E fanauraa arii to outou
E nehenehe outou e haapii no ni‘a i to outou oraraa e i ta outou misioni i te fenua nei na roto i te faaineineraa ia farii e ia haapii no ni‘a i to outou haamaitairaa patereareha.
I teie matahiti i ma‘iri a‘e nei, ua ite au i te maramarama o te Atua i te anaanaraa i ni‘a i te mau mata o te feia apî tamahine i roto i te mau putuputuraa rahi mai Paratira mai e tae atu i roto i te Hau Repubilita no Dominika. Ua ite au i te reira a ume ai outou i te mau pereoo puto na ni‘a i te mau e‘a o te mau pionie. Ua ite au i to outou maramarama a himene ai au e a ha‘uti ai au i te mau ha‘uti i roto i to outou mau puhaparaa. Ua ite au i taua maramarama ra i te anaanaraa i ni‘a i te mau mata o te mau tamahine i roto i mau piha bapetizoraa mai Mehiko mai e tae atu i Utaha. Te haamana‘o nei au i taua maramarama ra o ta outou e hopo‘ipo‘i nei. Ia‘u nei, ua riro to outou maramarama ei mea taa ê-roa no te mau taata e rave rahi. Te vai nei to outou maramarama no te mea e mau tamahine varua mau outou na tei Teitei roa, « ei mau huaai na te hoê na metua tei faateiteihia »1 ei natura no te Atua e te hoê faataaraa mure ore.2 Ua farii outou i ta outou mau haapiiraa matamua i roto i te ao o te mau varua mai ô mai i to outou mau metua i te ra‘i ra.3 Ua tonohia mai outou i te ao nei ia « tamatahia ».4
Tei roto outou i te hoê tau o to outou oraraa e rave ai outou i ta outou mau opuaraa faufaa roa. No te mea ua haaatihia outou e te mau parau poro‘i tano-ore mai teie i muri nei, no hea mai outou, titauhia ia outou ia imi i te hoê atu â arata‘iraa. E nehenehe outou e haapii no ni‘a i to outou oraraa e i ta outou misioni i te fenua nei na roto i te faaineineraa ia farii e ia haapii no ni‘a i to outou haamaitairaa patereareha.
E ere outou i te mea apî roa no te haamata i te haapii no ni‘a i to outou haamaitairaa patereareha.5 Te oaoa nei au e ua farii au i to‘u haamaitairaa hou vau a faauruhia‘i e te mau poro‘i nane e te hape o te ao nei. Ua ‘ape au i teie mau iteraa na roto i te hoê haapapûraa e, ua here e ua ite te Fatu ia‘u, e mai te reira mai taime, ua haamata vau i te feruri pinepine i te mau parau no te mure ore i te tuiroo o te taata nei.
Teie te taime tano mau no te feia apî tamahine ia faaineine no te faarii i to outou haamaitairaa patereareha. E tauturu to outou episekopo e to outou mau metua ia outou ia haamau i te taime e tano no te mea e mea taa ê te matahiti e te ineineraa to te tahi i to te tahi.6 Ia maramarama outou i te auraa e i te tumu mau o te hoê haamaitairaa patereareha, e ua tupu te hoê hiaai mau i te rave i te ohipa a te Fatu, ua paari ïa outou no te fariiraa i to outou haamaitairaa.7 I te tahi mau taime, e tia‘i maoro roa vetahi no te haereraa e tii i to ratou haamaitairaa, no te mea, e mana‘o ratou e, titauhia paha ratou ia faataahia no te reira na roto i te hoê rave‘a taa ê. Ia faataahia outou no te farii i e hoê parau faati‘a no te rave i te mau bapetizoraa i roto i te hiero, e nehenehe ïa outou e faataahia no te hoê haamaitairaa patereareha. E mea faufaa ia faaineine no to outou haamaitairaa na roto i te haapaeraa e i te pureraa ia haehaa e ia haapiihia to outou varua. E mea faufaa ta outou iho faaineineraa.
