso faanoanoa. E lagolagoina e lana molimau malosi, ma le iloa e faaauau pea le olaga i tua atu o le oti, o ia, ma lona tama, o ona tuagane, o ona uso, ma i latou uma lava o e iloa lenei malamalama o le upu moni paia e mafai ona folafola atu i le lalolagi: “E afe ane le tagi i le afiafi, a o le alaga fiafia i le taeao” (Salamo 30:5).

Faatasi ai ma le malosi uma o lo’u agaga, ou te molimau atu o loo soifua le Atua, o Lona Alo Pele o le faapolopolo o le Toetutu, o le talalelei a Iesu Keriso o le malamalama ati lea e suia ai aso faanoanoa uma i se taeao e tumu i le olioli.

Mai se lauga o le konafesi aoao ia Aperila 1976.

Mea e mafaufau i ai

E leai se mea e leaga ai le tagi pe a maliu se tasi e te alofa i ai. O le mea moni, e mafai ona fesoasoani. Ae e lei lagonaina e Keli le fia tagi. Aisea?
Aisea e te manatu ai na ta’u soo atu e le tina o Keli ia Keli e uiga i le olaga pe a mavae le oti?
E faapefea ona avea Iesu ma faapolopolo o le Toetutu (tagai 1 Korinito 15:23; 2 Nifae 2:8–9)? Ia talanoaina lenei mea ma ou matua.