Ia farerei faahou tatou
E ti‘a anei ia tatou ia haamana‘o e ia faaite tamau noa i roto i to tatou oraraa i te a‘oraa tei fariihia e tatou.
Te tahi noa parau iti opaniraa, e au mau taea‘e e au mau tuahine, no te opani i teie amuiraa rahi. E mea nehenehe roa te mau himene, e mea faauruhia te mau pure, e ua putapû to tatou aau i te mau a‘oraa e te mau iteraa papû, e ua faateitei ho‘i te reira i to tatou varua, e ua haapapû i to tatou faaroo.
I teie nei, ia ho‘i atu tatou i to tatou mau nohoraa e i roto i ta tatou mau ohipa, e ti‘a anei ia tatou ia haamana‘o e ia faaite tamau noa i te a‘oraa tei fariihia e tatou. Ia vai paari noa tatou i mua i te mau faahemaraa a te enemi. Eiaha ta tatou mau haaraa i roto i ta tatou mau hopoi‘a e rave rahi no te Ekalesia ia riro ei mea teimaha, ia horo‘a mai râ te reira i te oaoa e te mauruuru. Ia ora tatou ei mau tane e ei mau vahine faaipoipo, ei mau metua, e ei mau tamarii, ma te here e te maitai e te faatura i te tahi e te tahi.
Ia haamaitai mai te Atua ia outou, e au mau taea‘e e au mau tuahine here. Te vaiiho atu nei au i to‘u here e to‘u iteraa papû e ta‘u haamaitairaa i ni‘a ia outou, e te pure nei au ia parahi noa mai te Fatu i piha‘i iho ia tatou tata‘i tahi e tae noa‘tu i te mahana e farerei faahou ai tatou. Ia vai mai te mau haamaitairaa o te ra‘i i ni‘a iho ia outou, ta‘u ïa pure haehaa na roto i te i‘oa mo‘a e te mana o Iesu Mesia ra, amene.