Ia farii outou i to outou haamaitairaa, e nehenehe outou e ite atu i te hoê tuhaa o te mure ore. E haamata ïa outou i te ite i te hoê hoho‘a no te mau mea e vaira i mua ia outou no te mea, e faahiti to outou haamaitairaa i to outou mau tumu mure ore e i to outou oraraa. Eita te patereareha o te horo‘a ra i to outou haamaitairaa e ite i to outou haamaitairaa e tae roa‘tu i te taime oia a horo‘a‘i i te reira. E ti‘aturi oia i te Varua no te faaite ia‘na i te mau mea e ti‘a ia parau. I roto i to outou haamaitairaa, e faaitehia ia outou to outou tupuna i roto i te utuafare o Iseraela. To outou reni fetii e parauhia i te tahi taime te hoê opu. E ho‘i ti‘a te taatoaraa o te mau opu i te patereareha rahi ra ia Aberahama. E mea faufaa to outou reni fetii. To‘na auraa ra, e o atoa ïa outou i te mau fafauraa tei horo‘ahia ia Aberahama e na roto ia‘na e haamaitaihia‘i te mau nunaa atoa o te ao nei.8
To outou reni fetii o te « auraa toto ïa ».9 O te faariro ia outou ei mau « tamarii mau na te mau peropheta »10 e te hoê fanauraa arii. I parau pinepine ai matou ia outou e e feia apî outou no te fanauraa arii11 e no te hoê « autahu‘a arii, e e u‘i ma‘itihia ».12
Ua parau mai to‘u hoa e : « I to‘u tomoraa i roto i te Ekalesia i te 16 raa o to‘u matahiti, haamata ihora vau i te haapii no ni‘a i to‘u ihotumu. Ua farii au i to‘u haamaitairaa patereareha e ua parauhia ia‘u e no roto mai au i te opu o Iseraela. Aita vau i ite i te auraa no taua parau ra i taua taime ra area râ, i te mau matahiti i muri mai, ua haapii mai au e, ua fana‘o vau i te riroraa ei huaai no te mau peropheta. E faufaa ai‘a faaieie roa to‘u e te mau rave‘a hau atu i te maitai ».
Mai ia Aberahama, e imi outou i te hoê haamaitairaa ia roaa ia outou te ite rahi a‘e e ia farii i te mau haapiiraa no ô mai i te Fatu.13 Ia farii outou i to outou haamaitairaa, e ite outou e ua ite te Fatu ia outou na to outou i‘oa. I te mau matahiti matamua o te Ekalesia, rave rahi mau taata tei haere e ani ia Iosepha Semita ia ani i te Fatu i te arata‘i taa ê no to ratou oraraa. Ua riro teie mau heheuraa ei tuhaa no Te Parau Haapiiraa e te Mau Parau Fafau. Oia atoa mai te mau Feia Mo‘a matamua, e nehenehe outou e faariro i to outou haamaitairaa patereareha ei « papa‘iraa mo‘a »14 na outou iho. E mea ti‘a ia tape‘a noa i te reira ei mea mo‘a e eiaha e faaitehia i rapae i to outou iho opu fetii.15
E nehenehe te patereareha e faaite i te tupuraa e i te mau huru o to outou oraraa e e nehenehe e horo‘a i te hoê haamaitairaa tei taatihia i te reira. Mai ta te hoê tamahine apî i faaite ia‘u, « Te vaira te mau mea i parauhia no‘u i roto i to‘u haamaitairaa aita roa‘tu to‘u na metua i ite ». Ua parau te peresideni James E. Faust e, e mea faauruhia te mau haamaitairaa patereareha tata‘i tahi, e mau « heheuraa no te taata iho no ô mai i te Atua ». E au te reira mai te hoê feti‘a ia pee, te hoê tutau no to tatou varua. E heheu mai te reira i to tatou mau ite e to tatou paari.16
Ua parau te peresideni Boyd K. Packer e, ua riro to tatou mau haamaitairaa mai te hoê « paratarafa o te buka o to [tatou] mau ti‘araa ».17 Ua topa te peresideni Thomas S. Monson i to tatou haamaitairaa « te Liahona no te maramarama ».18
No te mea e ere te hoê haamaitairaa patereareha i te hoê parau tohu no te taatoaraa o te mau mea e tupu i roto i te oraraa o te hoê taata, e mea ti‘a râ ia tatou ia imi e ia pee i te arata‘iraa a te Varua Maitai no te farii i te iteraa hau atu no to tatou tere i te oraraa nei. Ua riro te mau haapiiraa o te evanelia ei arata‘i i te hoê iteraa rahi atu o to tatou faataaraa e ta tatou mau manuïaraa. Mai teie te huru, eita paha te hoê haamaitairaa patereareha e faaite e e faaipoipo e aore râ, e fanau te hoê area râ, ua haapiihia tatou i roto i te evanelia ia faaipoipo i roto i te hiero e ia fanau i te tamarii. E nehenehe tatou e pee i teie mau haapiiraa a te evanelia no tatou iho, ma te faahiti ore i te hoê haere‘a.
I to‘u haereraa i te haapiiraa tuarua, ua parau mai te hoê auvaha no te mau opuaraa no te ohipa ia‘u e, aita roa oia i mana‘o e e riro vau ei piahi maitai roa i te fare haapiiraa. I muri mai râ i to‘u pureraa e i to‘u tai‘oraa i to‘u haamaitairaa patereareha, ua feruri au eiaha e faru‘e i ta‘u mau opuaraa. No reira, no te mea te vaira to‘u ite i roto i te opuaraa a te Fatu no‘u, ua nehenehe ia‘u ia haere i mua ma te papû. Ite ihora vau e e manuïa vau, e ua roaa ia‘u te hoê parau tu‘ite no te fare haapiiraa tuatoru. Ia ite ana‘e tatou e o vaira tatou e eaha te mea o ta tatou e rave, e mea ohie a‘e ia rave i te mau opuaraa faufaa no ni‘a i te haapiiraa, te huru o te ohipa e te hoê faaipoiporaa. E mea ohie a‘e ia faaite i te anaana o to tatou maramarama i roto i te utuafare, i te mau hoa e i roto i te tahi atu mau vahi.
