Maua i le DVD le O Molimau a le Lafu e Tasi ma le Leoleo Mamoe e Tasi

I le mavae ai o le lima tausaga o faaalia ai na o le Maota Faamanatu o Iosefa Samita i le Aai o Sate Leki, Iuta, faapea ai ma lalo o le taitaiga a le Au Peresitene Sili, ua mafai nei ona maua le ata O Molimau a le Lafu e Tasi ma le Leoleo Mamoe e Tasi i le DVD e ala i faletusi a le Ekalesia.

O Molimau a le Lafu e Tasi ma le Leoleo Mamoe e Tasi o se tala mataina e faaalia ai le galuega a Keriso i tagata o Isaraelu anamua, sosoo ai ma Lona faaali atu i Amerika i ona po nei, e pei ona faamatalaina i molimau e lua: o le Tusi Paia ma le Tusi a Mamona. E mulimuli atu i le aiga faafoliga o Helama a o latou molimauina faailoga ma le afio mai o le Faaola i Amerika.

Ina ua faatoa faalauiloa mai le ata, na faamatala mai Elder Neil L. Andersen o le Au Fitugafulu e faapea, “O le faamoemoega o le ata ina ia faamautuina o Iesu o le Alo o le Atua, ‘o le malamalama ma le ola o le lalolagi,’ ma faaali mai ai aafiaga ofoofogia o le Faaola i olaga o i latou o e talitonu ia te Ia.”

E silia i le lua tausaga na faia ai le ata ma sa manaomia ai ni sailiiliga tetele i aganuu anamua a Amerika. Na pueina i Iuta, Kalefonia, ma Hawaii i ni nofoaga se 57, o le vaega aupito tele e tusa lona tele ma se malae lakapi. O tagata autu e toa 48, ma le 52 tagata na faaalia ai, ma le silia i le 1,000 le au faaopoopo na faatinoina le tala. O le Faili i le Lotoa i le Malumalu ma le Aufaipese a le Tapeneko na saunia musika.

O le ata e 65 minute (aitema numera 01607) ua faaavanoaina atu i se DVD o gagana eseese i faletusi a le Ekalesia i le lalolagi atoa i gagana e 18 (Gagana Amerika e Fai i Taga, Kenitonisia, Tanisi, Take, Igilisi, Finelani, Farani, Siamani, Italia, Iapani, Korea, Maneterini, Nouei, Potukale, Rusia, Sipaniolo, Suetena, ma Iukureini).