Teie ta te Fatu i parau : « Amene, amene, e parau atu vau ia outou, ua faariro vau ia outou ei maramarama no teie nei feia. E oire i faati‘ahia i ni‘a i te mou‘a ra, eita ïa e moe.
« Inaha, e tutu‘i anei te taata nei i te lamepa a tuu ai i raro a‘e i te farii ? Aita, ei ni‘a râ i te vairaa ra ia maramarama to te fare atoa ra ;
« Oia atoa to outou maramarama, ia anaana ïa i mua i te aro o te taata nei, ia hi‘o ratou i ta outou ohipa maitai, e ia haamaitai i to outou Metua i te ao ra ».19
Ia ite outou e o vaira outou e eaha te mea o ta outou e rave nei i roto i to outou oraraa, eita ïa outou e hinaaro i te huna i to outou maramarama.
Mai teie te huru, eita outou e hinaaro e « huna i to outou maramarama » na roto i te ahuraa i te mau ahu o te faaiti i to outou paari. Eita outou e parau i te mau parau ti‘a-ore e aore râ, i te tahi mau aamu e aore râ, e haapa‘o-ore i to outou tino i te mau nana‘oraa e aore râ, i te tahi atu mau ohipa no te faaino i te hoê tamahine no te fanauraa arii. Eita outou e faatura-ore i to outou fanauraa arii na roto i te afa‘iraa i te mau mea au-ore i roto i to outou tino o te haamauiui e aore râ, o te faataero ia outou. Eita atoa outou e mata‘ita‘i e aore râ, e amui atu i roto i te mau mea arioi o te faahaehaa i to outou ti‘araaa hanahana. E imi ïa outou i te mau mea maitai, te mau mea faahiahia, te mau mea roo maitai, e te mau mea popouhia20 no te mea ua ite outou e e mau tamarii outou na te mau peropheta e e ai‘a hanahana to outou.
E mau tamarii faufaa outou no te fafauraa. Mai te mea e tape‘a outou i te mau faaueraa e i te mau ture a te Fatu e faaroo i To‘na reo, e fafau mai ïa Oia e, e faateiteihia outou i ni‘a a‘e i te mau fenua atoa i te i‘oa e i te haamaitairaa e i te roo e i te tura.21 E faaurû ïa to outou mau haamaitairaa patereareha ia outou ia rave i te mau tauiraa i roto i to outou oraraa mai te mea e titauhia mai te reira. E farii outou i te mau haamaitairaa tei fafauhia i reira na roto noa i to outou faaroo. Mai te mea aita o outou e faaroo, eita ïa e tupu to outou haamaitairaa.
I te tahi mau taime, e mana‘o te feia apî tamahine e no te mea ua rave ratou i te mau hape, aita ïa ratou i ti‘âma no te farii i te hoê haamaitairaa patereareha e aore râ, e tape‘ahia to ratou mau haamaitairaa tei horo‘a-a‘e-na-hia ia ratou. Te haapiiraa tumu a te Fatu o Iesu Mesia o te faaroo ïa Ia‘na e i To‘na mana no te faaore i ta tatou mau hara. « Te hinaaro nei Satane ia ti‘aturi outou e, eita outou e nehenehe e tatarahapa tera râ, eita roa‘tu te reira i te parau mau ».22 Ia rave tatou i te oro‘a i te mau hebedoma atoa, te fafau ra ïa tatou i te taui i to tatou oraraa ia maitai a‘e. E mea ti‘a ia tatou ia tamata ia riro ei taata apî mai te huru o te Mesia ra. Ua pii te Aposetolo Paulo i te reira oia « te haere e au i te ora apî ».23 E au te tatarahapa mai te hoê horoi parau, e e nehenehe te reira e horoi i te mau inita tamau ! Eita i te mea ohie area râ, e nehenehe.24 Teie te parau a te Fatu : « Inaha, o oia o tei tatarahapa i ta‘na ra mau hara, ua faaorehia ïa te reira, e e ore ho‘i au, o te Fatu e haamana‘o faahou â i te reira ».25
E te feia apî tamahine e, e tauturu to outou haamaitairaa patereareha ia ite e fanauraa arii to outou. Ia paari rii a‘e outou, e ite outou i te tupuraa o te mau tohuraa o to outou haamaitairaa patereareha i roto i to outou oraraa. Te vai nei te mau ohipa faufaa e te anaanatae e vaira i te Fatu na outou ia rave. E taime teie no outou ia « ti‘a mai na i ni‘a e ia anaana mai na, ia riro to [outou] maramarama ei hi‘oraa no te mau nunaa ».26 « Oia atoa to outou maramarama, ia anaana ïa i mua i te aro o te taata nei, ia hi‘o ratou i ta outou ohipa maitai, e ia haamaitai i to outou Metua i te ao ra »27, na roto i te i‘oa o Iesu Mesia, amene.